Anëtari i kryesisë së PD dhe sekretari për sigurinë kombëtare, Xhemal Gjunkshi, ka reaguar në lidhje me ngjarjen e rëndë e cila ndodhi pasditen e sotme në burgun e Peqinit.
Gjunkshi shprehet se kjo ngjarje nuk tregon vetëm pasiguri në këto ambiente por edhe cënim të rendit dhe sigurisë publike.
Deklarata e plotë
Ngjarja e rëndë e ndodhur sot në burgun e Peqinit ku u vra një i burgosur dhe u plagos një tjetër, nuk dëshmon vetëm pasigurinë në këto ambjente.
Ngjarja pasqyron cënim të rendit, sigurisë publike dhe një realitet tensioni të rënduar të shoqërisë. Po sot në Tiranë dy të rinj u plagosën nga një adoleshent, ngjarje kjo e përsëritur dhe në qytete të tjera.
Shkaqet e rendit të tronditur tashmë dihen pasi varfërisë së madhe, papunësisë dhe mungesës së një Strategjie efikase kundër krimit i shtohet edhe filozofia e kryeministrit dhe e qeverise me moton * kokën e njëri tjetrit le të hanë*. Por në fakt kjo situatë “po i han kokën ” ekonomisë, stabilitetit kombëtar dhe integrimit europian.
Sepse investitorët vendas e të huaj nuk shohin siguri dhe besim tek institucionet, sepse turistët nuk mund të vizitojnë një vend ku krimi godet në mes të ditës dhe në mes të qendrës, ku parlamenti është përfshirë nga flaka e gazi, ku në burgje shpërthejnë armët dhe ku banesat e bizneset vidhen e grabiten.
Rendi dhe siguria duhet të mbahen me strategji vizion dhe masa konkrete, me zyrtarë e punonjës me integritet dhe jo me propagandë pompoze nga ministrat dhe zyrtarët e qeverisë. Shqipëria e 2023.
