Nënkryetari i PD, Kreshnik Çollaku ka postuar një foto në facebook, ku shkruan: “Sot në Burrel me kryesinë e PD Dega Mat, me miq e demokratë të mirë në përgatitjet e fundit për Kuvendin Zgjedhor të Degës PD Mat.. Asnjë Hap Pas!”
Ngjela: Tryeza e sotme e PD ishte e suksesshme!
Avokati Spartak Ngjela ka marrë pjesë sot në konferencën e organizuar nga Kryetari i PD-së Lulzim Basha, të quajtur Harku opozitar Euro-Atlantik.
Ngjela, i ftuar në rubrikën Opinion në News 24 foli në lidhje me pjesëmarrjen e tij në këtë konferencë, si dhe situatën e brendshme në Partinë Demokratike. Sipas Ngjelës, grupi i Berishës është grupimi i korrupsionit, ndërsa shton se e djathta duhet të bashkohet.
“Tryeza e sotme e PD ishte e suksesshme, tani duhet bashkimi i të djathtës. Bashkimi të bëhet me platformë dhe me program. Ligji zgjedhor e zgjidh problemin, unë kërkova maxhoritar të pastër. PD duhet të bëjë atë që rekomandon SHBA. PD e ka në favor bashkimin, sepse Berisha është arrestuar dhe nuk është në funksion.
Nëse Sali Berisha do të dënohet, më pas mund të mos jetë më deputet dhe nuk ka çfarë të bëjë më. Grupi i Berishës është grupi i korrupsionit. Të gjitha çarjet që bëri Berisha kanë qenë të mos kishte goditje, por se sërish u arrestua. 60 përqind e grupit të Berishës janë të korruptuar dhe kërcënojnë SPAK-un. Lulzim Basha e përjashtoi Berishën, sepse ia kërkuan ndërkombëtarët. PD ka dy degë dhe duhet të bashkohen në një Kongres. Sali Berisha nuk duhet të jetë, sepse është shpallur non grata. Rruga e vetme është krijimi i PD-së normale, që të fitojë zgjedhjet më 2025. Nëse hyjnë me lidershipin e Kongresin në zgjedhje, unë them se fitojmë”, u shpreh Ngjela.
“FBI është këtu, mbështesim SPAK”/ Ndihmës Sekretari Tod Robinson: Do të vazhdojmë me ‘non grata’ për të korruptuarit
Ndihmës Sekretari amerikan, Tod Robinson në një intervistë për Top Channel tregon se Shtetet e Bashkuara të Amerikës nëpërmjet DEA-s dhe FBI-së po ndihmojnë SPAK në kapjen e të korruptuarve.
Në një intervistë dhënë gazetares së Top Channel, Anila Hoxha ai thotë se Shtetet e Bashkuara të Amerikës do të përdorin të gjitha mjetet si shpallja ‘non grata’ dhe sanksionet e vizave për t’u siguruar që zyrtarë të rëndësishëm, zyrtarë të nivelit të lartë, zyrtarë të lartë të qeverisë, ta kuptojnë që për akte korruptive ka një çmim që duhet paguar.
Anila Hoxha: Cili është mesazhi që iu dhatë prokurorëve të posaçëm anti-korrupsion dhe që insistoni ta përsërisni sërisht?
