Ramës i dërgova mesazh me diplomatin, një qen i tërbuar s’mund të djegë vendin
– Zoti Berisha, ka një pyetje e cila në fakt po shtrohet nga të gjithë. Nga informohet Sali Berisha? Të mendojmë që qytetari dixhital ju ka informuar për arrestimin e Arben Frrokut në Holandë është pak e pabesueshme. E them pak më shkurt, media pranë mazhorancës aludojnë se SHISH është vënë në dispozicion të ish-Kryeministrit dhe jo të Kryeministrit.
Unë mund të siguroj shikuesit tanë dhe të gjitha mediat se në mënyrë absolute 100% të informacioneve që unë përcjell janë të atij që unë e quaj “qytetari dixhital”. Qytetari dixhital, në rastin konkret, në më shumë se 90% të rasteve është realisht një qytetar i thjeshtë, në 1% të rasteve është punonjës i administratës shtetërore. Mund të garantoj që në të gjithë gamën e madhe të informacioneve, nuk kam patur qoftë dhe një informacion të vetëm të SHISH, i cili mund t’i dërgojë si qytetar dixhital në telefonin tim dhe unë absolutisht i jap si të gjitha të tjerat. Nuk kam patur as dhe një të vetëm nga Prokuroria e Shtetit dhe nuk kam bërë kurrë përpjekje që të kem informacion nga dosjet e Prokurorisë dhe në tërësi, vetëm kur i nxjerrin mediat, por edhe në rast se vijnë nga burime të tjera ato nuk i qarkulloj. Kurse përsa i përket Frrokut është absolutisht qytetar dixhital, të cilin unë po të kërkoj këtu në arkivë ua faktoj menjëherë. Mund të më pyesësh mua tani nëse është burim shqiptar apo nga Holanda, mund të të them se është burim shqiptar, por nëse sms ka ardhur nga Holanda apo nga Shqipëria këtë nuk e kam kërkuar, edhe pse e verifikoja po të doja, por nuk e kam bërë. Pra, nuk kish asgjë pse ta dyshoja vërtetësinë e tij, natyrisht s’mund të isha 100% i sigurt, por një lajm i tillë nuk mund të bllokohej dot. Pra, ky lajm është specifikisht i qytetarit dixhital.
– Zoti Berisha, për 10 ditë tre herë ka qenë në zyrën tuaj ambasadori amerikan. Janë ditët kur ju keni denoncuar Shullazin, janë ditët kur ju keni propozuar që të vijë në Parlament një projektligj që qytetarët të armatosen sipas ligjit amerikan dhe kur keni njoftuar arrestimin e Frrokut. Çfarë bisedoni me të? A është zoti Lu një qytetar dixhital në raport me Sali Berishën?
Kurrë! Burimi diplomatik nuk mund të jetë sepse pastaj unë prish luajalitetin dhe kjo nuk ndodh. Që në momentin që dikush nxjerr një bisedë, të cilën unë ia jap off record ose unë dëgjoj një bisedë off record të dikujt tjetër atëherë marrëdhëniet luajale të bisedimit asgjësohen. Natyrisht në këto takime është diskutuar gjerësisht për Reformën në Drejtësi, është diskutuar për rastin Shullazi gjerësisht, për rastin Frroku po kështu gjerësisht dhe asnjë fjalë për amandamentin e dytë të Kushtetutës amerikane në të cilën bazohet deklarata ime, qoftë dhe një fjalë e vetme jo.
– Pra, në asnjë rast zoti Lu nuk ka shprehur ndonjë shqetësim për deklaratën tuaj?
Absolutisht. Zero. As është hapur fare, asnjëherë.
– Po rreth rastit Shullazi, është sekret apo ka diçka që mund të thuhet për mediat?
Ambasadori Lu ka meritën e tij shumë të madhe në përpjekjet për dekriminalizim të vendit. Ka shndërruar këtë temë në një axhendë, natyrisht në përputhje me instruksionin e qeverisë së tij, sepse natyrisht nuk mund të jetë ndryshe, ju e dini që sekretari Kerry ka përshkruar qartë dhe e ka përcaktuar si çështje kryesore, qëndrimin ndaj klikave oligarkike në vendet e Ballkanit dhe në 20 e ca vite është i pari rast ku ambasadori i vendit më të fuqishëm të Europës shqipton publikisht emrat e dy kriminelëve të shëmtuar. Nuk e ka bërë kush kurrë. Në rast se ju kujtohet, kanë qenë të ditur si drita e diellit vrasësit e Hajdarit, por nuk i shqipëruan ndonjëherë, ata të cilët edhe kontribuan në eliminimin e tyre, etj. Pra, ky ishte një rast shumë i veçantë.
