Anëtari i Kryesisë së Partisë Demokratike, Ervin Kulluri foli në lidhje me situatën në PD, si dhe marrëveshjen mes Gazment Bardhit dhe opozitës për komisionet hetimore.

Ai u shpreh se i kanë mbështetur komisionet në princip, por nuk mbështesin pazaret që bëhen në emër të komisioneve. Mes të tjerash Kulluri nuk ka kursyer as ironitë për deputetin Gazment Bardhi.

“Kjo pjesë e opozitës mori vetëm një Komision, pasi për çështjen e sterilizimit Beqaj dhe 8 persona të tjerë janë marrë nën akuzë. Komisioni i TIMS është më i parëndësishmi. Unë do thosha që ka një produkt serioz nëse do të kishte një komision hetimor për çështjen e portit të Durrësit, për McGonigal.

Ne i kemi mbështetur komisionet në princip, por nuk mbështesim dot pazaret që bëhen në emër të komisioneve. Duhet të kemi parasysh që ndryshimet që ka bërë mazhoranca në ligjet për komisionet hetimore, u bë shkak që kjo palë ta çonte në Gjykatë Kushtetuese. Më pëlqejnë shumë këto pamjet e Gaz Bardhit me shokët dhe shoqet socialistë. E gjitha është fake.”, u shpreh Kulluri në Euronews Albania.

Sekretari i Përgjithshëm i PD-së, Enkelejd Alibeaj, ka deklaruar se sot pasdite ka ardhur efekti i radhës i pazarit ndërmjet Foltores dhe mazhorancës. Në një postim në rrjetet sociale, Alibeaj, thekson se është ngushtuar kuadri i komisioneve hetimore për koncensionet në shëndetësi.

Postimi i Alibeajt:

Meqë dita e marrëveshjes “së madhe” filloi paradite me sakrifikimin e reformës zgjedhore, ja edhe efekti tjetër që po gatuhet (ende pa mbaruar dita). Ngushtimi i objektit të hetimit të komisionit parlamentar të koncensioneve të shëndetësisë, nga 4 në 2 është pazari i radhës mes Foltores dhe Ramës.

Të katër koncensionet në shëndetësi, ai i dializës, check up-it, pajisjeve të laboratorëve dhe sterilizimit janë abuzive dhe dëmtojnë interesat e qytetarëve.

Selektimi për hetim vetëm i sterilizimit dhe check-up-it (SPAK ndërkohë e mbaroi hetimin e tyre) dhe lënia jashtë hetimit i dializës dhe laboratorëve, është pazar dhe arsyet e vërteta i dinë ata që para 6 muajsh e nisën kërkesën për të hetuar 4 koncencione, e sot bëhen gati të votojnë vetëm për 2.

Bojkotuan muaj të tërë parlamentin, ndezën revolucionin me tymuese duke u shitur për interesat e oligarkut të radhës. E megjithatë të vërtetën nuk e fshehin dot sado te mundohen!

Eksperti i aviacionit civil Dritan Goxhaj, në një lidhje me Skype në rubrikën Çështja e Ditës nga Klevin Muka në News24, komentoi faktin se Albcontrol pritet të kthehet në agjenci shtetërore.

Goxhaj theksoi se shteti shqiptar i kishte dhënë Albcontrolit 50 milionë euro borxh. Ai shton se shteti nuk mund t’i japë dot borxh një shoqërie aksionere, e cila nuk ka fitime dhe për rrjedhojë nuk mund ta kthejë borxhin. Për Goxhajn, tentativa për ta kthyer Albcontrolin në agjenci shtetërore është që zyrtarët më të lartë të shtetit, përfshirë kryeministrin Edi Rama apo ministren Belinda Balluku, të mund ta shpëtojnë vetveten.

“Albcontrol do të vazhdojë të funksionojë siç ka funksionuar deri sot, e vetmja gjë që ndryshon është statusi i vet juridik në shtetin shqiptar, nuk do jetë më shoqëri aksionere siç ka qenë deri më sot, por do jetë thjesht entitet publik apo agjenci, si të tjerat që varen nga shteti shqiptar. Asgjë nuk do të ndryshojë në operimin e Albcontrol.

Albcontrol është shoqëri aksionere, por jo fitimprurëse. Një kompanie aksionere nuk i jepet borxh. Kjo, sepse pyetja që shtrohet është sesi kjo shoqëri aksionere do ta shlyejë borxhin, kur nuk ka fitime? 50 milionë eurot nuk i kthehen më shtetit shqiptar. Auditi nesër do të thotë se çfarë u bë me Albcontrol dhe këta para. Po i ndryshohet statusi kompanisë, që ata që kanë hedhur firmën për dhënien e borxhit të shpëtojnë vetveten. Duke e bërë agjenci shtetërore, ka kontroll më të lartë nga shteti. Ka pasur raste, kur zonja Balluku blinte 70 mijë euro tapet, gjë që asnjë lloj agjencie shtetërore tjetër nuk mund ta bëjë”, u shpreh Goxhaj.

