Analisti Fitim Zekthi ka komentuar hakerimin e e-maileve të SPAK në emisionin “Open” në News24, duke e cilësuar ngjarjen si shumë të rëndë dhe me pasoja të mëdha për sigurinë e institucioneve të drejtësisë në Shqipëri. Ai theksoi se SPAK është një nga institucionet më të rëndësishme të vendit dhe duhet të mbështetet nga qeveria në këto raste, duke shtuar se është e papranueshme që ky sulm të kalojë pa një mbështetje të fuqishme ndaj strukturës.
Zekthi nënvizoi se, megjithëse ngjarja është serioze, mund të ketë një pasojë të vogël në aspektin operacional, për shkak të ekspertizës të lartë që ka SPAK në fushën e krimit kibernetik. Ai e konsideron të vështirë për ‘ta kapur’ SPAK-un në informacionet e klasifikuara, duke sugjeruar se ky sulm mund të jetë pasojë e interesave të fuqishme që tentojnë ta shantazhojnë këtë strukturë të Posaçme.
Zekthi nuk beson se ky sulm ka ardhur nga dy individë kuriozë, dhe se ka më shumë mundësi që të ketë një grup të strukturuar me interesa të mëdha që kërkon të dëmtojë punën e SPAK.
Fitim Zekthi: Ngjarja është shumë e rëndë. SPAK është ndër institucionet më të rëndësishme. Qeveria duhet të kishte thënë se jemi në anën e SPAK. Ngjarja është tepër e rëndë, por ndoshta pasoja është zero. SPAK ka ekspertizë ka tepër të kualifikuar ndaj krimit kibernetik dhe është shumë e vështirë për të kapur SPAK-un tek informacioni i klasifikuar. Kjo tregon se në Shqipëri ka pushtet tepër të madh, ka interesa gjigande në lojë dhe përpiqen ta shantazhojnë SPAK-un. Unë s’besoj se ngjarja ka protagonistë dy njerëzve kuriozë, nuk besoj se është kjo tezë.
