Forcat ruse kanë vënë në shënjestër infrastrukturën e energjisë dhe gazit të Ukrainës në një sulm “masiv” me raketa dhe dron, tha ministri ukrainas i energjisë.

German Galushchenko tha në Facebook: “Edhe një herë, infrastruktura e energjisë dhe gazit në rajone të ndryshme të Ukrainës është vënë nën zjarr masiv me raketa dhe dron”.

Ai shtoi: “Kudo që është e mundur, ekipet e shpëtimit dhe inxhinierët energjitikë po punojnë për eliminimin e pasojave. Po merren të gjitha masat e nevojshme për të stabilizuar furnizimin me energji dhe gaz.”

Objektet e prodhimit të gazit natyror në firmën shtetërore të naftës dhe gazit Naftogaz u dëmtuan, tha kompania në një deklaratë.

“Fatmirësisht nuk ka pasur viktima”, thuhet në aplikacionin e mesazheve Telegram.

Kujtojmë se ditën e djeshme, u mbajt një samit urgjent në Bruksel nga 27 vende të BE-së, për të diskutuar lidhur me vendosjen e paqes në Ukrainë dhe menaxhimin e diplomacisë ndërkombëtare, pasi Trump ndaloi ndihmat ushtarake për Ukrainën.

Pas samitit me vendet evropiane që u mbajt të enjten, Zelensky tha se bashkëpunimi me SHBA-në do të bëhet për të arritur një paqe të shpejtë dhe të qëndrueshme.

Ai e konfirmoi takimin e palës ukrainase me atë amerikane gjatë javës së ardhshme në Arabinë Saudite.

“Ekipi im do të qëndrojë në Arabinë Saudite për të punuar me partnerët amerikanë”, u shpreh ai.

“Të hënën e ardhshme, kam planifikuar një vizitë në Arabinë Saudite për një takim me Princin e Kurorës. Pas kësaj, ekipi im do të qëndrojë në Arabinë Saudite për të punuar me partnerët tanë amerikanë”, tha ai në një postim në rrjetet sociale.

Shtetet e Bashkuara dhe Bashkimi Evropian kundërshtuan një sërë ligjesh të miratuara nga autoritetet e Republikës Serbe, të cilat ndalojnë gjyqësorin dhe policinë shtetërore të Bosnjës të veprojnë në pjesën e kontrolluar nga serbët.

Ligjet kanë nxitur tensione në vendin ballkanik të ndarë etnikisht dhe zyrtarët boshnjakë u ankuan në Gjykatën Kushtetuese, duke theksuar se ligjet e miratuara një javë më parë nga ligjvënësit serbë të Bosnjës dhe të nënshkruara nga Presidenti i Republikës Serbe Milorad Dodik, shkelin kushtetutën e Bosnjës dhe një marrëveshje paqeje që i dha fund luftës së viteve 1992-1995.

Ambasada e Shteteve të Bashkuara në Bosnje u shpreh thellësisht e shqetësuar me dekretimin e ligjeve.

“Shtetet e Bashkuara janë të vendosura në çuarjen përpara të interesave tona në Bosnje dhe Hercegovinë”, thuhet në deklaratë. “Për 30 vjet, angazhimi ynë ndaj Marrëveshjes së Paqes të Dejtonit dhe një Bosnje dhe Hercegovinë të qëndrueshme dhe të sigurt ka qenë i palëkundur”.

Në deklaratë thuhet mes tjerash se ky është një provokim i qëllimshëm ndaj rendit kushtetues të Bosnjës dhe paraqet një kërcënim të drejtpërdrejtë për qëndrueshmërinë dhe sigurinë e Bosnjës e Hercegovinës dhe për objektivat strategjike të SHBA-së.

