NGA NERITAN VLADI

Vitin tjetër në këtë kohë, shqiptarët kanë vendosur kush do ti qeverisë për 4 vitet e ardhshme.

Madje, sot një vit do të diskutohet kush do jetë kabineti qeveritar dhe i kujt force politike që do të drejtojë dhe performojë për një Shqipëri të zhvilluar, pa krim dhe korrupsion dhe drejt BE.

E vetmja forcë politike që po punon që të jetë e gatshme për një Shqipëri ndryshe, një Shqipëri që meriton më shumë, është Partia Demokratike e Shqipërisë dhe kryetari i saj Lulzim Basha.

Me qëllim që për çfarë theksova më lartë të realizohet, PD dhe lideri i saj së bashku me ekipin drejtues kanë punuar dhe po punojnë që jo vetëm të dalin me një program të shkëlqyer siç dhe u prezantua më datë 1 qershor, por edhe me kandidatët më të mirë për deputet në zgjedhjet parlamentare të vitit 2025.

Të shtunën PD prezantoi për shqiptarët një program që në fokus ka qytetarin, të ardhmen e Shqipërisë dhe shqiptarëve dhe zhvillimin e vendit duke qenë se ka çdo potencial të mundshëm për ta arrirë.

E për të arritur këtë kryetari Basha premtoi në krye të herës atë që është më e rëndësishme sot, atë që cdo qytetar e kërkon luftën ndaj korrupsionit galopant që është kthyer në gangrenë për ekonominë.

Pikërisht aty janë paratë ku duhen marrë, para që shkojnë në xhepat e hajdutëve të administratës dhe drejtuesve të saj. Lulzim Basha me ekspertët më të mirë të ekonomisë tashmë ka nisur një debat kombëtar që programi i PD të jetë program i gjithë shqiptarëve.

E ka nisur pikërisht gati 1 vit para zgjedhjeve për ta diskutuar, debatuar dhe pse jo aty ku ka argumente nga ekspertët dhe qytetarët edhe për ta ndryshuar deri ditën kur do të votohet për qeverisjen e ardhshme të vendit.

PD dhe Lulzim Basha janë tashmë të qartë në atë çfarë do të iu ofrojnë shqiptarëve. Veç ekspertëve që u prezantuan ditën e Kuvendit Programor, ky program po diskutohet edhe me ekspertët më të mirë në vend siç dhe nisi me z.Selami Xhepa dhe z.Zef Preçi për ekonominë.

Ky diskutim mbi premtimet konkrete të PD do të diskutohet edhe për fushat e tjera dhe me ekspertët më të mirë sikurse dhe me vetë qytetarët.

PD është e vetmja forcë politike që mendon për Shqipërinë, e bindur që meriton më shumë. Basha ka sfiduar duke premtuar heqjen e vizave me SHBA si dhe garantuar që me mirëqeverisjen e PD integrimin e vendit në BE.

Në këtë program premtohet krijimi i xhandarmërisë, përfshihen propozimet e PD për politikën e jashtme dhe sigurinë për turizmin dhe planifikimin urban, reformën e pronës dhe të përndjekurit, do të jepen 100 milionë euro subvencione të drejtpërdrejta për fermerët shqiptarë.

Në programin e PD për shëndetësinë janë disa risi më domethënëse në shërbim të qytetarëve por do të ndiqet filozofia: -“Paraja ndjek pacientin dhe luftë mafies së barnave”.

Prioritet i programit të PD është dhe një reformë inovative arsimore ku premton programe gjithëditore dhe drekë të garantuar. Risitë e programit të PD janë dhe për rininë, punësimin dhe teknologjinë të bëra publike tashmë ku lidershipi i PD dhe kryetari Basha po e diktimojnë me ekspertët dhe qytetarët dhe madje janë gati ta ballafaqojnë dhe më kundërshtarët politikë.

Propozimet e PD për politikat sociale u bënë konkrete dhe tërhoqën dhe vëmendje saqë politikanë të trekendëshit janë bërë xheloz e ato janë në mbështetje të familjes ku: 2,000 euro do të jepet për çdo bebe dhe 20 mijë euro për fëmijën e tretë.

