Zbulimi i disa varreve në Përmet gjatë punimeve për infrastrukturën rrugore po ngjall reagime.

Shoqata antikomuniste e të përndjekurve politikë thotë se dyshon se varret janë të të zhdukurve nga diktatura komuniste, pasi zona është në një ish-repart të Ministrisë së Brendshme.

Ndërsa Prokuroria e Përmetit thotë se është në pritje të vlerësimit të ekspertëve të monumenteve dhe mjekësisë ligjore pasi varret dyshohet se janë të periudhave më të hershme.

Punimet në infrastrukturën rrugore në Përmet kanë nxjerrë në dritë në pjesën fundore të qytetit disa varre ende të paidentifikuara nga autoritetet shtetërore. Shoqata antikomuniste e të përndjekurve politikë thotë se dyshon se varret janë të të zhdukurve nga diktatura komuniste. Kryetari i kësaj shoqata Nebil Çika tha se në diktaturën komuniste zona ku janë gjetur varret ka qenë një repart ushtarak i Ministrisë së Brendshme ku nga të dhënat arkivore dhe dëshmitë dyshohet se kryheshin ekzekutime të kundërshtarëve politikë.

“Janë katër varre që ne kemi gjetur, në fakt dyshohet nga dëshmitarët dhe nga indiciet që të jetë një varrezë shumë e madhe. Pra, edhe ndërtesat që janë ndërtuar këtu, një pjesë e tyre dyshohet që të jenë bërë mbi varre. Në diktaturën komuniste këtu ka qenë një repart ushtarak, nga ato repartet famëkeqe të ndjekjes që ndiqnin armiqtë e komunizmit, diversantët, ata që arratiseshin dhe deri në vitin 1991 ka qenë qendra më e madhe e stërvitjes së ushtarëve të kufirit. Në bazë të të dhënave që kemi dhe nga arkivi i Ministrisë së Brendshme, por edhe nga dëshmitarët, këto lloj repartesh të izoluara, në varësi të Ministrisë së Punëve të Brendshme dhe të Sigurimit të Shtetit përdoreshin dhe si vende ekzekutimi për kundërshtarët e regjimit, ata që dënoheshin me vdekje, ata që vriteshin ose kapeshin në kufi, varroseshin në këto vende”, thotë ai për Zërin e Amerikës.

Ndërsa Bektash Osmani ish-i përndjekur politik në Përmet thotë se të dhënat e kohës dëshmojnë se në këtë zonë u pushkatua një klerik katolik, Dom Gjergj Gjeçaj dhe familjarët e kanë kërkuar trupin e tij.

“Këtu ka qenë repart ushtarak dhe këtu është pushkatuar në vitin1947 një prift katolik Dom Gjergj Gjeçaj. Të afërmit kanë ardhur disa herë dhe kur morën vesh edhe zbulimin e varreve erdhën dhe thanë se kur të hapet të shikojmë por nuk e besojmë se është këtu “, thotë ai për Zërin e Amerikës.

Duhet të ketë edhe varre të tjera, thotë Bektashi nga bisedat që ka bërë me inxhinierët e kompanisë pasi zona ku janë gjetur varret duket se është fillimi dhe mund të jetë më e gjerë.

“Këtu nuk janë pak viktima. Sipas të dhënave duhet të jenë edhe më shumë edhe në godinat më tutje. Kështu tha dhe inxhinieri i firmës, në rrëzë është njëri varr por mund të ketë edhe të tjerë më tutje.

Bektashit i pushkatuan babanë gjatë regjimit komunist dhe edhe pas shembjes së komunizmit nuk arriti t`i gjejë eshtrat e tij megjithë kërkimet. Ai thotë se janë mbi 100 të pushkatuar gjatë regjimit komunist vetëm në Përmet që nuk u janë gjetur eshtrat nga familjarët.

“Përmeti ka më shumë të pushkatuar në Shqiëpri. Janë mbi 100 të pushkatuar, 3 prej të cilëve klerikë ortodoksë dhe tre klerikë bektashianë”.

Prokurori i Përmetit, Asllan Bajrami, i tha Zërit të Amerikës se policia dhe prokuroria ishin vënë në dijeni nga firma ndërtuese më datën 7 korrik lidhur me zbulimin e disavarreve. Është zhvilluar një këshillim paraprak me specialistë të Monumenteve të Kulturës pasi dyshohet se varret janë më të hershme, tha prokurori i Përmetit. Pritet vlerësimi i arkeologëve dhe specialistëve të mjekësisë ligjore për të vijuar më tej hetimet, tha zoti Bajrami.

Ndërkohë edhe Arben Dosti që kërkon prej vitesh eshtrat e xhaxhait të tij të pushkatuar ishte sot me përfaqësuesit e shoqatës së të përndjekurve. Ai tha se strukturat shtetërore duhet të bashkëpunojnë me familjet që kërkojnë eshtrat e të zhdukurve në diktaturën komuniste.

