Goli më i shtrenjtë në botë mund të konsiderohet i Neymar për PSG, me brazilianin që debutoi me klubin e tij të ri duke shënuar jo vetëm golin e 0-3, por duke qenë protagonisti absolut i sfidës me Guinkamp, të cilën skuadra e Emery pati jo pak probleme për ta zgjidhur. Debutimi i yllit brazilian duket se kishte “çoroditur” dhe tifozët e Guinkamp që kishin mbushur shkallët duke dhënë një mbështetje të jashtëzakonshme për skuadrën e tyre ndaj yjeve kryeqytetas.
Në pjesën e parë PSG i mungoi vetëm golin, me Neymar që bëri gjithçka për të çuar te goli të tijtë, por parisienët vuajtën sindromën e golit. Gjithsesi në fillimin e pjesës së dytë miqtë u zhbllokuan falë një super dhurate të Ikokos që dërgoi topin gabimisht në rrjetën e tij. Më pas ishte radha e Cavanit për të dyfishuar me një asist të Neymar, ndërsa në të 82-tën braziliani realizoi dhe golin e tij të parë francez duke mbajtur me pikë të plota të tijtë pas dy javëve të para.
Viti i ri, por Monaco e vjetër, me Radamel Falcon sërish protagonist, teksa vulosi me një 3 golësh fitoren 4-1 ndaj Dijonit në transfertë. Suksesi i monegaskëve, ishte i ngjashëm me ato të vitit të kaluar teksa erdhi sërish nëpërmjet spektaklit pavarësisht se goli i parë ishte pragmatizëm i pastër nga Falcao, por i dyti i brazilianit Jemmerson ishte një roveshatë perlë që i lejoi miqve të mbyllnin ndeshjen ende pa nisur mirë ajo.
Gjithsesi Monaco, që nuk kënaqet kurrë me të bukurën, pak a shumë si Falcao, para pushimit realizoi dhe një tjetër perlë, këtë herë me autor Falcaon, që dërgoi topin në trekëndësh me një goditje plot klas dhe saktësi.
Pavarësisht një tuneli të shfaqur në mbrojtje, por dhe mes këmbëve të Subasicit në fundin e pjesës së parë, rezultati nuk u vendos asnjëherë në diskutim, pasi Falcao mendoi ta mbyllte vetë ndeshjen ashtu si e hapi me golin e 1-4 që ngjit në krye kampionët me pikë të plota pas dy javësh, duke treguar se pavarësisht blerjeve, PSG duhet të luftojë fort për titullin dhe në Francë.