– Kush kontribuoi në eliminimin e vrasësit të zotit Hajdari?
Në identifikimin e tyre, identifikimi i vrasjes dhe i krimeve të tjera të shëmtuara.
– Megjithatë, po t’i referohem mediave të majta, mediat që marrin lajmet copy paste nga zëdhënësi Fuga, kanë pretendime dhe alibi se Berisha ka shtuar tonin kërcënues ndaj Ramës pasi pas arrestimit të Shullazit ndonjë familjar i juaji mund të jetë kërcënuar. A ka ndonjë gjë të vërtetë? Ka dy opinione, një i Sokol Ballës, një i Mero Bazes.
Në mënyrë absolute. Përsa i përket çorapes, pretendimet e tij duhet t’ja lëmë në çorapen e palarë të tij. Problemi është se qëkur e njohin të gjithë ata që e njohin e etiketojnë si Mr. Këllira.
– Edhe kur ka qenë miku juaj zoti Berisha?
Në çdo kohë. Miqësia ka qenë kur ai vinte tek unë, që të jemi realisht. Unë miqtë kollaj nuk i lëshoj. Kurse ai sapo kërkoi të kalonte shtypshkronjën pa doganë i thashë harroje dhe sapo bëri aktin e larjes së parave i kërkova agjencive respektimin që të bëjnë punën e tyre. Dhe e bëri me çorapen e Partisë, se çorapja e Partisë është Besnik Sula, atij ia shiti, nga 500 mijë tha se ia shiti për 1 mijë dollarë.
– Pse e prisnit kur e dinit që ky ishte?
Po të marrësh degradimin e tij, degradimi i tij ekstrem është në këto vite. Përsa i përket Ballës qëndrojmë pak më shumë. Tani, nuk ka pse më shtrohet mua kjo pyetje, kjo pyetje duhet t’i shtrohet Edi Ramës, të cilit i ka botuar dosjen e mjekimit 13 vite, që ka rekrutuar Ramën me dosjen e gjykatës për gjyqin për të njohur të birin dhe dosjen e klinikës psikiatrike. I ka botuar ai këto dhe tani ai është njeriu më i afërt.
– Meqë ma kujtuat, në një intervistë për mua zoti Baze është shprehur që “unë e botova këtë gjë pasi i besova Sali Berishës si mjek”.
Ato janë mashtrime sepse unë nuk kam qenë kurrë psikiatër, unë s’kam hulumtuar kurrë dhe nuk ke parë ti tek unë në 23 vjet një herë të vetme të nxjerr një dokument për një njeri (dok mjekësor). Nuk më lejohet mua të nxjerr dokumente personale se po të nxjerr unë dokumente personale të jesh i bindur që disa nga ata kundërshtarë të mi do të ishin me një bojë tjetër. Po unë nuk hyj në dokumente personale, asnjëherë dhe në asnjë rrethanë nuk ia lejoj vetes.
– Kthehemi te kërcënimi…
Familjarë të mi, në mënyrë absolute s’kanë patur asnjë kërcënim të vetëm kurse historia e kërcënimit të Sali Berishës është tjetër. Ajo përcaktohet nga çfarë konsideroj unë kërcënim, jo çfarë konsideron ti apo tjetri.
Mos harro se më kanë hedhur një bombë te këmbët dhe unë pas 30 sekondash kam vazhduar fjalimin. Kanë rrethuar Presidencën, kanë lënë kockat, rrethuan Kryeministrinë etj., me radhë. S’e kam konsideruar fare. Të them një gjë, të vërtetën, kërcënimi nuk ekziston për Sali Berishën. Kurrë ndonjëherë nuk jam përpjekur dhe s’do të përpiqem të shmang kërcënimin. Ky është qëndrimi im. Ai që hedh kërcënime drejt meje me idenë mund të më ndikojë mua, ai gabon se unë vetëm sa qesh me kërcënime të tilla. Kam qenë President, kam qenë Kryeministër, kryetar opozite, kam marrë me qindra e qindra ato, të cilat të tjerët i quajnë kërcënime…
– Nuk keni frikë?
