30.5 C
Tirana
E martë, 24 Qershor, 2025
type here...

PD, Pampuri: Raporti i fundit i BERZH për vitin 2023 konfirmon se Shqipëria është vendi me qeverisjen më të keqe në rajon

Lidhur me raportin e fundit të BERZH-it për vitin 2023, ka reaguar në një postim në profilin e saj në rrjetin social facebook nënkryetarja dhe deputetja e PD-së, Orjola Pampuri.

Pampuri shprehet se raporti është dëshmi e një qeverisjeje të keqe dhe të dëmshme për ekonominë në vend.

“Ky model i gabuar qeverisje punon vetëm për një grusht njerëzish të lidhur me pushtetin duke përfituar tendera, prokurime publike, PPP e konçesione, ku çdo vit i grabiten qindra miliona euro nga taksat e shqiptarëve.” – shprehet deputetja demokrate.


Postimi i plotë i Orjola Pampurit:

Raporti i fundit i BERZH për vitin 2023 konfirmon se Shqipëria është vendi me qeverisjen më të keqe në rajon, çka sjell pasoja të dëmshme në ekonominë e vendit.

Raporti i Tranzicionit “2023-2024” i Bankës Europiane për Rindërtim dhe Zhvillim (BERZH) konfirmon pamjen e qartë se si po performon qeverisja në raport me tregun, politikat publike dhe se sa e afektojnë shërbimet ndaj qytetarëve.

Shqipëria ka shënuar përkeqësim të dukshëm në qeverisjen, sëbashku me Bosnje Hercegovinën.

Ky përkeqësim kryesisht reflektohet në rënien e treguesve që masin efektivitetin e gjykatave dhe pavarësinë e gjyqësorit; informalitetin, dhe korrupsionin e perceptuar; lirinë e medias; kornizat rregullatore në lidhje me transparencën dhe buxhetin.

Performanca e ulët e qeverisjes në fushat e prokurimeve publike, përqëndrimi i mbështetjes buxhetore në konçesione dhe PPP ku vetëm në Shëndetësi 50 milion për vitin e ardhshëm janë më shumë se dy herë totali i shpenzimeve për investime në të gjitha spitalet e qendrat shëndetësore të vendit.

Ky model keqqeverisje ka reflektuar në uljen e perceptimit të publikut ndaj “cilësisë së jetesës” në vend, ku Shqipëria renditet e fundit krahasuar me të gjitha vendet e rajonit.

Shqipëria ka shënuar rënie për vitin 2023 krahasuar një “qëndrueshmërie” përgjatë periudhës “2016-2022” duke u renditur e fundit në rajon në nivelin për:

– Konkurueshmërinë
– Qeverisjen e Mirë
– Qëndrueshmëri Financiare
– Integrimi Ekonomik.

Ky model i gabuar qeverisje punon vetëm për një grusht njerëzish të lidhur me pushtetin duke përfituar tendera, prokurime publike, PPP e konçesione, ku çdo vit i grabiten qindra miliona euro nga taksat e shqiptarëve.

Një qeverisje që nuk shpërndan të mira dhe mbështetje financiare për më shumë shërbime publike cilësore, në Shendëtësi dhe Arsim për çdo qytetar, një treg të lirë, fermerë dhe zhvillim rural të subvencionuar, infrastrukturë dhe shërbime vendore që mundësojnë zhvillim të qëndrueshëm.

‼️Ndaj ne Partia Demokratike e Shqipërisë, dhe unë personalisht kemi depozituar në Kuvendin e Shqipërisë 8 Amendamente për Buxhetin 2024 në mënyrë që së paku të orientohet dhe të realizohet një shpërndarje më reale dhe e drejtë ndaj qytetarëve dhe të jetë në shërbimin e tyre.

Kadilli: Foltorja s’e pengon dot drejtësinë, Berisha gjithmonë i është shmangur

Ish-kandidati për kryetar të Partisë Demokratike, Fatbardh Kadilli thotë se ish-kryeministri Sali Berisha nuk mund ta pengojë drejtësinë që të bëjë punën e saj.

