14.5 C
Tirana
E hënë, 19 Maj, 2025
type here...

FJALA E PLOTË E KRYETARIT TË PD, LULZIM BASHA, NË SEANCËN PLENARE

Të dashur bashkëqytetarë, zonja dhe zotërinj deputetë, tek dëgjon fillimin e kësaj seance pothuajse harron 6 muaj. 6 muaj, 1/8 e kësaj legjislature të kaluar ashtu siç kaloi dhe pyetja e parë që çdo shqiptar bën: a ishin këta more këto 6 muaj apo ishin të tjerë? Po gjithsesi, për shqiptarët rëndësi ka një parlament me të vërtetë funksional. Pyetja është çfarë çmimi kanë paguar shqiptarët për të arritur deri këtu? Jo këta, por shqiptarët. Dhe çmimi është i paimagjinueshëm. Këtë vit siç me të drejtë krenohet taksavënësi më i madh në historinë 34 vjeçare të vendit, 7 miliardë euro do të dalin nga xhepat e shqiptarëve, por si do të shpenzohen këto para, çfarë do të marrin dhe pse nuk do të marrin pensionistët, pronarët, fermerët, këtë nuk patëm shansin ta diskutojmë. Sikundër miliona euro u hoqën nga fondi i kompensimit për të mbushur një tjetër gropë të krijuar nga arbitrariteti i kësaj qeverie.

Ligji për komisionet hetimore u ndryshua duke vendosur një precedent të papranueshëm në 34 vite të pluralizmit shqiptarë, duke e zvogëluar deri në zerim efektivitetin e komisioneve hetimore për transparencë dhe si një paradhomë e ndjekjes penale. Por zonja dhe zotërinj, dëmi më i madh është ai që nuk duket. Ndonëse sot është një ditë e veçantë për atë dëm. Pas një viti, vendi do të jetë në fushatë zgjedhore, kodi zgjedhor në përfitim të shqiptarëve është sakrifica më e madhe, flijimi më i madh në emër të këtyre 6 muajve denormalizim e normalizim.

Ndaj sot para se të nisni punimet, kam një thirrje: Hiqni dorë për një moment nga agjendat tuaja të ngushta partiake, nga interesat tuaja personale dhe jepini shqiptarëve deri në fund të këtij muaji një komision të reformës zgjedhore, me parametrat siç kanë qenë gjithmonë dhe me një vendimmarrje mbi propozimet që gjenden aty tash e 2 vite dhe mos përsërisni skandalin e 2008-ës, që erdhi pas një tjetër skandali dhe gjëme dhe shkaktoi një gjëmë edhe më të madhe. Thirrja ime është para se të procedojmë me këtë rend dite, të shprehemi me zë dhe me votë për diçka që çdokush që i dhimbset ky vend, që shqetësohet për fatin e demokracisë, që shqetësohet edhe më shumë për fatin e zgjedhjeve të ardhshme kërkon nga ky parlament reformë zgjedhore për qytetarët dhe jo për politikanët.

“A ishin këta këto 6 muaj apo ishin të tjerë?”- Basha ironizon paktin mes PS dhe Rithemelimit: Çmimi që kanë paguar shqiptarët është i paimagjinueshëm

Kryetari i Partisë Demokratike, Lulzim Basha ka marrë fjalën në Kuvend, pas pesë muajsh anormalitet, duke u shprehur se sot teksa dëgjon fillimin e kësaj seance, harron atë që ka ndodhur gjatë këtyre muajve.

“A ishin këta more këto 6 muaj apo ishin të tjerë” ­– tha Basha me ironi.

Ai shtoi se çmimi që kanë paguar shqiptarët gjatë kësaj periudhe është i paimagjinueshëm.

Lulzim Basha:

Teksa dëgjon fillimin e kësaj seance harron 6 muaj, a ishin këta more, apo ishin të tjerë? Por gjithësesi për shqiptarë rëndësi ka një parlament funksional, pyetja është cfarë çmimi kanë paguar shqiptarët për të arritur deri këtu. Çmimi është i paimagjinueshëm. Këtë vit sic me te drejtë krenohet taksavënësi më i madh në historinë e vendit, 7 miliard euro do të dalin nga xhepat e shqiptareve, por se si do të shpërndahen këto para, ne nuk patëm shansin ta diskutojmë.

Ligji për komisionet hetimore që ndryshoi duke vendosur një precendent të papranueshëm në 34 vite pluralizem duke zeruar efektivitetin për Komisonet Hetimore.

