16.5 C
Tirana
E shtunë, 12 Korrik, 2025
type here...

Basha: Koha që të rinjtë dhe të rejat të marrin përgjegjësitë që u takojnë

Me vlerat që na dallojnë, të lirisë, konkurencës dhe hapjes, ne do të përsosim edhe më shumë Partinë Demokratike, jo vetëm për t’u përballur me regjimin, por për të qenë në lartësinë e premtimit të papërmbushur të dhjetorit 1990. Atë të Shqipërisë europiane.

Jemi ne që do ta bëjmë realitet këtë amanet, jemi ne partia që do të realizojë këtë aspiratë dhe do ta bëjmë duke i hapur rrugën brenda rradhëve tona atyre që i kanë prirë betejës së 25 prillit, të rinjve dhe të rejave.

Unë do të jem përherë mirënjohës për angazhimin tuaj, është krenaria ime të shoh, se kemi midis nesh një brez të ri që është gati të bëhet ndryshimi që duan të sjellin në Shqipëri.

Ndaj jush, kemi një borxh të madh dhe ne duhet të jemi gati që këtij brezi të ri demokratesh dhe demokratësh t’u hapim dyert dhe zemrat, sepse në fytyrat e tyre guximtare është shkruar e ardhmja e familjes tonë politike dhe e ardhmja europiane e Shqipërisë.

Ne kemi nevojë për energjinë tuaj, ne kemi nevojë për krijimtarinë dhe vizionin tuaj, është koha që ju të merrni përgjegjësitë që ju takojnë!

Basha: Këtë betejë do ta bëjmë së bashku dhe do ta fitojmë!

Ne nuk do të rreshtim përpjekjet tona brenda dhe jashtë vendit, derisa ndryshimi të vijë për shumicën e shqiptarëve që e donin këtë ndryshim në 25 prill, dhe e duan edhe më shumë sot, kur oferta e vetme që Rama ka, është më shumë krim, më shumë korrupsion dhe më shumë dështime.

Ne angazhohemi fort për ta kthyer shtetin shqiptar në shtet të shqiptarëve. Për ta kthyer në shtet europian. Shtet i cili mbron lirinë individuale. Garanton paprekshmërinë e jetës. Mbron pronën private dhe publike. Mbron paratë dhe ekonominë e njerëzve. Mbron dinjitetin dhe personalitetin e njeriut.

Ndaj ne do të ndërmarrim, të gjithë bashkë, të gjitha vendimet e nevojshme për ta çuar deri në fund luftën tonë kundër këtij regjimi, përmes përsosjes së mëtejshme të qeverisjes së shtëpisë tonë të përbashkët. Një shtëpi ku secili gjen vendin e vet.

Basha: Shqipëria një vend i kapur nga korrupsioni. Misioni ynë është t’u kthejmë qytetarëve të drejtën për të vendosur 

Përballë përmbysjes së marrëdhënive të qytetarit me shtetin që ka prodhuar ky regjim i korruptuar, misioni i Partisë Demokratike është t’ua kthejë qytetarëve kontrollin mbi shtetin e tyre.

T’u kthejë shumicës së shqiptarëve të drejtën për të jetuar një jetë të plotë dhe të lirë për realizimin e aspiratave të tyre, këtu pranë familjeve dhe miqve të tyre. Larg trysnisë së një pushteti që ka depërtuar dhunshëm në cdo qelizë të shoqërisë, një shteti që merr gjithcka dhe nuk jep asgjë.

T’ua kthejë të drejtën për të vendosur, t’ua kthejë Shqipërinë shqiptarëve.

Basha: Me Ramën, Shqipëria është e para në Evropë për korrupsion

Kemi denoncuar korrupsionin marramendës të këtij regjimi, që duke përfituar nga vakumi i drejtësisë, e çoi Shqipërinë në një tatëpejtë të frikshme, duke e renditur të parën në Europë për korrupsion dhe të dytën në botë për ryshfetin që shërbëtorët dhe ortakët e Ramës u rrëmbejnë qytetarëve dhe sipërmarrjeve.

Miliarda euro dëme ekonomike, të paktën 7 sipas raporteve të KLSH-së, që mund të ishin përdorur për të ndërtuar një të ardhme më të mirë për fëmijët tanë, shkuan në xhepat e regjimit Rama-Doshi.

Nga të dhënat e Bankës Botërore dhe BERZH ryshfeti që merr ky regjim u kushton bizneseve shqiptare 550 milionë euro në vit, ose 1.5 milionë euro në ditë, një shumë tre fish me e lartë se ajo që raportohej në 2013-ën.

