Nga Zëri i Amerikës
Në Tiranë, Struktura e Posaçme kundër Korrupsionit dhe Krimit të Organizuar (SPAK) shënoi 5-vjetorin nga nisja e veprimtarisë. Zëvendës-ndihmës Sekretari amerikan i Shtetit, Aleksandër Kasanof, mori pjesë në tubimin ceremonial, ku theksoi se duhet siguruar vazhdimi pa ndërprerje i luftës kundër korrupsionit dhe krimit të organizuar, prandaj prokurorët e SPAK-ut duhet të lejohen të aplikojnë për të shërbyer sërish pas përfundimit të mandatit të tyre.
Zyrtari i lartë i Departamentit amerikan të Shtetit, Alexander Kasanof theksoi sërish sot mbështetjen e plotë të SHBA-ve ndaj SPAK-ut dhe bëri thirrje që prokurorëve të posaçëm t’u mundësohet, pas mbarimit të mandatit nëntë vjeçar, riaplikimi për të shërbyer përsëri në këtë fushë të vështirë.
Zëvendës-ndihmës Sekretari amerikan i Shtetit, Alexander Kasanof, mori pjesë sot në tubimin ceremonial të pesë vjetorit të SPAK-ut në Tiranë, ku deklaroi se “ky është institucioni publik më i besueshëm në Shqipëri”, që po bën “përpjekjen më të suksesshme kundër krimit të organizuar dhe korrupsionit në historinë shqiptare”, ndaj duhet siguruar vazhdimësia e kësaj lufte pa ndërprerje.
“Për t’u siguruar që SPAK-u do të vazhdojë pa ndërprerje luftën kundër korrupsionit dhe krimit të organizuar në të ardhmen, ne besojmë se prokurorët e SPAK-ut duhet të lejohen të aplikojnë për të shërbyer sërish pas përfundimit të mandatit të tyre aktual. Dështimi për të realizuar këtë, rrezikon të ndërpresë përpjekjen më të suksesshme kundër krimit të organizuar dhe korrupsionit në historinë shqiptare dhe rrezikon humbjen e profesionistëve tuaj më me përvojë e të njohurive të tyre institucionale”, tha ai.
Zëvendës-ndihmës Sekretari Kasanof tha se guximi dhe vullneti për të luftuar krimin dhe korrupsionin me energji të qëndrueshme janë sot po aq të rëndësishme sa në fillim të reformës në sistemin e drejtësisë, ndërsa këto rezultate janë thelbësore për rrugëtimin e Shqipërisë drejtë anëtarësimit në BE.
“Arrestimet, procedimet penale dhe dënimet tuaja të jashtëzakonshme, sikurse i keni parë këtu nga zoti Dumani, kundër atyre që dikur ishin të paprekshëm, flasin shumë. Puna juaj frymëzon besimin se prova do të ndiqet brenda kornizës së ligjit pavarësisht se ku, pavarësisht se drejt kujt çojnë hetimet. Asnjë nuk është mbi ligjin”, tha zoti Kasanof.
Ai theksoi se pavarësia e SPAK-ut mbetet vendimtare, por ky institucion nuk mund të zgjidhë i vetëm gjithë problemet e vendit, ndaj edhe institucionet e tjera duhet të tregojnë guxim, të ndërtojnë besimin e publikut dhe të veprojnë me integritet, sepse lufta kundër korrupsionit është detyrë për të gjithë.
Drejtuesi i SPAK-ut, Altin Dumani, u shpall 10 ditë më parë nga SHBA-të kampion për luftën ndaj korrupsionit. Ai tha sot se gjatë 5 vjetëve SPAK-u regjistroi 1 mijë e 809 procedime penale për afro 2 mijë e 496 persona.
“Askush nuk është më i paprekshëm, nëse e shkel ligjin dhe SPAK-u nuk është i njëanshëm. Ky është vetëm fillimi dhe vendosmëria e institucionit është e plotë në luftën kundër krimit të organizuar dhe korrupsionit”, tha zoti Dumani.
Bashkimi Europian po ashtu shprehu mbështetjen e vazhdueshme për punën e SPAK-ut. Drejtuesi i Delegacionit të BE-së në Shqipëri, ambasadori Silvio Gonzato, tha se arritjet e SPAK-ut në 5 vite janë domethënëse e për t’u vlerësuar dhe ato ndikuan shumë në çeljen e negociatave të Shqipërisë për anëtarësim në BE, sepse i dhanë fund pandëshkueshmërisë dhe ndërhyrjeve politike tek drejtësia, dhe sollën një institucion të ri, që godet krimin dhe korrupsionin e niveleve të larta.
“SPAK ka dhënë rezultate të mira në disa çështje të profilit të lartë. Ajo ka rikuperuar miliona euro pasuri nga individë dhe kompani të akuzuara për korrupsion. SPAK ka ngritur shumë grupe të përbashkëta hetimore me shtete të tjera për një seri çështjesh të suksesshme. BE e ka mbështetur SPAKun nga dita e parë dhe d të vazhdojë ta bëjë këtë”, tha ambasadori Gonzato.
Edhe më herët drejtuesi i SPAK-ut u ka kërkuar institucioneve që të vlerësojnë mundësinë e rikandidimit të prokurorëve të posaçëm për një mandat tjetër në mënyrë që të vazhdojnë punën e tyre kundër krimit të organizuar dhe korrupsionit, ndërsa Kushtetuta parashikon që mandati i tyre është nëntë vjet dhe pa të drejtë rizgjedhjeje, ndaj që të mundësohet riaplikimi nevojiten ndryshime kushtetuese nga Kuvendi.
