Pesëfishimi i sipërfaqes së kultivuar me drogë është akuza me fakte, për kriminalizimin që Edi Rama i ka bërë shtetit shqiptar. Kryetari i Partisë Demokratike, Lulzim Basha dëgjoi dhe bashkëbisedoi me drejtues të strukturave të Partisë Demokratike në Pukë. Puka është një ndër zonat që ka vuajtur më së shumti keqqeverisjen e Edi Ramës, mos mbajtjen e premtimeve, papunësinë në rritje dhe për pasojë emigrimin. Edi Rama në tre vite, theksoi Basha është faktuar si njeriu që e do pushtetin për vete dhe një grup miqsh të tij, duke u lënë si alternativë qytetarëve drogën dhe emigrimin.
“Për fatin e keq të Shqipërisë është provuar se Edi Rama, ky koalicion qeveritar prej ditës së parë e deri tani që po i vjen mbyllja e mandatit ka menduar vetëm për veten e vet, vetëm për xhepat e vet, vetëm për pasurimin e vet, vetëm për pushtetin e vet. Sepse një qeveri që erdhi me premtimin për 300 mijë vende pune dhe çoi 100 mijë shqiptarë refugjatë; Një Kryeministër që premtoi shëndetësi falas dhe e futi në gjendjen më mesjetare, më të zezë, më të vobektë, më të korruptuar që ka parë shëndetësia në këto 26 vite; Një Kryeministër që premtoi rend dhe siguri dhe që shumëfishoi krimin, drogën, vrasjet, nuk është në gjendje të tregojë një punë konkrete që i vlen qytetarëve, por që i tregohen me gisht me dhjetëra afera korruptive është varrmihëse e shpresës”.
Në Pukë ka me qindra hektarë tokë të mbjellur me kanabis nën mbrojtjen e policisë dhe pushtetarëve vendorë, theksuan qytetarët. Në 17% të territorit është 5-fishuar kultivimi i kanabisit në një vit. Nga 44.7 hektarë vitin e kaluar në 213.7 hektarë këtë vit, theksoi Basha, duke shtuar se kjo është vepër e Al Kaponeve në qeveri, në bashkëpunim të ngushtë me kartelin e drogës, është alternativa e Edi Ramës.
“Edi Rama llomotit për orë të tëra, por nuk thotë asgjë për krimin që mori pesë jetë njerëzish në dy ditë, ndërkohë që ai rrihte gjoksin. Ministrit të tij i ishte trashur gjuha se iu kapën 21 tonë drogë. 21 tonë drogë janë akuza me fakte, për kriminalizimin që Edi Rama i ka bërë shtetit shqiptar. Është prova se demokratët, Partia Demokratike po thonin dhe thonë të vërtetën, që sipërfaqja e kultivimit është shumëfishuar dhe shtrihet anembanë Shqipërisë, si përgjigja e zezë, si alternativa e vetme që Edi Rama u lë fukarenjve që punojnë si skllevër, sepse përfitimet i marrin një grusht njerëzish”.
Raporti i Guardia Di Finaza për drogën e mbjellë në Shqipëri nxorri të dhëna tronditëse. Në raport thuhet që sasia e kultivimit të drogës është pesëfishuar të paktën 17 % të territorit që ka kontrolluar Guardia Di Financa. Për pjesën tjetër të territorit të Republikës së Shqipërisë, Guardia Di Finanza nuk ka të dhëna. Në raport thuhet se policia i ka raportuar Guardia Di Finanza 2 mijë aksione kundër plantacioneve të kanabisit.
Por Guardia Di Fianaza ka mundur të verifikojë vetëm 20 aksione të tilla. Italianët janë të shqetësuar për kultivarët e përdorur. Njëri prej tyre është varieteti vietnamez, që del në prodhim brenda 45 ditësh dhe mbillet 3 herë në sezon. Guardia Di Finanza i ka filluar fluturimet në fund të qershorit. Por korrja e parë e kanabisit të këtij lloji është bërë në javën e parë të qershorit, ndaj nuk ka të dhëna se sa ka qenë sasia e mbjellë përpara fluturimeve. Po ashtu në raport thuhet se nuk është e qartë nëse korrja është bërë nga policia e shtetit apo vetë trafikantët. Raporti pritet të publikohet pas pak në një konferencë të Guardia Di Finanza, në prani të ambasadorit italian dhe ministrit të Brendshëm.
