Drejtuesi Politik i Koalicionit Euroatlantik, Lulzim Basha, në emisionin “Drejt” në Ora News, duke komentuar situatën aktuale në Partinë Demokratike, tha se pas 3 vitesh e gjysmë luftë për mbajtjen e partisë pranë Shteteve të Bashkuara, tani po ndërmerrin veprime për ta realizuar këtë me fatura të larta financiare. Ai tha se segmenti i partisë të lidhur me Sali Berishën po kërkon mbështetje amerikane përmes pagesave prej 6 milionë eurosh.

Basha theksoi se lufta e tij ka qenë për të mbajtur PD në krah të SHBA-ve, duke u mbështetur në parime dhe marrëdhënie diplomatike, ndërsa ata tani po e bëjnë këtë përmes parave. Ai theksoi se problemi kryesor për shqiptarët është korrupsioni i qeverisë dhe ndryshimi i saj, duke vendosur të gjithë para drejtësisë jo vetëm e gjysmës që është 7×7=313-ta.

Pjesë nga fjala e Bashës:

Është një ditë, ku mund të shohim një bumerang që po ndodh në kampin e zotit Berisha. Ju e dini për 3 vjet e gjysëm, beteja kryesore që unë kam ndërmarrë dhe për të cilën jam akuzuar, sulmuar dhe luftuar ka qenë për ta mbajtur partinë Demokratike në krah të Shteteve të Bashkuara të Amerikës, si një kusht I padiskutueshëm. Ndërkohë që u bë gjithë ajo luftë për vendime që duheshin marrë për ta mbajtur partinë Demokratike në krah të Shteteve të Bashkuara të Amerikës, sot po shohim që, pas 3 vjetësh e gjysëm, kanë ardhur tek e njejta pikë. Çfarë po bëjnë? Po bëjnë gjithçka që ai segment të qëndrojë në krah të Shteteve të Bashkuara të Amerikës, vetëm se kësaj rradhe me fatura të kripura financiare, 6 milion euro faturë financiare.
Ne duhet të rrimë mbi qëllimet e shkruara, pastaj nuk jam kundër asaj që shprehët si thelb, ajo është edhe më e rëndë, se ndërkohë demokratëve ju është thënë, çfarë nuk ju është thënë në raport me nongratën, por s’dua të hyj në atë diskutim. Qëllimi I shkruar është që partia demokratike të ketë mbështetjen e Shteteve të Bashkuara të Amerikës- më fal shumë, po 3 vjet e gjysëm për çfarë u luftova unë? Për çfarë u denigrova unë? Për çfarë u sulmova unë dhe mbështetësit e mi sepse thamë që partia demokratike, – dhe në fakt asnjë forcë serioze politike,- nuk mund të jetë në kurs përplasje me Shtetet e Bashkuara të Amerikës. Kaq e thjeshtë është. Vetëm se unë e bëra me parime, e bëra me rrjetin e marrëdhënieve diplomatike ndërsa këta po e bëjnë me parà, me shumë gjigande parash, 6 milion dollarë. Nëqoftëse pastaj do t’i rrinim gjykimit tënd, 6 milion dollarë për të marrë vizë amerikane. Ky është halli i shqiptarëve? Ky është halli i demokratëve? Halli i shqiptaravë është korrupsioni i qeverisë së Edi Ramës; halli i demokratëve është plotësimi i një misioni që kanë marrë përballë shqiptarëve që është ndryshimi, që është largimi I kësaj qeverie dhe vendosja e të gjithëve para drejtësisë jo vetëm e gjysmës që është 7×7=313-ta, dhe parakusht për këtë janë disa qëndrime që na bëjnë ne euroatlantik dhe të tjerët fallco-euroatlantik. Qëndrimi I parë që na bën ne Euroatlantik, është mbështetja për pavarësinë e drejtësisë.

Në emisionin “Drejt”, drejtuesi politik i Koalicionit Euroatlantik, Lulzim Basha, tha se Partia Socialiste në 12 vite e ka fryrë administratën publike për ta kthyer në një ushtri elektorale. Sipas tij, sot numërohen 200 mijë punonjës publik për një popullsi që është nën 2 milionë banorë.

Basha tha se në bazë disa studimeve PS ka shënuar rënie në mbështetje popullore dhe një pjesë jo e vogël e kësaj ka ardhur nga administrata. Ai tha se shumë punonjës të administratës janë lodhur me drejtorët apo me kolegët e tyre që mburren me pasuritë e vjedhura, ndërsa ata vet me rrogën që marrin nuk arrijnë të mbulojnë shpenzimet për nevojat familjare.