Në një intervistë për “Tirana Live” në ABC News, Kadilli u shpreh se Berisha gjithmonë i është shmangur drejtësisë dhe është mbrojtur nën flamurin e Partisë Demokratike.

Sipas Kadillit, Berisha nuk mund të krijojë më një parti të madhe politike dhe shtoi se qëndrimet e grupit të tij janë radikale.

“Kujdesi i ndërkombëtarëve për funksionimin e demokracisë nuk ka munguar kurrë. Janë shumë seriozë kur vjen fjala për funksionimin e parlamentit. Opozita po tallet me shqiptarët. Dalloj 3 gjëra të ndryshme. Janë qëndrimet që mbajnë palët e strukturuara të opozitës, rrugët që zgjedhin, dhe çfarë është e ardhmja e tyre.

Si qëndrime, PD zyrtare ka pasur qëndrime korrekte, por inekzistente. Politika nuk mjaftohet me qëndrime, por duhet sjellje. Sjellja e PD së Bashës, është inekzistente, e papranueshme. Çdokush që i është afruar Berishës, në atë mbledhje vonohet qëllimsht që të tregojë që është ai kryetari. Qëndrimet e tyre janë radikale, sjellja e tyre është guerrilase. E ardhmja e tyre është rrudhje dhe tkurrje. Zoti Berisha nuk mund të bëjë më parti të madhe politike.

Nuk e pengon dot, sepse drejtësia që po ndodh në Shqipëri, është proces që ka më shumës se 1 dekadë që po ndodh në rajonin tonë. Kjo ndodhi në Bullgari, Maqedoninë e Veriut, Kroaci, po ndodh edhe në Shqipëri. Leksioni që mori më 14 maj opozita, nuk i mjaftoi. Kjo nuk është opozita që i jep përgjigje qytetarëve. Vota e 14 majit nuk mund të harrohet.

Berisha gjithmonë i është shmangur drejtësisë, është mbrojtur në kurriz të Partisë Demokratike. Kjo është një padrejtësi e madhe që i ka bërë Partisë Demokratike. Kjo nuk bëhet nën flamurin e Partisë Demorkatike. Nuk po akuzoj zotin Malltezi, e vendos drejtësia.

Nuk mund t’i fshihesh në një moment drejtësisë. Zoti Berisha duhet të ballafaqohet me drejtësinë si çdo njeri. Nuk ia fal dot që mbrohet nën flamurin e Partisë Demokratike. Shqiptarët kanë më shumë frikë nga zoti Berisha se nga zoti Rama. Ky është gogoli i politikës shqiptare, i dyti Rama, i treti Meta, i katërti ndoshta Basha”, theksoi ai.

Në Gjermani shkojnë 23 lojtarë, tani nisin dilemat për Sylvinhon

Kuqezinjtë do të nisin përgatitjet për takimet që do të luajë në Gjermani, me besimin se në pjesëmarrjen e dytë do të bëjë më mirë se në debutimin e vitit 2016, duke shpresuar këtë herë që të kalojë të paktën fazën e grupeve.

Trajneri Sylvinho do të ketë një mision të vështirë, për të caktuar 23 lojtarët që do të marrë me vete në Gjermani.

Deri në qershor duhen ende dhe shumë muaj dhe padyshim do të ketë mundësinë të testojë të gjithë lojtarët në disa miqësore që do të përcaktohen në javët e ardhshme. Hapësira e radhës për kombëtaret do të jetë në muajin mars, ndërkohë që më pas në maj do të nisë dhe vrulli përfundimtar para nisjes së europianit.

Braziliani dhe stafi i tij do të monitorojnë me kujdes gjendjen e lojtarëve, ku prioritet do të kenë padyshim lojtarët që kanë dhënë kontribut në kualifikuese, diçka që edhe vetë tekniku e ka shprehur disa herë. Megjithatë, edhe nga grupi i lojtarëve që ka ftuar në grumbullimet e këtij vitit, Sylvinho do të jetë i detyruar të bëjë disa përzgjedhje, pasi vetëm 23 lojtarë mund të marrë me vete në Gjermani.

