Trajneri gjerman Thomas Tuchel e grumbulloi skuadrën e Paris Saint-Germainit për ta qartësuar situatën pas zënkës së fundjavës me Kylian Mbappen, por ky i fundit s’pranoi t’i kërkojë falje trajnerit.
Përkundër që ky sezon ka qenë shembullor për Paris Saint-Germainin në fushën e lojës – PSG-ja është në krye të tabelës së Ligue 1 dhe ka kaluar në 1/8 e finales së Ligës së Kampionëve – situata në Parc des Princes nuk ka qenë e qetë.
Pas probleme të shkaktuara nga Neymari në skuadër, tani problematiku është bërë Kylian Mbappe, i cili i reagoi me zemërim trajnerit Thomas Tuchel, pasi ky i fundit e zëvendësoi atë në ndeshjen e së shtunës në Ligue 1 kundër Montpellier.
Trajnerit gjerman tani i janë grumbulluar disa probleme, pasi që Edinson Cavani është i zemëruar që s’iu lejua transferimi në Atletico Madrid, përderisa Neymari u lëndua para ndeshjes kundër Nantes, pas festimeve të tij për ditëlindje që morën shumë vëmendje.
Trajneri i pranoi këto probleme në konferencën e tij për shtyp para ndeshjes kundër Nantes dhe tregoi se e kishte mbajtur një takim me skuadër për ta qartësuar situatën, në mënyrë që të mos u ndihmojë mediave të shtohen spekulimet.
Gjatë takimin, Kylian Mbappe nuk i kërkoi falje trajnerit gjerman, mirëpo e pranoi se reagoi më ashpër sesa ishte dashur dhe shtoi se reagimi i tij s’ishte kundër Edinson Cavanit ose Mauro Icardit, që po prisnin për të hyrë në ndeshje.
Në anën tjetër, drejtori sportiv Leonardo nuk dëshiroi ta komentojë më tutje këtë çështje, pasi që vlerësoi se situatat e tilla janë normale në klubet e mëdha, pasi që secili lojtar dëshiron të luajë sa më shumë.
Zbulohet plani i Real Madridit për Kylian Mbappe
Bordi drejtues i Real Madridit ka vendosur për një strategji, me të cilën shpresojnë se ta sgiurojnë transferimin e Kylian Mbappes nga Paris Saint-Germaini në verën e vitit 2021.
Florentino Perez e ka bërë një plan të detajuar, i cili, nëse ka sukses, do ta sjellë Kylian Mbappen në Real Madrid gjatë verës së vitit 2021. Ardhja potenciale e 21-vjeçarit nga PSG-ja në Bernabeu është spekuluar që një kohë të gjatë, mirëpo drejtuesit e Los Blancos nuk duan të dorëzohen as tani.
Mbappes do t’i mbetet vetëm edhe një vit në kontratën e tij këtë verë dhe PSG-ja do të duhet ta shesë atë këtë verë nëse duan të përfitojnë para nga shitja e tij, ose ta lënë të largohet falas në verën e vitit 2022, kur i skadon kontrata.
Detyra e parë e Real Madridit do të jetë të sigurohet se është në kontakt jo të drejtpërdrejtë me rrethin e afërt të futbollistit, për ta bindur këtë të fundit të mos e rinovojë kontratën me PSG-në.
Nëse Mbappen nënshkruan kontratë të re në Parc des Princes, transferimi i tij do të bëhej financiarisht i pamundur për madrilenët. Mirëpo, nëse ai nuk nënshkruan, Real Madridi do të ketë mundësi ta nënshkruajë lojtarin.
Kjo është një strategji e ngjashme me atë që Real Madridi e kishte përdorur për t’i siguruar shërbimet e Eden Hazardit, i cili në fund u transferuar për rreth 100 milionë euro.
Në favorin e Real Madridit shkon edhe zënka e fundit e Mbappes me trajnerin Thomas Tuchel, e cila ndodhi gjatë fitores të së shtunës në Ligue 1 kundër Montpellier shkaku se francezit s’i pëlqeu vendimi i trajnerit për ta zëvendësuar.