Konkrete është dhe premtimi i taksës së sheshtë 9%, tatim fitim 9% dhe 9% për profesionet e lira. Propozimet e PD për ekonominë çlirojnë potencialin e jashtëzakonshëm të Shqipërisë. E pamundur për të argumentuar çdo gjë në këto radhë por e vërteta është që PD dhe Lulzim Basha i kanë sytë nga shqiptarët.

Programi është konkret ku mund të themi dhe premtimin për heqjen e pagesës në Rrugën e Kombit. Realizmi i tyre shënon ditën e parë të Shqipërisë europiane.

PD është gati si alternativë qeverisëse me programin për qytetarët, “Shqipërinë që meriton më shumë” drejt BE.

Përpos kësaj, Lulzim Basha dhe lidershipi i PD po punojnë për të evidentuar më të mirët mes vetes, më të mirët në shoqëri, për t’i ftuar që t’i ofrohen dhe bashkohen realizimit të këtij programi për të dhënë edhe ata më të mirën nga vetja që PD të ringrihet fuqishëm dhe besueshëm në sytë e shqiptarëve dhe ndërkombëtarëve.

Sfida e ardhshme në muajit në vijim e PD dhe Bashës është evidentimi i tyre në komunitet, brenda dhe jashtë Shqipërisë duke iu kërkuar që të iu bashkëngjiten strukturave me anëtarësim ose jo ofrim ekspertize për një Shqipëri që ofron më shumë.

Vetëm me emra që janë ekspertë të mirë, që janë histori suksesi në të përditshme e tyre, që besojnë në të djathtën, që janë të ndershëm dhe të pakapur nga asgjë në këtë vend të kapur PD do të ngrihet fuqishëm dhe do të jetë forca qeverisëse e Shqipërisë Europiane me një kryeministër me mentalitet të tillë siç është Lulzim Basha. Koha nuk pret të gjithë duhet të japim kontribut që kjo të ndodh.

Nga Reldar Dedaj

Në politikë je i detyruar të krijosh një fabul pse je ti dhe jo një tjetër alternativa më e mirë. Je i detyruar, veç të tjerash, pasi vetë politika është një narracion. Ti duhet të tregosh, të shpjegosh, të krijosh dhe të përsërisësh çdo ditë pa u lodhur aspak të njëjtën histori edhe kur të tjerët të lodhën së dëgjuari atë, je përsëri i detyruar të krijosh një tjetër histori edhe më të bukur se e para e kështu me radhë. Pafund. Një gjë të tillë, Lulzim Basha e ka kuptuar shumë mirë. Ai ishte plotësisht i vetëdijshëm se ajo çfarë po ofron Partia Demokratike prej 11 vitesh nuk ishte asgjë tjetër, veçse se kjo forcë politike, ishte më pak e korruptuar se socialistët. Sigurisht, është sot akoma edhe më i vetëdijshëm, se pse, nuk arriti dot të krijojë një fabul të ardhjes në pushtet, përveç faktit se shqiptarët u lodhën me Edi Ramën.

Programi politik i prezantuar nga Lulzim Basha dhe forca e tij politike që drejton ka arritur fatmirësisht të ngacmojë një pjesë të konsiderueshme të opinionit publik. Me shumë gjasë, një pjesë e madhe e ideve të shprehura aty, në ditët në vazhdim, do arrijnë të ngacmojnë edhe një pjesë tjetër të kësaj shoqërie, e cila, për arsye të ndryshme dhe me të drejtë, ka krijuar një lloj alergjie ndaj ligjerimit publik, veçanërisht ndaj ligjerimit publik të opozitës shqiptare në përgjithësi, pasi pjesa më e madhe e trupit të saj politik është angazhuar më shumë tek hallet personale të familjes Berisha, sesa tek problemet e qytetarit shqiptar. Kjo pjesë e opozitës që paralelisht, nga njëra anë i vë flakën gomave para bashkisë së Tiranës dhe nga ana tjetër tenton të bllokojë foltoren e Kuvendit të Shqipërisë, do ta ketë shumë të vështirë, për të mos thënë të pamundur, ta ndryshojë gjellën e kazanit politik. Ata thjesht duan pjesën e tyre të racionit që Edi Rama ia ka zvogëluar shumë.