Nuk duhet harruar se në këto kualifikuese kanë munguar dy prej lojtarëve që konsiderohen si e ardhmja e kombëtares, Armando Broja që luan me Chelsea dhe Marash Kumbulla që është pjesë e Romës. Të dy këta lojtarë do ja bëjnë dhe më të vështirë përzgjedhjen e listës trajnerit të kuqezinjve, pa përmendur mundësinë e shpërthimit të ndonjë tjetër lojtari kuqezi, që mund të kthehet në një kandidaturë për europianin.

Trajneri do të ketë mundësinë që të marrë rreth 28 lojtarë në grumbullimin paraprak për në Gjermani, por më pas do i duhet të reduktojë listën në 23, çka do të jetë ndoshta dhe puna më e vështirë. Këtë edicion pjesa më e madhe e lojtarëve të Kombëtares po bëjnë mirë në skuadrat e tyre e tani do të motivohen akoma dhe më tepër për të fituar një biletë për në Euro 2024, por në anën tjetër do të shpresojnë dhe për të shmangur ndonjë dëmtim të mundshëm, që mund t’i privojë nga ëndrra e madhe.

Regjistrimi i popullsisë në Kosovë shtyhet deri në pranverë

Qeveria e Kosovës ka shtyrë përsëri edhe për disa muaj procesin e regjistrimit të popullsisë, që tani parashihet të fillojë në prillin e vitit të ardhshëm.

Kryeministri i Kosovës, Albin Kurti, ka thënë në një mbledhje të Qeverisë, të mbajtur të mërkurën e 22 nëntorit, se procesi i regjistrimit “nuk është menaxhuar mirë” nga Agjencia e Statistikave të Kosovës.

Kreu i ekzekutivit kosovar ka përmendur, po ashtu, edhe udhëheqjen e re të ASK-së si faktor që e ka shtyrë të propozojë shtyrjen e sërishme të procesit të regjistrimit të popullsisë.

Sipas vendimit të ri qeveritar, procesi do të zhvillohet nga 5 prilli deri më 17 maj të vitit 2024.

Më 23 gusht, Qeveria kishte vendosur ta shtynte për dy muaj procesin e regjistrimit të popullsisë, dhe kishte paraparë që ai të niste më 1 nëntor.

Duke e arsyetuar atë vendim gjatë një takimi të Qeverisë, kryeministri Kurti kishte thënë se një sërë vonesash në proces e kishin bërë të pamundur nisjen e regjistrimit të popullsisë më 1 shtator.

Ai kishte thënë se procesi ishte shtyrë shkaku i rezistencës nga Komisioni Qendror i Regjistrimit nga Asociacioni i Komunave të Kosovës.

Regjistrimi i fundit i popullsisë në Kosovë është bërë në vitin 2011, ndërsa regjistrimi që është dashur të bëhet në vitin 2021, është shtyrë për shkak të pandemisë Covid 19.

Sipas regjistrimit të bërë më 2011, numri i përgjithshëm i banorëve në Kosovë llogaritet të jetë rreth 1.8 milion.

Reshjet e dendura të shiut përmbytin Malësinë e Madhe! Dalin përrenjtë, dëmtohen biznese dhe banesa

Reshjet e shiut kanë shkaktuar përmbytje në territorin e bashkisë Malësi e Madhe.

Ato kanë shkaktuar dalje të përrenjëve dhe bllokim të kolektorëve. Dëme të shumta ka patur në disa banesa dhe biznese, ku sipas të dhënave të emergjencave civile janë 20 shtëpi të përmbytura në katet e para.

Probleme ka patur edhe me qarkullimin prej orëve të para të mëngjesit, si dhe ndërprerje të energjisë elektrike në shumë fshatra.

“Për shkak të reshjeve të dendura të shiut, dhe daljes nga shtrati i perrenjve, janë shkaktuar dëme materiale në disa banesa dhe biznese. Shërbimet e Policisë së Shtetit, të Policisë Bashkiake dhe Emergjencat Civile janë në terren, për të ndihmuar drejtuesit e automjeteve dhe banorët që janë në vështirësi. Qytetarët që kanë nevojë për ndihmë, të telefonojnë në numrin pa pagesë 112”– thuhet në njoftimin e Policisë.

