Një shoqëri e ardhur nga kohë totalitare ku çdo gjë qe e imponuar, u përmbys, duke lënë pas trauma. Ndaj personazhi kryesor i veprës së shkrimtarit Gazmend Krasniqi “Një roman në dosjet e policisë”, sjell një qasje krejt tjetër ndaj epokës që jetojmë, në antagonizëm me vertikalitetin e mendimit të së shkuarës. Kjo edhe për arsyen se sipas autorit, ka disiplina të tjera ku jepen përgjigje, letërsia, më së shumti ngre pyetje.
“Në këtë roman nuk del asnjëhëerë ideja që kjo është rruga. Personazhi e kërkon rrugën duket u luhatur në gjeografi, duke u luhatur në kohë, duke u luhatur në situata të vështira, i izoluar, i burgosur, i privuar nga liria, gjithnjë kërkon vlerën, pa thënë që vlera është kjo që ju imponoj unë” tha Krasniqi.
Romani i poetit, prozatorit e studiuesit Krasniqi, i merr motivet nga jeta e Frederik Rreshpjes dhe fatit të tij tragjik.
“Vite përpara kur jetonte Frederik Reshpja, kisha botuar një prozë dhe më tha që romani e nxirrte lexuesin të ç’orientuar. Në fakt unë atë kërkoja. Një roman i tillë mund të kalojë në gjyq e të bëhet i dëmshëm. Ne e dimë historinë e Sokratit, filozofit të parë të perëndimit. Megjithëse sot është vlerë e pamohueshme, është dënuar për antivlera. Një paralele të tillë don të bëjë edhe ky roman” u shpreh autori.
Me një ligjërim postmodernist, vepra ka një kontekst shqiptar dhe një shumësi ligjërimesh duke ritrajtuar raportin me të djeshmen./ Fatmira Nikolla, BalkanWeb.com
