Juristi Kreshnik Spahiu tha në një intervistë për Euronews Albania se çështja e ndërhyrjes në sistemin TIMS është e një rëndësie të veçantë pasi aty janë të regjistruara informacione sensitive dhe sekrete.

Spahiu u shpreh se në TIMS nuk regjistrohen vetëm hyrje-daljet e shqiptarëve por ka informacione të ndjeshme rreth aksioneve të policisë apo përgjimeve që mund të përdoren edhe nga agjenturat ruse.

“Çështja e TIMS është më rëndësishme se çështja e një tenderi në bashki apo truall në Himarë, në sistemin TIMS preken interesat e 3 mln shqiptarëve dhe diplomatëve. Ja shumë informacione sensitive dhe të regjistruara sekrete. Nuk regjistrohen vetëm hyrje daljet e shqiptarëve, ka informacione rreth aksioneve të policisë, mbi ngjarje jo kriminale që lidhen me përgjime. Dhe përvetësimi i paautorizuar i sistemit TIMS është një rrezik ku mund të dëmtohen interesat e sigurisë kombëtare, e rendit publik dhe policisë e mbrojtjes civile dhe cili mund të jetë qëllimi për t’i përvetësuar?

Mund të ndodhë për 3 arsye; për të shantazhuar çdo individ, e dyta mund të përdoret për interesa mafiozë, banda të ndryshme mund të paguajnë deri 2 mln euro për të marrë informacione ndaj aksioneve të policisë. Mund të përdoret për qëllime agjenturash, për shembull shërbimi rus mund të kërkojë informacione nga sistemi TIMS për gjithë agjentët amerikanë, britanikë, gjermanë që hyjnë e dalin në Shqipëri, kush janë agjentët e kundërzbulimit që bëjnë punë të 2 fishtë për disa shërbime. Kjo është arsyeja pse i dërguari i SHBA i ka shkuar në zyrë ministrit dhe kryeministrit për t’i treguar se sa e ndjeshme është kjo çështje”, tha Spahiu.

Gazetari Lavdrim Lita ishte i ftuar këtë të premte në Euronews Albania, ku komentoi zhvillimet më të fundit politike.

Lita u ndal dhe te kërkesa e kreut të grupit paramentar të PD, Gazment Bardhi, drejtuar Kuvendit, ku kërkon rikthimin në grupin paralamentar të të gjithë deputetëve të përjashtuar, përfshirë dhe Sali Berishën.

Lita theksoi se kjo kërkesë e Bardhit është një shkelje e vijës së kuqe amerikane dhe britanike në lidhje me personat non-grata të cilët duhen jashtë parlamentit.

“Është shkelje e vijës së kuqe amerikane dhe britanike për non-gratën. Në 9 shtator të 2021 Lulzim Basha nuk është se kishte ndonjë qejf të madh për të përjashtuar Sali Berishën nga grupi parlamentar, por e bëri sepse SHBA-të përmes nënsekratarit Reeker dhe shumë lajmëtarëve të tjerë, i kërkonte PD që të mbante një qëndrim politik në lidhje me shpalljen non-grata të Sali Berishës për minim të demokracisë dhe korrupsion masiv familjar. PD duke parë interesin e votuesve të saj tha se është më e rëndësishme të bashkëpunojmë me SHBA-të se sa të mbajmë një person si zoti Berisha në atë kohë. Gaz Bardhi ka qenë pro këtij vendimi për ta përjashtuar Berishën. Grupi i deputetëve që u përjashtuan nga Gazmend Bardhi, janë ata që kanë sulmuar më 8 janar selinë e PD-së ku desh u bë dhe vëllavrasja. Sot Bardhi ka bërë piruetën 180 gradë dhe kërkon rikthimin e Berishës dhe të tjerëve në grupin parlamentar. Kjo është një shuplakë ndaj atyre që kanë vite që thonë që non-gratat nuk duhet të jenë pjesë e Kuvendit të Republikës së Shqipërisë”, tha Lita

Deklarata e kreut të SPAK, Altin Dumani javën e kaluar gjatë raportimit para Këshillit të Lartë të Prokurorisë se GJKKO vendos atë çfarë Prokuroria e Posaçme kërkon, nxiti mjaft debate.

Rithemelimi shkoi deri aty sa foli për kapje të institucioneve dhe shndërrimin e GJKKO-së në notere të SPAK.

Këtë të premte, kreu i SPAK, Altin Dumani raportoi para Këshillit të Integrimit Europian për bilancin e punës së institucionit që ai drejton.

Ai u pyet nga deputetja e PD, Dhurata Çupi lidhur me atë deklaratë, për të dhënë një sqarim shterues nëse ajo ishte nxjerrë jashtë kontekstit apo artikulimi ishte po i tillë, që solli edhe polemikat.

Dumani tha se deklarata e tij ishte keqinterpretuar pasi ai kishte theksuar se me rëndësi për prokurorët e SPAK është të tregohen të kujdesshëm në ngritjen e akuzave të cilat më pas vlerësohen nga GJKKO.