Nuk është punë frike, ky është qëndrim ndaj tij. Nuk ka gjë më të keqe në botë se sa të ndikohesh prej tyre. Pra, asnjëherë dhe në asnjë rast nuk është denoncuar njeri pse kërcënoi Sali Berishën. Kurrë!
– Po ju vetë a kërcënoni politikisht? Kam parasysh konferencën e shtypit të denoncimit ndaj rastit Shullazi dhe deklaratën për Ramën. A ishte një kërcënim ndaj zotit Rama?
Jo, absolutisht jo. Çfarë është ajo? Ajo është një paralajmërim dhe në asnjë mënyrë kërcënim. Ai le ta marrë si të dojë. Ajo ishte një paralajmërim për mbarë shoqërinë dhe për Shqipërinë. Të akuzosh Edi Ramën se, vrau apo bëri këtë apo atë një bandit, është absurde, sepse ai është në detyrën e Kryeministrit dhe natyrisht pa një lidhje të tillë s’mund ta bësh. Por nëse banditi nga mëngjesi deri në darkë ka mbështetjen e Ramës, nëse ai arrin, për shkak të kësaj mbështetjeje, të krijojë një ushtri prej rreth 40 vetë të armatosur më mirë se çdo njësi ushtarake në Shqipëri sot, ta bëjë këtë në zemër të Tiranës, t’ia rrahë kryetarin e Bashkisë së Durrësit e ta tërheqë zvarrë, të gjitha këto të denoncuara dhe asnjë e mohuar, t’i marrë me revole tjetrit firmën në hipotekë dhe të njoftohet për të gjitha këto Edi Rama, atëherë ai është fund e krye instrument i Ramës. Dhe ai që nuk e beson këtë ai pastaj është një naiv dhe meriton çdo gjë. Në këtë kontekst, atë që kam thënë e them prapë, nëse opozita goditet nga klani Shullazi në mënyrë absolute e ka personale nga Edi Rama dhe unë, e them përpara më mirë se ta them në atë rast. Sepse, a mundet një Kryeministër të tolerojë një bandit të tillë? Po pse e toleron Rama? Rama e toleron pikërisht sepse i duhet që t’i çojë kundërshtarit të tij se “po nxore kokën në dritare të bëj këtë e atë”, siç bëri Shullazi me Lul Bashën dhe ta nxjerrë direkt nga komisariati i policisë. Edi Rama nuk është burrë!
Kur ka ardhur problemi për t’i çuar mesazh personal ia kam çuar unë. Direkt. Dhe ia kam çuar nëpërmjet një zyrtari të lartë të huaj shumë të rëndësishëm.
– E konceptonte dot një zyrtar i lartë i huaj një gjë të tillë?
Absolutisht kur ia thashë, mbeti shumë i habitur, kur ia zbërtheva, tha në rregull. Po në qenë të tërbuar që të djegin vendin tim nuk e lejoj, se unë patriot jam. Se donte të vinte të mbante fjalim në ballkonin e zyrës sime. Unë kam qëndruar aty atë ditë, nuk e kam ndjerë veten fare të kërcënuar, pavarësisht se ç’ndodhte unë nuk kam ndjerë kërcënim. Kështu që Rama nëse është burrë ato i çon vetë dhe nuk përdor shullazër, të cilët i vë, në kundërshtim me ligjet, me Kushtetutën e me çdo gjë, të dhunojnë qytetin e Tiranës, të dhunojnë qytetin e Durrësit si kurrë ndonjëherë në ekzistencën e tij.
– Zoti Berisha, keni bërë mjaft kujdes për të sqaruar se këto janë qëndrime të Berishës dhe jo të opozitës. Megjithatë eksponentë të PS janë munduar ta ironizojnë: “Vetëm me Kukësin nuk merret Tirana”, “Nuk merret pushteti me 5 mijë veta”. Si mund ta marrë Rama si një kërcënim serioz kur ai është vetëm i Sali Berishës dhe jo i opozitës?