Dëmi ma i madh është ai që nuk duket. Pas një viti vendi do të jetë në zgjedhje. Kodi zgjedhor është krimi më i madh

Përgjigjja e Lulzim Bashës ndaj ftesës së Berishës, akti i dytë i madh i tij

Nga Sidi Hasanaj

Pas përjashtimit që Lulzim Basha i bëri S.Berishës më 8 shtator 2021 nga grupi parlamentar i PD, dje nga Durrësi kreu aktin e dytë të madh dhe shërbimin jetik për të mbajtur gjallë në këtë vend të djathtën e partinë demokratike:

Refuzoi në mënyrën më dinjitoze, ofertën e bashkimit me Berishën (përmes gojës së G.Bardhit) në marrëveshjen e tyre me Edi Ramën në nënkomisionin “Bardhi-Çuçi” që në vetvete është Rama-Berisha.

“Shikoni çfarë thonë sot, “ejani ju se kemi dhe një karrige për ju”. Merreni karrigen edhe… Ne se kemi nisur këtë për karrige. Se kemi nisur për karrige, s’ishte kjo punë për karrige. Enkelejd Alibeaj nuk ishte aty për karrigen e tij. As i kisha thënë unë rri për karrige. Ishin listat e hapura, ishte për votimin elektronik, ishte për votën e diasporës, ishte për Shqipëria një zonë. S’duam karrigen, ne duam të drejtat e shqiptarëve, ne duam që pazari 34 vjeçar i fëlliqtë, trashëgimnia më e pisët e Ramiz Alisë, trashgimtarit të fundit komunist të marrë fund. Sepse është ky pazar që rëndon pronarët dhe të përndjekurit, sipërmarrësit dhe profesionistët, fermerët dhe arsimtarët, rininë shqiptare. S’na duhen karriget. Thojini shqiptarëve sot, ku qëndroni në raport me listat e hapura? Jeni për lista të hapura, po apo jo, votoni për listat e hapura, votimin elektronik, Shqipëria një zonë, votën e diasporës, s’na duhen karriget.”

Lulzim Basha u tregua dje aq i fortë, aq i vendosur të eci mbi rrugën e të vërtetës dhe parimeve më të vyera për Shqiptarët… aq i qartë për këdo!

Asnjë pazar me Ramën e Berishën, luftë për listat e hapura, votën e diasporës dhe votimin e nunërimin elektronik.
Fokusi i PD është të çmontojë sistemin 34 vjeçar që Ramiz Aliaj i trashëgoi Berishës-Metës-Ramës.
Misioni i PD është të përkrahë Drejtësinë, të çliroj tregun nga monopolet dhe oligopolet e treshes më sipër, tju japë dinjitetin të Përndjekurve Politike dhe Pronarëve, të ndalë boshatisjen e Shqipërisë!

Kjo nuk bëhet me pazar me ata që e vranë këtë vend 34vjet, Ramën e Berishën! Kjo bëhet me luftë, ku armët e PD janë ofertat dhe programet më të mira pro tregut të lirë, pro sipërmarrjes, profesioneve të lira… shpirtit fisnik të punës në Shqipëri, dhe armata e PD në këtë luftë janë të rinjtë që vijnë nga familjet fisnike antikomuniste, që vijnë nga suksesi në sipërmarrje, prefesione të lira apo botën akademike!

Lulzim Basha i bëri tjetër shërbim të madh, PD dhe të djathtës dje!

Basha në “sulm” për zgjedhje, Kulluri: Ftesa e Bardhit shkel principet, kërkon t’i bashkohemi poshtë ballkonit

Sekretari i marrëdhënieve me publikun i PD, Ervin Kulluri, në edicionin qëndror të lajmeve me gazetarin, Aleksandër Furrxhi, në Vizion Plus foli lidhur me zhvillimet e fundit në Partinë Demokratike dhe hapat e ndërmarrë për përballjen në zgjedhjet e ardhshme parlamentare me mazhorancën.

Tryeza e sotme e opozitës apo edhe krijimi i harkut opozitar euroatlantik nga një pjesë e vëzhguesve konsiderohet si një përpjekje ndoshta e vonuar e Lulzim Bashës për të zbritur në sheshin e politikës. Si mund t’i përgjigjesh një vlerësimi të tillë?

“Pjesërisht e drejtë, sepse duhet të kuptojmë që angazhimi që ka marrë PD dhe Basha si kryetar i saj për një reformë zgjedhore dhe ndryshime kushtetuese që ta kthejë sistemin në normalitet demokratik, janë përpjekje që nga shtatori e deri më sot. Ka qenë në parlament pothuajse e pamundur të mbahet kjo agjendë për shkak të bllokimit të punimeve të parlamentit, kështuqë ka qenë e vështirë për ta vazhduar në parlament këtë betejë për lista të hapura, votim, numërim elektronik, votën e emigrantëve, janë beteja jo për PD”, theksoi ai duke nënvizuar se marrëveshja Bardhi-Çuçi është ende e paqartë duke theksuar se Rama dhe Berisha nuk duan përparimin e reformës zgjedhore.

