NGA ERVIS ILJAZAJ

Rruga e opozitës për në pushtet kalon nga mbështetja
SPAK në vitet e fundit ka ndërmarrë një sërë hapash të rëndësishëm në luftën kundër korrupsionit. Njerëz me pushtet të politikës si ministra, ish-ministra, kryebashkiakë apo të tjerë që kanë menaxhuar paratë e shqiptarëve janë arrestuar, hetuar apo akuzuar për korrupsion si asnjëherë më parë në këto nivele. E megjithatë, opozita shqiptare, më saktë një pjesë e saj siç është Rithemelimi, ende nuk ka arritur që ta mbështesë publikisht punën e SPAK. Përkundrazi, një pjesë e mirë e Rithemelimit e konsideron atë si organizatë kriminale. Një sjellje absurde e një opozite që kërkon të vijë në pushtet, kur dihet që kauza e luftës ndaj korrupsionit duhet të jetë kauza e saj kryesore kur përballë ka një qeveri të korruptuar.

Kjo sjellje e Rithemelimit nuk ndryshoi edhe pse SPAK në ditët e fundit, me firmën e drejtuesit të saj Altin Dumani, zhvilloi një nga operacionet më të rëndësishme në dekadën e fundit kundër krimit të organizuar. Disa nga grupet kryesore të krimit të organizuar në Shqipëri ranë në rrjetën e SPAK dhe të drejtësisë. Kjo nuk ishte vetëm një goditje për krimin e organizuar, por edhe një goditje për pushtetin, duke qenë se shumë prej tyre janë përdorur nga kjo qeveri si hambar votash, dhe janë të ditura lidhjet e këtyre bandave me pushtetin dhe qeverinë shqiptare.

E megjithatë, përfaqësues të Rithemelimit e konsideruan këtë operacion si fasadë. Askush prej tyre nuk pati kurajon të dalë publikisht dhe të përshëndes punën e SPAK në këtë drejtim.

Duke u sjellë në këtë mënyrë, duke mos mbështetur SPAK, opozita shqiptare po humbet një nga kauzat e saj kryesore, atë të luftës ndaj korrupsionit dhe krimit të organizuar. Sepse nëse ke vërtet për zemër luftën ndaj korrupsionit, nuk mund të mos e mbështesë atë organ që po e lufton. Në të kundërtën, nuk je aspak i besueshëm për qytetarët shqiptar, ashtu sikurse po duket.

Për hir të mbrojtjes të liderve të tyre, që ose janë nën arrest apo nën hetim nga SPAK , Rithemelimi i cili është një pjesë e rëndësishme e opozitës në Shqipëri, po sakrifikon pushtetin e opozitës. Konflikti i interesit që kanë me SPAK për shkak se ky i fundit është duke hetuar liderët e tyre, e bënë Rithemelimin që ta konsiderojë këtë organi si organizatë kriminale. Asnjëherë Rithemelimi nuk ka për ta legjitimuar SPAK , edhe sikur të arrestojë të gjithë qeverinë. Për një arsye shumë të thjeshtë. Nëse legjitimon punën e SPAK , i duhet të legjitimojë arrestimin e liderit të saj.

Në këtë mënyrë, opozita shqiptare po mbron drejtuesit e saj, por po sakrifikon ardhjen në pushtet dhe po lë në opozitë për të katërtën herë radhazi popullin e saj opozitar.

Sepse është e qartë, që rruga e opozitës për në pushtet, madje e vetmja rrugë, kalon nga mbështetja për SPAK. Rithemelimi mund të bëjë çdo gjë. Mundet të marrë edhe logon e PD-s, mundet edhe të krijojë program të mirë apo çdo lloj aksioni tjetër politik. Nëse nuk mbështet SPAK, pushteti për opozitën do të jetë shumë i largët. Dhe kjo për disa arsye kryesore.

E para, sepse SPAK është i vetmi institucion që realisht po bënë luftën e tij kundër korrupsionit. Sigurisht mund të ketë mangësitë e tij, por themelet në këtë rrugë janë hedhur, dhe duken të forta. Me një qeveri të korruptuar përballë, gjë e cila tashmë nuk është më opinion por fakt, opozita se ka luksin që të humbasë kauzën e saj kryesore opozitare, atë luftës ndaj korrupsionit.

