Pedagogia Klodeta Dibra, diskutoi zbrazjen e universiteteve, duke theksuar se rreth 40% e kuotave në universitetet publike janë bosh, ndërsa numri i studentëve vazhdon të ulet. Ajo e përshkroi situatën e krijuar në arsimin e lartë si një shkak-pasojë, duke theksuar se më e dhimbshme se kuotat bosh është largimi i maturantëve të shkëlqyer, i cili ka kontribuar në rënien e cilësisë së studentëve.
“Arsimi është një shkak-pasojë. Kjo është një bjerrje që ka filluar para shumë kohësh. Tani mesatarja më e lartë është 8.2. Kjo tkurrje ndihet më shumë në Universitetin e Tiranës, ku në fillim iu hoqën disa fakultete dhe u tkurr.
Duke mos thënë të vërtetën, ne kemi arritur në këtë situatë. Nuk e di sa mund ta kapim këtë situatë në dorë dhe ta ndryshojmë. Ndryshimi nuk mund të ndodhë sot për nesër; gjatë 15-20 viteve të fundit, ne kemi gatuar këtë çorbën që po hamë sot. Ajo që më shqetëson është cilësia, sepse kur na ikin maturantët, ikin maturantët më të mirë,” tha Dibra.
