“Një shef krimesh në Elbasan më kërkonte 10 mijë euro për të më dhënë informacion në lidhje me vendndodhjen e Talo Çelës”.

Kështu ka thënë mes rrëfimeve të shumta të ditës së djeshme Nuredin Dumani, teksa ka vijuar të hedhë dritë mbi krimet e kryera prej tij dhe vrasësve të tjerë, që herë funksionin si grup e pastaj gjurmonin njëri-tjetrin ta ekzekutonin. Në fakt, një qasje e tillë ishte edhe prita që iu ngrit në hyrje të Elbasanit Nuredin Dumanit, teksa kishte marrë rrugën nga Fieri për të realizuar vrasjen e Elton Kilës, sipas tij për llogari të Suel Çelës.

Dumani, në cilësinë e të penduarit, status që e ka fituar prej shumë kohësh, ka treguar detaje që s’janë thënë më herët në lidhje me atë moment, që teksa priste informacion për vendndodhjen e Kilës, ai ra vetë në pritë. Sërish, edhe dje, ai ia ka faturuar atë pritë Talo Çelës, madje ka shkuar deri atje sa i tha avokates së Altin Ndocit, se drejtuesi i mjetit të atentatorëve dukej si Talo Çela.

Dumani, teksa ka folur rreth atentatit, largimit për në Fier, mjekimit, arrestimit, i ka thënë Gjykatës së Posaçme se nuk pranoi t’u deklarohej prokurorit të Elbasanit, kryepolicit të Elbasanit dhe atij të Tiranës. Ai tha se, “ata ishin të korruptuar, ndaj refuzova të jap deklarime për ta”.

Po ashtu, ai tregoi se ekzekutimin e Kilës e kërkonte Suel Çela, ndërsa nuk e përjashtoi njohjen me shënjestrën e vet, që për fatin e tij nuk e kapi dot: “Po e njoh, madje edhe kemi ndenjur bashkë”!

DËSHMIA

“Më 2019-ën një shef krimesh në Elbasan që Henrik Hoxha e kishte shok, më jepte informacione për Talo Çelën. Shefin ma prezantoi Henriku, ai kërkonte 10 mijë euro në muaj”, – tha Dumani. Nuredin Dumani u arrestua më 29 mars 2022, vetëm pak orë pasi i shpëtoi një atentati, kohë kur ishte nisur për të kryer një të tillë ndaj Oti Kilës së Elbasanit, vrasje e porositur nga një emër i njohur i botës së krimit në këtë qytet.

“Suel Çela ishte i interesuar për vrasjen e Oti Kilës. Ditën e ngjarjes isha vetëm në makinë, kur u qëllova. Më qëlluan nga mbrapa. Më pas u ula te sedilja e pasagjerit në makinën X5. Oti Kilën e njihja personalisht, kam ndenjur me atë bashkë me vëllain tim. I kemi shitur një makinë dhe i kemi blerë një makinë. Autorët që më qëlluan nuk i kam njohur, pasi ishin të maskuar. Vetëm nga trupi, shoferi më është dukur si Talo Çela. Një ditë para ngjarjes – dëshmon mbi tentativën për të vrarë Otin – bleva një kallashnikov dhe silenciator në Fier, Sandër Baho më njohu me shitësin. Ditën e ngjarjes kisha mitraloz me 200 fishekë dhe një kallashnikov. Mitralozin ma dha çuni i xhaxhait tim. Makinën për ngjarjen e bleva rreth 5-6 mijë euro, me thanë që ishte e vjedhur në Greqi, por nuk e di. Kur jam arrestuar më çuan në Spitalin e Fierit, isha i plagosur. Pastaj shkova në Spitalin Ushtarak. Tre persona, Ardian Çipa, Tonin Vocaj dhe Kreshnik Ajazi erdhën të më takonin. Pas arrestimit, deklarimet e para i kam bërë të Spitali i Burgut”, – tha Dumani.

I pyetur nga avokatët në seancë nëse ishte marrë në pyetje në Policinë apo Prokurorinë e Elbasanit pas arrestimit, Nuredin Dumani tha: “Nuk u kam kthyer përgjigje të korruptuarve”.

Në një sipërfaqe të stërmadhe prej 210 mijë metra katrorësh në zonën e Petrelës në Tiranë, brenda së cilës ndodhet edhe Kalaja, e cila është monument kulture, pritet të ngrihet i ashtuquajturi Parku i Besimit. Një nismë e qeverisë për harmoninë dhe tolerancën fetare, ku do të ndërtohen “kopje” të disa monumenteve kulturore në të gjithë botën, atë islame, të krishterë, budist apo edhe të besimeve të tjera.

Por, nga dokumentet rezulton se, brenda Parkut të Besimit, do të ndërtohen hotele dhe restorante të shumta, duke e tjetërsuar të gjithë atë sipërfaqe, pjesa më e madhe shtetërore. Pritet që, në gjithë territorin përreth të Kalasë së Petrelës të ngrihen hotele dhe restorante, teksa nisur edhe nga investimet e qeverisë, vëmendja e oligarkëve pritet të jetë e madhe.

Dokumenti i mësipërm është publikuar nga Korporata e Investimeve Shqiptare. Aty është një hartë, e të gjithë zonës së Petrelës, përkatësisht se zonës përreth kalasë ku do të ngrihet edhe Parku i Besimit.