E dyta, SPAK gëzon një mbështetje tek qytetarët shqiptarë shumë të madhe. Këtë e tregojnë të gjitha sondazhet. Duke kritikuar SPAK, apo edhe më keq akoma, duke e quajtur organizatë kriminale, nuk është as sjellje elektorale. Është një sjellje që shkon në kundër tendencë me shqiptarët.

E treta, SPAK është një projekt ndërkombëtar dhe mbështetet fort nga aleatët e Shqipërisë, sidomos nga ShBA. Në këtë mënyrë opozita shqiptare po humbet partnerët e saj ndërkombëtarë. Pa të cilët dihet që është e vështirë të vish në pushtet. Sigurisht ata nuk janë faktori përcaktues, por ama kanë rolin e tyre të rëndësishëm në rotacionin politik në Shqipëri. Ti kesh kundra, nuk është asnjëherë e lehtë të vish në pushtet, është pothuajse e pamundur. Dhe fakt është që kjo pjesë e opozitës aktualisht është në izolim të plotë.

Dhe e fundit, sepse koha politike në të cilën jetojmë kërkon hetimin e korrupsionit të akumuluar ndër vite të politikës shqiptare. Këtë e kërkojnë shqiptarët, këtë e kërkon e ardhmja e tyre. Sot dikotomia e re politike nuk është më e majtë e djathtë, por pro SPAK dhe kundër tij.

Për të gjitha këto arsye, nëse opozita shqiptare nuk është e gatshme të sakrifikojë njerëzit e saj në emër të një kohe të re politike që e kërkon e ardhmja e Shqipërisë, nuk ka për të ardhur kurrë në pushtet. Të mbrosh njerëzit e tu nga drejtësia mundet të jetë njerëzore, por nuk është aspak politike. Nëse vazhdon kështu, opozita shqiptare do të ketë rreth saj një numër të caktuar votash dhe militantësh, por asnjëherë shumicën e shqiptarëve për të rrëzuar Edi Ramën nga pushteti.

Fatkeqësisht edhe luftën kundër korrupsionit po e merr si kauzë Edi Rama, pikërisht sepse opozita nuk është në gjendje të bëjë sakrificat e saj. Njeriu që duhet ë japë llogari për korrupsioni e qeverisë së tij, paradoksalisht po e kthen atë në kalë beteje. Madje po kërkon dhe aleancë politike me Rithemelimin për këtë arsye. Kjo po, që është një fasadë politike, dhe jo aksioni i SPAK kundër krimit të organizuar.

Nga Desada Metaj

Operacioni i madh, ndalimet dhe urdhërarrestet ndërkombëtare për ata që konsiderohen bosët e botës së krimit dhe të “paprekshmit” nga ligji dhe shteti ka dëshmuar qartë se pjesa më e madhe e akteve banditeske janë planifikuar dhe ekzekutuar nga njerëz me pushtet politik.

Në vorbullën e madhe të emrave të përfshirë në vrasje, trafik të lëndëve narkotike dhe krime të tjera spikasin ato të ish deputetëve socialistë. Edhe pse vëmendja e publikut është fokusuar tek “giallo” e ngjashme me filmat me mafiozë, nuk mund të lë pa përmendur dy emra kyç të këtij skandali. Ish deputetët e PS-se Arben Ndoka dhe Rrahman Rraja. I pari dorëzoi mandatin në vitin 2015 pasi u mësua se ishte dënuar në Itali për trafik të qënieve njerëzore. Rraja dorëzoi mandatin një vit më parë, pas bërjes publike të videos ku dy vëllezërit e tij Xhelal dhe Përparim Rraja dhe i biri Rexhep Rraja rrihnin dy qytetarë në lokal pasi ishin ankuar në polici në lidhje me dëmet që i kishin shkaktuar shpërthimet nga gurorja në pronësi të vëllait të deputetit. Pak vite më parë i biri i tij Rexhepi u përfshi në një tjetër skandal, atë të dhunimit të një vajze pasi ajo kishte depozituar ankesë ndaj tij në polici.

