Para takimit vendimtar mes Real Madridit dhe Barcelonës të mërkurën, Lionel Messi i ka komentuar një numër të problemeve të ngritura në botën e futbollit, përfshirë këtu pse Barcelona duket se luan më mirë kundër Real Madridit në Santiago Bernabeu.
Top dy skuadrat e La Ligës do të përballen në stadiumin Camp Nou në mesjavë. Barcelona e kryeson tabelën vetëm për shkak të dallimit në gola, pasi dy skuadrat i kanë grumbulluar nga 35 pikë nga 16 xhirot e para në sezonit 2019/20.
Barcelona u mbajt me barazim 2:2 në Anoeta nga Real Sociedadin në ndeshjen e fundit, ndërsa Real Madridi e humbi mundësinë për ta marrë kreun e tabelës kur u ndal me barazim 1:1 nga Valencia në Mestalla.
Kampionia në fuqi e Spanjës, Barcelona, e kishte fituar këtë përballje me Real Madridin me rezultat 5:1 sezonin e kaluar, duke e arritur kështu fitoren e parë në shtëpi kundër Los Blancos në katër tentimet e fundit.
Për dallim, Barcelona i regjistron katër fitore radhazi në ndeshjet e fundit në Santiago Bernabeu. Messi e ka pranuar se skuadra e Barcelonës arrin të gjejë më shumë hapësira kur luan si mysafire.
“Kur ne luajmë në Bernabeu, gjejmë shumë më shumë hapësira. Ata na sulmojnë neve më shumë sepse e kanë këtë obligim si skuadra vendase dhe njerëzit i ndëshkojnë ata për këtë gjë”, ka thënë Messi për Marcan.
“Në Camp Nou, ata luajnë më ndryshe, rrinë më shumë në mbrojtje dhe janë më afër njëri-tjetrit dhe na godasin me kundërsulme pasi që kanë lojtarë shumë të shpejtë në repartin e sulmit”.
“Në Bernabeu, ne i luajmë 90 minuta baras. Këtu ndeshja bëhet më e mbyllur dhe më e komplikuar”.
Një njeri që në të kaluarën kishte ndikim të madh në përballjet e El Clasicos ishte Cristiano Ronaldo , i cili i kaloi nëntë vjet në Real Madrid, para se t’i bashkohej Juventusit gjatë verës së vitit 2018.
I transferuari gjatë verës së këtij viti, Eden Hazardi, ishte pritur të jetë zëvendësuesi i Cristiano Ronaldos në skuadrën e Real Madridit, mirëpo ai s’ka arritur deri më tani t’i përmbushë ato kritere të krijuara për të nga tifozët.
“Hazardi ka shumë cilësi. Ai është një futbollist më ndryshe që mund t’ua prishë baraspeshën mbrojtësve, por unë mendoj se ai është ndryshe nga Cristiano, ka karakteristika të tjera”, tha Messi.
“Është shumë e vështirë të zëvendësohet Cristiano, por Hazardi është një lojtar i mrekullueshëm” tha më tej Messi.
Messi është ne mesin e një numri të futbollistëve me më përvojë në skuadrën e Barcelonës që po pushohet në disa ndeshje nga trajneri Ernesto Valverde, ashtu siç po ndodh edhe me Sergio Busquetsin, Ivan Rakiticin e Gerard Piquen.
Gjashtë-herë fituesi i Topit të Artë e vazhdoi këtë intervistë duke e diskutuar mënyrën se si Ernesto Valverde e zgjedh formacionin e parë, duke e vlerësues si të nevojshme për t’i mbajtur të gjithë lojtarët të motivuar.
“Në fakt, unë mendoj se të gjithë jemi shumë të rëndësishëm. Ka disa raste kur i vjen radha dikujt tjetër për të luajtur dhe ti duhet ta pranosh në mënyrën më të mirë të mundshme, të jesh i vetëdijshëm se të gjithë në zhveshtore duhet të ndihen të rëndësishëm sepse kemi nevojë që të gjithë të jenë të motivuar për t’i arritur synimet tona”.
