Zëdhënësja e PD, Mirela Karabina, duke iu referuar të dhënave të INSTAT, shprehet se në vitin akademik 2022-2023 u diplomuan 13,808 studentë në ciklin e studimeve “Bachelor”, me rënie vjetore 13,8 për qind.

Në një postim në Facebook, Karabina thotë se “qeveria e Edi Ramës që ka 11 vjet në pushtet dhe ka pasur kohë të mjaftueshme që të ndërmarrë reforma reale në arsim dhe të prekte rezultatet, nuk ka pasur vullnetin politik për ta bërë këtë”.

POSTIMI I PLOTË:

Kambanat për arsimin që kanë rënë në veshin e shurdhët të qeverisë.

Referuar të dhënave publike të INSTAT për Arsimin e Lartë, rezulton se në vitin akademik 2022-2023 u diplomuan 13,808 studentë në ciklin e studimeve “Bachelor”, me rënie vjetore 13,8 për qind.

Qeveria e Edi Ramës edhe pse 11 vjet në pushtet dhe ka pasur kohë të mjaftueshme që të ndërmarrë reforma reale në arsim dhe të prekte rezultatet, nuk ka pasur vullnetin politik për ta bërë këtë.
Arsimi i cili është shërbim themelor publik, qeveria e ka përdorur vetëm për propagandë në dëm të familjeve shqiptare , shoqërisë dhe vendit.

Investimi i ulët ne Arsimin e Lartë dhe Kërkimin Shkencor, reforma të dështuara që në nisje, politika të gabuara pse jo dhe klienteliste kanë ndikuar drejtëpërdrejtë në mendësi dhe cilësi në universitete duke i zbritur ato thuajse në nivelin e arsimit të mesëm.

Staf kademik jo të mirëformuar dhe të mirëkualifikuar, metedologji të vjetëruar dhe të menduarit kritik përmes logjikës e deduksionit ende nuk është në bosht të saj, mungesa e mjeteve dhe praktikave si pjesë e formimit dhe kualifikimi studentor, mungesa e prespektivës, punësimit dhe ndërtimit të një jete të mirë janë arsyet që një pjesë e madhe e studentëve largohen për studime jashtë vendit.
Nga afro 30 mijë maturantë më 2023-in, 10 mijë prej tyre aplikuan për studime jashtë vendit, pra 1/3 e tyre.

Ky eksod masiv nuk po ndalet dhe kjo qeveri nuk do që ta ndalë!

Me këtë ritëm të largimit të studentëve dhe të rinjve, ekonomia e vendit shumë shpejt do të përballet me mungesë specialistësh të fushave të ndryshme dhe zhvillimi i vendit do të ngadalësohet.

Pasi rënia e numrit të studentëve në nivelin “Bachelor” dëshmon jo vetëm largimin e të rinjve jashtë vendit për studime, por diploma univeristare po i shërben si pasaportë punësimi dhe jetese në vendet që arsimohen.

Premtimi më 2013-ën i Edi Ramës se buxheti për arsim do të arrinte nivelin 5% të PBB, rezulton mashtrim. Pasi sot investimi në arsim është ndër më të ultit në tri dekadat e fundit, 2.3% të PBB, dhe më ulti ndër vendet e Rajonit.

Kambanat për arsimin dhe largimin e të rinjve kanë kohë që bien, por qeveria nuk do t’i dëgjojë.

Ndërhyrja në këtë fushë me interest të madh kombëtar është urgjente!

Partia Demokratike ka dhe vullnetin dhe vizionin për ta ndryshuar këtë realitet dramatik të largimt masiv të studentëve dhe të rinjve duke filluat nga rritja e buxhetit për arsimin dhe politikave mbështetëse e zhvillimore.

Arsimi dhe rinia do të jenë në boshtin e programit e saj pasi me një arsimim cilësor dhe një rini vitale të mbështetur dhe të qartë në rrugën e saj, perespektiva e zhvillimit të vendit do të jetë e sigurtë.