Para që mund të shkonin për shkolla, spitale, rrugë, paga më të mira për mësues dhe mjekë, pensione më të dinjitetshme për të moshuarit tanë që meritojnë një pleqëri të bardhë, larg shqetësimeve për faturat përherë e më të kripura të dritave dhe ujit, larg ankthit për ilacet që nuk mund të përballojnë dhe tryezës që bëhet gjithmonë e më e varfër.

Basha propozon Platformën Qytetare për Demokracinë: Bashkëpunim me të gjitha grupet shoqërore që kërkojnë ndryshim

Rruga drejt realizimi të këtij misioni nuk është e lehtë dhe as e tillë që Partia Demokratike mund ta përshkojë e vetme.

Ajo fillon duke u dhënë pushtet qytetarëve. Ndaj me forcën që na dhanë qytetarët në 25 prill, ne ftojmë shumicën e shqiptarëve që kërkojnë ndryshim rrënjësor në punët e vendit, dhe rezultate të prekshme për veten dhe fëmijët e tyre, që të ndërtojmë së bashku një Platformë Qytetare për Demokracinë.

Ndërtimi i kësaj platforme do të ketë në themelin e saj rikthimin e legjitimitetit dhe demokracisë në vend.

Ne do të bashkëpunojmë me të gjitha grupet shoqërore: Intelektualë, studentë, pedagogë, sipërmarrës, artistë, gazetarë, profesionistë, fermerë, të rinj e të reja që kërkojnë kthimin e normalitetit në vend.

Që kërkojnë zgjedhje të lira, ndryshime kushtetuese dhe ligjore që garantojnë ndarjen dhe balancimin e pushteteve, që përmirësojnë përfaqësimin politik, që reformojnë ndarjen territoriale dhe demokratizojnë pushtetin vendor.

Që mundësojnë ushtrimin e demokracisë së drejtpërdrejtë nëpërmjet referendumeve lokale dhe kombëtare, propozime për çlirimin e ekonomisë nga oligarkët dhe modelit të dështuar ekonomik që po i marrin frymën sipërmarrjes së ndershme, për lirinë dhe pavarësinë e medias, për shkëputjen përfundimtare të politikës nga krimi, ndryshime që e bëjnë shoqërinë realisht demokratike dhe e shpëtojnë shtetin nga kapja e një pakice që kërcënon të ardhmen e vendit.

Basha: Do të luftojmë çdo ditë për ndarjen e politikës nga krimi

Jemi ne që luftuam dhe luftojmë kundër kriminalizimit të politikës, dhe sfidës që krimi i organizuar po i bën çdo vlere të shoqërisë tonë me bekimin dhe ortakërinë e Edi Ramës, sepse ne nuk mund të pranojmë kurrë që institucionet publike të përqafojnë një model, që askush nuk do ta pranonte për familjen apo fëmijët e tij.

Ne nuk e veshim kriminelin me kostum për ta futur në parlament dhe bashki.

Ne kemi luftuar dhe luftojmë që institucionet e shqiptarëve të jenë të lira nga ndikimi i krimit dhe në shërbim të qytetarëve.

Ne e dimë fare mirë, që kur ky tumor përhapet në indet e një partie politike, metastazat e tij kapin gjithë shtetin, deri në atë pikë sa sot është e qartë për të gjithë pa përjashtim, se pushteti i rrëmbyer me masakrën zgjedhore, nuk i përket qytetarëve, as socialistëve, por ortakëve të Edi Ramës që blenë vota, shantazhuan, dhunuan, dhe në këmbim marrin kontrollin mbi ato institucione që i shërbejnë më mirë interesave të tyre kriminale.

Basha: Pa fituar luftën për demokraci, e ardhmja nuk do të jetë më mirë!

Të vetëdijshëm që shqiptarët meritojnë një politikë që punon për ta dhe jo për vete, ne qëndruam pranë njerëzve në nevojë, pranë të papunëve, pranë familjeve shqiptare, pranë studentëve dhe të rinjve shqiptarë, pranë sipërmarrësve të ndershëm dhe fermerëve, pranë gazetarëve që luftojnë përditë për të vërtetën dhe artistëve dhe intelektualëve që luftojnë për gjallimin e jetës së kombit.

Ne nuk lejuam që mjegulla hileqare e propagandës kundër kësaj lufte të drejtë, të na largonte nga njerëzit dhe vështirësitë e tyre të vogla e të mëdha.

Shqiptarët sot e dinë se problemet që ata hasin në punësim, arsimim, shëndetësi, biznes e kudo tjetër burojnë aty ku e ka gjenezën lufta jonë me regjimin: Te demokracia që shkatërrohet, tek zgjedhjet që vidhen, tek e drejta që shkelet.

Dhe pa u fituar kjo luftë, për cdo shqiptar, të majtë apo të djathtë, atëhere cdo zgjedhje e lirë në jetën e secilit prej tyre, cdo përpjekje e gjithsecilit prej tyre për punësim, për arsimim për të patur një jetë më të mirë, do të jetë e pamundur.