Todd D. Robinson Ndihmës-sekretar i shtetit për Narkotikët dhe Ligjzbatimin: Dhamë një numër mesazhesh. Së pari, që ata (SPAK) po bëjnë një punë fantastike dhe jo vetëm SPAK, por të gjitha agjencitë e pavarura të drejtësisë po bëjnë punë fantastike, një punë fantastike që shqiptarët e zakonshëm nuk e shihnin kur isha unë këtu, për shembull, në vitet 2004-2006. Ky ishte mesazhi i parë; i dyti – Qeveria e Shteteve të Bashkuara është këtu për t’i ndihmuar me punën e tyre. Ajo që iu thashë ishte, burimet janë të kufizuara kudo në botë. Por një nga vendet ku nuk e kemi problem të shpenzojmë burimet tona është këtu në Shqipëri, për shkak të punës së shkëlqyer që këto institucione po bëjnë. Dhe mesazhi i fundit është se qëllimi ynë është të vazhdojmë të ndihmojmë – kemi një ekip të shkëlqyer këtu. DEA është këtu. Departamenti i Drejtësisë është këtu. FBI është këtu. Po bëjmë punë të madhe me sistemin e burgjeve. Dhe synojmë ta vazhdojmë atë punë sepse është e rëndësishme për marrëdhënien Shtetet e Bashkuara – Shqipëri. Por më shumë sepse është rëndësishme që shqiptarët e zakonshëm ta shohin të bëhet kjo punë dhe të shohin që po mbështetet nga komuniteti ndërkombëtar.
Anila Hoxha: Ju qëndruat në një takim me Kryeprokurorin e SPAK dhe – për t’iu kthyer sërish njoftimeve nga Ambasada për takimet me njerëzit e drejtësisë – kuptova që mesazhi juaj kryesor ose kishit përçuar një mesazh për kurajo dhe guxim tek njerëzit e drejtësisë që hetojnë dhe shpallin vendime. Mund të ndani me ne disa nga këshillat ose mesazhet që iu dhatë prokurorëve të posaçëm të SPAK gjatë këtyre takimeve.
Todd D. Robinson Ndihmës-sekretar i shtetit për Narkotikët dhe Ligjzbatimin: Siç e thashë më parë, ne duam që ata ta dinë se kanë mbështetjen tonë. Ne i kuptojmë nevojat e tyre dhe atë që ata duam të marrin nga bashkëpunimi me ne. Ne duam që ata të kuptojnë se ne e dimë që nuk është e lehtë dhe ka ende shumë punë për të bërë. Por, si përfundim, mesazhi është: nëse ata kanë vullnetin të bëjnë punën e vështirë, ne jemi këtu për t’i ndihmuar. Dhe nuk është vetëm SPAK-u, janë të gjitha agjencitë e pavarura. Është sistemi gjyqësor. Është sistemi i burgjeve. E dini, ne duam të punojmë me ministritë, duam të punojmë me ekzekutivin. Ne nuk duam të përjashtojmë askënd. Ne duam të jemi në një marrëdhënie gjithëpërfshirëse në mënyrë që kushdo, nga qytetarët e zakonshëm që përmende me parë, e deri te ministritë dhe institucionet e pavarura, institucionet e drejtësisë, ne duam që të gjithë të punojnë së bashku tani dhe drejt së ardhmes. Ne mendojmë se, e dini, ne duam të falënderojmë këto institucione për punën e tyre në të shkuarën, atë që po bëjnë tani, por më me rëndësi, atë që do të bëjnë në të ardhmen, për ta bërë Shqipërinë një partner më të mirë, për ta bërë Europën një partner më të mirë, dhe si përfundim, për ta bërë aleancën tonë globale më të fortë kundër këtyre kriminelëve të organizuar ndërkombëtarë.
Anila Hoxha: Departamenti i Shtetit dhe Departamenti i Thesarit kanë shpallur non-grata njerëz të politikës dhe njerëz të biznesit. A do të vazhdoni ta bëni këtë gjë dhe a është kjo një masë e efektshme?
Todd D. Robinson Ndihmës-sekretar i shtetit për Narkotikët dhe Ligjzbatimin: Do të përdorim çdo mjet që kemi në dispozicion për t’iu vënë pas aktorëve të korruptuar dhe për të ndihmuar institucionet shqiptare që t’i vihen pas aktorëve të korruptuar. Kemi një numër mjetesh dhe shpalljet non-grata dhe sanksionet e vizave janë mes tyre, dhe ne do të vazhdojmë t’i përdorim ato sepse janë mënyra të efektshme për t’u siguruar që ata zyrtarë të rëndësishëm, zyrtarë të nivelit të lartë, zyrtarë të lartë të qeverisë ta kuptojnë që për akte korruptive ka një çmim që duhet paguar dhe të gjitha mjetet që ne kemi në dispozicion do të vihen në punë kundër atyre aktorëve të korruptuar.