Dhurata Çupi: Pyetja ime është për zotin Dumani, e natyrshme që të fokusohen të gjitha pyetjet. Janë tre elemente që e kanë kaluar testin nga SPAK, lufta kundër korrupsionit, krimit të organizuar, pastrimit të parave. Por një nga kriteret bazë është besueshmëria e institucionit, ashtu siç është ruajtja e integritetit, pavarësisë dhe bashkëpunimit mes institucioneve të drejtësisë me njëri-tjetrin. Një deklaratë e juaja zoti Dumani është kapur jashtë kontekstit, do të doja të shfrytëzohej për ta sqaruar. Në mbledhjen e KLP keni deklaruar natyrshëm Gjykata vendos çfarë SPAK kërkon. A mund të na jepni një detaj ose ta zgjeroni këtë deklaratë se ka patur goxha debate në opinionin publik.

Altin Dumani: Në raportimin tim para KLP-së unë kam evidentuar mes të tjerave një shqetësim institucional që kishte të bënte me ne Prokurorinë, që ishte rritja e numrit të pafajësive krahasuar me një vit më parë. I gjithë qëllimi ishte që ne prokurorët të jemi pak më të kujdesshëm kur ngremë akuzën. Gjykata është në të drejtën e vebt të japë vendime siprodukt i bindjes së brendshme dhe duke u bauar në ligj e prova. Unë asnjëherë, edhe në marrëdhënie me kolegët kush më njeh e kush punon me mua, nuk komentoj asnjëherë, asnjë vendim gjykate. Kam qenë dhe jam prokuror çështje dhe mund të ngelem i pakënaqur nga një vendim gjykate sepse prokurori “dashurohet” më atë çështje, por realisht gjykata është sovrani dhe të dyja shkallët kanë dëshmuar integritet e profesionalizëm në dhënien e vendimeve të tyre. Ne s’bëjmë asgjë tjetër, të gjithë prokurorët e Prokurorisë së POsaçme respektojmë vendimet, kur nuk kënaqemi ushtrojmë të drejtën e ankimit në të gjitha shkallët e gjyqësor dhe kemi të mirën tjetër që i përfaqësojmë vetë në të gjitha shkallët çështjet. Ju ftoj të shikoni vendimmarrjet e gjykatave ët posaçme në raport me pafajësitë e dhëna, masa e dënimi që janë të ndryshme në shumë raste me ato që kërkon prokurori, në raport me masat e e sigurimit, përqindja që masat e sgurimit janë të ndryshme nga kërkesat e prokurorit kjo është në diskrecionin e gjykatës e zgjidhur shekuj më parë.

Mënyra si ajo (deklaratë) u interpretua ishte komplet jashtë asaj që unë po trajtoja në punën para Këshillit. Dhe thashë ishte momenti i përgjegjësisë tonë si institucion që të jemi të kujdesshëm kur ngremë akuzën, me një analizë më të gjerë të provave dhe të ligjshmërisë të vendimmarrjes tonë, para se të shkojmë në Gjykatë.

Drejtori i Policisë së Shtetit, Muhamet Rrumbullaku ka mbajtur ditën e sotme një konferencë të shkurtër për mediat teksa u pyet në lidhje me Ervin Muçën, drejtorin e IT, i cili është në hetim për ndërhyrjen ne sistemin TIMS.

Në një konferencë për mediat Rrumbullaku tha se do i japë llogari vetëm drejtësisë dhe në komisionin hetimor parlamentar.

Pyetje: Pse emëruat në krye të drejtorisë së Teknologjisë së Informacionit një person pa certifikatë siguri dhe në kohën kur plasi skandali i TIMS dhe pse e rikthyet në detyrë  pasi kishte pak ditë pasi i kishit pezulluar?

Rrumbullaku: Për ju dhe për publikun e gjerë, para se të adresoni pyetjen duhet të dini shumë mirë legjislacionin shqiptar në lidhje me informacionin e klasifikuar sekret shtetëror dhe procedura dhe aktet normative që normojnë punën për procedurat që ndiqen për pajisjen me certifikatë sigurie për të gjithë drejtuesve policore. Unë për këtë jap llogari në dy institucione, drejtësisë dhe komisionin hetimor parlamentar.

Prokuroria e Posaçme, ka shprehur falënderimet ndaj Ambasadës Amerikane dhe të Ngarkuarin me punë David G. Wisner, për mbështetjen e tyre ndaj SPAK dhe institucioneve të drejtësisë, si dhe për letrën personale mbi vlerësimin e raportit vjetor të prezantuar në KLP.

Në një reagim në “X”, SPAK nënvizon angazhimin maksimal për të përmbushur misionin kushtetues në luftën kundër korrupsionit dhe krimit të organizuar në Shqipëri

“SPAK falenderon të Ngarkuarin me punë David G. Wisner dhe Ambasadën e SHBA në Tiranë, për letrën personale mbi vlerësimin e raportit vjetor të prezantuar në KLP.

SPAK nënvizon angazhimin maksimal për të përmbushur misionin kushtetues në luftën kundër korrupsionit dhe krimit të organizuar në Shqipëri.”, thuhet ne reagimin e SPAK.