Basha: Ne hymë në këtë betejë të pabarabartë, me programin më të mirë të hartuar në historinë e këtyre 30 viteve

Të gjithë bashkë hymë në këtë betejë të pabarabartë, me programin më të mirë të hartuar në historinë e këtyre 30 viteve, fryt dhe prodhim i ekspertëve më të aftë të vendit dhe bashkëpunimit me institutet dhe institucionet prestigjioze të Perëndimit.

Fryt i viteve të punës së bazuar mbi studime të gjendjes reale që e kemi prekur bashkë shtëpi më shtëpi, fshat më fshat, qytet më qytet, sipërmarrje në sipërmarrje me të gjitha grupet e interesit, në bashkëpunim të thellë dhe të hapur me të gjithë grupet shoqërore,
me të papunët, me fermerët, me sipërmarrjen e vogël, me sipërmarrësit e mëdhenj, me prodhuesit, me eksportuesit, me mjekët dhe personelin shëndetësor, me arsimtarët, pedagogët dhe studentët, artistët dhe intelektualët, me elitën e mendjes dhe shpirtit të këtij vendi, me personat me aftësi të kufizuara, me të përndjekurit politikë dhe shoqatat e pronarëve që u bashkuan për herë të parë ndër vite me përfaqësuesit e tyre në selinë e Partisë Demokratike përmes programit tonë.

Një program i detajuar, me angazhime konkrete, për cdo sektor të shoqërisë, që vendosi gishtin tek plagët e shumta të vendit, që ofronte zgjidhje për të cliruar potencialin e cdo shqiptari, që clironte dhe zhvillonte potencialin e Shqipërisë, të ndrydhur, të mpakur, të boshatisur, të ngecur në vendnumëro në 8 vite nga një fatkeqësi kombëtare që e quan veten qeveri.

Një program që ka në qendër familjen shqiptare, si shtylla e politikave tona; një program që synon forcimin e shtresës së mesme, si motori i zhvillimit dhe i transformimit të shoqërisë, sepse një shtresë e mesme e fortë është garante e stabilitetit ekonomik dhe politik të vendit.

Basha: Megjithëse 25 Prilli nuk kishte asnjë lidhje me demokracinë, PD doli më e fortë dhe më e bashkuar!

Edhe pse 25 prilli nuk kishte lidhje me demokracinë, edhe pse çdo padrejtësi që mund të bëhej, u bë për të penguar ndryshimin, ne dolëm më të fortë dhe më të bashkuar, sepse të gjithë bashkë luftuam me mish dhe me shpirt për të ndezur besimin dhe shpresën e njerëzve se një Shqipëri më e mirë është e mundur.

Jo duke përdorur mjetet dhe modelin e Edi Ramës, por duke e përbuzur dhe refuzuar atë.
Ne nuk hoqëm dorë nga mjetet e ndershme për të bërë politikë. Nuk u stepëm nga propaganda e shtrenjtë dhe meskine e regjimit, as nga llumi i krimit që sot është garniturë e një kryeministri ilegjitim, as nga oligarkët që si shushunja i janë turrur trupit të drobitur të Shqipërisë.

Ne luftuam dhe besuam, sikurse ende besojmë, se mund t’i ndryshojmë gjërat në këtë vend pa u bërë më të këqij, më të pabesë dhe më të korruptuar se Edi Rama.

44 vjet nga pushkatimi i poetëve Vilson Blloshmi dhe Genc Leka

Bedri Blloshmi boton dosjen e plotë të Vilson Blloshmit

Me rastin e 44 vjetorit të pushkatimit të poetëve disidentë Genc Leka e Vilson Blloshmi, Bedri Blloshmi boton librin e tij më të fundit kushtuar të vëllait, Vilsonit.

Libri i titulluar “Dosja formulare Kategoria 2A nr.840 për Vilson Blloshmin”, përmbledh pëndjekjen, arrestimin, hetuesinë, “gjyqin” dhe ekzekutimin e Vilson Blloshmit.

Ndryshe nga librat e tjerë që Bedri Blloshmi ka shkruar ose përgatitur për Vilsonin e Genc Lekën apo persekutimin e Fisit Blloshmi nga Bërzeshta e Librazhdit, ky libër sjell të përmbledhur në një libër të vetën gjithë praktikën e ndjekur në përndjekjen, spiunimet, arrestim deri në vendimet  e fundit të refuzimin e faljes së jetës nga ish-garda e vjetër komuniste e Presidiumit të Kuvendit Popullor, si dhe Urdhërin e Kadri Hazbiu, ish-ministrit të Brendshëm, që urdhëronte pushkatimin e poetëve në orën 0.00 të datës 17 korrik 1977.