“Askush nuk e di a ka një marrëveshje apo jo, flitet për një marrëveshje po e mohojnë. Realisht ka ndodhur një akti shumë i rëndë, ngritja e nënkomisionit për reforma që kërkojnë 3/5 e votave është një gjë krejtësisht okulte e paqartë për publikun, por që lë shije shumë të keqe në lidhje me mundësinë reale për të sabotuar reformën zgjedhore, të cilit i skadon data nesër dhe duket qartë që Rama e Berisha nuk duan një reformë zgjedhore mbi këto baza që unë fola”, shtoi ai.

Cilat janë asetet e formacionit që u krijua sot të harkut opozitar euroatlantik, cilat janë betejat e fortat që do bëjë e si?

“Në politikë ka dy niveli veprime, njëra janë fjalët, tjetra veprimi politik. Unë besoj se sot pjesëmarrja në tryezë e njerëzve që kanë bërë beteja për këto principe, Topi, Ngjela, etj dhe angazhimi i vetë PD dhe shumë partive të vogla joparlamentare, por që kanë një peshë e zë publik, është një lëvizje shumë e mirë për t’i thënë Ramës e Berishës që Shqipëria nuk është ajo që duan të pikturojnë ata, është shumë më e madhe se aq dhe mbi të gjitha çështja që kemi ngritur është shumë më e madhe se aq. Në fund fitojnë parimet dhe të drejtat, nuk fiton numri i karrigeve në një sallë”, theksoi ai duke nënvizuar se ulja në një tavolinë e Bardhit dhe Çuçit ka shkaktuar zhgënjim të madh tek elektorati i “Rithemelimit” dhe tek disa parti aleate.

Nga “grupi i Bardhit” pati një ftesë indirekte edhe për PD zyrtare, a është një opsion afrimi, bashkëpunimi apo një term tjetër mes PD zyrtare dhe “Rithemelimit” pas këtyre zhvillimeve?

“Së pari, grupi i “Rithemelimit” aty ishin në komisionin e reformës zgjedhore e nuk treguan asnjë vullnet për këto reforma. Ne kemi bërë një ftesë që ata të ishin sicc janë të përfaqësuar me vendim të parlamentit, nuk erdhën asnjë ditë të kontribuonin për reformën zgjedhore”, nënvizoi ai. “Ftesa e zotit Bardhi është ftesë për të shkuar poshtë ballkonin, që shkonin përbi dhe në konflikt të hapur për t’i shteruar partitë nga parti të babait, kryetarit, monarkut, mbretit, princit, në parti politike që përfaqësojnë njerëzit. Këtu, zoti Bardhi ka tradhëtuar principet e tij, sepse rezoluta e 18 dhjetorit për të hequr dorë nga modeli i të drejtuarit të PD në mënyrë arbitrare”, tha ai.

Kur të mund… hunda jote!

(Shënime për novelën “Hunda” të N.V.Gogolit)

Nga Agim Baçi

Hunda…si mund të jemi pa të? Thuajse askush nuk arrin ta mendojë të ngrihet pa të, ashtu siç i ndodh asesorit të kolegjit, Kovaliovit, të novelës “Hunda” të N.V.Gogol. Aq më pak mund ta mendojmë se “hunda jonë” arrin të shëtisë me një gradë më të lartë shoqërore sesa ajo që mbajmë ne në përditshmërinë tonë. Por, ja që personazhit të Gogolit, Kovaliovit, i ndodh e papritura- ngrihet në mëngjes dhe sheh që vendi mes dy faqesh, aty ku qëndron hunda e gjithkujt prej nesh, te ai është bosh.

Kërkesës së tij për ta shpallur të humbur në lajmërimet e gazetës së qytetit apo për ta denoncuar në polici nuk i përgjigjet askush. Sepse, për këdo “që e ka hundën në vendin e vet”, hunda nuk duhet dhe nuk mund të humbë. Apo, edhe në pastë mundësi të humbë, ajo është thjesht një gjë që i takon ta gjejë atij që i ka humbur. Por ja që Kovaliovit i shtohen sfidat, teksa ai vetë përballet me hundën e tij që shëtit nëpër qytet me gradën e këshilltarit të shtetit dhe nuk do t’ia dijë për të zotin, i cili kërkon gjithandej të gjejë komplotistin që i ka mbushur mendjen hundës që ta braktisë e të nisë një rrugë më vete…

“O perëndi! O perëndi! Ç’është ky mjerim që më goditi? Do të kish qenë më mirë po të isha pa këmbë ose pa duar; po të kisha qenë pa veshë, keq do të ishte, por prapë do ta duronja. Po njeriu pa hundë – dreqi ta marrë vesh se ç’është: është zog a s’është zog, është qytetar a s’është qytetar; merre e hidhe nga dritarja jashtë! Të paktën të ma kishin prerë në luftë ose në duel, ose ta kisha pasur fajin vetë. Po kështu…” ( Gogol, “Tregime dhe novela”, fragment nga  “Hunda”, përkthim i Mitrush Kutelit)