Kërcënimet e Vuçiç/ Ambasadori Hovenier: Aleanca më e suksesshme në histori është këtu, qytetarët të mos “mbesin pa gjumë “
Ambasadori i SHBA në Kosovvë, Jeff Hovenier i është përgjigjur deklaratës së presidentit të Sërbisë, Aleksandër Vuçiç pak ditë më parë.
Hovenier u shpreh se qytetarët nuk duhet të shqetësohen nga ky kërcënim, pasi Aleanca më e suksesshme në histori është prezente në Kosovë.
“SHBA ka qëndruar fuqishëm për paqen e njerëzve në Kosovës. Mund të them që jemi të përkushtuar për sigurinë e Kosovës. Ne nuk e humbim gjumin natën duke u shqetësuar për atë kërcënim sepse ne besojmë që NATO është e gatshme dhe e përgatitur. Dhe nuk mendoj që as njerëzit e Kosovës duhet të mbesim pa gjumë sepse aleanca ushtarake më e suksesshme në histori ka një prezencë të fuqishme dhe është e gatshme të bëjë atë që është e nevojshme,” tha Hovenier.
Poli Hoxha: Si po bashkëpunon Rithemelimi me Ramën!
Poli Hoxha tha se takimi i sotëm i organizuar nga Lulzim Basha, është për t’u vlerësuar, por është tepër vonë pasi vetëm një vit na ndajnë nga zgjedhjet e përgjithshme dhe beteja mes partive. I ftuar në Intervistën e Ditës në Dritare TV, zoti Hoxha tha se Rithemelimi dhe PS, ndonëse jo de juro, de fakto po bashkëqeverisin.
“Ky takim është pak i vonuar. Sepse jemi vetëm një vit larg zgjedhjeve të përgjithshme. Kjo nuk është një tryezë që hapet partia demokratike dhe të shkrihet me parti të tjera por është një front opozitar.
Deputetët duhet të dalin nga populli dhe të votohen nga populli. Jo siç ndodh sot. Ky ishte thelbi i kësaj tryeze. Unë mendoj që edhe parti të tjera janë thirrur të bashkohen. Sepse këtu nuk bëhet fjalë më për ideologji, por për demokraci.
Parimisht të gjithë po bashkohen. Asnjë nga komisionet që fitoi opozita nuk godet aty ku i dhemb qeverisë dhe kjo u arrit falë marrëveshjes. Thelbi i asaj marrëveshje është që ata të bëhen bashkë për të plotësuar votat për ligjet që kërkojnë plus 84 vota.
Ka plot parti që bashkëqeverisin edhe pse nuk janë në kabinetin qeveritar. Sepse mund të bashkëpunosh në dhjetëra mënyra. Bashkëqeverisja kuptohet te tenderat, koncesionet, bizneset, investimet strategjike, tek ato që nuk duken”, u shpreh Hoxha në Dritare TV.
Marrëveshja Rama-Berisha, “e drejtë,” e logjikshme, e tmerrshme
Nga Fitim Zekthi
Marrëveshja politike mes Partisë Socialiste të kryeministrit Edi Rama dhe grupimit politik të Sali Berishës është gjëja e duhur, e vetmja gjë e drejtë dhe logjike që ata mund të bënin nisur nga këndi i tyre.
Nuk ka në atë marrëveshje asgjë të gabuar, asgjë të palogjikshme ndonëse ajo është një marrëveshje që kërcënon drejtpëdrejtë çdo shpresë për ndryshim dhe çdo shpresë për ta futur vendin në trajektoren e sunimit të ligjit dhe në trajektoren ku askush nuk është mbi ligjin.
