Klubi i bardhë ka zyrtarizuar vazhdimësinë e kroatit dhe në këtë mënyrë shmang lamtumirën e dhimbshme të dyfishtë të dy lojtarëve që kanë mbretëruar në mesfushën e Realit në dekadën e fundit, Modriç dhe Toni Kros. Kroati do të luajë në këtë mënyrë sezonin e tij të trembëdhjetë me të bardhët, pasi mbërriti në verën e vitit 2012 nën drejtimin e Murinjos. Marrëveshja mes vetë Luka Modriç dhe Florentino Perez u finalizua pas paraqitjes së mirë të lojtarit në pjesën e fundit të sezonit.
REKORDET – Luka Modriç ka sfiduar këdo, duke zgjedhur të luajë për Realin në moshën 39 vjeç. Dhe natyrisht me ambicie për të tjera suksese. Me “konsumimin” e rinovimit të tij me “Los blancos”, prapa skenës qëndrojnë të tjera rekorde. Kur Modriç do të luajë një ndeshje zyrtare pas 16 tetorit, ai do të jetë futbollisti më i moshuar që ka luajtur një ndeshje si lojtar i Realit të Madridit.
Rekordi mbahet nga Pushkash, 39 vjeç e 36 ditë, kur luajti ndeshjen e fundit si madrilen në ndeshjen e parë çerekfinale të Kupës kundër Betisit (8 maj 1966). Është rekordi më i lehtë për t’u arritur për Modriç, por jo i vetmi. Me 26 trofe të fituar me Realin ai është së bashku me Naçon lojtari më i suksesshëm. Por me Naçon të larguar, kroati ka shansin të bëhet më i suksesshmi. Provimi i parë është Atalanta në Superkupën e Europës. Me Botërorin e ri të klubeve, Modriç do të kërkojë 7 trofe brenda një sezoni që do të ishte një rekord absolut.
