Pas medias gjermane “Bild”, e cila kishte kritika të forta për qeveritarët shqiptarë, mediat e Holandës kanë shkruar për trafikun e drogës që bëhet nga Shqipëria drejt vendit të “tulipanëve”. Media holandeze “Limburg” e nis shkrimin me arrestimin e 4 shqiptarëve të martën, tre burrave dhe një gruaje, në një aksion të madh policor kundër trafikut të lëndëve narkotike dhe kryesisht goditjes së mafies shqiptare.
“Policia arrestoi tre burra dhe një grua të martën në një aksion të madh kundër një bande shqiptare të drogës. Policia dhe njerëz të drejtësisë kanë pushtuar dhjetëra ndërtesa, kryesisht në zonën e Sittard dhe Geleen.
Të dyshuarit e arrestuar janë dy burra 40-vjeçarë me origjinë marokene, një burrë shqiptar (34 vjeç) dhe një grua 36-vjeçare. Shumica e të dyshuarve në këtë rast janë vendosur në Geleen. Kishte gjithashtu disa bastisje të martën nga policia. Agjentët arrestuan një belg, një maroken dhe një grua që po tentonte të shkonte duke mbartur drogë nga Belgjika në Gjermani”, thuhet në shkrim.
Madje, operacioni i drogës u quajtur “Shqipëria”. Në artikull shkruhet se me dhjetëra shqiptarë që jetojnë në Holandë kanë si aktivitet të tyrin trafikun e drogës. Shqiptarët duket se kanë përdorur një kompani që merret me transport për të paguar qiratë, në mënyrë që të mos zbuloheshin nga policia.
Sipas mediave holandeze, një kompani në Groenstraat në Geleen, u ka paguar qiranë shqiptarëve. Pikërisht kjo kompani dyshohet se bën edhe transportin e parave nga Holanda drejt Gjermanisë ose Belgjikës, pasi ka qendra në këto shtete.
Mediat holandeze flasin gjithmonë e më shumë për grupime shqiptarësh, të cilët ikin në këtë vend ekskluzivisht për t’u marrë me drogë. Në artikull thuhet se në rastet te goditjes së bandave të drogës, rezulton se anëtarë të tyre janë kryesisht shqiptarët, ç’ka nënkupton se pikërisht shqiptarët kanë në dorë këtë treg ilegal trafiku, që ka fitime marramendëse.
Kujtojmë se disa ditë më parë, gazetari gjerman Peter Tiede shkroi një artikull fshikullues ndaj Shqipërisë, duke thënë se vendi ynë ka në krye banditë dhe kriminelë. Tiede në prononcimet për mediat mbrojti ato që kishte shkruar, duke thënë se ka qenë vetë në Shqipëri dhe ka biseduar me të intervistuarit në artikull.
“Balkanweb”
