PSG-ja është bashkuar me Chelsea në listën e klubeve që mendojnë për Luis Enrique Martinez, ish-trajnerin e Barcelonës, për të zëvendësuar Unai Emery në sezonin e ardhshëm. Bashkëpunëtori i “SPORT.es”, Emilio Pérez de Rozas, tashmë është vënë në rrugën e duhur, në fillim të shkurtit, me një artikull në “El Periódico de Catalunya”. Luis Enrique u fotografua në një fluturim me “Qatar Airways” në Doha, ku ndodhet rezidenca e Nasser al-Khelaifi, presidentit të PSG-së.
Alternativat e Emery
Realiteti është se PSG-ja po kërkon një alternativë për Unai Emery, përpara sezonit të ardhshëm. Trajneri bask, pavarësisht sukseseve të brendshme, nuk ka arritur suksesin e dëshiruar në Ligën e Kampionëve. Sezonin e kaluar, Barça do ta poshtëronte skuadrën parisiene me një përmbysje historike (6-1) që la në hije fitoren 4-0 të francezëve në ndeshjen e parë. Neymar ishte një nga heronjtë e blaugranëve në atë përmbysje, por Luis Enrique ishte trajneri i katalanasve. Në këtë sezon, Real Madridi është kthyer në realitet ndaj kampionit francez, dominues në sfidën e parë të 1/8 finale të Ligës së Kampionëve, duke fituar 3-1 në “Santiago Bernabéu”. Natyrisht, çështja e kualifikimit është ende në ajër, por pronarët e PSG-së nuk janë të kënaqur me punën e trajnerit të tyre, ndaj kanë nisur të shohin alternativa të tjera.
Zizou… dhe Lucho
Zinedine Zidane është, po ashtu, një nga kandidatët për trajner të PSG-së, në rast se francezi vendos të mos vazhdojë në stolin e Real Madridit. Ka patur tashmë biseda me “Zizou”, por një vendim nuk është marrë ende, 100 për qind. Fakti është se PSG-ja dëshiron një teknik të ri, i cili, përveç të pasurit një mentalitet fitues, ofron një frymë shërbimi të patëmetë. Dhe Zidane mund ta bëjë këtë, sepse jo më kot ka fituar dy Champions radhazi me “Los Blancos”. Gjithashtu, Luis Enrique ka udhëhequr një garë të patëmetë në drejtim të Barcelonës, duke fituar 9 nga 14 titujt e mundshëm, duke përfshirë edhe Ligën e Kampionëve, aq shumë të lakmuar.
Faktori “Neymar dhe Alves”
Në vendimin përfundimtar të PSG-së do të ketë shumë hapësirë për të dhënë mendimin e tyre disa prej “peshave të rënda”, që tashmë kanë qenë nën urdhrat e Luis Enrique, si Neymar dhe Dani Alves. Me të parin, ai mbante një marrëdhënie të mirë, megjithëse duhet të mbahet mend se në sezonin e fundit të “Lucho”, Neymar kishte një përplasje serioze me Juan Carlos Unzué, pastaj trajner i dytë i ekipit katalanas. Në rastin e Dani Alves, Luis Enrique gjithmonë e ka mbrojtur rinovimin e brazilianit me Barçën dhe publikisht ankohej për largimin e tij te Juventusi me parametra zero, përpara se të përfundonte te PSG-ja.
Chelsea e dëshiron
Sa për Luis Enrique, “SPORT.es” tashmë shpjegon se Chelsea dëshiron ta ketë atë për projektin e vet afatgjatë. Edhe pse u sugjerua se Luis Enrique mund të jetë në krye të “Blues”, menjëherë, realiteti është se trajneri asturian donte ta fillonte projektin e tij në sezonin e ardhshëm. Përveç kësaj, Roman Abramovich dhe drejtuesit e Chelsea nuk duken të gatshëm të paguajnë 30 milionë euro, sa do të kushtonte shkarkimi i Antonio Conte në këtë kohë, madje duke u eliminuar nga Liga e Kampionëve, kundër Barcelonës. Prandaj, e ardhmja e Luis Enrique mund të përcaktohet në javët e ardhshme. Londër apo Paris? Chelsea apo PSG? Në çdo rast, dy klube më shumë se interesante janë në ndjekje të shërbimeve të tij.