SPAK, rekurs në Gjykatën e Lartë kundër lirimit të Malltezit

SPAK do të bëjë rekurs në Gjykatën e Lartë kundër vendimit të Gjykatës së Posaçme të Apelit që e la Jamarbër Malltezin në arrest shtëpie.

Kujtojmë se dje Apeli liroi nga burgu Jamarbër Malltezin dhe la në fuqi masën detyrim paraqitje për ish-kryeministrin Sali Berisha.

Gjyqtarja argumentoi për dhënien e vendimit se Malltezi nuk mund të prishë provat dhe nuk ka rrezik të largohet jashtë vendit.

Jamarbër Malltezi akuzohet për pastrim parash dhe korrupsion për çështjen e privatizimit të ish-klubit sportiv “Partizani”.

SPAK thotë se ai ka përfituar 5.4 milionë Euro gjatë këtyre procedurave, i favorizuar nga ish-kryeministri Sali Berisha.

Ndërsa ky i fundit akuzohet për korrupsion pasiv. Nën hetim për këtë rast është edhe biznesmeni Fatmir Bektashi.

Përse reagon me aq agresivitet Foltorja?!

Nga Zef Ndreka

Ti quajmë incidente politike, nuk është e drejtë. Sepse, shqiptarët po shikojnë çdo ditë ngjarje në Kuvendin e Shqipërisë prej muajsh që i shkojnë për shtat vetëm organizatave terroriste, apo njësitëve guerrile.

Aq sa turpërohesh që i ke dhënë votë këtyre deputetëve apolitik, injorant e pa të ardhme politike.

Incidentet nuk mund të jenë të përditshme. Strategjia e Berishës dhe deputetëve mbështetës të tij, me radikalizimin e lëvizjeve politike në Kuvendin e Shqipërisë e nxjerrin jashtë lojë pozicionin e deputetit, si përfaqësues i elektoratit që i ka votuar.

Pyetjet normale që lindin janë:
– Përse reagon me aq agresivitet kjo pjesë e opozitës?!
– Përse imitojnë guerrilasit me metodat e vjetra komuniste?!
– Përse e lënë opozitën pa zë në Parlament?!
– Po shtresat e papërfaqësuara të popullit që rritën e rritën çdo ditë kush do ti përfaqësojë në Kuvend?!

Sigurisht, strategjia e bllokimit të Kuvendit të Shqipërisë ka disa qëllime kryesore.

Së pari është luftë përsonale për të shpëtuar nga akuzat Sali Berishën të shpallur non grata nga SHBA-të dhe Britania e Madhe. Por kjo përdorje e një pjese të deputetëve të PD-së është zgjidhja e gabuar kundër sistemit të drejtësisë dhe reformës amerikane, që në finale favorizon Edi Ramën në të gjitha planet, për ta mbajtur sa më gjatë në pushtet.

Se dyti, qëllimi i mëtejshëm i Berishës është të çmontoje plotësisht opozitën pasi e ka coptuar e përçarë si mos më keq atë. Berisha, me këto sjellje pa shpresë po kërkon lëmoshë nga Rama, i cili nuk ka mundësi as forcë ta ndihmojë. Situatën me drejtësinë e kanë marrë në dorë amerikanët të cilët duken të vendosur për ta nxjerrë “ujin e zi” korrupsionit të 32-viteve.

Se tretë, gjithë incidentet në Kuvend janë strategji e qartë në favor të qeverisë për të miratuar në zhurmë Buxhetin e vitit pa asnjë kundërshtim, pa asnjë diskutim.

Kështu, shqiptarët dhe taksapaguesit asnjëherë nuk do mund të mesojne ku shkojnë taksat e tyre. Ato, sigurisht që mund të keq administrohen për llukse apo qëllime elektorale.

Incidentet në Kuvend janë shenjë e qartë e zhvillimeve negative të dirigjentit Berisha dhe disa deputetëve të foltorës së tij.
Rama, kështu është i kënaqur pasi uji shkon në mullirin e tij.

Nga ana tjetër, nuk shihet asnjë ide. Per me tepër asnjë imazh pozitiv për të ardhmën politike.