Për të kuptuar që ajo është e drejtë duhet të shohim se çfarë përfaqësojnë grupimi politik i Edi Ramës dhe grupimi politik i Sali Berishës.
Së bashku me Ilir Metën ata janë politikanët, drejtues partish apo qeverish, më jetëgjatë të Shqipërisë në 34 vite pluralizëm. Berisha dhe Meta kanë aty që prej fillimit, pra 34 vite. Rama ka aty që në vitin 1998 pra 26 vite. Ka në politikën shqiptare njerëz me jetëgjatësi të tillë si Tritan Shehu apo si Pasndeli Majko por këta nuk kanë qenë kurrë dhe vazhdimisht drejtues partie dhe kryeministra kësisoj nuk mund të merren asfarë në konsideratë si njerëz që kanë ideuar, përvijuar, ngritur dhe mbajtur në këmbë ndonjë sistem politik.
Demokracia është sot diçka në vështirësi kudo në botë. Ndryshe nga sa mendohej në fillim të viteve 1990 se demokracia do të dominonte kudo në botë dhe do të bëhej gjithnjë e më e fortë ajo në të vërtetë në shumë vende të Europës Lindore, të Afrikës Subsaharinae, të Azisë dhe Ameriëks Jugore është në dobësim, në bjerrje, në shkërrmoqje. Shqipëria është një nga vendet që e dëshmon më fort se shumë e shumë të tjerë këtë bjerrje të rëndë të demokracisë dhe rënien nën kontrollin e një sistemi politik të korruptuar dhe autokratik.
Francis Fukuyama, një nga shkencëtarët më të njohur në botë të politikës thotë se demokracitë e reja të pas viteve 1990 duke qenë se u ngritën të gjitha mbi rrëzimet dhe boshllëkun e sistemeve diktatoriale lanë hapësira që njerëz të fortë, njerëz që kryeminin veprimtari kriminale të mund të ndikonin sistemin politik. Partitë kishin interes të bashkëpunonin me këtë njerëz në mënyrë që të fitonin sa më shumë vota. Sistemi i ri i drejtëisë duke qenë shumë i dobët nuk kishte mundësi ti ndalonte. Partitë e reja të sapo krijuara duke qenë se drejtoheshbin nga njerëz me përvojë dhe kulturë shumë të vogël të respektit për ligjin, zgjedhjet, lirinë dhe të drejtën filluan të kërkojnë mjete për të qëndruar gjatë në pushtet madje me çdo kusht. Pak a shumë thotë Fukuyama kjo ndodhi kudo në demokracitë e reja. Kjo gjë ndodhi padyshim edhe në Shqipëri.
Gradualisht si pasojë e sistemit të dobët të drejtësisë, si pasojë e përjekjes së partive që të mbanin pushtetin, si pasojë e ndikimit të njerëzve që vinin nga krimi këta të fundit nisën të kenë gjithnjë e më shumë ndikim në jetën politike. Klasa e re e biznesit që po lindte në një masë të madhe do të vepronte brenda kësaj atmosfere dhe nisi të bashkëpunojë me politikën për tu mbrojtur. Më pas një pjesë e saj nisi të bashkëpunojë për të fituar më shumë. Edhe njerëzit që vinin nga krimi nisën të bashkëpunojnë me politikën për të qene të mbrojtur në fillim dhe më pas për të fituar më shumë e më shumë.
Si rezultat pas tre dekadash sistemi drejtësie që ka ardhur duike u dobësuar dhe korruptuar, njerëzit e krimit dhe biznesit klinetelist me pushtetin politik arritën të bëhen pjesë e vendimarrjes politike. Sistemi politik arriti një pikë ku ishte dhe është padyshim e vështirë të kuptohet se cila pjesë është biznes klinetelist, krim i organizuar dhe parti politike. Që të treja bashkë janë sistemi, që të treja bashkë janë vendimarrja politike. Kjo është pak a shumë ajo që, thotë Francis Fukuyama, ka ndodhur. Sigurisht secili vend ka shkallën e tij të kësaj bjrrejeje por në vija të përgjitshme kjo është e përbashkëta.