Sali Berisha nuk përfaqëson opozitën. Këtë ta ketë të qartë çdo njeri. Së pari, sepse ai ka dhënë dorëheqjen. Së dyti, Sali Berisha, të jesh i sigurtë ti se, po të dojë mund t’i mbledhë kur të dojë, vetëm 1 mijë, 2 mijë, 3 mijë qytetarë pa asnjë vështirësi. Po Sali Berisha nuk e bën kurrë atë. Sepse unë askush s’mund të presë më nga unë që unë t’i çoj drejt të ardhmes që ata duan. Se nëse thërret njerëzit, ti do i premtosh atë që unë nuk mund t’ja premtoj dot kujt sepse unë kam dhënë dorëheqjen, të cilën nuk e kam dhënë me dy mendje, por e kam dhënë i bindur në ndërgjegjen më të plotë dhe për asnjë sekond të vetëm nuk kam ndjerë keqardhje. Kam bërë një arsyetim dhe i kam qëndruar. Ndaj dhe unë nuk përfaqësoj as PD, as opozitën, por përfaqësoj Sali Berishën. Në rast se Rama godet opozitën, të jetë i bindur se opozita do t’ja kthejë me të gjitha mundësitë e saj. Dhe këtu dua t’i them një gjë. Ai u tmerrua nga deklarata e armëve, u llahtaris. Prit se është naiv. Ai nuk e di që sot në këtë moment që flasim, në anëtarësinë e PD, në anëtarësinë e PS, në anëtarësinë e çdo parie ka aq armë sa për të rrëzuar 5 herë një qeveri nëse vendosin. Po ky është një vend i lirë. Asnjëri ato armë nuk i mban as kundër Ramës, as kundër Bashës, i mban për qëllime të sigurisë. Flas jo për banda. Atë e llahtarisi qytetari me armë. Atë sikur ta ketë nxjerrë Koleka prej hundësh. Pra, nuk ka asnjë lloj lëvizje nga ato që kam thënë, i qëndroj plotësisht. Se gjë më të turpshme në botë, krim më të shëmtuar sesa të tolerohet dhe të lozësh me banda ndërkohë që detyra jote kryesore është zhdukja e bandave dhe vendosja e shtetit ligjor, nuk ka për mua.
– Pse qytetari dixhital denoncon tek Sali Berisha dhe jo tek Lulzim Basha?
Lulzim Basha është kryetari i opozitës, është një gjeneratë tjetër, lider dhe e gjithë eksperienca 20 e ca vjeçare e nxjerr Sali Berishën liderin më direkt të këtij vendi. Ata e dinë që po më thanë një gjë, shumë vështirë të ketë ndonjë faktor që të më pengojë pa e bërë publik dhe e kanë konstatuar. Ka edhe një gjë tjetër, ndoshta për një kryetar partie ai ka zëdhënësin, funksionon me zëdhënësi, funksionon me mekanizma të tjera të komunikimit, kurse unë përdor këtë formë komunikimi dhe unë them ato që thonë qytetarët.
– A mendoni se opozita shqiptare dhe Sali Berisha kanë një stil ndryshe se si e mendojnë realitetin politik në Shqipëri sot?
Mendoj se ndaj çështjes që qeveria është një organizatë kriminale, siç e quan Sara Kejs, opozita ka qëndruar në mënyrën më të fuqishme, me kushtetuese, më luajale. Në këtë aspekt, Sali Berisha ka qëndruar ndaj rasteve konkrete sikur opozita ka qëndruar ndaj rasteve konkrete, por në mënyrën e saj. Kurse si fenomen opozita ka dhënë një kontribut historik në këtë betejë, votoi një ligj me sakrifica të mëdha, të shkëlqyer, i cili gradualisht do të japë efektet e saj.
– Denoncimi i Shullazit ndaj rektorit të zgjedhur dhe ish-rektorit, këta nuk kanë pranuar t’i përmendin emrin Shullazit…
Unë i përgëzoj përzemërisht për njoftimin, u dolën zot njoftimit. Por tani vijojmë pjesën tjetër, ju e dëgjuat vetë, në emisionin “Opinion”, Blendi Fevziu deklaroi se 36 gazetarë dhe jo gazetarë refuzuan të komentojnë për Shullazin në emision. Ç’do të thotë? Prandaj e akuzoj Edi Ramën. Kjo është diktatura e krimit. Është absolutisht forma më e zezë dhe më e shëmtuar e krimit. A e di ti që të dy ata burra akademikë janë sjellë si qytetarë dinjitozë, para se të më çojnë mua mesazhe përmes të tjerëve ia kanë çuar direkt Edi Ramës. Dhe Edi Rama ka ngarkuar Saimir Tahirin për ta mbyllur në mënyrën e tyre. Si i shkonin më parë e i thoshin se më kërkon ndërmarrjen e Rama u thoshte se Shullazi ashtu se ç’ka është i mërzitur. Pra, ai qëndrim i tyre është dëshmi e diktaturës së krimit që ka vendosur Edi Rama. I kam dëgjuar kritikat ndaj tyre, është shumë e padrejtë, çfarë duhet të bëjnë më shumë ata. Atyre u ndodhi, ia përcollën Kryeministrit, ata mund ta dinin se ua bënte Kryeministri, sepse Kryeministri donte me çdo kusht të bëhej rektore basketbollisja, që unë s’kam asnjë vërejtje. Dhe mënyra më preçize për të nxjerrë zonjën Klodiana ishte pikërisht largimi i kandidatit tjetër. Ishte llogari perfekte, këta atij iu drejtuan, ata i dinin këto, por u treguan qytetarë të përgjegjshëm. Ata e dinin që ai do t’i thoshte menjëherë Shullazit. Po përse nuk e arrestuan menjëherë Shullazin që kur të dilja unë të thoshin po flet pas pilafit ky. Jo, jo, s’mund ta arrestonin.