“Për të gjithë udhëheqësit politikë dhe veçanërisht për ata që qëndrojnë pas këtyre vendimeve, mesazhi ynë është ky: Përmbahuni nga përfshirja në veprime të mëtejshme destabilizuese dhe retorikë nxitëse. Angazhohuni në dialog politik konstruktiv dhe të përgjegjshëm. Mbështetni institucionet demokratike të Bosnjës dhe mbështesni sundimin e ligjit. Dhe bëni pjesën tuaj për të ulur temperaturën politike. Qytetarët që ju u shërbeni nuk meritojnë më pak”, thuhet në deklaratë në të cilën nënvizohet se Shtetet e Bashkuara mbështesin fuqimisht sovranitetin dhe tërësinë tokësore të Bosnjës dhe rrugën e saj drejt integrimit të plotë në komunitetin euro-atlantik. Bashkimi Evropian tha se ligjet “dëmtojnë rendin kushtetues dhe ligjor” të Bosnjës, funksionalitetin e institucioneve të saj dhe kërcënojnë liritë themelore të qytetarëve të saj. Republika Serbe, pjesa e Bosnjës e drejtuar nga serbët, thuhet në një deklaratë të BE-së, duhet të veprojë në përputhje me ligjet e Bosnjës dhe kushtetutën e saj. “BE-ja i bën thirrje udhëheqjes politike të entitetit të Republikës Serbe që të përmbahet dhe të heqë dorë nga retorika dhe veprimet provokuese, përçarëse, duke përfshirë vënien në pikëpyetje të sovranitetit, unitetit dhe tërësisë tokësore të Bosnjës e Hercegovinës”, thuhet në deklaratë.

Serbët e Bosnjës miratuan legjislacionin pasi një gjykatë boshnjake dënoi Milorad Dodikun, presidentin pro-rus të Republikës Serbe muajin e kaluar me një vit burg dhe gjashtë vjet ndalim të përfshirjes në postet publike, për shkak të veprimeve ndarëse të tij.

Milorad Dodiku, i cili nuk është në rrezik të menjëhershëm arrestimi, tha se ka në plan të shpërfillë vendimin, i cili bëhet i formës së prerë pas një procesi të apelimit.

Zyrtarët e Bosnjës thonë se grupi i ligjeve të miratuara nga Republika Serbe, përfaqëson një grusht shteti dhe një hap të madh në shpërbërjen e vendit.

Bosnja përbëhet nga dy entitete, njëri e dominuar nga serbët e Bosnjës dhe tjetri i drejtuar nga boshnjakët myslimanë dhe kroatë.

Marrëveshja e paqes e Dejtonit që i dha fund luftës së Bosnjës, e cila la pas vetes më shumë se 100,000 të vrarë dhe miliona të zhvendosur, parashikoi gjithashtu që entitetet të jenë të lidhura nga institucionet e përbashkëta shtetërore, duke përfshirë ushtrinë, gjyqësorin e lartë dhe administratën tatimore.

Presidenca e prej tre anëtarësh e Bosnjës përbëhet nga anëtarë boshnjakë, serbë dhe kroatë, ndërsa një i dërguar ndërkombëtar që mbikëqyrë paqen, ka autoritetin të ndryshojë ligjet dhe të marrë vendime në Bosnje.

Milorad Dodiku u dënua për mosbindje ndaj vendimeve të Përfaqësuesit të Lartë Christian Schmidt, që synonte të frenojë përpjekjet pro-pavarësisë së serbëve të Bosnjës. Milorad Dodiku vazhdimisht ka bërë thirrje për ndarjen e gjysmës së Bosnjës të drejtuar nga serbët për t’u bashkuar me Serbinë fqinje dhe për këtë arsye ish-administrata amerikan vendosi sanksione kundër tij dhe aleatëve të tij të ngushtë.

Pas një takimi me presidentin e Serbisë Aleksandar Vuçiç në Beograd, Milorad Dodik akuzoi të enjten zyrtarët boshnjakë në Sarajevë se po kërkojnë një konflikt dhe dëshirojnë shfuqizimin e entitetit serb.

“Nuk jemi ne ata që duam luftë dhe konflikt”, këmbënguli ai.

Prokurorët e Bosnjës thanë të enjten se Milorad Dodiku po hetohej për sulm ndaj rendit kushtetues të vendit.

Udhëheqësi i entitetit serb të Bosnjës, i cili mbështetet nga Rusia, Hungaria dhe Serbia, shkroi në rrjetin X se ka marrë një ftesë për të dhënë deklaratë të premten në prokurori, por nuk do t’i përgjigjet asaj./voa

Raportuesi i Parlamentit Evropian për Malin e Zi, Marjan Sharec, deklaroi të enjten se mbështetja për anëtarësimin e Malit të Zi në BE është e lartë, por kjo nuk do të thotë, siç tha ai, se nuk ka probleme.