Shqpëria është padiskutim dëshmi e qartë kristal e kësaj pamjeje. Pra gradualisht në 33 vite sistemi poltik u ngjiz, u ideua, u rrit dhe drejtohet nën këtë shenjë, nën shenjën e lidhjes së pandashme të biznesit klientelist, krimit të organizuar dhe politikanëve jetëgjatë që kanë drejtuar qeveritë dhe partitë e mëdha për këto 33 vite. Sistemi politik i ngjan një shkëmbi të madh akulli ku pjesa dërrmuese është në ujë dhe pjesa e vogël është mbi të. Ajo që është mbi ujë ka dy tre maja ose grupe që janë partitë politike që drejtohen nga kryeministrat dhe kryetarët e partive të mëdha të tranzicionit. Këta indidvidë, partitë e tyre dhe njerëzit që ata kanë në parti shfaqen si në një luftë të egër me njëri tjetrin. Në shumë raste kjo luftë është e vërtetë dhe e egër sespe bëhet fjalë se cili do të ketë më shumë fuqi brenda këtij sistemi.
Pjesa poshtë e shkënmbit të akullit që është pjesa më e madhe, është pjesa e sistemit politik të krijuar në 33 vite si baza, mbëështetja dhe fuqia e vërtetë e sistemit. Kjo pjesë është biznesi klinetelist dhe krimi I organizuar. Edhe kjo pjesë ka luftën e vet të brendshme e cila mund të jetë në shumë raste e egër dhe e vërtetë sepse bëhet fjalë për dominim në sistem. Kjo pjesë në shumë raste mund të bëjë luftë edhe vertikale për shantazh ose për ndikim më të madh. Lufta mund të jetë gjithëfasojëshe.
Douglas North, një shkencëtar amerikan i ekonomisë dhe politikës që ka fituar çmim Nobel thotë se sisteme të tilla zhvillojnë një luftë të fortë të brendshme kur prishen ekuilibrat. Çdo biznes apo grup biznesi klinetelist, çdo grup krimi, çdo parti apo grup politik merr renta dhe privilegje në ekonomi dhe politikë në përputhje me fuqinë e tij ekonomike dhe kriminale, në përputhje me forcën për të ushtruar dhunë apo blerë vota, në përputhje me fuqinë për të kërcënuar dhe shantazhaur etj. Kur dikush nuk merr aq sa ka fuqinë atëherë shpërthen lufta e cila ndalet kur rivendoset ekuilibri. Ekuilibri vendoset kur gjithkush rimerr sipas fuqise që ka renta ne ekonomi dhe politikë.
Kjo ndoddh saktësisht me vendin tonë. Sistemi ynë politik është pikërisht ky shkëmb akulli ku lart janë politikanët që kanë drejtuar dhe drejtojnë partitë e mëdha dhe qeveritë në këto 33 vite, poshtë janë biznesi klientelist dhe krimi I organizuar. Pavarësisht se sistemi mund të jetë në luftë mes vedi, sistemi nuk mund të pranojë kurrë dobësimin e vetes dhe aq më keq shkatërrimin e vetes. Çdo element I sistemit kur kërcënohet sistemi do të bashkohet dhe do të formojë një bashkësi në mënyrë që të mbrojnë systemin.
Sistemi politik i shkëmbit të akullit është një oqean me temperatura që garantojnë jetën e akullit, sistemi politik ëshët është habitati natyror ku njeton jeton klasa jonë politike dhe biznesi i saj klinetelist së bashku me krimin e organizuar që është po ashtu pjesë e natyrshme këtij sistemi.
Oqeani është hapësira publike, drejtësia, media, ekonomia kombëtare etj. Është pak a shumë si një pyll apo një shkurrajë ku dhelpra dhe lepuri, ujku dhe kaproli, skiftreri dhe shkurta janë armiq por nuk duan kurrësesi shkatërrimin e sistemit sespe po u shkatërrua sistemi zhduken edhe ato.
