Virgil van Dijk synon t’i eklipsojë yjet botërorë Cristiano Ronaldo dhe Lionel Messi për ta fituar çmimin Lojtari më i Mirë i FIFA-s për vitin 2019, pasi vlerësohet si favorit për ta rrëmbyer këtë çmim sot në Milano.
Van Dijk, Messi dhe Ronaldo janë tre finalistët për çmimin Lojtari më i Mirë i FIFA-s, dhe fituesi do të shpallet sot në mbrëmje në një ceremoni në Milano.
Qendërmbrojtësi shtatlartë holandez i ndihmoi Liverpoolit ta fitojë Ligën e Kampionëve sezonin e kaluar dhe muajin e kaluar e fitoi çmimin Lojtari më i Mirë i UEFA-s për vitin 2019.
Që prej se ky çmim u krijuar më 2016, fituesi i tij e ka fituar edhe Topin e Artë, i cili do të ndahet më 2 dhjetor.
Vitin e kaluar, mesfushori i Real Madridit, Luka Modriç, i fitoi këto dy çmime duke i dhënë fund dominimit 10-vjeçar të Messit dhe Ronaldos.
