Një parcelë me kanabis është gjendur në fshatin Shkozë të Gjegjanit, në zonën e Pukës. Forcat speciale RENEA kanë zbarkuar në terren pas informacioneve të marra për kultivimin e lëndëve narkotike në këtë zonë.

Pas disa orësh monitorimi nga helikopteri, efektivët e RENEA-s evidentuan në një terren të thepisur malor në zonën e quajtur “Qafa e Helmit”, një parcelë me fidanë dhe bimë narkotike.

Ata kanë zbritur me litar në një zonë mes shkurresh derisa kanë arritur në vendin ku ishte kultivuar bima narkotike. Në kuadër të këtij operacioni, Policia njofton se nuk është arrestuar asnjë person, teksa po punohet për identifikimin e përgjegjësve.

Një aksion të tillë të RENEA-s, e ka denoncuar një ditë më parë Partia Demokratike. Përmes një deklarate, ato thonë se në pranga është vendosur oficeri i Policisë Gjyqësore, Kastriot Bicukaj. Ai është liruar më pas pasi është kushëriri i kryebashkiakut të Fushë-Arrëzit, Fran Tuci.

Operacioni

Policia e Shtetit njoftoi dje se po vijojnë kontrollet dhe operacionet për parandalimin, evidentimin dhe goditjen e veprimtarisë kriminale në fushën e kultivimit të bimëve narkotike. Në këtë kuadër, u finalizua dje operacioni policor antidrogë i koduar “Qafa e Helmit”, i drejtuar nga Drejtoria e Përgjithshme e Policisë së Shtetit. Policia tha se operacioni u zhvillua në një terren shumë të vështirë në zonën e Gjegjanit të rrethit Pukë.

Në operacion morën pjesë Drejtoria Hetimore në Departamentin e Policisë Kriminale, forcat speciale RENEA, Forca e Posaçme Operacionale në Policinë e Shtetit, FNSH-ja dhe Drejtoria Vendore e Policisë Shkodër. Për gjetjen e vendit të kultivimit forcat speciale RENEA kanë kryer disa orë kontrolle në një zonë malore.

Në vijim të kontrolleve dhe të goditjeve të njëpasnjëshme ndaj veprimtarisë kriminale në fushën e prodhimit dhe shitjes së narkotikëve, bazuar në informacionet e marra në rrugë operative se në vendin e quajtur “Qafa e Helmit”, në zonën e fshatit Shkozë, Njësia Administrative Gjegjan, Pukë, Shkodër, kishte të kultivuara bimë narkotike kanabis sativa dhe fidanë narkotikë në tokë dhe në kubikë, është organizuar operacioni policor i koduar “Qafa e Helmit”.

“Pas disa orësh monitorim me helikopter u bë i mundur identifikimi i vendit ku ishin kultivuar bimët narkotike kanabis sativa, një terren malor i thepisur dhe i pyllëzuar, çka ka vënë në vështirësi dhe rrezik jetën e forcave speciale RENEA, të cilët kanë zbritur me litar nën një zonë mes shkurreve për të shkuar në vendin ku ishin kultivuar bimët narkotike në tokë dhe në kubikë.

Nga grupi hetimor vijojnë veprimet e thelluara për identifikimin dhe kapjen e personave të përshirë në këtë veprimtari kriminale, si dhe për të vërtetuar nëse ka pasur implikim ose jo nga ana e inspektorëve të Policisë së zonës, pavarësisht terrenit malor të vështirë”, tha zyrtarisht Policia.

Vazhdon të jetë problematike situata nga zjarret në majën e Rrunës, në Kukës, ku flakët kanë përfshirë pjesën më të madhe të malit.

Sipas Komisionit të Mbrojtjes Civile të prefekturës në Kukës, pavarësisht punës së zjarrfikësve të Bashkisë nuk është bërë e mundur vënia nën kontroll e flakëve pasi ka patur erë të fortë në këtë zonë dhe një vijë shumë të zgjeruar të kësaj vatre.

Po ashtu flakët kanë përfshirë Thirrë. Një varg i tërë në mal është përfshirë nga zjarri, duke përfshirë shkurre e bimës.

Ndërkohë janë vënë nën kontroll vatra e zjarrit në Kalis dhe po punohet për shuarjen e saj, kurse është shuar plotësisht zjarri në afërsi të fshatit Shtanë.

Në bashkinë Tropojë është izoluar vatra e zjarrit të rënë në Betosh dhe Shëngjergj dhe po punohet për shuarjen e saj.

Ndërsa në Has është izoluar plotësisht zjarri në Pogaj dhe po punohet për shuarjen e tij.

Nga Halil Rama

Familjarë, miq, të afërm e bashkëpunëtorë të ngushtë përcollën sot për në banesën e fundit veteranin demokrat Jorgji Terca.

Ai kishte lindur në një familje patriotike tiranase 89 vjet më parë. Në këtë mjedis atdhetar u rrit dhe u edukua me dashurinë për familjen dhe atdheun. Ndaj dhe që në fëmijërinë e tij, kur ishte veçse 10 vjeç do të shprehte urrejtjen për pushtuesin fashist të vendit.., duke u bërë një nga anëtarët më aktiv të organizatës së njohur me emrin “DEBATIK”.

Debatikasi Jorgji Terca mori pjesë në disa aksione luftarake kundër karabinierisë fashiste italiane, si ndërprerje linjash telefonike, rrëmbime pajisjesh propagandistike, municione e armatime. Aktivitetin luftarak e vazhdoi pandërprerë deri në çlirimin e plotë të vendit nga pushtuesi nazifashist.

Pas çlirimit, Jorgji shërbeu me devotshmëri e përkushtim në disa reparte të Ushtrisë Shqiptare.

I zhgënjyer nga sistemi i diktaturës që nuk ia njohu meritat, Jorgji do të mbështeste fuqishëm proceset demokratike pas ’90-tës.

Që me krijimin e OBVL(Org.Bashkuar e Veteranëve) Jorgji u bë një nga anëtarët aktiv, përkrah themeluesve e drejtuesve të saj, si Dr.Ymer Dishnica, Gjeneral Rrahman Parllaku, Gjeneral Nexhip Vinçani e personaliteteve tjera të LANÇ e Ushtrisë Shqiptare, si: Liri Belishova, Edip Ohri, Skënder Malindi, Tahir Voshtina, Myfit Guxholli, Sotir Budina etj.

Madje, prej dhjetë vitesh ai drejtoi degën e OBVL Tiranë, si kryetar i saj, duke organizuar veprimtari të larmishme me veteranët, si përkujtimore, vizita e ekskursione tek Llixhat “Nëna Naile” në Kosovë, në Voskopojë, Përmet, Ersekë etj, duke siguruar mbështetjen e donarëve të ndryshëm.

Ai ishte një prind dhe veprimtar shoqëror shembullor.

Si i tillë do të kujtohet e nderohet nga njerëzit e familjes, shoqëria dhe nga OBVL.

Lamtumirë miku ynë i shtrenjtë Jorgji Terca!

Parajsa qoftë vendbanimi yt i përjetshëm…