Më shumë duket si diçka që ka lidhje fillimisht me gradën e tij. Ai është asesor kolegji, por grada e tij, sipas nomenklaturës së kohës, duhet t’i përgjigjet gradës major. Por për shkak të mungesës së një fisnikërie të trashëguar, ai nuk e arrin këtë titull. Madje ai me veten mendon se meriton më shumë, mendon se duhet të ketë tituj me të lartë, duhet të jetë nënguvernator. Ky dyzim dëshirash, në pamje të parë krejt i vogël për çdo njeri të zakonshëm, nuk është i tillë jo vetëm për një ushtarak, por edhe për shumëkënd që vetëm ëndërron e nuk lexon asgjë rreth vetes dhe për veten…

Shpesh, ngjarjet që vendosin shumë për këdo nga ne, për sjelljen, inatet dhe gëzimet tona, nisin pikërisht nga këto hendeqe, në pamje të parë, fare të vockla, si në rastin e Kovaliovit.

E më pas, ç’ndodh me ne nëse hunda na rritet nga ajo që ushqejmë përmes egos sonë, përmes ëndrrave tona, përmes mendimeve që nuk na përputhen me atë ç’ka jemi realisht? A nuk e lidhin njerëzit krenarinë e dikujt tjetër me shprehjen që e thonë ashtu, si pa menduar,  “hundë përpjetë”? A nuk duam t’i themi dikujt që po sillet me arrogancë se “i është rritur hunda”? A është historia e Pinokut një rrugëdrejtim për atë që duam të rrëfejmë kur gënjeshtrat peshojnë më shumë se gjithçka që kemi?

Asesori i kolegjit Kovaliov është pikërisht njeriu që “hunda ka më shumë kërkesa se vetë ai”. Egoja e tij është duke ëndërruar, duke ecur me një titull tjetër karriere, ç’ka nënkupton një rang tjetër shoqëror, një dëshirë për më shumë respekt dhe pushtet.
Kovaliov i Gogol-it është portreti grotesk i gjithë pamjes që krijon hendeku mes nesh dhe egos sonë.

Është një hendek që ndodh kudo dhe që rrezikon të kushtojë shumë, pasi është hendeku që rrezikojmë ta prekim të gjithë, sidomos nëse zgjedhim të jemi dikush tjetër nga ai apo ajo që jemi, apo duke besuar se ajo që kemi nuk është për ne. E duke rrezikuar që ta shpërfillim realitetin, që të mos e vlerësojmë atë çfarë jemi realisht, mund të nisim një distancë të rrezikshme me veten. Dhe ndodh që ta mendojmë kaq shumë se jemi dikush tjetër sa “edhe hunda jonë të na shpërfillë!”.

Por çfarë duhet të na ndodhë në jetë që ta kuptojmë “masën e hundës sonë”? A mos duhet të turpërohemi kur e kuptojmë se cilët jemi në të vërtetë? A duhet të këmbëngulim te ajo pjesë e ëndrrës të cilën nuk e arrijmë edhe kur hapat tanë nuk munden?

“….Pastaj u hap fjala se jo në Nevski Prospekt, por në Tavriçevski Sad, kishte dalë shëtitje hunda e major Kovaliovit, se kjo hundë gjendej atje që në kohën e Hozrev- që ish çuditur aq shumë me këtë lojë të habitshme të natyrës. Atje shkuan disa studentë të Akademisë së Kirurgjisë. Një zonjë e nderuar nga shoqëria e lartë iu lut me anë të një letre administratorit të kopshtit që t’u tregonte fëmijëve të saj këtë fenomen të rrallë dhe t’u jepen të rinjve shpjegimet udhëzuese dhe edukuese… Por…në botë ngjasin shumë gjëra pa kuptim. Ngandonjëherë këto nuk i përshtaten aspak së vërtetës; përnjëherësh e njëjta hundë që shëtiste me gradën e këshilltarit të shtetit dhe kish bërë kaq potere në qytet, papritur, sikur të mos paskej ndodhur asgjë e gjeti vendin e saj, domethënë u fut midis të dy faqeve të major Kovaliovit…” (“Hunda”).

Një rrëfim që fillimisht na zbavit, me stilin elegant dhe me humorin. Përpjekjet e Kovaliovit na bëjnë për të qeshur. Por, më pas, duket se nuk i shpëtojmëedhe ne vetë një lëvizjeje të dorës: “A jemi në rregull me hundën tonë?”. Por për të gjetur një përgjigje, dorën nuk mjafton ta rrëshqasim mes faqeve, ku hunda ka vendin e vet, por në pjesën e pasme të kokës, ku besojmë se është truri ynë që duhet të arsyetojë…

Hulumtim: Të rinjtë sot brezi më i palumtur, Shqipëria e fundit në Ballkan

Brezi i ri ndihet më pak i lumtur se të moshuarit pasi vuan nga një krizë, si ajo e moshës së mesme, argumentojnë autorët e raportit për Lumturinë Globale 2024.