Për këtë arsye marrëveshja Berisha Rama është e pashmangshme, e vetmja e logjikshme brenda këndit të tyre të logjikës. Ata po luftojën të shpëtojnë sistemin dhe veten. Nuk po luftojnë për askënd tjetër, për popullin dhe njerëzit jo e jo. Ata, sistemi, janë ashpërssiht të kërcënuar nga prishja e sistemit, nga SPAK dhe përfundimi I pandëshkueshmërisë. Ata janë të kërcënuar edhe nga çdo parti politike që është kundër sistmit të tyre, që shtë në anën e SPAK-ut dhe që është në anën e linjës politike që ndjekin partnerët ndërkombëtarë sidmos SHBA-ja.
Sistemi ka prekur fundin dhe ai do te beje gjera edhe me te renda s e sa kaq per te mbijetuar. Sistemi ka fuqi te akumuluar ne 33 vite dhe do te mundohet ta perdure kete fuqi per te mbijetuar. Problemi eshte se ai ka dy armiq te tmershem. I pari është koha, eshte kalbezimi, është entropia dhe i dyti që është edhe më i rrezikshëm për ta është SPAK-u dhe SHBA-ja. Sistemi nuk do mbijetojë dot, ai do shkaktojë dëm dhe vuajtje tek shqiptarët dhe tek vendi ynë por sigurisht do ti shkaktojë dhimbje të mëdha edhe vetes.
Gjyqi për Berishën në Londër, analisti: Përpjekja për të hequr non gratën do dështojë, hetimet e SPAK ‘fundosin’ mbrojtjen e ish-kryeministrit
Analisti Endri Tafani ka folur për gjyqin e nisur në Britani të Madhe, ku po shqyrtohet kërkesa e Sali Berishës, i shpallur non grata nga Anglia për korrupsion dhe lidhje me krimin, kundër Ministrisë së Punëve të Brendshme të Britanisë së Madhe.
I ftuar në emisionin ‘Sot Live në Shqipëri’, Tafani thotë se përpjekja e Berishës për heqjen e non gratës nga Britani do dështojë. Ai u ndal edhe në argumentet që po përdor mbrojtja e Berishës.
Analisti Tafani thotë se hetimet e SPAK dhe fakti që ka një akuzë të ngritur ndaj Berishës dhe familjarëve të tij, do ‘fundosin’ argumentet e mbrojtjes së Berishës.
“Argumentet që ka ngritur mbrojtja më duken pak të vështirë për të kthyer vendimin. Argumenti i parë ishte që akuzat janë të pabaza, nuk ekziston që është i përfshirë në korrupsione e përfitime për postin.
Argumenti i dytë është që kam nja 10 vite që nuk jam kryeministër, nuk jam personi që mund të shfaq rrezikshmëri. Argumenti i 3 është që kryeministri Rama është ai që është në pushtet dhe për atë është përfolur, pse nuk është marrë masë, por për mua është marrë.
E shohim që tek argumenti i parë, që mbrojtja mund të jetë që ndaj jush ka një akuzë dhe jeni në hetim. Ata mund të thonë që i kam pas këto informacione më para, dhe e kam ditur që ky person ka qenë i përfshirë dhe fakti ekziston që është përfshirë se ka një kauzë penale të ngritur ndaj tij dhe familjarëve të tij, duke thënë abuzimi me postin dhe përfitimi i familjarëve nga posti”, tha Tafani.
Po ashtu Tafani thotë se nuk qëndron as argumenti që përdor mbrojtje se Berisha prej 10 vitesh nuk është më kryeministër, duke tehksuar se kjo nuk do të thotë që ai s’duhet të mbajë përgjegjësi për çfarë ka bërë.