Sipas Bashës, një pjesë e tyre janë zhgënjyer pasi nuk e kanë votuar PS-n që Rama t’u sillte trafuikantë droge dhe të korruptuar në qeveri.

Pjesë nga fjala e Bashës:

Në pamjet të parë mund të thuash që ky, nga 89 mijë që ka qenë administrata në 2013-ën kur popullsia përllogaritej të ishte akomanë nivelet e 3 milionëshit, afërsisht, plus minus, ky e ka çuar mbi 200 mijë tani që popullsia është nën 2 milionë. Pra ka ndërtuar një ushtri elektorale. Ky është argumeni që si me thënë sillet. Por ama po ju them që në studimet serioze të opinionit publik, jo ato që shiten për të demotivuar ndryshimin dhe për të kalcifikuar status-quon. Që në prillin e vitit të kaluar, pra një vit më përpara, PS ka shënuar rënie në mbështetje popullore dhe ne e kemi të qartë nga burimet tona që një pjesë jo e vogël e kësaj rënie ka ardhur nga administrata. Pse do thonui ju? Dhe kjo ishte pyetja e parë me të drejtë që ne i bëmë edhe ekspertëve që i ndjekin këto jo për t’i shitur në media të kontrolluara nga qeveria, por realisht për të pasur një pasqyrë të gjësë. Ore keni një njeri që është në administratë le ta marrim prej 12 vitesh, që kur ka fituar PS është futur në administratë. Le ta themi që e ka rrogën 500 mijë lekë të vjetra, 600 mijë, 700 mijë. Le të themi që e ka 1 milionë dhe ka 12 vite që punon. Ka qenë 30 në 2013-ën, sot është 42 vjeç, ka qenë 40 në 2013-ën, sot është 52 vjeç. Ka qenë 50 në 2013-ën, sot është 62 vjeç. Dhe me këtë rrogë ka hequr nga goja për të çuar fëmijët në shkollë, për të dhënë një model suksesi. Socialist që ka besuar me Edi Ramën vjen ndryshimi. Dhe ky socialist në administratë publike, me këtë rrogë, sheh që vit pas viti në katër vitet e para, në 8 vitet e para, 12 vite që shkoi kjo punë, jo vetëm që nuk ka asnjë ndryshim pozitiv po do thotë unë nuik votava që të më sjell trafikantë, të më sjellësh të korruptuar. Po ta them siç ma kanë thënë, votues socialistë, nuk votova që të shoh drejtorin i cili ka një rrogë sa unë apo pak më pak se unë dhe ndërkoh ka blerë apartament në Tiranë dhe makinë, apo drejtori i përgjithshëm që mburret që ka 1 milionë euro dhe ka makinë për vete, makinë dhe për gruan dhe makinë për të dashurën. Pra, padiskutim që administrata është e demotivuar. Ata njerëz në administratë të cilët janë mbajtur pas bukës së gojës, qofshin dhe këta socialistë, e kuptojnë që ky nuk është ndryshimi që kishin kërkuar. Prandaj ne shohim tek administrata, tek pensionistët dhe te të rinjtë, padiskutim potencial për ndryshim. Këtu pastaj vijm te problemi, çfarë oferte ka për ndryshimin?

Në emisionin “DREJT” me Luan Ramën, drejtuesi i Koalicionit Euroatlantik, Lulzim Basha, theksoi se fuqizimi i SPAK-ut dhe lufta pa kompromis kundër korrupsionit janë çelësi për të çliruar fondet që i takojnë qytetarëve shqiptarë.

Pjesë nga fjala e Bashës:

O në xhepat e të korruptuarve te 313, o në xhepat e qytetarëve, në dy vende s’mund të jenë. Me propozimin tonë, me luftën pa kompromis kundër korrupsionit, me fuqizimin dhe jo dobësimin e SPAK-ut; me mbajtjen e të korruptuarve të arrestuar deri më tani dhe arrrestimin e të korruptuarve të tjerë dhe vendosjen e tyre përpara drejtësisë, paratë shkojnë te xhepat e qytetarëve.
Propozimi i tyre, ndodh në gara piramidale se sa do t’I rrisin benefitet sociale dhe pagat, është një mashtrim, për sa kohë që si Rama dhe qeverisja e tij por jo më pak edhe këta të tjerët kanë çështjen kryesore që i lidh bashkë goditjen ndaj SPAK-ut. Kjo është ajo që na diferencon, vetëm mbështetja për luftën kundër korrupsionit,vetëm mbështetja ndaj SPAK-ut, do të jetë në gjendje të gjenerojë ato të ardhura që pastaj mund të kryejnë politikat ekonomike dhe sociale.

