Greqia nuk do të japë pëlqimin për ecurinë e negociatave të anëtarësimit të Shqipërisë ne BE, nëse nuk do të të ketë zhvillime pozitive në lidhje me marrjen e detyrave si kryetar bashkie të Fredi Belerit, përkatësisht betimin e tij si kryebashkiak.

Lidhur me këtë fakt, Presidenti i Institutit Liberal “Pashko”  Preç Zogaj, tha në emisionin “Të paekspozuar” në MCN tv, se kjo është një ndërhyrje e pastër e Greqisë si një akt jomiqësor ndaj Shqipërisë.

Sa i takon mbajtjes në paraburgim, unë nuk jam shumë pro mbajtjes kaq të gjatë në paraburgim, nuk jam për këto burgosjet e gjata pa dënim. Drejtësia të veprojë më shpejt.

Kjo që ka bërë Greqia, sidomos dje dhe sot, është një akt jomiqësor ndaj Shqipërisë. Është akt i shtetit grek, një abuzim dhe shpërdorim i anëtarësimit të Greqisë në BE dhe të drejtës që ka për të vendosur veton.

Natyrisht, ju thatë që përgjatë këtyre viteve, ka patur periudha të përmirësimit të marrëdhënieve, por ka një akumulim të vjetër që del në pah shpeshherë dhe ka dalë edhe në këtë rast, ku Greqia kërkon të lirohet një person i arrestuar nga drejtësia. Pra i kërkon Shqipërisë, të bëhet një shtet politik. Kjo është në kundërshtim me standardin e integrimit në Bashkimin Europian.

Bilateralizmi mund ta pengojë pafundësisht zgjerimin e BE-së.

Mendoj se duhet të vijë një mision i BE-së këtu dhe ta shohë këtë çështje.

Më duket sikur Greqia kërkon të arrijë çështje të tjera këtu, që Shqipëria të vetëpaditet si vend ku nuk ka drejtësi.

I ftuar në “Drejt” nga Luan Rama në Ora News, gazetari Reldar Dedaj tha se Berisha është shumë modest me interesat e veta, por janë të tjetër që kanë pritshmëri mbi të.

Dedaj: Ligji që ka Shqipëria për mediet është krejtësisht jashtë çdo principi evropian. Shihi klasën e vjetër të analistëve që kanë 30 vite dhe janë rritur me këtë klasë politike dhe u shërbejnë atyre në kurriz të qytetarëve. Herë mbrojnë Berishën dhe herë mbrojnë Ramën.

Këta duhet t’i dalin këtij sistemi dhe t’i imponohen që të ndryshohet ky kod dhe ligj elektoral dhe të shkojnë tek interesat e qytetarëve, sepse ata nuk janë injorantë, e kuptojnë shumë mirë këtë aleancë interesash. Berisha është shumë modest me interesat e veta, por janë të tjetër që kanë pritshmëri mbi Berishën. Berisha i mori aksionin zyrtar të gjithë partive opozitare. Të gjithë e dinë se Berisha nuk vjen më në pushtet.

Mes detajeve të dhëna mbi Kuvendin e Rithemelimit që do mbahet në 2 dhjetor për votëbesimin e Berishës si kryetar, gazetarja e Report Tv, Danjela Maloku zbuloi se përveç votimit të fshehtë, në Kuvend, Këshilli Kombëtar do të miratojë një rezolutë me tezat e Berishës për organet e drejtësisë.