– Ju pretendoni se arrestimi i Shullazit erdhi vetëm pas konferencës suaj të shtypit, nuk do e bënte Rama këtë…
Po pse nuk e arrestoi Rama, pse nuk e arrestoi, por e liroi kur në Qafë Kashar, u plagos, e mori dhe tha nuk është plagosur.
– Megjithatë preteksti përse e thirrën në polici nuk ishte ky…
Preteksti pse e thirrën në polici ishte për ta shpëlarë, siç e shpëlanë me Qafë Kasharin. Aty pasi njoftoi Çipa, i cili është një lloj Shullazi se e kapën, se ishte në makinë, se e kapën plumbat në shpinë, se kishte gëzhoja në makinë, se u gjetën dhe 3700 euro aty, ia mori të gjitha Saje Qorri këto me urdhër të Edi Ramës dhe erdhi këtu të nesërmen nga Drejtoria e Policisë së Tiranës, u tha që këto janë dy çështje të palidhura, ai s’ka qenë fare atje. Dhe i thanë shko kërcëno kryetarin e opozitës. Është e njëjta kohë dhe në vazhdim kjo.
– Po Prokuroria e Përgjithshme përse duhet të priste këtë rast….
U detyrua të dalë në skenë kryeprokurori i vendit për t’u arrestuar ai. Nuk e arrestonin ndryshe. A e di ti që oficeri i policisë e refuzoi urdhrin për të shkuar për ta arrestuar dhe e arrestoi oficeri i Policisë Gjyqësore që punon me prokurorin? Ata e thirrën në polici tani që dola unë, sepse donin ta shpëlanin…
– Çfarë diskutuat me zotin Lu dhe pse e viziton kaq shpesh zyrën tuaj ambasadori?
Diskutuam për Reformën në Drejtësi, më shprehu interesin e tij të madh që amendamentet të kalojnë kur të arrihet konsensusi. Domethënë për amendamentet që do të bien dakord do të ketë një qëndrim që ato do të votohen dhe unë mendoj se kërkesa është e drejtë, për një gjë që bie dakord është e pandershme që të lëvizësh nga konsensusi. Tradicionalisht këtë e ka bërë Edi Rama s’e ka bërë kurrë Partia Demokratike, por një kërkesë të tillë ai e ka paraqitur edhe në takimet e tjera. Diskutuam për parimet mbi të cilat janë ndërtuar ose ndërtohen amendamentet, domosdoshmërinë e dialogut politik, me sa di unë nesër është caktuar një ditë tjetër e mbledhjes së komitetit ad hoc për reformën, diskutuam gjithashtu edhe për Arben Frrokun, ku unë i solla si argument të lidhjes së tij direkt me Edi Ramën faktin që u arratis nga Puka pasi u takua me të dhe është i filmuar dhe i fotografuar, faktin që e kaluan në Murriqan.
– I keni këto filmime zoti Berisha?
I kam pas deri vonë dhe i gjej prapë….