Prokuroria e Posaçme pas përfundimit të hetimeve ndaj ish-zv/kryeministrit Arben Ahmetajt, akuzat të cilit do t’ia komunikoj më 26 mars, ka marrë në pyetje ish-gruan e tij, Albina Mançka.

Lajmi është bërë i ditur nga gazetarja Klodiana Lala ndërsa mësohet se në vend të Mançkës, u paraqit avokati i saj, Ermir Beta.

Oficeri i BKH e informoi avokatin, që të njihet me aktet e dosjes.

Kujtojmë se ish-zv/kryeministri ndodhet në arrati dhe sipas SPAK, ka përfituar rryshfet nga bosët e inceneratorëve, si pasuri të paluajtshme dhe në formën e dhuratave apo pagesës së udhëtimeve.

Ahmetaj është nën hetim për veprat penale pastrim parash, korrupsion në 6 raste dhe fshehje pasurie.

Arben Ahmetaj si ish-ministër i financave dhe ekonomisë u vendos nën hetim për dosjet e inceneratorëve, mbas këqyrjeve në një kompjuter që i përket Klodian Zotos, i cili rezultoi se kishte paguar e prenotuar udhëtime luksoze për ish funksionarin, vlera e të cilave u llogarit nga SPAK në shumën e 34 mijë eurove.

Për hetimet SPAK i referohet një sërë dëshmish të biznesmenëve për që tregojnë se vilat në Palasë dhe në Hamallaj janë të lidhura me Arben Ahmetajn ndërkohë që nga një telefon “blackberry” i sekuestruar janë përftuar mesazhe dhe komunikime edhe me persona të tjerë, zyrtarë ish-zyrtarë dhe biznesmenë.

DOSJA PËR AHMETAJN

Janë mbi 300 faqe dosje që sipas SPAK zbulojnë udhëtimet e hetuara nga SPAK të Arben Ahmetaj dhe të afërmve të tij, për periudhën 2013 – 2017. SPAK thotë se Ahmetaj për vete e të afërmit ka përfituar 34 mijë euro në formën e shpenzimeve për udhëtimet nga Klodian Zoto dhe Mirel Mertiri ndërsa këta kanë përfituar kontrata.

Bëhet fjalë për 14 udhëtime dhe qëndrime në hotele luksoze nga Milano të Italisë në Monako, Vjenë të Austrisë, Frankfurt të Gjemanisë dhe Francë nga viti 2013 – 2017. Ahmetaj u emërua në postin e Ministrit të Zhvillimit Ekonomik, Tregtisë dhe Sipërmarrjes në shtator 2013 ndërsa SPAK në dosje thuhet se më 10 korrik 2013 në hotelin Principe di Savoia, në Milano janë paguar 1535 euro për Arben Ahmetajn dhe Erjola Hoxhën dhe miken e Erjolës.

Më pas më 15 korrik 2013 Ahmetaj dhe bashkëjetuesja e tij Erjola Hoxha dhe shoqen e saj kanë qëndruar në hotelin Hermitage në Monako ku janë paguar 3156 euro. Ndërkohë, më 19 korrik 2016 janë paguar 10 600 euro për hotel “SPA Tiara Miramar” me pesë yje që gjendet në Cote d’Azur ose Bregu i Kaltër, një segment i bregdetit të Francës në Mesdhe. Shpenzimet më të mëdha të “luksit’ janë kryer gjatë vitit 2016 me 15 228 euro. Në dosje rezulton se dhe ish ministri Damian Gjiknuri ka qenë në një hotel me Arben Ahmetaj në Frankfurt të Gjermanisë për të cilin janë paguar 1052 euro, por vetë Gjiknuri ka mohuar më herët të ketë përfituar pagesa hotelesh nga Zoto.

“Ekziston dyshimi i arsyeshëm i mbështetur në prova se shtetasi Arben Ahmetaj për vete ose të afërmit e tij ka përfituar në mënyrë të padrejtë një shume prej 34 422 euro, në formën e shpenzimeve për udhëtime. Kjo shumë, ekziston dyshimi se është përfitim i paligjshëm në formën e mitës, dhënë këtij shtetasi, si rezultat i ushtrimit te funksionit te tij si deputet apo minister që ka sjellë për pasojë lidhje kontratash përfituese për shtetasit Klodian Zoto dhe Mirel Mertiri. Përsa më sipër, ekziston dyshimi se shtetasi Arben Ahmetaj ka konsumuar veprën penale të ‘Korrupsionit pasiv te funksionarëve të lartë shteterore ose i të zgjedhurve vendore’ parashikuar nga neni 260 i Kodit Penal”, thuhet në dokumentin e SPAK.