“Do miratohet një rezolutë që ende është në proces të hartimit të detajeve të fundit që do ketë tezat e artikuluara nga Berisha për të lidhur gjithë veprimtaritë e tjera që kanë të bëjnë edhe me organet e drejtësisë. Berisha nuk e ka fshehur se edhe aksioni i SPAK është i lidhur me dëmtimin e opozitës, prandaj do jetë pjesë e rezolutës. Pritet të ketë 12-20 folës dhe pritet të zgjasë deri në 2 orë dhe më pas procesi i votimit e numërimit”- u shpreh gazetarja Danjela Maloku në “Frontline” nga Marsela Karapanço.
Kujtojmë se Berisha ka akuzuar organet e drejtësisë së re po ndjekin një agjendë poltike në shërbim të mazhorancës. Këto akuza u shpeshtuan pasi ndaj kreut të Rithemelimit GJKKO caktoi masën ‘detyrim paraqitje’ dhe ‘ndalim i daljes jashtë shtetit’ duke e akuzuar për korrupsion pasiv për aferën e privatizimit të klubit ‘Partizani’

Deputeti i PD, Saimir Korreshi ka bërë me dije se nuk do të marrë pjesë në Kuvendin e Rithemelimit në 2 dhjetor për votëbesimin e Sali Berishës pas humbjes së thellë në zgjedhjet vendore të 14 majit.

Në një lidhje ‘skype’ për emisionin “Frontline” me gazetaren Marsela Karapanço në Report Tv, deputeti tha se nuk ndihet i përfaqësuar pasi nuk ka marrë pjesë më herët në vendimmarrjet e këtij Kuvendi.

“Nuk do jem në datën 2, është në momentin më të papërshtatshëm. Ka gjëra më të rëndësishme pasi opozita ka ngritur një kauzë shumë të rëndësishme në Kuvend. 40 burra patëm kurajon të linim mënjanë mosmarrëveshjet për të përballur me një të keqe më të madhe. Ka shumë demokratë të tjerë që nuk kanë marrë pjesë e këtyre vendimmarrjeve të Kuvendit që do mbahet në 2 dhjetor. Po marr rastin e Lushnjës, nuk jemi bërë pjesë unë dhe shumë demokratë të tjerë. Nuk përfaqësohemi dot”- tha Korreshi.

Ish-deputeti i Partisë Demokratike, Gert Bogdani ka qenë i ftuar në ‘Panorama TV’ ku ndër të tjera foli edhe për situatën në të cilën ndodhet opozita dhe mënyrën se si ajo mund të dalë nga kjo tymnajë.

Fillimisht ai ka thënë se kjo sherrnajë në të cilën është përfshirë PD nuk i shërben askujt, por thjeshtë ka lodhur qytetarët.

“Kam qenë i barazlarguar nga kjo sherrnajë e brendshme, sepse sherri nuk bën mirë askujt, por thjeshtë ka lodhur qytetarët demokratë. Sherri nuk të çon askund” tha ai.

Sipas TIJ për të larguar këtë tymnajë në opozitë duhet një vullnet i fortë politik, që përfshin bashkimin e partisë, reformimin e punës dhe rifreskimin e saj.

Bogdani: Kam qenë i barazlarguar nga kjo sherrnajë e brendshme, sepse sherri nuk bën mirë askujt, por thjeshtë ka lodhur qytetarët demokratë. Sherri nuk të çon askund.

Angazhimi politik është i përditshëm me demokratët e thjeshtë dhe bazën e Partisë Demokratike. Një opozitë e dobët në një vend si Shqipëria, tregon që është një vend që po shkon keq. Edhe në një vend me demokratik, pa opozitë, kryeministri do gabonte.

Kjo gjendja e PD, nuk ndihmon vendin.

Sa i përket Kuvendit dhe a do shkojë Bardhi, këto janë cic-mice. Problemi është se a do zgjidhen problemet e mëdha dhe kjo tymnajë e opozitës.

Një vullnet i fortë politik e heq tymnajën në opozitë. E para është bashkimi, për numra dhe frymëzim. E dyta është reformimi. Mënyra e të berit punë. Të jesh përditë me demokratët dhe qytetarët. Jo vetëm kur ka fushata elektorale.

Dhe së fundmi, rifreskim. Duhet t’i hapet rruga njerëzve  të rinj që frymëzojnë qytetarët.

Me një ekip që ka humbur 7 herë, nëse nuk e ndryshon, rezultati po i njëjtë do të jetë.

Duhet vënë interesi kombëtar, mbi interesat personale dhe partiake.