– Në atë kohë zoti Rama e përgënjeshtroi…
Absolutisht, po ai duket qartë siç po shohim njëri-tjetrin në turizmin e Pukës Arben Frroku me Edi Ramën. Të nesërmen ai i iku, të pasnesërmen ai mori dënimin me burgim të përjetshëm, kaloi Murriqanin pa i vënë vulën në pasaportë dhe këtë e kanë dhënë të gjitha mediat, shkoi në kufirin midis Malit të Zi dhe Kroacisë, e bllokuan sepse shtetas shqiptar që nuk kishte marrë as firmën e shtetit të vet me dokumente, atëherë ai i çoi një sms ose Ramës ose Saje Qorrit dhe i thanë lëre se është i yni. Ata me siguri e kanë marrë për ndonjë agjent të sigurimit të fshehtë sepse atyre u bëhen lehtësime të tilla dhe më kryesorja atë që thanë mediat se Edi Rama nuk e ka shpallur atë në kërkim ndërkombëtar. Kjo është dëshmi e një bashkëpunimi kriminal të shëmtuar. Dija shumë mirë se prej dy muajsh ai ishte arrestuar dhe tani po të them tjetrën, Edi Rama i ka dërguar njeri në Holandë. Edi Rama i ka dërguar njeriun e tij në Holandë gjatë kësaj periudhe Arben Frrokut. Mikun e tij i ka dërguar në Holandë.
– Po çfarë mund të bisedojë zoti Rama me të…
Çfarë mund të bisedojë? Ai është dëshmitar i tmerrshëm për Edi Ramën, ai u arratis me konsensusin e Edi Ramës, dokumentet nuk iu vulosën me urdhër të Edi Ramës, ai u lirua nga njësitë malazeze në kufi me Kroacinë me urdhër të Edi Ramës. Këto janë bomba të mëdha që e ndjekin Edi Ramën gjithë jetën. Po përse ia dërgoi njeriun në Holandë shko dhe pyet Edi Ramën.
– Si ka mundësi që një Kryeministri kaq shumë i lidhur me krimin sipas jush dhe që ambasadori i SHBA e ka këtë informacion pritet në Shtëpinë e Bardhë?
Përsa i përket pritjes në Shtëpinë e Bardhë, të jesh i bindur që sekretari i Shtetit John Kerry dhe Presidenti Obama nuk kanë asnjë lëkundje në qëndrimet e tyre ndaj oligarkëve, krimit, lidhjeve me krimit, pasi janë ata, të cilët e autorizojnë përfaqësuesit e tyre në Tiranë të shqiptojnë edhe emra kriminelësh në një rast të paprecedent. Por politika është politikë. Sekretari Kerri erdhi në Shqipëri dhe tha atë që fshehu në mënyrë të paskrupullt Edi Rama, duket se këta ia kishin kërkuar që të mos e deklaronte në konferencë shtypi dhe ai i qëndroi, por tha “Unë erdha në Shqipëri, për të falënderuar Shqipërinë për ndihmën e madhe që po na jep për refugjatët e kampit Liria”. Ky kamp është një problem nevralgjik sa ç’është ndoshta edhe burgu i Guantanamos ose edhe më shumë për SHBA. Edi Rama ka premtuar marrjen e të gjitha banorëve të atij kampi.
Pa bërë asnjë transparencë, sot më në fund i detyruar nga opozita, ai është detyruar t’i kthejë përgjigje deputetit Noka se janë marrë 1210 dhe deri në fund të vitit do të merren edhe 1910 të tjerë. Dhe unë e përgëzoj, ky është një vendim shumë i drejtë, Shqipëria ka detyrime pafund ndaj SHBA për atë që kanë bërë për lirinë tonë, por absolutisht dil dhe thuaji shqiptarëve. Por ky nuk bën transparencë, ky ka frikë dhe detyrohet opozita t’ia nxjerrë sikur është ndonjë sekret shtetëror. Çdo hap që kam bërë në jetën time të tillë unë e kam njoftuar paraprakisht. Më kanë kërkuar që, a duhet ta informojë opozita dhe absolutisht me kënaqësi. Opozita duhet të informohet. Ky ka konceptin e vjetër. Më në fund e dha dhe shifrën rreth 2000.
– Ka ndikuar ky gjest në vizitën e Ramës në Shtëpinë e Bardhë?
Absolutisht. Pesha e këtij akti është kryesore dhe nuk ka diskutim… Ideja ime ishte kjo, unë mora në fillim 210 për të parë se si do të adaptoheshin, do të vazhdoja të merrja. Duhet të dini një gjë, kur më është kërkuar më parë nga qeveria amerikane ata kanë qenë në lista si organizatë terroriste dhe gjëja e parë që u kam kërkuar ju do t’i hiqni nga lista, se duke i patur në listë unë nuk i marr kurrë. DASH më ka dhënë shumë të drejtë dhe u kam kërkuar që në një mënyrë apo një tjetër OKB do të ketë një sy mbi këta, se këta janë qytetarë të huaj, unë dua që këta të kenë garancirat më maksimale në Shqipëri. Shqipëria përballon absolutisht çdo gjë dhe ata më kanë dhënë të drejtë dhe kanë ardhur këtu pasi janë hequr nga lista.