Duke paraqitur një projekt-raport në Komisionin për Punë të Jashtme të Parlamentit Evropian, zoti Sharec ndër të tjera përmendi si problem bllokimet e punës së parlamentit dhe mosfunksionimin e disa komunave locale në Malin e Zi.

Ai iu referua synimit të Podgoricës që Mali i Zi të bëhet anëtar i BE-së deri në fund të kësaj dekade, por paralajmëroi se Mali i Zi ka ende shumë punë për të bërë.

Në këtë drejtim, ai përmendi dështimin për të hapur kapitullin 31 në negociatat e anëtarësimit. Ky është një kapitull që lidhet me politikën e jashtme, hapja e së cilës u pengua nga Kroacia.

“Duhet të theksoj se asnjë shtet anëtar nuk do të donte ta shihte këtë proces të anëtarësimit si një mënyrë për zgjidhjen e çështjeve dypalëshe. Ne duhet të bëjmë gjithçka që është në fuqinë tonë për të mbyllur të gjithë kapitujt”, tha Marjan Sharec.

Duke reflektuar për vizitën e tij në Mal të Zi, ai konfirmoi në Parlamentin Evropian se të gjithë aktorët politikë kanë shprehur dëshirën e tyre që Mali i Zi të bëhet anëtar i Bashkimit Evropian, “por ata kanë kuptime të ndryshme se si të arrihet kjo”.

Parlamenti Evropian njeh angazhimin e fortë të Malit të Zi për pranimin në BE dhe konfirmon mbështetjen e tij të plotë për anëtarësimin e ardhshëm të vendit në BE. Projekt-raporti mirëpret përparimin pozitiv të Malit të Zi në zbatimin e reformave dhe masave të lidhura me BE-në, mbështet kornizën kohore ambicioze dhe përpjekjet kolektive të aktorëve politikë, shoqërisë civile dhe qytetarëve, por gjithashtu lavdëron Malin e Zi për përmbushjen e standardeve të përkohshme për kapitujt 23 dhe 24 dhe për marrjen e një IBAR pozitiv.

Ky dokument u bën thirrje të gjithë aktorëve politikë në vend që të mbeten të fokusuar në integrimin në BE dhe reformat e nevojshme, duke theksuar nevojën për stabilitet politik, përkushtim dhe angazhim konstruktiv që kapërcen linjat partiake për të ecur drejt mbylljes së kapitujve shtesë. Gjithashtu nënvizohet se reformat e miratuara duhet të zbatohen në mënyrë efektive për të siguruar progres real.

Projekt-raporti i Parlamentit Evropian mirëpret përafrimin e vazhdueshëm dhe të plotë të Malit të Zi me politikën e përbashkët të jashtme dhe të sigurisë të BE-së, duke përfshirë masat kufizuese kundër Rusisë. Vendi inkurajohet të forcojë zbatimin e masave kufizuese dhe të shmangë anashkalimin e tyre.

Dokumenti vë theks të veçantë në “ndërhyrjen e huaj me qëllim të keq” dhe përpjekjet destabilizuese, kërcënimet hibride dhe fushatat e dezinformimit nga aktorët e vendeve të treta.

Në seksionin mbi demokracinë dhe shtetin e së drejtës, drafti vëren me shqetësim bojkotet dhe bllokadat politike, si dhe ringjalljen e tensioneve dhe polarizimin etnik.

Me këtë raport, Parlamenti Evropian do t’i bëjë thirrje Malit të Zi që të harmonizojë plotësisht politikën e vizave me atë të BE-së, veçanërisht në lidhje me vendet që paraqesin rrezik për sigurinë.

Në projekt-raportin e tij, Parlamenti Evropian mirëpret ligjet e reja të Malit të Zi për median dhe strategjinë e politikës së tij mediatike, këmbëngul në një politikë të tolerancës zero në lidhje me presionin ose ngacmimin e gazetarëve, përfshirë figurat publike, dhe thekson nevojën për monitorim efektiv të rasteve të mëparshme të sulmeve ndaj gazetarëve./ VOA