Kështu, të rikrijohet ideja e para dy tre viteve se mos ndoshta PD-ja është konsumuar dhe e ka mbaruar misionin e saj historik?!
Kjo nuk mbetët më ide, por shihet si realitet pasi si PD-ja zyrtare, ashtu edhe ajo e Foltorës nuk kanë më identitet.

Ato janë të dëmtuara në asht. Është w vështirë në mos e pamundur të kurohen e të shërohen për tu bërë forcë e besueshme si alternativë qeverisëse.

Koha po tregon se PD nuk ka më forcë për të kuruar plagosjen e madhe, plagën e madhe që uluret…

Human Rights Watch, akuza Kinës: Po mbyll e po shkatërron xhamitë!

Kina po mbyll, po shkatërron e po tjetërson xhamitë, thotë Human Rights Watch, HRW, në raportin e saj më të fundit ku e cilëson këtë goditje të autoriteteve kineze si pjesë të një “përpjekjeje sistematike” për të frenuar praktikën e Islamit këtë vend.

Në Kinën zyrtarisht ateiste, por që pretendon se e lejon lirinë fetare, numërohen rreth 20 milionë myslimanë. Vëzhguesit thonë megjithatë se ka pasur një shtim të masave ndaj besimit të organizuar këto vitet e fundit, teksa Pekini kërkon kontroll më të madh mbi të.

BBC kontaktoi ministrinë e jashtme kineze si edhe komisionin e çështjeve etnike për të marrë një koment mbi raportin e organizatës së të drejtave të njeriut, për të cilin Maya Wang, drejtoreshë për çështje që kanë të bëjnë me Kinën, sqaroi se vjen pas provave në rritje të abuzimeve sistematike të të drejtave të njeriut kundër myslimanëve ujgurë në rajonin veriperëndimor të Xinjiang të Kinës.

Pekini hedh poshtë me forcë çdo akuzë për abuzim. Shumica e myslimanëve të Kinës jetojnë në veriperëndim të vendit, që përfshin Xinjiang, Qinghai, Gansu dhe Ningxia. Në fshatin me shumicë myslimane të Liaoqiao në rajonin autonom të Ningxia, tre nga gjashtë xhamitë janë zhveshur nga kupolat dhe minaret e tyre, sipas HRW, ndërsa pjesës tjetër u janë shkatërruar sallat kryesore të lutjeve.

Pamjet satelitore të siguruara nga kjo organizatë treguan një kube të rrumbullakët në një xhami në fshatin Liaoqiao duke u zëvendësuar me një faltore te stilit kinez diku midis tetorit 2018 dhe janarit 2020. Rreth 1,300 xhami në Ningxia janë mbyllur ose konvertuar që nga viti 2020, thotë Hannah Theaker, një studiuese për myslimanët kinezë. Ky numër përfaqëson një të tretën e totalit të xhamive në rajon.

Dosja franceze në SPAK për Breçanin dhe të tjerët: Tonelata kokainë dhe policë të korruptuar që thurin vrasje!

Një grup i krimit të organizuar, i dyshuar për trafikimin e tonelatave të kokainës nga vendet e Amerikës Latine drejt Europës si dhe aktivitet kriminal në Shqipëri u godit mbrëmjen e së hënës nga Prokuroria e Posaçme, në një operacion të kryer në bashkëpunim me Europol, Eurojust dhe agjenci të tjera të huaja ligjzbatuese.

Hetimet kanë zbuluar gjithashtu përfshirjen e zyrtarëve të policisë në aktivitetin e grupeve kriminale në cënim të funksionimit të shtetit ligjor dhe sundimit të ligjit.

Sipas njoftimit për shtyp të shpërndarë nga SPAK, gjykata ka vendosur 11 masa sigurimi për anëtarët e grupit kriminal dhe zyrtarët e policisë, por vetëm katër prej tyre janë ekzekutuar nga Policia e Shtetit.

Dhjetë prej masave të sigurisë janë “arrest me burg” për vepra penale të trafikimit të narkotikëve, grupit të struktuar kriminal dhe sigurimit të kushteve për të kryer vrasje.