– A keni pasur dyshime se amerikanët lëshojnë Reformën në Drejtësi në këmbim të 200 iranianëve?
Sekretari Kerri deklaroi qartë në konferencë shtypi këtu Reformën në Drejtësi sipas parimeve të Komisionit të Venecias. Unë nuk them se nuk ka forma apo parime të tjera mbi të cilat mund të ndërtohet sistemi i drejtësisë dhe ky është sistemi amerikan, që për mua është drejtësia më funksionale e botës. Lidhur me të qenurin në Shtëpinë e Bardhë, Presidenti i Hondurrasit 6 muaj para arrestimit të tij ishte në Shtëpinë e Bardhë, në Dhomën Ovale, Presidenti Obama njerëzisht i kërkoi atij që të pranojë që të bëhet hetim për korrupsion, e pranoi, prokurorin ia përzgjodhi OKB dhe sot është në burg. Nuk i shërbeu Presidentit të Hondurrasit si pasaportë shpëtimi nga hetimi, përkundrazi ia përshpejtoi hetimin. Kurse sekretari Kerri, Presidenti Obama jam shumë i sigurtë siç e kanë bërë edhe publike inkurajojnë Reformën në Drejtësi. Për Reformën në Drejtësi Edi Ramës i ka fol hollësisht që vizitën që nuk e ka mohuar dot kurrë, për vizitën që i ka bërë në qeli Viktor Pontës, ai ka thënë kjo e imja do të duket suitë.
-Ka një pretendim për një drekë me të, ju po thoni e ka vizuar në qeli…
Në qeli e ka vizituar…
-Është pak e vështirë për t’u besuar, çfarë i duhet një Kryeministri të vizitojë një të arrestuar…
E kishin shumë mik Pontën. Ata shkuan kastile për ta pyetur si ndodhi me ty. Fillimisht mendonin se ia bëri Basesku, as Presidenti aktual. Ua tha vetë ai, njeriu që emërova vetë tha, i bënë një brain-washing dhe ja ku më çoi. Nuk ka mohuar gjë Rama.
-Keni deklaruar se për këtë arsye Rama po bllokon Byronë…
Komplet.
– A e pranon ambasadori amerikan se ka pasur realisht një konsensus mes PD dhe zotit Rama?
Mos prit kurrë ti që ambasadori amerikan që bën ndërmjetësin të akuzojë një palë tek pala tjetra.
– Pas takimit të sotëm a keni besim dhe a shpresoni se Refoma në Drejtësi mund të kalojë?
Nuk besoj se Reforma në Drejtësi mund të kalojë nga ky Parlament. Personalisht jam përpjekur të jap se secila është mënyra më e mirë e procedimit për realizimin e saj, por të them që Edi Rama do të pranojë me gjithë këto afera të tmerrshme në shpinë korruptive dhe lidhje me krimin, unë nuk besoj. Unë di një bisedë që ai ka bërë në hollin e Parlamentit, një bisedë që ai ka bërë në prani të eksponentëve kryesorë të koalicionit të tij dhe përfaqësues të PD, ku në një moment të caktuar nën efektin e mallit apo nuk e di ai vjell çdo gjë kundër reformës dhe jo vetëm kundër reformës, por edhe pak më tutje.
– Në rast se Reforma në Drejtësi dështon…
Unë nuk besoj se do të dështojë reforma, unë u përkas atyre që besojnë se do të ecë reforma. Natyrisht mund të ketë modifikime të një apo dy çështjeve dhe kjo gjithmonë për parim dhe jo me specifika të veçanta, por kjo s’do të thotë se nuk ecën reforma. Po të ishte marrë parasysh varianti im, Byroja Kombëtare e Hetimit do të kishte të paktën 6 muaj në funksion. Nuk u bë. Dikur do të vendoset. Por ai variant që kam sugjeruar është identik me atë që solli Venecia në variantin e parë, nuk u bë as herën e dytë. Një gjë është e sigurtë që s’mund të bëhet kurrë në variantin e Ramës.
Intervistoi: Çim Peka