Sekretari për Programin në PD, Arbi Agalliu, ka reaguar për skandalin e mikrokredive që ka dëmtuar rreth 103 mijë qytetarë. Në një deklaratë për mediat, Agalliu shprehet se kjo skemë gjigande mashtrimi vazhdon të jetë në proçes mashtrimi nga institucionet financiare të cilët janë frymëzuar, ngritur dhe toleruar nga kryeministri dhe shpura e zyrtarëve të korruptuar.

Deputeti i PD, gjithashtu thotë se “çdo veprim i paligjshëm i kryer nga këto piramida moderne është bërë me miratimin e Edi Ramës, i cili ka pasur diejeni të plotë për veprimtarinë e tyre minimalisht që prej vitit 2020 dhe ka zgjedhur të hesht”. Për këtë Agalliu i bën thirrje SPAK që t’i shkojë deri në fund këtij skandali.

DEKLARATË E PARTISË DEMOKRATIKE, DEPUTETI, ARBI AGALLIU

Piramidat e Edi Ramës kanë dëmtar 103 mijë qytetar dhe rreth 20 mijë prej tyre vazhdojnë të jenë në proçes mashtrimi nga institucionet financiare që janë frymëzuar, ngritur dhe toleruar nga ai dhe shpura e zyrtarëve të korruptuar.

510 milion euro janë paguar nga qytetarët më të pamundur të shoqërisë shqiptarë të cilët të presionuar nga funksionarët publik janë detyruar të paguajnë detyrime që nuk i kanë marrë kurrë.

570 milion euro asete janë bllokuar ose kaluar për llogari të këtyre mashtruesve financiar si pasojë e lejimit të proçedurave të paligjshme nga ana e hipotekave apo si pasojë e mos ushtrimit të kontrollit të organeve kompetente mbi përmbaruesit që kanë shkelur ligjin për të ndihmuar këto piramida moderne të ideuara dhe mbështetura nga Edi Rama dhe mëkëmbësit e tij.

Çdo veprim i paligjshëm i kryer nga këto piramida moderne është bërë me miratimin Edi Ramës i cili ka pasur diejeni të plotë për veprimtarinë e tyre minimalisht që prej vitit 2020 dhe ka zgjedhur të hesht dhe të mos marr asnjë masë për të parandaluar këtë krim që ka prekur 103 mij shqiptar.

Partia Demokratike e Shqipërisë i bën thirrje Prokurorisë së Posaçme SPAK që të çojë deri në fund hetimet e nisura për këtë skemë gjigande mashtrimi si dhe të marri në përgjegjësi penale të gjithë zyrtarët e lartë që kanë pasur dijeni për të dhe e kanë lejuar duke filluar nga Edi Rama dhe e gjithë shpura e tij e korruptuar.

PD vazhdon përgatitjet për prezantimin e programit në 1 qershor. Kreu demokrat Basha përmes postimit të rradhës e ka fokusuar vëmendjen tek diskutimet e projektit për rininë.

Vijojmë takimet për finalizimin e programit qeverisës të Partia Demokratike. Rinia është zemra e projektit tonë, sepse ne besojmë se rinia ka forcën dhe kapacitetin për të sjellë ndryshimin e Shqipërisë.

Me programin tonë jemi gati për t’u dhënë zgjidhje problemeve të vendit për të ndalur emigrimin, për t’u dhënë mundësi qytetarëve tanë të kthehen dhe të punojnë në vendin e tyre.

Anëtarja e Kryesisë së PD, Marinela Ziu, shprehet se fondet për investime thuajse janë bllokuar, duke përsëritur të njëjtin skenar të çdo viti parazgjedhor e duke përqëndruar të gjithë investimet gjatë periudhës zgjedhore.

Ziu thotë se e njëjta gjë nuk ka ndodhur me inceneratorin e Tiranës i cili është nën hetim nga SPAK, për të cilin janë paguar 3.8 milionë euro ose 32% të fondeve të planifikuara në vitin 2024.

