Gjykata kundër Korrupsionit dhe Krimit të Organizuar ka lënë në burg Bujar Shegën, i njohur ndryshe me emrin Marsel Shega. Ai u ekstradua nga Milano drejt Tiranës, pasi ishte shpallur në kërkim ndërkombëtar nga SPAK. Shega akuzohet për trafik ndërkombëtar të lëndëve narkotike dhe pastrim të produkteve të veprës penale, kryer në kuadër të një grupi të strukturuar kriminal. Sipas dosjes së Prokurorisë së Posaçme, Shega ka qenë “truri financiar” i organizatës së Suel Çelës, një prej emrave më të njohur të botës së krimit në Shqipëri, i shumëkërkuar prej vitesh dhe i përfshirë në dosjen “Plumbi i Artë”.
Në seancën e Gjykatës së Posaçme të Shkallës së Parë për Korrupsionin dhe Krimin e Organizuar, trupi gjykues i kryesuar nga gjyqtari Erjon Çela, vendosi të lërë në fuqi masën e sigurisë “arrest me burg” ndaj Shegës. Ai dyshohet për veprat penale “Trafikimi i narkotikëve”, “Grup i strukturuar kriminal”, “Kryerja e veprave penale nga organizata kriminale” dhe “Pastrimi i produkteve të veprës penale”, të parashikuara nga nenet 283/a/1, 28/4, 333/a/1, 334/1 dhe 287/1 të Kodit Penal. Policia gjyqësore është urdhëruar të shoqërojë menjëherë të hetuarin në institucionin e paraburgimit.
Marsel alias Bujar Shega është administrator i dy kompanive me emra të gjelbër siç kërkon moda: Viola Green dhe ëonder Green. Kompanitë në fjalë kanë fituar tendera për pastrimin e disa qyteteve në Shqipëri, ndërkohë që dyshohet se kanë shërbyer si vegla për pastrimin e parave të organizatave kriminale brenda dhe jashtë vendit. Në dosjen hetimore theksohet se përmes këtyre shoqërive, Shega ka qarkulluar dhe legjitimuar kapitalet e grupeve të mëdha kriminale, përfshirë një grup me bazë në Dubai, i cili dyshohet se ka investuar në pasuri të paluajtshme në Tiranë.
Goditja e kësaj organizate kriminale u bë e mundur pas zbërthimit të komunikimeve të koduara në aplikacionin Sky ECC, të cilat janë vënë në dispozicion të SPAK nga autoritetet belge. Pikërisht këto komunikime kanë zbuluar përfshirjen e Shegës në dy episode të rënda të trafikut të kokainës nga Amerika Latine drejt Europës. Në episodin e parë, Shega rezulton të ketë qenë një nga financuesit e 930 kilogramëve kokainë të kapur në portin e Ekuadorit në kuadër të operacionit “Boya Roja”. Kur ngarkesa humbi, Suel Çela i kërkoi Shegës të zbulonte “tradhtarin”, ndërsa Shega, sipas komunikimeve të përgjuara, u zotua se do t’i shkonte deri në fund duke kërkuar pamjet e kamerave të sigurisë së portit. Në bisedën mes tyre, Çela e paralajmëron Shegën se nëse kishte pasur tradhti, atëherë përgjegjësi duhet ta paguante “me kokë”.
Në episodin e dytë, Suel Çela del në bashkëpunim me Ergys Dashin – një figurë qendrore e narkotrafikut, i vrarë më vonë në Ekuador – dhe Ervin Matën. Në këtë rast, grupi nisi një ngarkesë prej 446 kilogramësh kokainë nga Ekuadori drejt Holandës, por lënda narkotike u kap në portin e Roterdamit më 5 janar 2021. Dashi, në komunikim me Suel Çelën, i raportonte mbi përpjekjet për të siguruar dokumentet që provonin se droga ishte konfiskuar. Po në këtë skemë rezulton i përfshirë edhe Xhino Roka, i cili kishte rolin e dërgimit të parave nga Europa drejt Amerikës së Jugut për llogari të grupit.
Sipas hetuesve, Dashi kishte plane për të dërguar deri në 10 ton kokainë në Europë, dhe siguronte Çelën se çdo ngarkesë do të niste me të paktën 300 kilogramë, pasi kjo ishte shuma minimale që justifikonte financimin dhe korruptimin e zyrtarëve të doganave dhe porteve.
Operacioni i fundit i SPAK, i cili përfshin edhe Shegën, është një zgjerim i hetimeve të “Plumbi i Artë” dhe ka shënjestruar jo vetëm elementë të krimit të organizuar, por edhe bashkëpunëtorët e tyre institucionalë. Në kuadër të këtij aksioni, janë ekzekutuar disa nga 18 urdhër-arrestet e nxjerra. Mes të arrestuarve janë edhe ish-gjyqtarja Pajtime Fetahu, ish-zyrtari i policisë Dedan Gjoni, si dhe avokatja e një anëtari të grupit të Suel Çelës, e cila u vendos në arrest shtëpie. Me kërkesë të SPAK, gjykata ka vendosur gjithashtu masën e detyrimit për paraqitje ndaj dy gazetarëve, por kreu i organizatës kriminale Suel Çela është ende i lirë.
Operacioni u mbështet nga Europol dhe agjencitë e tjera ligjzbatuese ndërkombëtare. Gjithçka ka nisur me zbulimin e një komunikimi të enkriptuar që ka çuar në një skemë globale, ku tenderët e pastrimit urban, kullat në Tiranë, kokaina në Ekuador dhe paratë në Dubai përplasen në të njëjtin dosje penale. Dhe në qendër të kësaj vorbulle që lidh krimin dhe biznesin – ndodhet një emër që deri dje shkonte në Milano për ekspo, ndërsa sot ndodhet në burg për trafik ndërkombëtar.