SPAK deklaroi se ka mundur të dokumentojë katër episode të trafikimit të trafikimit të lëndëve narkotike në sasi të mëdha gjatë vitit 2021; të cilat kanë të bëjnë me sekuestrimin e 446 kilogramëve kokainë në Holandë, 69 kg kokainë në Brazil, 166 kg marijuanë në Gjermani si dhe të një sasie prej 250 kilogramë kokainë të nisur nga Brazili për në aeroportin e Frankfurtit në Gjermani.

Gjithashtu, janë zbardhur dy episode të tentativave të vrasjes për dy shtetas të Republikës së Shqipërisë.

“Po vazhdohet me dokumentimin e episodeve të tjera të trafikimit të lëndëve narkotike nga Brazili, Kolumbia, Ekuadori dhe vende të tjera të Amerikës Latine në drejtim të vendeve të Bashkimit Evropian,” thuhet në njoftim.

SPAK deklaroi gjithashtu se produktet e kësaj veprimtarie kriminale pastroheshin në Shqipëri dhe se ka dokumentuar disa pasuri, për të cilat ka kërkuar sekuestrimin.

Gjatë ekzekutimit të vendimeve të gjykatës është ushtruar kontroll në banesa dhe ambiente të tjera, ku janë gjetur dhe sekuestruar në cilësinë e provës materiale shuma monetare, automjete, telefona, armë zjarri të ndryshme.

Kjo është goditja e dytë e madhe e SPAK ndaj krimit të organizuar, pas operacionit “Metamorfoza” në korrik të këtij viti, ku u arrestua biznesmeni Pëllumb Gjoka dhe drejtues të policisë dhe prokurorisë.

Të dyja operacionet janë mundësuar nga informacionet e ardhura në Shqipëri nga drejtësia franceze dhe të koordinuara nga Europol dhe Eurojust.

Si u arrestua Erzen Breçani dhe të tjerët

Ish-zv.drejtori i policisë së Tiranës, Erzen Breçani në momentin e arrestimit ka qenë pranë stadiumit ‘Air Albania’ bashkë me Dedan Gjonin, shef i Krimeve te komisariati Nr. 6 në Tiranë.

Ata kishin prerë biletat për të parë ndeshjen e kombëtares me Ishujt Faroe, përballja e fundit për kualifikueset e europianit. Në atë moment, bashkë me Breçanin u arrestua edhe Dedan Gjoni.

Ndaj shefit të krimeve janë ngritur disa akuza për vepra të rënda penale, një prej të cilave është ajo e sigurimit te kushteve për të kryer vrasje. Ndërsa Breçani dhe djali i tij, Eralbi Breçani, akuzohen për pastrim parash dhe përkrahje të autorit të krimit.

Nga 11 urdhër arrestet e lëshuara nga SPAK, 6 janë ekzekutuar dhe 5 janë në kërkim, përfshirë këtu edhe Ervin Mata, një emër i njohur i drejtësisë.

Emrat e dy prej të arrestuarve të tjerë janë Besmir Mustati dhe Bujar Germizi. Ky i fundit një emër i njohur i botës së krimit në Kukës. Germizi akuzohet për krijim kushtesh për te kryer vrasje.

Ata kanë bashkëpunuar me shefin e krimeve në komisariatin numër 6, Dedan Gjonin për të tentuar vrasjen e 2 vëllezërve që jetojnë në Britaninë e Madhe.

Sipas SPAK ‘vrasja do të kryhej në Republikën e Shqipërisë;

Ndërkohë Jonida Babameto, oficere e Drejtorisë së Kufirit dhe Emigracionit ndaj të cilës është dhënë masa e sigurisë ‘detyrim me paraqitje’ është shoqëruar në kuadër të këtij operacioni, dyshohet se gjatë kohës që punonte në Interpol ka dhënë informacione nga sistemi për 2 vëllezërit që jetonin në Britani.

Dyshohet se plani për vrasjen e 2 vëllezërve ishte bërë pas konflikteve për trafikun e drogës.

Sipas mediave, katër prej të dyshuarave që janë shpallur në kërkim nga SPAK ndodhen në Spanjë. Në kërkim janë Ervin Mata, Besmir Murati, Artan Sulejmani, Albert Prenga, Bajram Grabova.

