Në Shqipëri, ish kryeministri Sali Berisha dhe mbështetësit e tij, mblodhën sot Kuvendin Kombëtar, ku paralajmëruan mosbindjen civile si aksionin e tyre të ardhshëm për t’ju kundërvënë shumicës socialiste në pushtet. “Mosbindja civile është betimi im”, tha zoti Berisha në fjalën e tij, ndërsa deklaroi se “do të jetë një aksion pa kthim për të shpëtuar demokracinë”. Ai ftoi që kësaj lëvizje t’u bashkohen dhe faktorët e tjerë opozitarë: “Ne mund të jemi të ndryshëm, por Edi Rama është armiku ynë i përbashkët. Mos mendoni se Edi Rama rrëzohet me fjalime, deklarata apo me zgjedhje”.

Ish kryeministri, solli si shembull të efektit të mosbindjes civile, qëndrimin në parlament të deputetëve që e përkrahin atë, duke penguar zhvillimin e seancave dhe punën e komisioneve parlamentare. “43 vetë jemi në parlament, vetëm një muaj kemi dhe me kaq veta, në kaq pak kohë, me betejën pa kthim dhe mosbindjen civile, ne i çorrëm maskën Edi Ramës. E gjithë bota mësoi ditët e fundit, se Shqipëria një vend anëtar i NATO-s ka një kryeministër që ka bërë grusht shteti brenda shtetit”, u shpreh zoti Berisha.

Megjithatë, në Kuvendin e sotëm mungonin një pjesë e mirë e atyre deputetëve, të cilët bëjnë pjesë në atë që njihet si grupimi i zotit Gazmend Bardhi. Kritikë të rikthimit të zotit Basha në krye të PD-së zyrtare, në muajin shtator, ata u afruan me deputetët që përkrahin ish kryeministrimin, për të forcuar qëndrimin e opozitës në sallën e parlamentit, por duke refuzuar sot të jenë pjesë e e asaj që zoti Berisha e konsideron si Partia e vërtetë Demokratike.

Ish kryeministri nuk e bëri të qartë se kur ky aksion i opozitës do të shtrihet përtej parlamentit, dhe se për çfarë forme të mosbindjes civile ai bën fjalë.

Një nga momentet që ra në sy në Kuvend, ishte shfaqja për herë të parë në një aktivitet politik të demokratëve, të zonjës Argita Malltezi, vajza e ish kryeministrit. Por zoti Berisha deklaroi se ajo thjesht mori fjalën si një aktiviste që në ditët e para të themelimit të Partisë Demokratike. “Është fjalimi i parë i saj publik në Kuvendin e partisë po kjo nuk do te thotë asgjë më shumë se sa një fjalim në të cilën shprehu si aktiviste e Partisë Demokratike mendimet e veta”, tha zoti Berisha, ndërsa vetë ajo shpjegoi se nuk kishte asnjë ambicie politike.

Bashkëshorti i zonjës Malltezi, është në arrest shtëpie, në kuadër të hetimeve të Prokurorisë së Posaçme për procedurat e privatizimit të ish Klubit sportiv Partizani, të cilat kanë përfshirë dhe vetë ish kryeministrin Berisha.

Kuvendi i sotëm u thirr për votbesimin e zotit Berisha, pas humbjes së zgjedhjeve të 14 majit, por në fakt për to nuk u fol. Ish kryeministri e shpjegoi këtë me faktin se sipas tij vendi gjendet përpara “zhvillimeve dramatike, të zhvillimeve do të thosha më dramatike nga viti 1991 e gjer sot, të grushtit të shtetit brenda shtetit, ndaj opozitës. Sigurisht kjo situatë i dikton PD-së, agjendën e saj duke filluar nga parlamenti dhe duke vazhduar në të gjithë strukturat e saj. Kam bindjen se ky angazhim i PD-së dhe kjo platformë që paraqitet sot në kushtet e emergjencës së krijuar nga grushti i shtetit brenda shtetit, nuk do të pengojë analizat e demokratëve për zgjedhjet e kaluara”.

