Këndi i lojërave “7-Xhuxhat”, i cili ndodhet ngjitur me ETC-në në rrugën e “Elbasanit”, do të prishet për t’i lënë vend ndërtimit të një kulle 30 katëshe. Leja për ndërtimin e kësaj kulle është dhënë nga Kryeministri Edi Rama edhe pse mbahet ende sekret-tashmë, mënyra e zakonshme e qeverisjes së Kryeministrit. Paradoksi i këtij zhvillimi është se propaganda zyrtare ka disa muaj që flet për përkushtimin e qeverisë dhe Bashkisë Tiranë për kënde lojërash për fëmijë: ndërkohë këndi më i madh i lojërave në qytet tashmë është viktima e radhës e babëzisë së pangopur të ndërtuesve dhe Kryeministrit Rama. Kryeministri Rama e kishte inauguruar me shumë bujë në vitin 2001 rindërtimin e këndit të lojërave 7-Xhuxhat, kur ishte kryebashkiak i Tiranës. Mania e Kryeministrit Rama për të ndërtuar kulla duket se nuk ndalet. Kjo kullë është vetëm njëra nga të paktën shtatë të tilla që kanë parashikuar të ndërtojnë në Tiranë Kryeministri Edi Rama dhe Kryebashkiaku Erion Veliaj.
Një kullë po ndërtohet përballë Fakultetit Ekonomik, një do të ndërtohet në trupin e stadiumit të ri kombëtar, një tjetër është planifikuar të ndërtohet në aneksin e stadiumit “Qemal Stafa”, një kullë në territorin e Gardës dhe dy të tjera në territorin ngjitur me Parkun të Liqenit. Këshilli Kombëtar i Territorit nën drejtimin e Ramës pritet që në mënyrë të fshehtë të miratojë projektin në fjalë. Në fakt flitet se, mbledhja është zhvilluar dy ditë parë, edhe pse nuk dihet rendi i ditës dhe as lejet që do të shqyrtohen, prej disa ditësh shumë zëra që qarkullojnë dhe dokumente pa burim të konfirmuara, pretendojnë se në këtë mbledhje do të miratohen disa ndërtime gjigante në Tiranë. Ndër projektet e përfolura se do të miratohet është një ndërtesë gjigante, mbi 30 katëshe, në vend të parkut të lojërave “Shtatë Xhuxhat” në fillim të rrugës së “Elbasanit”.
Përflitet se do të miratohet një tjetër ndërtim i madh në hapësirën e këndit të lojërave, në krah të Policisë Bashkiake, në zonën e ish-Parkut të Autobuzave në rrugën e “Kavajës”. Një tjetër ndërtim që mendohet se do të miratohet është në zonën e “Don Boskos”. Mungesa e plotë e transparencës dhe vendimmarrja në fshehtësi është tashmë standard me të cilën vepron qeveria në fushën e zhvillimit urban. Mbi të gjitha, duket se qeveria Rama ka braktisur krejtësisht ligjin, pasi vazhdimisht ajo po shqyrton dhe miraton leje ndërtimi pa studime të ndikimit në mjedis dhe pa zhvilluar konsulta me publikun. Një kullë po ndërtohet përballë Fakultetit Ekonomik. Me firmën e Ramës, në 9 shtator të vitit të kaluar është miratuar një leje ndërtimi pallati 13 katësh. Leja është dhënë në zonën përballë Fakultetit Ekonomik, në rrugën e “Elbasanit”, pikërisht në hyrjen e Parkut të Liqenit. Në një sipërfaqe të konsiderueshme, aktualisht parkim makinash, do të ndërtohet “Godinë banimi dhe shërbimesh, 2, 7 dhe 13 kate mbi tokë dhe 2 kate parkim nën tokë”. Në fund firma. “Kryetari i KKT, Edi Rama”.
Por kjo nuk është godina e vetme. Bashkë me këtë vendim, KKT ka miratuar edhe pesë leje të tjera ndërtimi në Tiranë, të cilat variojnë nga 4 kate, deri në 10 kate lartësi. Të gjitha godina banimi dhe shërbimesh. Të gjitha lejet e reja kanë firmën e vetë kryeministrit Rama. Betonizimi i Parkut të Liqenit ka nisur me parkun e lojërave për të vazhduar me ndërtimin e 4 kullave 25 katëshe. Në lojë janë interesa të biznesmenëve afër pushtetit. Oligarkët që do të ndërtojnë këto kulla do t’i ndajnë ato në pronësi edhe me Ramën, i cili është edhe ideatori dhe zbatuesi i këtij projekti. Këndi i lojërave është vetëm fillimi. Në këtë mënyrë, duke betonizuar një pjesë të këtij parku, gjoja për lojëra synohet që t’i hiqet statusi i “paprekshëm” këtij parku. Pas degradimit të këtij parku, në vend të tij do të ndërtohen kullat. Në planimetrinë e paraqitur ishte propozimi për hyrjen e Parkut të Liqenit, i cili ishte përgatitur të fitonte, por pasi pati protesta u detyruan përkohësisht t’ja japin një projekti tjetër dhe këtë e kaluan në vend të dytë. Megjithëse Veliaj si mashtrues ordiner që është, premtoi se nuk do të kishte beton në Park, por po të shkosh në Park sheh se muret e betonit janë lartësuar në mes të Parkut të Liqenit. Një kullë tjetër do të ndërtohet në trupin e stadiumit të ri kombëtar, një tjetër është planifikuar të ndërtohet në aneksin e stadiumit “Qemal Stafa”, një kullë në territorin e Gardës dhe dy të tjera në territorin ngjitur me Parkun të Liqenit.