Diferenca e shprehur në terma, shifra dhe fakte konkrete mes asaj që propozon Lulzim Basha dhe forca e tij politike që drejton me atë që ofron dyshja politike Berisha dhe Meta është jo vetëm e thellë dhe e ndryshme, por është e vetmja rrugë që e lufton rendin aktual. Dialektika politike e dyshes Berisha-Meta jo vetëm që nuk e eleminon ”regjimin Rama”, që në fakt është regjimi ”Rama-Berisha-Meta”, por, përkundrazi, forcimi politik i dyshes Berisha-Meta, thjesht është një standard që forcon dhe riciklon në pafundësi pushtetin politik të Edi Ramës. Thjesht për këtë arsye dhe për asgjë tjetër është kaq i rëndësishëm për qytetarin shqiptar prezantimi i programit politik të Partisë Demokratike për zgjedhjet parlamentare të vitit 2025, pasi shkatërron dialektikën politike të prezantuar prej 11 vitesh nga dyshja Berisha-Meta, sepse një dialektikë e tillë, që nga njëra anë i vë flakën gomave para Bashkisë dhe nga ana tjetër tenton të bllokojë foltoren e Kuvendit të Shqipërisë është një pamje kaq e vjetër për qytetarin shqiptar, sa veçse i përforcon atij bindjen se vërtetë dyshja politike Berisha-Meta nuk kanë kapur pushtetin, por ama kanë kapur opozitën, duke e vendosur atë në funksion të ambicieve dhe të interesave të tyre personale dhe familjare.

Prezantimi i programit politik nga ana e PD-së dhe Lulzim Bashës ka edhe një të mirë tjetër po kaq të rëndësishme, pasi e ka futur me dhunë, debatin rreth Partisë Demokratike dhe opozitarizmit në korsinë e ideve, fakteve dhe shifrave, të gjitha të debatueshme, padiskutim, por ka krijuar ama, me pahir, një ligjerim publik ku shtresat shoqërore mund ta pranojnë dhe ta kundërshtojnë, mund edhe ta refuzojnë, sigurisht, por s’mund të thonë se nuk ekziston një ide, qoftë ajo edhe pabesueshme për mendjen e tyre. Në fund, nuk është asgjë tjetër, veçse një program që tenton të rregullojë jetën e tyre, pasi prej 11 vitesh qeverisje socialiste, Shqipëria vazhdon të mbetet vendi i fundit në rajon për nga zhvillimi ekonomik dhe demokratik, pothuajse në të njëjtin stad, kur socialistët morën pushtetin në 2013-ën.

Prezantimi i programit politik ka sjellë për demokratët në veçanti, por edhe për shoqërinë shqiptare në përgjithësi, përveç të tjerash, rendin normal të gjërave. Konfliktualiteti, dhuna, agresiviteti dhe tensioni i krijuar me qëllim ndaj institucioneve shtetërore, i ndihmuar shumë edhe nga një pjesë e konsiderueshme e mediave shqiptare, prodhon fragmentarizim permanent të shoqërisë, duke e ndarë në dysh atë, pasi ndarja e saj e thellë, e shprehur me dhunë verbale dhe jo verbale prodhon ekstremitet, e siç dihet, ekstremitetet përveç dhunës, për regjimin politik ”Rama-Berisha-Meta”, do të thotë më pak kosto ekonomike. Nuk është nevoja për t’u investuar në asete intelektuale të shoqërisë, për të prodhuar ide dhe alternativa shoqërore, por për të ndarë në dysh shoqërinë, për të prodhuar ekstremitete, për të prodhuar konflikt, për ta luftuar mendimin. Dhe, për ta realizuar këtë, mjaftojnë veçse pak njerëz, ata që janë më të devotshmit që bluzën ”Free Berisha” ta mendojnë si bekim…