Sa më lart është vetëm pjesa e dukshme dhe më e “pafajshme” e dy ish deputetëve të PS. Në dosjen e fundit qartas vëllai i ish deputetit Rraja, në bashkëpunim me Durim Bamin i forti i Niklës, Endrit Doklen dhe Marklen Hakën organizojnë planin për vrasjen e ish deputetit Ndoka. Thënë ndryshe, nuk është thjesht luftë mes banditësh të rëndomtë, por luftë mes bandave të deputetëve socialistë.

Edhe pse pak e trajtuar në media dhe opinionin publik, mendoj se ky duhet të jetë dhe shqetësimi më i madh për shoqërinë tonë. Si ka mundësi që dy ish deputetë të PS gjatë periudhës që kjo e fundit ka drejtuar vendin kanë drejtuar organizata të mirëfillta kriminale? Si është e mundur që të gjithë institucionet e këtij vendi, policia, prokuroria apo shërbimet sekrete nuk kanë mundur të identifikojnë asnjë problem për dy ligjvënës që në kohën që ngrinin kartonin për qytetarët në parlament merrnin vendime për vrasje dhe trafiqe?

Përgjigjet sigurisht që s’mund ti gjesh në një vend ku kryeministri pretendon se përgjegjësia është personale. Edhe kur gjithë shteti është në funksion të bandave siç ka ndodhur me Arben Ndokën dhe Rrahman Rrajën prapë përgjegjësia mbetet personale. Por siç thotë Elisa, “ngjarje të tilla ndodhin kudo në botë”. Me shpresën se këtë herë bandat nuk do të kenë në shenjë regjizorin, meqë skenaristët janë ose pas hekurave ose në kërkim.

Nënkryetarja e PD, Orjola Pampuri, shprehet se në Shqipëri vetëm pagat dhe pensionet qëndrojnë në vend, ndërsa shtrenjtësia e jetesës vijon të rritet. Ne postimin e saj në Facebook, Pampuri thotë se kjo vjen nga politikat ekonomike dhe sociale të ndjekur nga qeveria Rama, e cila çon miliona euro për afera korruptive dhe një grusht të vogël oligarkësh, ndërsa lë pas dore mirëqenien e shqiptarëve.
Deputetja e PD, sjell në vëmendje të dhënat e fundit të INSTAT për rritjen çmimit të mobilerive, gjë që do të ndikojë në në shtrenjtimin e produkteve të mirëmbajtjes së shtëpisë. Sipas saj, Partia Demokratike zotohet se në programin e saj ekonomik do t’i japë zgjidhje shqetësimeve dhe halleve të njerëzve, si një detyrim politik dhe moral.

Postimi i plotë i nënkryetares së PD, deputetja, Orjola Pampuri:

Në këtë vend vetëm pagat dhe pensionet qëndrojnë në vend.
Shtrenjtësia e jetesës në Shqipëri shkon në proporcion të zhdrejtë me të ardhurat e qytetarëve shqiptarë.
Kjo është përgjegjësi e drejtpërdrejtë e politikave ekonomike dhe sociale të ndjekur nga qeveria Rama, e cila, duke investuar miliona euro për afera korruptive si ajo e inceneratorëve apo koncensionet abuzive në shëndetësi, ka lënë pas dore mirëqenien e njerëzve.
Për Edi Ramën dhe qeverinë që ai drejton nuk kanë rëndësi qytetarët e thjeshtë të këtij vendi, por vetëm një grusht i vogël oligarkësh, të lidhur me pushtetin dhe pjesë të tjera të politikës, si garanci e mbajtjes në këmbë të një sistemi korruptiv që ka 34 vite që i varfëron shqiptarët dhe i detyron të largohen nga ky vend.
Sipas të dhënave të fundit të INSTAT, mobileritë dhe arredimi kanë pësuar një rritje të lartë prej mesatarisht 6 për qind duke filluar nga viti 2022 dhe kjo do të ndikojë në shtrenjtimin e produkteve të mirëmbajtjes së shtëpisë, ndërkohë që produktet me bazë drurin janë të rëndësishme për familjet shqiptare.
Ky shtrenjtim i gjithçkaje në këtë vend dhe pamundësia për të përballuar jetën, janë një ndër arsyet e shumta që shqiptarët largohen drejt vendeve të tjera për një jetesë më të mirë.
Ajo që duhet të bëjmë ne, është të largojmë Edi Ramën dhe qeverinë e tij dhe t’u mundësojmë shqiptarëve një jetë më të mirë në vendin e tyre.
Për këtë arsye, Partia Demokratike e Shqipërisë zotohet se në programin e saj ekonomik do t’i japë zgjidhje shqetësimeve dhe halleve të njerëzve, si një detyrim politik dhe moral, për t’u shkëputur një herë e përgjithmonë nga mendësia e politikës që vjedh njerëzit për të mbajtur pushtetin.
Për Partinë Demokratike të Shqipërisë, një individ i fuqishëm në aspektin ekonomik, do të thotë një shoqëri më e mirë dhe më e qëndrueshme, do të thotë një Shqipëri e begatë dhe e jetueshme, dhe këtë do ta realozojmë sepse ua kemi borxh shqiptarëve!

