Kancelari gjerman Friedrich Merz ka vlerësuar maksimalisht takimin me presidentin amerikan Donald Trump, i cili u zhvillua në Shtëpinë e Bardhë, duke e cilësuar atë si “jashtëzakonisht të frytshëm”.
Në deklaratën për mediat pas takimit, Merz tha se bisedimet kishin qenë konstruktive dhe kishin vendosur themelet për një bashkëpunim të ngushtë në prag të samitit të G7 dhe atij të NATO-s.
“Po largohem me ndjesinë se gjeta te presidenti amerikan një bashkëbisedues me të cilin mund të komunikoj shumë mirë në nivel personal,” deklaroi ai, duke nënvizuar rëndësinë e dialogut të drejtpërdrejtë mes dy udhëheqësve.
Merz theksoi gjithashtu se, pavarësisht ndryshimeve në karrierat dhe rrugët politike, ai dhe Trump gjetën pika të përbashkëta që krijojnë, sipas tij, një lidhje të veçantë: “Kemi mjaft gjëra të përbashkëta, edhe pse karrierat tona janë të ndryshme. Kjo lind një mirëkuptim të ndërsjellë.”
Takimi mes dy liderëve vjen në një kohë sfidash të mëdha ndërkombëtare, përfshirë luftën në Ukrainë dhe sfidat në politikën globale të sigurisë, ndërsa pritet që koordinimi SHBA-Gjermani të jetë kyç për qëndrueshmërinë në NATO dhe rendin ndërkombëtar.