Drejtuesi Politik i Koalicionit Euroatlantik, Lulzim Basha, në një intervistë për emisionin “Drejt” në Ora News, ironizoi premtimet e partive politike dhe kryesisht të qeverisë si gara e “Sudes me Rapush Xhaferin”.

Basha tha se Edi Rama që ka 12 vite që qeverisë, ende vazhdon të premtojë. Sipas tij, parë kanë shkuar tek xhepat e shokëve të Edi Ramës tek 7×7-313, apo shoqeve valltare, dhe jo në xhepat e pensionistëve, apo të sipërmarrësve, apo të profesionistëve të lirë, apo të pagës minimale.

“Rrugës kur vijë për këtu, pash këto reklamat. Reklamat janë bërë fiks, po fiks si gara e dikurshme e firmave piramidale. Siç thotë një miku im, citoj, “si garë e Sudes me Rapush Xhaferin”. Njëri thotë 500, tjetri thotë 1 mijë dhe pikërisht këtu vihet në pyetje pamundësia e tyre për të mbajtur këto premtime dhe diferenca me Koalicionin Euroatlantik. Pse Edi Rama duhet t’i bëjë këto premtime pasi ka qeverisur për 12 vite me radhë. Pse nuk ka mbajtur një pjesë të premtimeve, që nuk ka realizuar një pjesë të këtyre zotimeve. Sepse paratë nuk mund të jenë në të njëjtën kohë edhe në xhepat e shokëve të Edi Ramës tek 7×7-313, apo shoqeve valltare, dhe jo në xhepat e pensionistëve, apo të sipërmarrësve, apo të profesionistëve të lirë, apo të pagës minimale.
Në atë valle që kërcenin në shesh, ajo që bie në sy, është diçka që SPAK-u e ka zbërthyer në rastin kundër kryebashkiakut të Tiranës që këta janë të veshur e të ngjeshur me tesha e me aksesor të cilat janë disa herë më të larta se rroga mesatare vjetore e një çifti të ri shqiptar” – tha Basha.

Drejtuesi Politik i Koalicionit Euroatlantik, Lulzim Basha, i shoqëruar nga kandidatët për deputetë Neli Demi, Diana Toma, Irsida Shehi, ka zhvilluar takime me qytetarë dhe biznese në Njësinë 10 në Tiranë.

Gjatë bisedës me Bashën, qytetarët shprehën vështirësitë që përballen në jetën e përditshme dhe gjendjen ekonomike që sa vjen edhe rëndohet. “Jemi shumë të lodhur. Është një situatë e pakonceptueshme, domethënë e papërshkrueshme. Është një situatë ku çdo gjë është shkatërruar në detajë, në mënryë të përcaktuar, për mu me një projekt me laps e letër në tavolinë. Të uroj me gjithë zemër sukese” – u shpreh një qytetar.

Duke evidentuar korrupsionin si shkaktarin kryesor i kësaj situate, Basha më tej tha se ndryshimi më 11 maj është numri 4 dhe Koalicioni Euroatlantik. “Në qoftë se do që lekët të jenë në xhepat e shokëve të Ramës, voto 5 se i marrin lekët ata. Vpoto 1, del Ilir Meta. Vetëm 4 i kthen paret te xhepi.

Ai gjithashtu foli për disa nga pikat e programit, që sipas tij, do të kthejnë sjellin mirëqenie për familjet shqiptare, për të rinjtë dhe sipërmarrësit.

Për sipërmarrësit:
• Vendosja e taksës së sheshtë në masën 9%
• Heqja e TVSH për biznesin e vogël
• Lehtësira reale për hapjen dhe formalizimin e çdo iniciative të ndershme

Për familjet shqiptare:
• Subvencione për strehimin e çifteve të reja
• Dyfishim i ndihmës për nënat kryefamiljare
• Deri në 20 mijë euro bonus për fëmijën e tretë

Për të rinjtë:
• 100 milionë euro investime për programin NextGen në 4 vite
• Praktika të paguara, mbështetje për start-up-et dhe bursa për vajzat
• Shkolla me orar të zgjatur, drekë të garantuar dhe kushte që i japin vlerë arsimit publik

Në përfundim të takimeve, Basha theksoi se Shqipëria ndodhet përballë një zgjedhjeje të qartë:
Ose Shqipëria e 313-s dhe korrupsionit të pandëshkuar, ose Shqipëria e ndershme që zhvillohet dhe garanton një të ardhme më të mirë për çdo familje.