Ndërkoh sipas saj, bizneset e ndershme janë në krizë mbijetese.

POSTIMI I PLOTË

Sipas Fondit Monetar Ndërkombëtar #korrupsioni ka rritur koston e investimeve publike.

Prej janarit, fondet për investime thuajse janë bllokuar, duke përsëritur të njëjtin skenar të çdo viti parazgjedhor e duke përqëndruar të gjithë investimet gjatë periudhës zgjedhore.

Por kjo jo për inceneratorin pa incenerator të Tiranës, një vepër nën hetim dhe sekuestro nga SPAK, për të cilin janë paguar 3.8 milionë euro ose 32% të fondeve të planifikuara në vitin 2024.

Nëse bizneset e ndershme janë në krizë mbijetese, #InceneratoriTiranës ka gjeneruar 23.8 milionë euro fitime, ndërkohë që do vijojë të financohet nga shteti me 12 milionë euro të tjera këtë vit ose 20% me shumë krahasuar me vitin 2023.

Gazetari dhe analisti Agim Baçi, ka komentuar deklaratat e kreut të SPAK Altin Dumani ditën e sotme në komisionin e ligjeve.

Baçi, i ftuar në studion e emisionit Open, u ndal te shqetësimi i ngritur nga ana e kreut të SPAK për përfshirjen dhe bashkëpunimin e elementëve të policisë me krimin e organizuar.

Sipas tij, alarmet e ngritura nga Dumani duhet të merren seriozisht, ndërsa shtoi se janë bërë disa herë që kreu i SPAK kërkon ndihmën e deputetëve për çështjen e policisë.

“U bë disa herë që Dumani e ka ngritur çështjen e policisë dhe ka kërkuar ndihmë nga deputetët sepse ata mund të ushtrojnë presion në disa institucione që varen nga Kuvendi që mund të ndihmojnë prokurorinë që ky alarm që Dumani ka thënë disa herë, që bashkëpunimi i shefave të policisë me krimin është alarmues. Ky është më i tmerrshmi, kur policia bashkëpunon me kriminelët vështirësohet puna dhe dekonspirohen operacionet. Ky alarm duhet marrë seriozisht dhe duhet mbështetje. Ai i kërkoi ligjvënësve që ta marrin parasysh këtë. Dumani nuk ka në varësi asnjë institucion tjetër, nuk ka shërbimin sekret, nuk ka ministrinë e brendshme. Opozitës ia ka marrë parasysh denoncimet, e ka marrë denoncimin e Këlliçit për drejtorët e bashkisë”, u shpreh ai mes të tjerash.

Gjatë fundjavës Prokuroria e Posaçme Kundër Krimit të Organizuar dhe Korrupsionit (SPAK) ndërmori një operacion në shkallë të gjerë duke lëshuar 50 urdhër arreste kundër eksponentëve kryesor të krimit të organizuar në vend.

Hetimi i SPAK kundër 7 organizatave kriminale i bazuar tek të dhënat e aplikacionit të koduara Sky ECC dhe EncroChatt, nuk ka zbardhur vetëm 18 episode kriminale – të cilat luhaten nga vrasja te ndihma për kalim të paligjshëm të kufirit, por ka bërë të dukshme dhe ka faktuar edhe lidhjet mes grupeve kriminale dhe politikës në Shqipërisë.

Të dhënat e bëra publike nga ky hetim i SPAK tregojnë se tre deputetë të Partisë Socialiste, nga të cilët dy nga legjislaturat e shkuara dhe një nga legjislatura aktuale, kishin familjarë ose janë përfshirë në mënyrë të drejtpërdrejtë në aktivitete kriminale si pjese e strukturave të krimit të organizuar.

Sipas ekspertëve këto të dhëna janë dëshmi të lidhjeve të forta midis krimit të organizuar dhe politikës në Shqipëri, të cilat janë rrënjosur prej dekadash.