“Argumenti që ka 10 vite që nuk është kryeministër s’do të thotë që s’do mbash përgjegjësi për atë që ke bërë. Fakti që është aktiv në politikë e anulon këtë gjë. Është shumë e vështirë të kthehet duke bërë argumente që është bërë nga mbrojtja e Berishës”, tha Tafan
Tryeza e Bashës, Spartak Ngjela: Na duhet PD e fortë që të krijojë bashkimin! Përballë keni partinë e Enver Hoxhës!
Avokati Spartak Ngjela është pjesë e tryezës së organizuar nga Lulzim Basha dhe Partia Demokratike ‘Harku Opozitar Euro-Atlantik’. Ngjela tha se PD është e vetmja alternativë që ka e djathta, megjithatë edhe ajo është e cunguar dhe duhet të mbledhë rreth vetes njerëz me vlera. Duke u ndalur tek Sali Berisha ai e cilëson si nga 3 monarkët e vendit, i cili ka ardhur pas Zogut dhe Enves Hoxhë, i cili momentalisht s’ka parti, është i arrestuar, por nuk e kupton dhe del në penxhere pas asnjë ide.
‘Janë tre apo katër aspekte që duhen ndryshuar. Nëse individëve të caktuar bashkimi iu krijon frikën se nuk do triumfojnë personalisht nuk vlejnë. Politika është luftë idesh. Këtu kanë frikë nga idetë e reja jo tani por që nga 45’. Këto janë ato monarkitë që kanë kaluar, nga Zogu tek Enveri, nga Enveri tek Saliu. Çdo të thotë monark? Nuk është kurora, është politika që ka monarku. Heq kë të dojë, vë kë të dojë. Këto të fundit janë edhe populiste. Ua futi Enveri edhe e mori edhe ky tjetri që vjen vërdallë se nuk ka parti. Nuk kupton se është i arrestuar. Asnjë ide. E vetmja shpresë që ka e djathta është Partia Demokratike, nuk është në formën që duhet të ishte. PD që ishte e çau Saliu. Edhe po të mos ishte e çarë nuk ishte e fortë. Tani na duhet një parti e fortë që të krijojë bashkimin. Bashkimi është politik. Jo absolutizëm jemi akoma në absolutizëm. Nuk zhvillohet kombi. Kriza politike është krizë individësh sepse janë pa ide.
Opinioni është i mjegulluar. Nuk ka program. Duhet të paktën që PD që ka një karakter klasik që vlen shumë në politik duhet të jap mundësinë e kësaj devize. Duhet të ketë një skemë konkrete që të thërras individë me vlerë. Përballë keni partinë e Enver Hoxhës, jo të Ramës. Nuk e rrëzuan dot sepse doli Saliu për të qenë Enveri. Saliu krijoi absolutizëm dhe donte pushtet absolut. Dashuria e liderve shqiptarë për kultin e invdivid. Saliu donte të bërtisnin Sali, Sali ti je bota, broçkulla. Nëse kjo është një mbledhje që krijon bashkim bravo na qoftë, nëse krijon ndarje asgjë. Për të krijuar një bashkim politik, eksperienca e perëndimit na ka thënë që një parti klasike e bën. Pse nuk bie Partia e Punës? Nuk bien partitë klasike. Kjo që është këtu është parti e Enver Hoxhës. Kush do krijojë votat përqindjet e mëdha në opinionin publik.
Na duhet një parti klasike. Ja ku e keni Lulzim Bashën. Është i aftë ta bëjë apo jo? Varet nëse do ftoj të tjerët. Nuk ka kohë më deri në zgjedhje, sepse kuptohet Rama e zvarrit çështjen që të shkoj me këtë formacion politik deri në zgjedhje. E ka në dorë e djathta. Të dalim në një konkluzion, që ti përgjgjemi pyetje anglo-saksone: Bari i mirë na thuaj ku? Çështja që do trajtohet më tej se si do jetë bashkimi i liderve, ku? Por marrëveshja duhet jetë juridike. Marrëveshja të jetë koncept juridik i bashkimit. Të ketë karakter statutor dhe liberal. Të gjitha këto nuk bëhen dot në një mbledhje.