Anëtari i Kryesisë së Partisë Demokratike, Endri Hasa ka deklaruar në studion e RTSH24 se bashkimi i kësaj force politike pas çarjes së saj, mbetet një utopi.

Sipas Hasës, ai e ka konstatuar këtë qëndrim që pas përplasjes mes kreut të Partisë Demokratike Lulzim Basha dhe liderit historik të së djathtës, Sali Berisha.

“Në një moment të caktuar disa anëtarë të kryesisë i kërkuan z. Basha të bënte një hap pas për t’i dhënë mundësi një bashkimi hipotetik me ata që kishin humbur rrugën praktikisht në PD. Pasi Basha e bëri këtë hap pas, unë nuk e kam thënë në media, sot është dita ta them, kam qenë nga të vetmit anëtar i kryesisë që në ditën që është bërë mbledhja kam thënë që; “këto përrallat me bashkim mbeten përralla, sepse ndarja është ideologjike. Nuk ka bashkime mekanike dhe matematikore”, theksoi Hasa.

Hasa vuri në dukje se bashkimi politik apo koalicionet bëhet për parime dhe jo për llogari në tavolinë.

“Partia Demokratike është besimplotë se duke qenë në anën e duhur të historisë duke qenë me njerëzit dhe për njerëzit. Kjo nuk bëhet duke bërë llogari në tavolinë. Politika nuk bëhet duke bërë matematikë.

Për këtë kam qenë i mendimit që nuk ka bashkime që mund të jenë mekanike sepse në politikë që të ngjizet diçka, madje kam qenë kundër koalicioneve që janë thjesht të ngjizura.

Që të në ngjizet diçka në politikë duhet një reaksion kimik, është si kimi ose ka një qasje të përbashkët që ti të jesh të besueshëm. Nuk mund që një i ekstremit të djathtë të ngjizet me një të ekstremit të majtë dhe të prodhojnë dy. Bashkimet bëhen për parime nuk bëhen për numra”, u shpreh Hasa.

Ai theksoi se kryedemokrati Basha ka punuar përgjatë kësaj kohe për një ofruar një alternativë të re për shqiptarët.

“Z. Basha ka punuar përgjatë kësaj kohe për t’iu ofruar një alternativë shqiptarëve për të zgjedhur ekipe individësh në zonat e tyre, njerëz që janë në terren me qytetarët dhe që janë afër tyre, jo njerëz që duan të mbyllen brenda katër mureve të Parlamentit.

Ky është prioriteti ynë. Prioriteti është që të ofrojmë diçka që njerëzit ta pranojmë. Njerëzit besojnë te individët e pastër dhe ne e kemi bërë për parime.

Siç ndodhi edhe me Amnistinë. Kur ne dilnim dhe thoshim që do të lirohen zyrtarë të korruptuar, do të lirohen personat e dënuar nga Gjykata e Posaçme. Ata që miratuan amendamentet bënë një goditje ndaj reformës në Drejtësi, nxorën njerëz që ishin të dënuar nga SPAK dhe GJKKO”, shpjegoi Hasa.