Libri hapet me një vlerësim të bërë nga shkrimtari ynë i madh Ismail Kadare, në korrespodencën që pati me autorin, Bedri Blloshmi, i cili ndër të tjera nënvizon: “Është e vërtetë se në vitin 1977, askund në botën komuniste nuk pushkatoheshin më poetët, por në Shqipëri kjo ndoshta disa kilometra larg qytetit të vogël të Librazhdit. Atje, pasi i shkuan në plumb, ashtu në pranga siç ishin, i rrokullisën në gropën e hapur, mbi të cilën, pas hedhjes së baltës, nuk vunë as gjurmë as shenjë, në mënyrë që të mos i gjente dot askush”.

Libri është i pajisur me shumë dokumente, fakte e rrëfime, të cilat zbardhin gjithë tragjedinë, intrigat, shpifjet dhe urrejtjen klasore që kishin komunistët për poetët e veçanërisht për fisin e madh e të nderuar të Blloshmëve.

Poetët Genc Leka e Vilson Blloshmi u ekzekutuan 44 vjet më parë, në natën e errët të 17 korrikut në Librazhd. Në vitet e demokracisë u bë rivlerësimi i tyre dhe u rivarrosën me nderime e respekt.

Procesverbal

I mbajtur në mbledhjen e Presidiumit të Kuvendit Popullor ne datën 16.07.1977, ditë e shtunë, ora 9.00

  • në mbledhje marrin pjesë shokët: Haxhi Lleshi (kryetar), Spiro Koleka, Shefqet Peçi (nënkryetarë), Telo Mezini (sekretar), Muharrem Sefa, Naumka Bozo, Nuredin Hoxha, Pilo Peristeri, Rrapo dervishi, Zina Franja, Maliq Sadushi (anëtarë).
  • Paraqitet rendi i ditës si vijon:
  1. Propozime për dekorime,
  2. Kërkesa për dhënien e shtetësisë shqiptare
  3. Kërkesë për falje dënimesh

Kryetari: Siç e shikoni,  rendin e ditës e kemi më të shkurtër kësaj radhe. Është menduar që të bëhet kjo mbledhje mbasi janë dy të dënuar me vdekje që të mos rrinë kështu këta, as të pushkatuar, as të falur, si do të vendosë presidiumi. Disa shokë janë në pushim prandaj mungojnë. Shoku Shefqet e shoku Pilo erdhën, megjithëse patën pushim. Meqenëse përbëjmë shumicën mund të fillojmë. Në qoftë se jemi dakord me këtë rend dite fillojmë.

Merret në shqyrtim pika e tretë e rendit të ditës:

  • Kërkesa për falje dënimesh

Shoku Telo Mezini: janë dy dënime me vdekje:

  1. Genci Bardho (Feimit) Leka,
  2. Vilson Sami Blloshmi

Të dy janë nga fshati Bërzeshtë e Librazhdit dhe janë dënuar me vdekje (pushkatim) se në bashkëpunim me njëri – tjetrin krimet e sabotimit ekonomik dhe të agjitacionit e propagandës kundër pushtetit popullor. Të dy kanë kërkuar faljen e jetës.

Kryetari: Këto familje Leka e Blloshmi kanë qenë armiq edhe gjatë luftës Nacionalçlirimtare. Këta janë armiq të Atdheut dhe të Socializmit.

Genci Bardho (Feimit) Leka,

Vilson Sami Blloshmi

Të dënuar me vdekje (pushkatim) u refuzohet kërkesa për faljen e jetës.

Mbyllet mbledhja,

Tiranë, më 16.7.1977

Sekretari i Presidiumit

Telo Mezini

URDHEROJ:

Të dënuarit Genci Bardho (Feimit) Leka dhe Vilson Sami Blloshmi të ekzekutohen me vdekje (pushkatim) , në vendin e caktuar në datën 17.7.1977, ora 24.00.

Për ekzekutimin e tyre ngarkoj Degën e Punëve të Brendshme Librazhd.

Para se të ekzekutohen të njoftohen të dënuarit se kërkesat e tyre për faljen e jetës janë refuzuar nga presidiumi i Kuvendit Popullor.

Mbas ekzekutimit, i ngarkuari me këtë punë duhet të bëjë procesverbalin e ekzekutimit të vendimit që mban edhe fjalën e fundit të të akuzuarve, i cili i dërgohet Drejtorisë së Hetuesisë.

Ministri i Punëve të Brendshme

Kadri Hazbiu

1...2 1882 1892 190...8 382Faqja 2 189 nga 8 382

Kryesore

Continue to the category
Më shumë
© 2024 Rilindja Demokratike Euroatlantike