Gary Medel do të rikthehet në fushat e blera në fillim të vitit 2017-ës. Përfundoi me sukses operacioni të cilit iu nënshtrua, mesfushori kilian i Interit në një klinikë të Barcelonës. I dëmtuar në ndeshjen e të dielës së kaluar ndaj Milanit, Medel vendosi t’i drejtohej sallës së operacionit për të lënë pas problemet në menisk, por tashmë atij do t’i duhet minimalisht 1 muaj e gjysmë për t’u riaftësuar. Objektivi i Pitbullit siç njihet ndryshe 29-vjeçari për shkak të shpirtit të tij luftarak, është të jetë i gatshëm për takimin e parë të Interit pas pauzës dimërore atë ndaj Udineses në datën 8 janar.
Në derbin ndaj Milanit, Pioli e aktivizoi Medel-in si qëndërmbrojtës pozicion të cilin lojtari e bën shumë mirë te përfaqësuesja kiliane. Por pas diçka më shumë se 30 minutash, Medel u detyrua të linte fushën, duke i bërë vend Murillos. Me kilianin në fushë Milani nuk arriti të rrezikonte për asnjë moment portën e Handanoviç dhe dëmtimi i Medel në këtë fazë delikate të sezonit nuk i duhej Interit, me Piolin që kishte gjetur te 29-vjeçari një shok të denjë reparti për Joao Mirandën. Medel humbet kështu sfidat e mbetura të këtij viti, ku mbi të gjitha spikasin dy takimet e radhës në Serinë A, ndaj Fiorentinës dhe Napolit si dhe përballja e 21 dhjetor-it ndaj Lazios.