Ata theksojnë se mediat sociale janë kryesisht përgjegjëse për këtë situatë të pakëndshme të brezi i ri. Përveç kësaj, të rinjtë në Amerikën e Veriut dhe në Evropën Perëndimore janë më pak të lumtur se ata që jetojnë në Afrikën Sub-Sahariane dhe Evropën Lindore, sipas raportit të publikuar nga gazeta Guardian .

Ky fakt do të thotë se të mirat materiale nuk janë gjithmonë të lidhura me lumturinë. Për profesorin, Dr. Vivek Marty, kirurg i përgjithshëm amerikan, t’i lejosh fëmijët të përdorin mediat sociale është si t’u japësh atyre barna që nuk janë provuar të sigurta. Ai gjithashtu theksoi se përpjekjet e qeverive për të rregulluar kushtet që mbizotërojnë në mediat sociale kanë dështuar, raporton Vizion Plus.

Profesori amerikan nënvizoi se gjithnjë e më shumë të rinj në Amerikën e Veriut janë tani më pak të lumtur se të moshuarit e tyre. E njëjta tendencë pritet të mbizotërojë edhe në Evropën Perëndimore. Rënia e mirëqenies në mesin e moshave nën 30 vjeç e ka shtyrë SHBA-në jashtë 20 vendeve më të lumtura, ka zbuluar Raporti Botëror i Lumturisë 2024.

Profesori amerikan i përshkroi gjetjet e raportit si një “këmbanë alarmi ” për të rinjtë. Ai shtoi gjithashtu se pret të shohë prova se platformat e mediave sociale do të bëhen të sigurta për fëmijët dhe adoleshentët, ndërsa bëri thirrje për veprime ndërkombëtare për të përmirësuar ndikimin e tyre në jetën e përditshme të të rinjve.

Sipas raportit global të lumturisë vendi ynë renditet i 87 për nivelin e lumturisë te brezi i ri nga 143 vende në total, Mali i Zi në vendin e 76, Serbia në venin e 37 dhe Kosova në vendin e 29.

Britanikët nën moshën 30 vjeç listohen në vendin e 32-të në renditjen e Raportit Botëror të Lumturisë. Britai renditet pas Moldavisë, Kosovës dhe madje edhe El Salvadorit, i cili ka një nga normat më të larta të vrasjeve në botë.

Në të kundërt, britanikët mbi 60 vjeç hynë në top 20 brezat më të lumtur në botë. Në të njëjtën kohë, SHBA ranë tetë vende në renditjen e përgjithshme të lumturisë në vendin e 23-të, por kur u pyetën vetëm ata nën 30 vjeç, SHBA u rendit në vendin e 62-të, pas Guatemalës, Arabisë Saudite dhe Bullgarisë.

Vihet re se nëse do të merreshin parasysh vetëm pikëpamjet e njerëzve të moshës 60 vjeç e lart, SHBA do të ishte vendi i 10-të më i lumtur . “Për SHBA-në, Kanadanë, Australinë dhe Zelandën e Re, lumturia ka rënë në të gjitha grupmoshat, por në veçanti të rinjtë janë grupmosha më pak e lumtur”, thuhet në raport.

Sipas profesor Vivek Marty, adoleshentët amerikanë kalojnë pothuajse pesë orë në ditë në mediat sociale dhe një e treta qëndrojnë sërish zgjuar duke shfletuar mediat sociale deri në mesnatë. Sipas listës së vendeve më të lumtura dhe më të palumtura, Greqia është në vendin e 64-të , duke rënë gjashtë vende në renditjen relative krahasuar me vitin 2023 kur ishte në vendin e 58-të në listë, shkruan Vizion Plus.

Sa i përket të rinjve, nën moshën 30 vjeç, Greqia renditet e 53-ta . Raporti nuk zbuloi arsyet e ndryshimeve, por gjetjet e tij vijnë mes shqetësimeve në rritje për ndikimin e përdorimit në rritje të mediave sociale, pabarazisë së të ardhurave, krizës së strehimit dhe frikës nga lufta dhe ndryshimet klimatike.
Raporti Global i Lumturisë gjurmon mirëqenien subjektive duke përdorur vlerësimet e të anketuarve për jetën e tyre dhe emocionet e tyre pozitive dhe negative. Edhe një herë Finlanda, Danimarka dhe Islanda ishin tre vendet më të lumtura.