Të bëjmë edhe një mbledhje tjetër dhe të krijohen grupe për të sjellë ide në funksion të fushatës elektorale. Edhe pasi të krijojmë një PR, kundërshtarët i tremb sa është përqindja e simpatizantëve. Pa bërë bashkimin nuk e kuptojmë dot. Bashkimi në momente të caktuar është politika më e lartë, në funksion të votave. Ajo që më shqetëson është cili do jetë sistemi zgjedhor. Duhet sistem joproporcional, sistem anglosakson. Të kthehemi tek ligji, një për një. Ballë për ballë. Vetëm ai krijon figurat. Ligji proporcional nuk krijon figurat. Individi i neutralizuar nga forcat e partisë. Individi duhet të jetë gjenerim idesh.’
U dorëhoq nga gjyqtar i Apelit për të shmangur Vettingun, Gjin Gjoni bëhet pjesë e politikës! Garon për “Rithemelimin”
Ish-gjyqtari i Gjykatës së Apelit të Tiranes, Gjin Gjoni është bërë pjesë e politikës.
Mësohet se ish-magjistrati Gjin Gjoni do të kandidojë për Kreun e Rithemelimit në degën e Lezhës.
Rikthemelimi, në kuadër të riorganizimit, njoftoi nisjen e garës për të zgjedhur 19 kryetarët e rinj të degëve të kësaj force politike.
Gjin Gjoni, i cili do të jetë një nga kandidatët, ka dhënë dorëheqjen nga detyra si gjykatës i Apelit të Tiranës në 21 korrik 2020, duke shmangur kështu vettingun e pasurisë dhe performancës në punë.
“Diçka e madhe po luhet”, gazetari zbardh detaje nga vizita e zyrtarit amerikan në SPAK
Ndihmës Sekretari për Byronë Ndërkombëtare të Narkotikëve dhe Çështjeve të Zbatimit të Ligjit, Todd D. Robinson vizitoi ditën e djeshme Shqipërinë, ku gjatë vizitës së tij ai u ndal edhe në SPAK.
Gazetari Lavdrim Lita tha në një intervistë për Euronews Albania se vizita e Robinson në SPAK zgjati 120 minuta kjo sipas tij tregon rëndësinë që amerikanët po i japin këtij institucioni dhe reformës në drejtësi.
Lita tha gjithashtu se duke parë dosjet voluminoze të vendosura edhe në tokë, të krijohet përshtypja se diçka e madhe po luhet.
“Ndihmës sekretari i shtetit Tod Robinson është zyrtari më i lartë i departamentit të shtetit që merret me luftën kundër narkotikëve dhe me respektimin e ligjit.
Ne në 5 javë kemi pasur dy zyrtarë të lartë të departamentit të shtetit si Blinken dhe Robinson që i japin support SPAK-ut dhe reformës në drejtësi.
Por posaçërisht SPAK-ut sepse ditën e djeshme ata kanë qëndruar më shumë se 120 minuta në prani të prokurorëve të SPAK-ut dhe të BKH-së për të parë ecurinë e dosjeve.
Ne e kemi parë nga kapicat e dosjeve që diçka e madhe po luhet në ato dosje dhe korrupsioni që shfaqet aq masiv nga dendësia e atyre dosjeve, tregon se Shqipëria ka një problem shumë të madh me krimin, korrupsionin dhe narkotikët.
Ne dimë që një nga temat e prekura në takim kanë qenë paratë e pista që hyjnë në sektorin e ndërtimit”,– tha Lavdrim Lita.
Kryesore
Continue to the category
“Investimi” që filloi me pushtim prone dhe përfundoi me titull strategjik
Nga Sabina Nika/ shteg.org
Në brigjet e arta të Lukovës, ku deti përplaset qetësisht në breg dhe pronat kanë vlerën e arit, një hotel luksoz...