“Nevojitet ndihma e shtetit ,të jemi bashkë me përfaqësuesit e Ministrisë së Brendshme në kërkimin dhe gjetjen e eshtrave të familjarëve dhe të afërmve tanë.”

Në Shqipëri disa mijëra familje që humbën të afërmit në burgjet komuniste nuk kanë arritur të gjejnë eshtrat e tyre megjithëse kanë kaluar rreth 30 vite nga shembja e komunizmit./VOA

Qeveria Shqiptare i ka dhënë dritën jeshile e projektit që mund të konsiderohet edhe si pazari financiar për përpunimin e mbetjeve të Durrësit në landfillin e Sharrës, i cili menaxhohet nga kompania koncensionare “Integrated Energy BV”.

Nga informacionet e SYRI TV dhe Syri.net, Bllako, i cili pritet të marrë mandatin e deputetit socialist në shtator të këtij viti është një prej emrave të kallëzuar penalisht pranë prokurorisë SPAK, si i dyshuar për favorizimin e kompanisë “Integrated Energy BV” lidhur me kontratat kocensionare të impianteve të përpunimit të mbetjeve.

Kallëzimi dhe hetimi penal i nisur nga prokurorët specialë nuk e ka stepur aspak Bllakon, që të vijojë të propozojë zgjidhje në favor të kompanisë së menaxhuar në fillim nga Klodian Zoto.

Këshilli Bashkiak i Durrësit e shndërroi në vendim atë opinion të Alqi Bllakos dhe ngarkoi kryetaren në detyrë të Bashkisë, Emirjona Sako, që të diskutoj me qeverinë për mbështetjen financiare të projektit të miratuar, pra “variantit Zoto”.

Ndërkohë, Bashkia e Durrësit u detyrua të tërhiqet nga një tender me vlerë 40 milionë lekë të vjetra, i shpallur në prill të këtij viti, i cili synonte hartimin e një studimi fizibiliteti për menaxhimin e mbetjeve në një prej zonave potenciale të qytetit për t’u shndërruar në landfill.

Në një vendim të Këshillit Bashkiak, që mban datën 28 Qershor 2021, u vendos që fondi i parashikuar për këtë studim fizibiliteti, në shumën 50 milionë lekë të vjetra, të alokohej për projekte të tjera të bashkisë.

Pas një përpjekje dy-vjeçare, e cila shkaktoi kaos dhe problematika të theksuara me menaxhimin e mbetjeve të Durrësit, qeveria arriti të finalizojë “pazarin” për dorëzimin e plehrave të qytetit pranë landfillit të Sharrës.

Durrësi prej mëse dy vitesh është në emergjencë mjedisore, pasi kabineti i Edi Ramës vendosi të mbyllë landfillin e Porto Romanos, pa u gjetur një zgjidhje për grumbullimin dhe përpunimin e mbetjeve urbane të qytetit.

Më pas, në pranverën e këtij viti, qeveria refuzoi në heshtje një propozim të Bashkisë së Durrësit për të ndërtuar një landfill të ri në territorin e qytetit.

Dhe, në fund, Bashkia e Durrësit u detyrua të pranojë variantin e paraqitur nga Agjencia Kombëtare e Mbetjeve, e cila detyron qytetin bregdetar të dorëzojë mbetjet në landfillin e Sharrës, në Tiranë, një projekt që përllogaritet rreth 50 milionë euro për 10 vitet e ardhshme.

Këshilli i Ministrave, nën drejtimin e Erion Braçes, ka miratuar këtë të Enjte, vendimin për të mbështetur financiarisht Bashkinë e Durrësit për menaxhimin e mbetjeve urbane.

Megjithëse qeveria është kujdesur të mos e përmend nominalisht kompanitë e drejtuar fillimisht nga menaxheri Klodian Zoto, të gjithë të dhënat të orientojnë drejt saj.

Në vendimin e Këshillit të Ministrave nr. 438, datë 15 korrik 2021, thuhet se bashkitë e qarkut të Durrësit duhet të marrin masa të menjëhershme për të gjetur zgjidhje dhe, në rast se nuk kanë fonde të mjaftueshme, t’i drejtohen Ministrisë së Financave për mbështetje financiare.

Por, megjithëse në vendim e qeverisë flitet për plane e strategji që mund të hartohen në të ardhmen, në fakt Bashkia e Durrësit e ka miratuar variantin e saj dhe ia ka dorëzuar qeverisë që në mesin e qershorit 2021.

Pra, duket se gjithçka është e zgjidhur, pavarësisht se vendimi i nënshkruar nga Braçe rreket të krijojë përshtypjen se nuk ekziston një plan paraprak.

