Nga Rigels Seliman
Në një kohë kur fëmijët tanë janë më shumë të lidhur me ekranet e telefonëve sesa me librat dhe aktivitetet kulturore, qeveria shqiptare po përpiqet të hedhë fajin mbi rrjetet sociale, si Tik Tok, për ndikimin negativ tek brezi i ri. Kjo është një përpjekje e pamatur për të fshehur dështimin e një sistemi të kalbur edukativo-kulturor, i cili, në vend që të ofrojë mundësi për zhvillimin intelektual dhe krijues të fëmijëve, i ka lënë ata në baltë, pa alternative. Fajësimi i Tik Tokut dhe rrjeteve sociale nga kryeministri Edi Rama është i pasaktë dhe i padrejtë, sepse ato janë vetëm pasojë e një sistemi që ka dështuar të krijojë mundësi për zhvillimin e fëmijëve.
Në vend që të ofronte mundësi dhe hapësira për shprehjen artistike dhe kulturore, qeveria shqiptare ka mbyllur teatrot, kinematë dhe ka shkatërruar sheshet e lojërave. Pse duhet të çuditemi që fëmijët e sotëm, kur nuk kanë mundësi të shikojnë një film të mirë, të frekuentojnë një teatër ose të argëtohen me aktivitete kulturore e sportive, i kthehen Tik Tokut? Ky është rezultat i një politike të kultivuar nga qeveria, e cila ka investuar shumë më tepër në ndërtimin e pallateve se sa në hapësira për kulturë dhe arsim. Kur nuk ofron gjë për të rritur shpirtin e fëmijës, ata do të kërkojnë një mënyrë tjetër për të kaluar kohën, dhe Tik Toku u ofron mundësinë për të shpërthyer në botën e informacionit dhe argëtimit virtual, pavarësisht se sa shumë mund të jetë kjo e dëmshme.
Në vend që të përmendë rrjetet sociale si shkakun e rënies morale të shoqërisë, Z. Rama dhe qeveria e tij duhet të reflektojnë për atë që ata nuk kanë ofruar. Kur teatrin kombëtar e shembin dhe e çojnë në një godinë të dytë e pa kushte, kur kinematë janë shndërruar në parkime, kur mjediset për fëmijët janë të pakta dhe të pasuksesshme, nuk mund të presim që ata të zhvillohen shëndetshëm. Përkundrazi, duhen ofruar mundësi për krijim, mësim dhe zhvillim të aftësive, jo vetëm nëpërmjet rrjeteve sociale. Nëse qeveria do të mendonte se çfarë mund të bëjë për të rinjtë, do të investonte në shndërrimin e infrastrukturës kulturore dhe edukative.
Në këtë situatë, Tik Toku është vetëm një pasojë e një mungese të thellë të mundësive që i ofrohen fëmijëve tanë. Ajo është një shpërqendrim që është krijuar nga mungesa e alternativave të shëndetshme. Çfarë mund të presim nga një sistem që shemb dhe shpërndan çdo mundësi zhvillimi për brezin e ri? Këtu, në vend të një politike aktive për ringjalljen e kulturës dhe edukimit, kemi një qeveri që fshihet pas gishtit dhe gjen fajin tek të tjerët.
Në fund të fundit, Z. Kryeministër, nuk është Tik Toku që i ka shpërbërë fëmijët tanë. Ata janë produkt i një sistemi që nuk ka investuar asnjëherë në të ardhmen e tyre, që ka braktisur kulturën, arsimin dhe ka krijuar një ambient që i detyron të mbështeten te rrjetet sociale për argëtim dhe zhvillim. Fajësimi i Tik Tokut është vetëm një tentativë për të fshehur dështimet e një qeverie që, ndërsa predikon “rilindjen”, nuk ka ofruar asgjë për rinovimin e kulturës dhe edukatës për brezin e ri në Shqipëri në këto 30 e kusur vite demokraci.