Kosta Rika dhe Kuvajti ishin dy vendet që për herë të parë hynë në top 20 të Raportit Botëror të Lumturisë, ndërsa Gjermania ra nga vendi 16 në 24 . Afganistani dhe Libani mbetën në fund të listës si dy vendet më pak të lumtura .

Vendet që gëzonin lumturi në rritje përfshijnë shumë kombe afrikane, Kamboxhia, si dhe Rusia dhe Kina.

Gjërat që duhet të dini rreth Mekës

Meka në Arabinë Saudite është qyteti më i shenjtë i fesë islame. Është shtëpia e xhamisë më të madhe në botë, dhoma më e lartë e lutjes në botë dhe është vendi i mbledhjes më të madhe njerëzore në botë.

Me kaq shumë gjëra të mahnitshme për të ditur për këtë qytet magjepsës, këtu janë disa nga faktet më interesante për Mekën në Arabinë Saudite:

Meka është një qytet në Arabinë Saudite
Meka, ose në arabisht Meka është një qytet në Arabinë Saudite perëndimore. Ndodhet në malet Saravat (Sarat), të cilat shkojnë paralelisht me bregun lindor të Detit të Kuq.

Është kryeqyteti i rajonit të Mekës. Që nga viti 2021, popullsia e Mekës është 2,078,766.

Njerëzit e Islamit besojnë se Meka fillimisht u banua nga pasardhësit e Ismaelit (djali i parë i Abrahamit). Muhamedi, themeluesi i Islamit dhe shpallësi i Kur’anit, lindi në Mekë në vitin 570. Për shkak se Meka është qytet i Islamit, zbatohen ligje të rrepta dhe qeveria e Arabisë Saudite i ndalon të gjithë jomuslimanët të hyjnë në qytetin e shenjtë të Mekës. .

Është shtëpia e xhamisë më të madhe në botë
Al-Masjid al-Ḥarām (Xhamia e Shenjtë), e njohur gjithashtu si Xhamia e Madhe e Mekës, është xhamia më e madhe në botë. Al-Masjid al-Harām ka nëntë minare dhe ndërtimi i xhamisë filloi gjatë sundimit të Omar Ibn al-Khattab (634-644). Xhamia u ndërtua rreth Qabes (Qabes ose Qabes). Kjo faltore është para Islamit dhe muslimanët besojnë se është ndërtuar nga profeti Ibrahim dhe djali i tij Ismail si një vend adhurimi.

Mbledhja më e madhe njerëzore në botë
Të gjithë muslimanët e devotshëm dhe të aftë duhet të bëjnë një Haxh në Qabe, “Shtëpia e Zotit” të paktën një herë në jetën e tyre. Haxhi vjetor i bërë në qytetin e Mekës është grumbullimi më i madh njerëzor në botë. Numri mesatar i të pranishmëve është 2,269,145 në vit, me grumbullimin më të madh, 3,161,573 pelegrinë, që u zhvillua në vitin 2012.

Drama e një shëndetësie që vret/ Si po ‘helmohen” shqiptarët me ilaçe të dyshimta nga Turqia

Nga Klodian Tomorri

Në vitin 2015, Ministria e Shëndetësisë autorizoi importin e dy barnave nga Turqia, që quheshin Apranax Plus dhe Codeine. Por medikamentet vinin nga një kompani e panjohur, e cila nuk ishte liçencuar për prodhimin e këtyre ilaçeve. Denoncimi mbërriti pikërisht nga një kompani turke që kishte liçencën për prodhimin e Apramaxit dhe Codeinës.

Në atë kohë importet e ilaçeve nga Turqia ishin më së shumti sporadike. Por në vitet që pasuan, Turqia u shndërrua në eksportuesin më të madh të ilaçeve në Shqipëri.

Të dhënat zyrtare nga Instituti i Statistikave tregojnë se në periudhën 2018-2023, importet e ilaçeve nga Turqia u rritën me gati 2.5 herë në volum. Më saktësisht nga 490 tonë në 1200 tonë. Si rezultat, aktualisht gati 20 për qind e ilaçeve që importohen në Shqipëri vijnë nga Turqia.

Tashmë thuajse të gjitha kompanitë farmaceutike shqiptare kanë filluar të kthejnë sytë nga Turqia. Por loja e rëndë bëhet veçanërisht nga dy kompani, të cilat sjellin volumin më të madh të ilaçeve turke në tregun shqiptar. Njëra prej tyre e hetuar dhe dënuar më parë për mashtrim, ndërsa tjetra është aktualisht nën hetim nga SPAK.

Ndryshimet ligjore

Rritja e frikshme e importeve të barnave nga Turqia nuk është e rastësishme. Në vitin 2014, qeveria shqiptare ndryshoi ligjin e barnave duke i hapur rrugë importit të tyre edhe nga vendet jashtë Bashkimit Europian.