Gjithashtu janë dokumentuar pasuri, të cilat janë produkt i kësaj veprimtarie kriminale, për të cilat është kërkuar sekuestrimi i tyre. SPAK njofton se janë ushtruar kontrolle në banesa dhe ambiente të tjera, ku janë gjetur dhe sekuestruar në cilësinë e provës materiale shuma monetare, automjete, telefona, armë zjarri të ndryshme.

Ministri i brendshëm Taulant Balla tha në një deklaratë: “Përgëzoj drejtuesit dhe pjesëmarrësit e Policisë së Shtetit në këtë operacion, për profesionalizmin e lartë dhe mbi të gjitha për sigurinë e plotë të informacionit sensitiv deri në finalizimin e operacionit që çoi në arrestimin e të gjithë personave që ndodhen në Shqipëri. Ndërsa vijon puna për gjetjen dhe ndalimin e personave të tjerë që ndodhen jashtë territorit të Shqipërisë. Gjej rastin t’i falenderoj dhe përgëzoj prokurorët për besimin dhe bashkëpunimin…”

Ndryshimet klimatike rrezikojnë infrastrukturën, Shqipëria 147 milionë USD dëme në vit

Dëmet mesatare vjetore në infrastrukturë që vijnë nga fatkeqësitë natyrore po bëhen gjithmonë e më shqetësuese.

Një dokument i qeverisë vlerëson se vlera mesatare është 147 milionë dollarë dhe këtu bëjnë pjesë përmbytjet, tërmetet apo rrëshqitjet që prekin rrjetin rrugor dhe urat por pjesën kryesore e mbajnë të parat.

“Infrastruktura rrugore dhe e urave të Shqipërisë është e ndjeshme ndaj ndryshimeve klimatike dhe fatkeqësive natyrore, kryesisht përmbytjet dhe tërmetet. Dëmet mesatare vjetore vlerësohen në 147 milionë dollarë në vit, me një ngjarje katastrofë, për shembull siç është një tërmet 1 në 100 vjet, për shembull, duke shkaktuar më shumë se 2 miliardë dollarë dëme.

Përmbytjet lumore janë një rrezik i madh i rrezikut natyror në rrjetin rrugor primar në Shqipëri dhe përbën 84 për qind të totalit të AED(dëmit mesatar vjetor), krahasuar me 11 për qind nga rrëshqitjet e dheut dhe 5 për qind nga tërmetet” vlerësojnë institucionet shqiptare.

Disa arterie kryesore në infrastrukturë janë të prekur vazhdimisht nga përmbytjet dhe rëndësia e tyre ekonomike e bën dëmin edhe më të madh në raste bllokimesh. Dy janë rrugët kryesore që dokumentet përmendin dhe janë pjesë e korridorit 4 dhe 5.

“Nën rrjetin strategjik, Korridori 4 (Tiranë-Durrës) dhe Korridori 5 Durrës-Vlora, janë rrugët më kritike në Shqipëri. Këto korridore janë edhe tani të prekshme ndaj ngjarjeve të përmbytjeve dhe dëmi vjetor mund të jetë rreth 13 milionë euro për shkak të vëllimit të madh të trafikut dhe rëndësisë ekonomike të këtyre korridoreve dhe pritet të rritet sipas skenarëve të ndryshëm të ndryshimeve klimatike.

Duke marrë parasysh të gjithë rrjetin rrugor kombëtar urat dhe kanalet janë infrastruktura kyçe që janë më të cenueshmet dhe elementët më të ekspozuar vlerësohet një dëm mesatar vjetor prej 18.7 milionë euro” thuhet në dokument.

ARRSH nënvizonte në një përmbledhje të projektit të urave që po zbatohet me ndihmën e Bankës Botërore se ekziston një nevojë e qartë dhe urgjente për të rritur qëndrueshmërinë e infrastrukturës rrugore të Shqipërisë ndaj klimës ndryshimet dhe fatkeqësitë natyrore (p.sh., tërmetet, përmbytjet dhe rrëshqitjet e dheut, stuhitë e forta të erës, etj)./MONITOR

1...1 7811 7821 783...8 382Faqja 1 782 nga 8 382

Kryesore

Continue to the category
Më shumë
© 2024 Rilindja Demokratike Euroatlantike