“Politika dhe krimi kanë ekzistuar prej dekadash në simbiozën më të shëmtuar në vendin tonë – njëra palë ushqente tjetrën dhe të dyja se bashku janë ushqyer mbi kurrizin e shqiptarëve”, tha Redion Qiriazi, ekspert sigurie me eksperiencë 15-vjeçare nw studimin e krimit të organizuar.

Ndërkohë Arjan Dyrmishi, drejtor ekzekutiv i Qendrës për Studimin e Demokracisë dhe Qeverisjes, i tha BIRN se lidhjet midis krimit dhe politikës në Shqipëri nuk janë rastësore, por një investim proaktiv i organizatave të krimit të organizuar për të “siguruar mbrojtje ndaj goditjeve apo dënime sa më të lehta”.

Dyrmishi theksoi se pikërisht për shkak të këtij investimi dhe lidhjeve të forta mes krimit dhe politikës edhe suksesi i drejtësisë është ende në pikëpyetje.

“Ndarja e krimit nga politika, administrata dhe ekonomia ka për të qenë një operacion afatgjatë dhe mendoj se me gjithë kahun pozitiv të deritanishëm, suksesi i këtij operacioni nuk është akoma i garantuar”, tha ai.

Operacioni i SPAK

Të shtunën me 18 maj, SPAK njoftoi mbylljen e njërit prej operacioneve më të mëdha kundër krimit të organizuar në vend. Sipas njoftimit për shtyp 7 grupe kriminale me shpërndarje thuajse në të gjithë vendin u goditën, ndërsa u ngrit akuzë ndaj 50 personave.

Nën akuzë u vu Arben Ndoka, ish-deputet i Partisë Socialiste i shpallur në kërkim dhe një listë e gjatë me bashkëpunëtorë dhe armiq të tijtë, përfshi figura të njohura të botës së krimit, si Astrit Avdyli, Gjergj Culkali, Emiljano Shullazi, Endrit Dokle dhe të tjerë.

“Operacioni i drejtuar nga SPAK dhe i rënë dakord me Europol më datë 17 maj 2024, zgjati për rreth 20 orë, ku u angazhuan afërsisht 30 hetues të BKH-së, forcat RENEA, Policia e Shtetit, si dhe Europol i cili caktoi një Oficer pranë SPAK për të mbështetur këtë Operacion. U kryen veprime hetimore në qytetet e Tiranës, Durrësit, Vlorës, Shkodrës, Lezhës, Rrëshenit, Kurbinit, Fushë-Krujës dhe Krujës. Gjatë këtyre veprimeve hetimore u ushtruan kontrolle në rreth 50 ambiente banimi,” bëri të ditur SPAK në një njoftim zyrtar.

SPAK njoftoi sekuestrimin e pasurive me vlerë rreth 4.5 milionë euro, përfshirë gati 1 milionë euro në para të thata, orë me vlerë rreth gjysmë milion euro apo gjysmë milion euro të tjera automjete, pesë prej të cilave ishin të blinduara. Katërmbëdhjetë persona u arrestuan në Shqipëri gjatë operacionit, ndërsa gjashtë të tjerë u arrestuan në Itali, Gjermani, Spanjë dhe Belgjikë.

SPAK bëri të ditur se zbardhi 18 episode kriminale, përfshirë vrasje, tentativa për vrasje, bomba, kultivim apo trafikim droge e të tjera. Goditja u bë e mundur falë informacioneve të siguruara prej autoriteteve franceze nga aplikacionet Sky ECC dhe EncroChat, dy aplikacione celularësh që besohej se ofronin komunikim të sigurt dhe që ishin popullore për figurat e krimit të organizuar.

Për ekspertët e sigurisë operacioni është një hap i suksesshëm, që do sjellë rritje të besimit te drejtësia, por që duhet të shihet vetëm si një hap i parë.

“Arrestimet e fundit padyshim dëshmojnë për një rritje të efektshmërisë dhe efikasitetit të SPAK në luftën kundër krimit të organizuar dhe korrupsionit në vend”, tha Redion Qirjazi.