Sipas qeverisë, këto ndryshime do të ulnin kostot e mjekimit për pacientët shqiptarë duke u mundësuar atyre barna me çmime më të lira. Por kostot e ulëta sollën një efekt edhe më të rëndë. Daljen nga tregu të ilaçeve me cilësi të lartë dhe vërshimin e produkteve jo cilësore apo me keq akoma ilaçeve false nga vendet jashtë BE-së.

Organizata Botërore e Shëndetësisë ka lëshuar disa herë alarmin për ilaçet e falsifikuara në Turqi dhe Indi, ku rasti më i fundit ishte ai barit defibrotide, që shitet nën brandin defitelio dhe përdoret për trajtimin e sëmundjeve të mëlçisë.

Ndërkohë një burim i tha Kapitali.al se aktualisht prokuroria po verifikon një rast ku dyshohet se në vend mund të jenë futur edhe kimiopreparate false në farmacitë e QSUT-së të importuara pikërisht nga Turqia.

Rasti, i cili po hetohet mund të shndërrohet në një nga skandalet më të mëdha në fushën e shëndetësisë në Shqipëri. Por deri më tani prokuroria nuk ka ende përfundimet zyrtare.

Korrupsion dhe kapje tregu

Tregu i barnave në Shqipëri është një moçal i madh, i ndërtuar kryesisht me kontributin e qeverisë dhe institucioneve që duhet ta mbikqyrin atë. Në vitet 2014-2015, qeveria shqiptare fiksoi çmimet e medikamenteve përmes një vendimi absurd, i cili nuk lejon përditësimin e tyre.

Kjo masë tashmë po godet mbrapsht. Të dhënat zyrtare nga Ministria e Shëndetësisë tregojnë se gjatë viteve të fundit nga tregu shqiptar kanë dalë mbi 473 barna të mirënjohura, që prodhohen nga kompani të certifikuara perëndimore për kurimin e sëmundjeve të ndryshme.

Këto barna janë zëvendësuar me të tjera që vijnë nga Turqia dhe Azia, por që shpesh kanë dyshime të mëdha mbi cilësinë dhe autenticitetin e tyre. Madje kanë edhe abuzime të mëdha tek çmimet.

Shumica e ilaçeve importohen nga Turqia me çmime minimale, porn ë doganat shqiptare deklarohen me çmime njësoj si barnat perëndimore. Diferenca amortizohet përmes skontove në fatur ose notjave të kreditit, të cilat më vonë falen.

E gjitha është një skemë e madhe mashtrimi, lehtësisht e verifikueshme që në deklaratat doganore. Por kjo është një skemë, e cila bëhet e mundur përmes korrupsionit në sektorin shëndetësor.

Tashmë lista e barnave të rimbursueshme po mbushet gjithmonë e më shumë me barna turke dhe nga vendet e tjera të lindjes. Ato që blihen me çmime qesharake, por rimbursohen disa herë më shtrenjtë nga Fondi i Kujdesit Shëndetësor.

Dhe ndërsa një grusht kompanish fitojnë miliona euro, të cilat i ndajnë me zyrtarët e korruptuar të Shëndetësisë,  shqiptarët po helmohen masivisht me ilaçe pa cilësi./ Kapitali.al

 

Nuk është aspak e lehtë, por do t’ia dalim, sepse kemi në krah të drejtën dhe të vërtetën!”/ Basha ndan foto të Kuvendit Zgjedhor të PD-së në Durrës

Kreu i PD-së, Lulzim Basha, mori pjesë në Kuvendin Zgjedhor të PD-së në Durrës.

Kryedemokrati ka ndarë në një postim në profilin e tij në rrjetin social facebook foto nga ky takim, ku shkruan se “të bësh betejë për shqiptarët në një vend që ka kastë politike 34-vjeçare, nuk është aspak e lehtë, por ne jemi të vendosur që me demokratët në të gjithë Shqipërinë ta shndërrojmë Partinë Demokratike në një alternativë të besueshme dhe shumë shpejt qeverisëse”.

“Nuk është aspak e lehtë, por do t’ia dalim, sepse kemi në krah të drejtën dhe të vërtetën!” – përfundon ai.

Më poshtë postimi i plotë:

Urime të përzemërta për demokratët e Durrësit, anëtarët e kryesisë dhe kryetarin e zgjedhur Jonuz Myshketa – nga Kuvendi Zgjedhor, falë të cilëve kjo degë ringrihet sot më e fortë dhe më e sigurt se dje.

Kemi nisur një betejë jo për karriget, por për t’u ofruar shqiptarëve të drejtën e zgjedhjes së përfaqësuesve të tyre nëpërmjet listave të hapura, votimit dhe numërimit elektronik, mundësisë së votës së diasporës dhe Shqipërisë një zonë zgjedhore.