Rioknfirmimi i zotit Berisha ishte një formalitet. Nga 1 mijë delegatë që morën pjesë në votimin për votbesimin e tij, vetëm 55 votuan kundër, ndërsa 7 vota u shpallën të pavlefshme./ VOA

Emigracioni përgjatë 33 viteve, që nga rënia e komunizmit, mbetet një plagë sociale që jo vetëm nuk po mbyllet por në vend të kësaj përhapet dhe bëhet më e madhe vit pas viti.

Një studim i fundit eksperteve Ilir Gëdeshi dhe Russell King “Studentët shqiptare jashtë, një potencial për emigrimin e trurit” vë në dukje se, mbi 600 të rinj shqiptare të anketuar që studiojnë jashtë vendit janë shumë të kënaqur me zgjedhjen që kanë bërë.

Studimi vë në dukje se studentët janë trashëgimtarë të profesionistëve dhe po shërbejnë si një indikator për emigrimin kronik te të rinjve për studime, në një kohë që cilësia e universiteteve publike shqiptare që thirhin mbi 70 për qind të fondeve jo vetëm nuk po përmirësohet, por përkundrazi, askush nuk mban përgjegjësi për gjendjen.

Të dhënat që i takojnë vitit 2017 tregojnë se stoku i studentëve jashtë vendit është 17,488 prej të cilëve 59,4% studionin në Itali, 6.9% në Greqi dhe 5.7% në Turqi, dhe pjesa e tjetër në vendet e tjera të BE-së. Fluksi është shtuar edhe më shumë gjatë viteve të fundit.

Të dhëna më të detajuara tregojnë se studentët jashtë vendit janë kryesisht pasardhës të profesionistëve (mjekë, avokatë, arkitektë, profesorë universiteti, ekspertë IT, gazetarë etj.) dhe të personave të biznesit (pronarë, drejtorë, menaxherët, partnerët etj.). Baballarët e studentëve jashtë vendit, gati 53.5% në këto dy sektorë orë (biznes dhe profesione).

Autorët evidentojnë se, familjet më të pasura dhe më të fuqishme politikisht i dërgojnë fëmijët e tyre në universitete të rangut të lartë në Mbretërinë e Bashkuar dhe në një masë më të vogël në Zvicër, Holandë dhe Francë. Kjo kërkon investime të mëdha jo vetëm në tarifat e shkollimit dhe akomodimin. Të dhënat e anketës tregojnë se 62 për qind e prindërve të studentëve që studiojnë në Britaninë e Madhe janë persona në biznes, profesionistë apo zyrtarë të lartë shtetërorë.

Të intervistuarit kanë pohuar se studimi me bursë jashtë vendit është selektiv dhe kryesisht fitohet nga familjarëve me poste drejtuese në Administratë. Megjithatë ata që largohen për të studiuar jashtë kanë më shumë gjasa të kenë prindër të diplomuar.

Studimi tregon se synimet e të rinjve për t’u larguar dhe arsimuar jashtë vendit duket të jenë më të larta se kurrë më parë.

Për të frenuar këtë hemorragji të trurit, politikat e brendshme duhet të sigurojnë perspektiva më të mira për të rinjtë shqiptarë për të qëndruar në Shqipëri, sugjerojnë autorët.

Kjo sipas tyre do të kërkonte disa gjëra: përmirësimin e standardit të universiteteve shqiptare dhe lidhjen e tyre në mënyrë më efektive në rrjetet akademike ndërkombëtare, duke përfshirë shkëmbimet afatshkurtra të studentëve në mënyrë që studentët nuk ‘humben’ por sigurohen që të kthehen. Gjithashtu duhen krijuar perspektiva më të mira pune për të diplomuarit, me të ardhura më të larta dhe struktura më të qarta të karrierës.

Bamir Topi ka komentuar Kuvendit Kombëtar të mbajtur më 2 dhjetor nga Sali Berisha, ku ky i fundit është rizgjedhur kryetar i Partisë Demokratike të Rithemelimit me 938 vota pro.

