Fitorja 5-0 në fushën e Sëlltikut tregoi se sa mirë funksionon treshja sulmuese e PSG-së e përbërë nga Nejmar, Mbape dhe Kavani, të cilët gjetën rrjetën në këtë duel dhe dhanë spektakël në fushë. Por vetë Nejmar mendon se ky është vetëm fillimi, pasi lojtarët kanë pak kohë që luajnë së bashku dhe nuk njohin mirë njëri-tjetrin.
“Janë dy futbollistë të mëdhenj. Po njohim ende njëri-tjetrin. Kavani është një futbollist i shkëlqyer, Kilian është një talent. Kemi ende punë për të bërë, ata dhe unë, që të njohim më mirë njëri-tjetrin. Është e lehtë të luash përkrah lojtarësh inteligjentë, por na mungon ende sintonia”, tha ai në një intervistë për UEFA-n.
I ngacmuar se si ishte mirëkuptimi në krahasim me Mesin e Suarez, Nejmar pranoi se për momentin nuk mund të bëheshin krahasime me periudhën e artë kur luante për katalanasit dhe dominonin futbollin europian. “Mungon ende shumë që ne të merremi vesh vetëm me shikim apo me lëvizje”, tha ai.
Por sipas tij, PSG nuk ka vetëm tre lojtarë në repartin e avancuar, por shumë më tepër alternativa, me të cilat do të synojë fitoren e Ligës së Kampionëve, duke dhuruar një tjetër provë force në duelin e radhës, ndaj Bajern Mynih.
“Ne nuk kemi vetëm Kavani apo Kilian, kemi edhe Draksler, Lukas, Di Maria që është i dëmtuar. Kemi lojtarë të mëdhenj dhe është e vështirë që të zgjedhësh tre me të cilët të luash. Por kjo është një skuadër, turneu është i gjatë dhe duhet të jemi të gjithë bashkë që të fitojmë.
Të fillosh duke fituar është gjithmonë e rëndësishme. Bëmë një ndeshje të madhe dhe jemi shumë të lumtur për këtë rezultat jashtë fushe. Objektivi ynë është Bajerni, një ndeshje e vështirë, por ne duam të sigurojmë tre pikët para tifozëve tanë”, theksoi Nejmar.
Kavani është bërë golashënuesi më i mirë në histori të PSG-së në garat evropiane. Sulmuesi Edinson Kavani ka shënuar dy gola për PSG-në në fitoren 5:0 ndaj Sëlltikut, duke shkuar në kuotën e 22 golave në garat evropiane. Kështu, ai është bërë golashënuesi më i mirë në histori të klubit francez në garat evropiane, bën të ditur PSG-ja në rrjetet sociale.