Në 10 qershor 2021, Këshilli Bashkiak i Durrësit shqyrtoi tre variante për menaxhimin e mbetjeve dhe arriti në përfundimin që të mbështeste dërgimin e plehrave të qytetit në landfillin e “Integrated Energy BV”.

Këshilli Bashkiak, më herët, kishte marrë një “Opinion” nga Agjencia e Mbetjeve, e drejtuar ende nga Alqi Bllako, në të cilin sugjerohej pikërisht “varianti Zoto”.

Avokatja e Popullit, Erinda Ballanca, në lidhje të drejtëpërdrejtë me Syri Tv me gazetaren Armela Ferko, është shprehur në lidhje me veprimet e fundit të policisë bashkiake të dhunës që është ushtruar ndaj ambulantëve të cilët jo vetëm u është marrë malli por edhe janë poshtëruar në rrugë.

Zonja Balanca e cilësoi veprimin e policisë Bashkiake si jo në përputhje me ligjin, ndërkohë që po sipas saj, nuk ka ende një reagim nga Policia Bashkiake.

‘Për të dyja këto raste ka nisur shqyrtimi më iniciativë.

Kjo është një nga mënyrat për t’i mbrojtur qytetarët për veprimet që janë në kundërshtim më ligjin prej organeve të ndryshme të administratës publike.

Prandaj ne na duhet të bëjmë një hetim të thelluar për të dalë në një rezultat përfundimtar.

Ajo që vihet re në pamjet të parë duket se ka një veprim që nuk është në përputhje me ato që janë rregullat që duhet të plotësohen nga ana e policisë për qytetarët shkelës.

Është e qartë edhe nga zonja që ajo është duke kryer një veprimtari që përbën një shkelje, sepse është e pamundur të ushtrosh aktivitet tregtar pa paguar asnjë taksë, apo duke zënë hapësira publike.

Por ka një qasje të sjelljes se si policia bashkiake duhet ti trajtojë këta persona që mund ta kryejnë një shkelje konkrete.

Ndoshta duhet që edhe për këto persona që kanë një tregti minimaliste, për të nxjerrë ato të ardhura minimale, bashkia duhet tu sigurojë vende ku ata të shkojnë edhe pa pagesë për aktivitetet që ata kryejnë që edhe ata të kenë të ardhura për të pasur një jetë dinjitoze.

Shqipëria ka një problem të thellë që nuk e ka të përcaktuar nivelin jetik, ku ne do të lançojmë me forcë një minimum jetik, për të bërë të mundur jetesën me dinjitet të qytetarëve.

Për rastin e fundit nuk ka ende reagim zyrtar nga Bashkia.

Ne kemi dërguar kërkesën për shpjegime. Ata janë brenda afatit për të na kthyer përgjigje.

Për rastin e të moshuarës tjeter thuhet se ka një shënim në media, që dy zyrtarët në shkelje janë pezulluar.

Sigurisht që situata është shqetësuese.

Kemi edhe një rast të fundit të majit 2021, që ishte rasti i një shtetasi që është ankuar te ne sepse nga ana e policisë, ndërkohë që po ushtronte një aktivitet të ligjshëm, jo vetëm i është marrë malli por edhe mjeti, ndërkohë që policia bashkiake nuk ka kompetencë ligjore.

Kështu që ne i kemi kërkuar Policisë Bashkike të krijojë një procedurë të rregullt që veprimet të përputhen me procedurën e tyre dhe të mbajnë procesverbal.’

Një ngjarje e rëndë ka ndodhur mesditën e sotme në Lezhë ku është mbytur një pushues.

Ngjarja ka ndodhur në Tale të Lezhës rreth orës 12:05. Viktima eshte identifikuar si Zeqir Zeqo, një i moshuar nga Kosova, i cili kishte zgjedhur bregdetin e Lezhës për të pushuar.

Policia njoftoi se, rreth mesditës, në plazhin e Kunes, është mbytur në det Zeqir Zeqo, rreth 77 vjeç, banues në Kosovë.

Grupi hetimor ndodhet në vendngjarje punon për sqarimin e plotë të rrethanave të ngjarjes, shtuan të njëjtat burime.

Me nisjen e sezonit veror, ka pasur herë pas herë raste të pushuesve që mbyten në det.

Në rritjen e pasigurisë së jetës në plazhe ndikon mungesa e rojeve bregdetare. Konstatohet në thuajse gjitha plazhet.

.

Policia e Lezhës/ Informacion paraprak

Rreth orës 12:05, në plazhin e Tales, Lezhë është mbytur në det shtetasi Z.Z., rreth 77 vjeç, banues në Kosovë.

Grupi hetimor në vendngjarje punon për sqarimin e plotë të rrethanave të ngjarjes.