I ftuar në studion e emisionit “Kjo Javë” në News24, Topi është shprehur se opozita tanimë është kthyer në “qesharake”, por nga ana tjetër sipas tij kjo është një “dramë e madhe për shoqërinë shqiptare”.

Ndër të tjera ai është ndalur dhe në daljen publike të  së bijës së Berishës, Argita Malltezit, për të cilin ish-presidenti Topi tha se ajo është e predispozuar të ecë në hapat e të atit, por do të varet sa do e lejojë ky i fundit.

Sipas tij në një parti të dominuar nga “njëshi” preferencat e para për trashëgiminë janë te pjesëtarët e besuar të familjes.

“Ashtu sikurse unë shikoj dinamikën e lëvizjeve në opozitë, do të vijë një ditë kur opozita do të bëhet qesharake. Jemi në një teatër ku po luhet një komedi. Kjo është komedi për PD-në, por dramë e madhe për shoqërinë. Duke parë që situata rrotullohet rreth një individi të pashpresë, kjo shoqëri po shkon në një situatë të pashpresë.

Grupi i Bardhit ka preferuar të mbajë bashkimin në parlament duke i dhënë prioritet kohezionit parlamentar. Në jetën politike jam rezervuar në komentet rreth familjes, por jemi në politikë, unë shikoj që e bija e Berishës nuk është një personazh që shfaqet rishtaz. Ajo që konsiderohet risi është shfaqja publike.

Zonja Malltezi ka thënë që i përket shtresës së mesme, ndaj më duhet një kohë e gjatë për të parë formëzimin nëse marrim si pikë referimi që zonja Malltezi është shtresë e mesme se si është shoqëria shqiptare.

Ajo parti mund të përcaktohet si një parti që dominohet nga njëshi dhe kur dikush e dominon patjetër që preferencat e para janë të trashëgimtarëve brenda familjes. Kjo është diskutuar gjerë e gjatë, por sot shihet qartë që në një moment të vështirë të Sali Berishës pretendohet të fuqizohet me elementë të rinj si ato brenda familjes.

Ajo shprehet se nuk pretendon më tepër se kaq, nëse Berisha do kërkonte kompromis për tërheqjen nëse vazhdon e bija, do të ishte Argita ajo që do e zëvendësonte?

Jam i bindur se gjithçka që në çdo lloj rrethane gjithë predispozicioni është që ajo të ecë në hapat e të atit, por varet sa e lejon ai. Megjithatë unë këtë e shoh si stacionin e fundit, nuk ka stacion tjetër më, është pika fundore e partisë”, tha ai.

Në lidhje me thirrjen e ish-kryeministrit për grevë urie dhe mosbindje civile, Topi u shpreh se ka ardhur koha që Berisha të futet në grevë urie si Pjetër Arbnori, i cili rrezikoi jetën.

Ndër të tjera, ish-presidenti tha se ‘Berisha ka parë boll se si kanë bërë të tjerët’, ndërsa shtoi se kjo është një mënyrë, gjest për të cilin ish-kryeministri do të mbahet mend.

Aksioni i opozitës me këto përmasa, si e shihni?

Bamir Topi: E keni parë zotin Berisha që i hedh deklaratat përtej të mundshmes. Ajo bëhet për të thirrur nën forcë ‘eja në radhë’ militantët. Kush është jashtë këtij informacioni e shikon fatin e Berishës të mbyllur. Unë besoj se është një kapitull që duhet të jetë i fundit. Duhet të jetë epilogu.

Unë kam eksperiencën e jetës politike. Thënieve të tij se do ketë gjeste deri të mosbindje civile…më kujtohet kur i ndjeri Pjetër Arbnori, i cili shkoi në prag të vdekjes. Sot mesa duket ka ardhur dita që vetë zoti Berisha për t’i dhënë besim kësaj lëvizje të bëj grevë urie që ta provojë vetë. Të shkojë ta provojë. Boll ka parë të tjerët. Të mbahet mend që tek e fundit bëri një gjest.