“Siti i propozuar i konkursit ndodhet në zonën e Petrelës, në një sipërfaqe prej afërsisht 210,000 m2. Pozicionimi buzë luginës të Erzenit dhe kontrasti i kodrave dhe luginave ka nxitur zhvillimin e strukturave turistike (hoteleri, bujtina dhe bar restorante) dhe aktiviteteve sportive-turistike (Zip Line Albania). Në zonë dhe në afërsi të saj, ndodhen një sërë atraksionesh historike si Kalaja e Petrelës, vendbanimi antik i Persqopit dhe Muzeu i Historisë të Forcave të Armatosura” thuhet në këto dokumente.

Sipas tij, zona ndodhet në një distancë 15 km në jug të Tiranës, buzë rrugës nacionale Tiranë-Elbasan, me lidhje të shpejta me aeroportin, Korridorin Blu dhe Portin e Durrësit. Më pas jepen të dhëna se sipërfaqja është plot 210 mijë m2 dhe sipërfaqja e pronës publike është plot 165.475 m2.

Natyrisht, çdo projekt i hapur nga kjo Korporatë është një tjetërsim i pronës shtetërore. Janë dhënë prona të kushtueshme, në Tiranë apo në bregdet, teksa tashmë radha i erdhi edhe Kalasë së Petrelës.

Por, çfarë do të ndërtohet në atë zonë?!

Sipas dokumenteve me “kamuflimin” e besimit në gjithë atë zonë do të bëhen hotele dhe restorante. “Strehat Mikpritëse – Akomodimet do të konfigurohen në struktura të ulëta që do të shërbejnë si “streha” për të përmirësuar mirëqenien mendore dhe fizike, të pajisura me elemente që promovojnë harmoninë mjedisore, mirëqenien e komunitetit dhe qëndrimin shpirtëror” thuhet në dokumente.

Sipas tyre, janë projektuar deri në 75 njësi për të akomoduar profile të ndryshme vizitorësh, duke përfshirë turistët e mirëqenies, pelegrinët shpirtërorë dhe vizitorët VIP. Ndërkohë, do të ketë edhe akomodim me impakt të ulët. “Struktura të Qëndrueshme – Këto njësi janë një pjesë thelbësore e përvojës së mirëqenies, të projektuara për të mbështetur infrastrukturën e gjelbër të parkut dhe për të ruajtur praktikat e qëndrueshme. Projektimi i 25 njësive shtesë me konfigurime të ndryshme për të akomoduar individë dhe grupe që kërkojnë retreat-e holistike për mirëqenie” shkruhet në këto dokumente.

Me pak fjalë, në gjithë zonën do të ndërtohen 100 hotele! Por, Korporata ka parashikuar të ndërtojë edhe restorante.

“Shërbime që ofrojnë një larmi ushqimesh dhe pijesh të ndryshme, duke respektuar preferencat fetare dhe dietike të vizitorëve. Kapaciteti për të akomoduar lehtësisht fluksin tipik të vizitorëve në hapësirat kulturore të parkut si dhe të ftuarve në strukturat e mikpritjes” thotë Korporata.

Hotelet dhe restorantet që përmendën më sipër do të kamuflohen me disa projekte që do të ndërtohen në zonë. Qeveria ka shfrytëzuar harmoninë dhe bashkëjetesën për këtë projekt, teksa thotë se do të bëjë një mini park “Kur’anor” si ai në Dubai, apo “Shtëpia e Familjes Abrahamike (Abu Dhabi)”. Do të ndërtojë edhe “Kopshtet e Botës (Garten der Welt)” si në Berlin, kopshtet “Bahá’ (Haifa, Izrael) si dhe “Kopshtin e Paqes” në Dublin, Irlandë.

Qeveria synon të bëjë edhe një mini tempulli i të gjitha feve si në Kazan, Rusi, apo edhe memorialin e dëshmorëve në Algjer, Algjeri. Lista vijon me kopshtin “Tohono Chul” Tucson, SHBA, me kopshti japonez “Setagayapark” apo me kopshtet e Xhamisë së Madhe “Sheikh Zayed” në Abu Dhabi, Emiratet e Bashkuara Arabe./ Vox News

SPAK shtyn sërish me tre muaj hetimet për ish zëvendës kryeministrin Arben Ahmetaj, që akuzohet se ka kryer veprat penale “Pastrim parash”, “fshehje të pasurisë” dhe “korrupsion pasiv”.

Prokuroria e Posaçme ka tashmë afat deri në datën 23 qershor për të plotësuar hetimet e munguara në dosjen ndaj Ahmetaj, teksa kjo është hera e tretë që organi akuzës zgjat hetimet.

Arben Ahmetaj ndodhet në arrati që prej muajit korrik të vitit 2023. Ky i fundit u shpall në kërkim nga Prokuroria e Posaçme lidhur me përfshirjen e tij në çështjen e inceneratorëve.

Ahmetaj dyshohet se gjatë funksionit të tij si ministër, mori disa akte për t’i mundësuar sipërmarrësve lidhjen e kontratave koncensionare.

Ndaj tij, ka edhe hetim pasuror dhe janë vënë në sekuestro dy vila, disa apartamente dhe llogari bankare.