Arjan Dyrmishi theksoi se operacioni duket se dëshmon një ndryshim në mënyrën se si po zhvillohen hetimet. Sipas tij ka një ndryshim me hetimet e cekëta të mëparshme që ndalonin te përsonat e kapyr në flagrancë dhe nuk shkonin te organizatorët e lehtësuesit.

“Shumë rrallë hetimet mund të jenë shtrirë për të përfshirë dhe personat lehtësues që formojnë miksin e lartëpërmendur”, tha ai ndër të tjera.

Nga ana e tij eksperti i sigurisë Pëllumb Nako, oficer i Policisë së Shtetit në pension, shprehet se ky operacion është vetëm një hap i parë, por sheh me optimizëm faktin që hetimet nuk u ndërprenë kur u arrit te emra politikanësh.

“Kjo sepse më parë hetimet në këtë drejtim ose janë ndërprerë fare ose dhe nuk janë thelluar duke rezultuar të pjesshëm pa u shkuar deri në sekuestrime pasurish e akte të tjera”, thotë ai.

Tentakula të shtrira

Për Pëllumb Nakon aksioni i SPAK dëshmon për lidhje të forta mes krimit dhe politikës. Këto lidhje sipas tij ishin të perceptuara dhe të përmendura në media, por mohoheshin nga klasa politike.

Por ai shprehet i shqetësuar për përmasat e kësaj lidhje dhe infiltrimin e strukturave shtetërore nga organizatat kriminale. Sipas tij SPAK provoi përmasat e krimit të organizuar, që përfshin individë që hynë si politikanë në parlament, pushtetarë lokalë, investitorë të ashtuquajtur strategjikë dhe punonjës të niveleve të ndryshme të policisë.

Nako tha se kjo situatë ka sjellë një krim të organizuar gjithmonë e më të fortë, i cili veç të tjerash ka futur duart edhe në fondet publike.

“Të gjithë të lidhur në grup dhe në bashkëpunim ndër grupe dhe me financa të fuqishme që garantojnë paprekshmëri nga organet e drejtësisë, mbrojtje politike dhe ligjore për të kryer më pas investime publike nëpërmjet fondeve publike”, theksoi ai.

Nako shtoi se përtej operacionit situata është e rëndë, ndërsa paratë e pista rrezikojnë ekonominë e vendit.

“Pastrimi i parave në vendin tonë duke qartë se sa përmasa alarmante ka për ekonominë dhe për vetë shoqërinë shqiptare”, tha ish-oficeri i lartë i policisë.

Për ekspertët lidhjet e thella mes krimit dhe politikës janë të dukshme prej kohësh. Qirjazi përmend se të njëjtat organizata kriminale të goditura në këto operacione, kanë qenë më herët pjesë e fushatave elektorale dhe kanë bërë grumbullim votash për partitë politike dhe nga ana tjetër kanë përfituar akses në fondet publike.

“Këto të dyja janë faqet e kundërta të së njëjtës monedhë. Mjafton të përmendësh këtu ndërhyrjet e grupeve kriminale në fushata elektorale, financimet e fshehura të partive politike, tendera të fituara nga persona me akuza penale, si dhe politikanë e drejtues lokalë të dënuar për korrupsion apo lidhje me struktura kriminale, dhe kushdo mund të kuptojë se krimi dhe politika kanë qenë partnerë të pandashëm”, tha ai.

Për Dyrmishin politika është fajtore edhe për aksesin që krimi i organizuar ka fituar në policinë e shtetit. Ai theksi se policia ka qenë që herët nën presionin financiar e korruptues të këtyre strukturave kriminale dhe se “në mungesën e një sistemi efektiv llogaridhënie dhe ndërhyrjet politike frekuente, nuk ka qenë e vështirë për krimin e organizuar të shtrinte ndikimin edhe në këtë sektor”./Reporter.al