Nuk është aspak e lehtë, por do t’ia dalim, sepse kemi në krah të drejtën dhe të vërtetën!

Raporti i FRONTEX: 31% më pak emigrantë të parregullt në Ballkanin Perëndimor në vitin 2023

Agjencia Europiane e Ruajtjes së Kufijeve, FRONTEX publikoi të mërkurën raportin vjetor të 2023 lidhur me zhvillimet e migracionit të parregullt në Europë dhe pritshmëritë për vitin 2024.

“Rruga e Ballkanit Perëndimor,ku përfshihete dhe Shqipëria raportoi një rënie prej rreth 31%, me rreth 99.000 raste të evidentuara të migrimit të parregullt, krahasuar me vitin 2022 thotë raporti .

Sipas raportit “një pjesë e presionit migrator nga kufijtë serbë u zhvendos në kufijtë e Bosnjë Hercegovinës e cila shënoi një rritje me 80% të kalimeve të parregullta të kufirit në 11 muajt e parë të 2023, krahasuar me të njëjtën periudhë të vitit 2022.

Sipas FRONTEX-it emigrantët e raportuar ,si më të shumtit në numër , në Rrugën e Ballkanit Perëndimor , ishin kryesisht sirianë, turq dhe afganë.

Në përmbledhjen e FRONTEX-it thuhet se në vitin 2024 menaxhimi i kufijve evropianë do të vazhdojë të përballet me një sfidë të madhe karakterizuar nga mundësia për rritje të prurjeve migratore dhe krimit ndërkufitar.

Rreziqet për vitin 2024, thotë FRONTEX mund të pritet të prekin kryesisht rrugët e Mesdheut Qendror dhe Lindor.

Presioni i përforcuar i prurjeve migratore në Mesdheun lindor do të kishte efekt edhe në Ballkanin Perëndimor thotë Frontex në raportin vjetor të 2023.

Shqipëria si pjesë e rrugës ballkanike dhe prurjet migratore gjatë vitit 2023

Edhe Shqipëria si pjesë e rrugës Ballkanike të kalimit të migrantëve pësoi një ulje të prurjeve migratore që vijnë kryesisht nga Greqia në vitin 2023.

Me pak se 9 mijë migrantë të huaj të parregullt sipas të dhënave pararake u evidentuan në brendësi të territorit shqiptar, ku pjesa më e madhe e të cilëve kanë hyrë nga Greqia në pikën e Qafë Botës në Sarandë.

Shqipëria është pjesë e Rrugës së Ballkanit Perëndimor ku migrantët e parregullt që hyjnë nga kufiri jugor dhe juglindor shqiptar me Greqinë kalojnë tranzit për të udhëtuar nga zonat veriore në drejtim të Malit të Zi apo Kosovës me destinacion final vendet e Bashkimit Europian.

Prurjet migratore në Shqipëri u lidhën ngushtësisht gjatë vitit 2023 me situatën në kampet greke të migrantëve, me ritmin e hyrjes së migrantëve të parregullt në Greqi, kryesisht nga kufiri turk por edhe me aktivitetin e rrjeteve rajonale apo kombëtare të kontrabandimit të migrantëve.

Autoritetet shqiptare firmosën mesin vitit të shkuar një marrëveshje bashkëpunimi me FRONTEX që synon të sigurojë shkëmbimin e informacionit në lidhje me pretendimet për shkelje të të drejtave themelore në aktivitetet operacionale të Frontex në territorin e Shqipërisë.

Frontex nisi operacionin e përbashkët në Shqipëri, operacionin e parë të agjencisë në Ballkanin Perëndimor, në maj 2019. Aktualisht janë 162 oficerë evropianë të rojeve kufitare që punojnë së bashku me Policinë kufitare Shqiptare.

Sipas të dhënave nga Agjencia Europiane për Ruajtjen e Kufijve , Frontex, numri i kalimeve të parregullta në kufirin e jashtëm të Bashkimit Europian arriti në vitin 2023 në rreth 380 000, i nxitur nga një rritje e mbërritjeve përmes rajonit të Mesdheut,

Kjo shënon nivelin më të lartë që nga viti 2016 dhe përbën një rritje prej 17% krahasuar me kalimet e parregullta të vitit 2022, duke treguar një tendencë të vazhdueshme rritëse gjatë tre viteve të fundit.

Sirianët përbënin mbi 100 000 kalime të parregullta përgjatë vitit 2023 ,duke shënuar edhe numërin më të lartë midis të gjitha kombësive.

Ata u pasuan nga guineasit dhe afganët.

Këto tre kombësi kryesore përbënin mbi një të tretën e të gjitha kalimeve, sipas FRONTEX./VOA

1...1 3121 3131 314...8 316Faqja 1 313 nga 8 316

Kryesore

Continue to the category
Më shumë
© 2024 Rilindja Demokratike Euroatlantike