Zbardhen propozimet e Partisë Demokratikë në tryezën e reformës zgjedhore sa i përket ndërhyrjeve në Kodin Zgjedhor. Disa prej ndryshimeve kanë të bëjnë me rolin e Policisë së Shtetit nën regjimin e qeverisë kujdestare për procesin e zgjedhjeve.

Pra nuk flitet më për qeverinë në pushtet por për një qeveri kujdestare, një kërkesë e opozitës prej muajsh. Në draftin e siguruar nga gazetari Osman Stafa për “BalkanËeb”, në nenin 5/1, pika 2 kërkohet që 100 ditë (njëqind) ditë përpara datës së zgjedhjeve,

Ministri i Brendshëm në Qeverinë Kujdestare të zgjedhjeve, i caktuar sipas përcaktimeve të bëra në ligjin për organizimin dhe funksionimin e Këshillit të Ministrave të emërojë Drejtorin e Përgjithshëm të Policisë së Shtetit.

PD kërkon që të shihet mundësia që shkeljet zgjedhore të konsiderohen si shkak për pavlefshmërinë e zgjedhjeve.
Sipas PD, skema e cila duhet të implementohet lidhur me rolin e policisë duhet te jetë totalisht e ndryshme nga situata aktuale.
“Në kushtet aktuale kur policia ‘është larguar’ në mënyrë distante nga përfshirja në procesin zgjedhor ka sjellë një fenomen të ri.

Atë sipas të cilit policia është e përfshirë në procesin zgjedhor por jo si një fluks që pozicionohet si ruajtës i rendit apo edhe agjent i policisë gjyqësore për parandalim dhe procedim të krimeve. Është pozicionuar si e përshirë në zgjedhje duke bërë vota për qeverinë.

Një pozicionim që asnjëherë më parë nuk ka qenë i njohur për policinë as në situatat më ekstreme. Në këtë kuptim roli i saj duhet ridimensoinuar. Nga një pozicion antiligjor, okult, duhet nxjerrë në dukje veprimtaria e saj dhe duhet vendosur në pozicion monitorimi, duke mos e lejuar të abuzoje në këtë pozicionim të ri”, deklaron PD.

Sipas saj, skema është e thjeshtë, policia duhet të kthehet pranë Qendrave të Votimit dhe do ketë dy detyra. Së pari me ruajtjen e rendit në qendrat e votimit. “Kjo është një praktikë e stazhionuar me legjislacionin e mëparshëm. Policia, nuk futet në perimetrin e jashtëm të qendrave të votimit.

Ajo mund të ndërhyjë vetëm ne rastet kur thirret nga komisioni i qendrës se votimit. Baza ligjore (e shfuqizuar) ka qenë mjaftueshmërisht e qartë dhe e testuar”, arsyeton PD.

Së dyti dhe ndoshta më e rëndësishme, shprehet PD, është që policia, të ngarkohet me funksionet e policisë gjyqësore, raporton “BalkanËeb”.

“Një funksion që ajo në veprimtarinë e përditshme e ka, porse përgjatë periudhës zgjedhore (saktësisht ditët e zgjedhjeve) duhet ta ketë akoma më të fokusuar dhe të rregulluar në mënyrë akoma të detajuar. Funksioni i policisë gjyqësore është shumë i rëndësishëm, sepse ky rol i përforcuar i policisë, duhet të jetë i konkorduar së pari me komisionin e Qendrës së Votimit, e mbi të gjitha edhe me rolin e ri që do të duhet të ndërmarrë edhe prokuroria përgjatë procesit zgjedhor”, deklaron PD në relacionin shpjegues. PD thotë se e këshillueshme do të ishte qe roli i policisë në kryerjen e funksioneve të policisë gjyqësore, të artikulohej si veprimtari që kryhet përgjatë “gjendjes së flagrancës”.

Pra, PD kërkon të konkretizohet deri edhe me arrestime në flagrancë të shkelësve të veprave penale zgjedhore, duke shpjeguar se ka shume impakt pozitiv, arrestimi përgjatë fushatës i një individi që shpërndan para.

Po kështu kërkohet që zinxhiri KQV-polici- Prokurori, të funksionojë në gjendje alarmi përgjatë ditëve zgjedhore.
Por ndërkohë, kërkohet që prania e policisë, në ambiente të tjera jo për qëllime të mbrojtjes së rendit zgjedhor, do të duhet të interpretohet si përfshirje e paligjshme në zgjedhje.

Po kështu thuhet se çdo informacion, kërkesë, ankesë, e subjekteve zgjedhore dhe zgjedhësve, të adresohet tek KQV dhe këtij të fundit duhet t’i njihen kompetenca edhe jashtë këtij territori.

Albin Kurti ka shpjeguar sot gjatë diferencat që pati me Edi Ramën gjatë takimit në Tiranë për sa i përket shengenit Ballkanik. Ndërsa kryeministri kosovar foli për një makro Shengen mes shqiptarëve homologu i tij ia ktheu se ai nuk mund të realizohet pa bërë mini shengenin ballkanik.

Albin Kuri e pranoi pa hezitim se midis tij dhe Ramës ka dallime në këtë pikë. Gjatë një interviste për Rubikon në KTV ai e ironizoi mini Shengenin duke e quajtur më shumë një ide sesa një projekt konkret.Vëretja tjetër e tij qe se ky proces nuk mund të fillohet duke pasur si partner kryesor Serbinë.

“Unë nuk mendoj që kjo është një përpjekje për ringjalljen e Jugosllavisë, por as e përjashtoj që në Serbi ta imagjinojnë si një nismë për krijimine Jugosllavisë së katërt”, tha ai.

Megjithatë Albin Kurti nuk e përjashtoi kategorikisht mundësinë që të ulet në tryeza për këtë nismë. “Ne nuk i kemi në duar dokumentat e tre takimeve të para. Vetëm pasi të njihemi.me to do të vendosim në qeverinë e Kosovës” tha ai duke shtuar:”Nuk e perjashtoj apriori pjesmarrjen ne tryezë”.

Ish-deputeti i PD, Bardh Spahia ka reaguar për ngjarjen e rëndë që ndodhi sot n ë mesditë në Shkodër ku pati përplasje me armë mes dy grupeve rivale. Spahia pyet Lleshajn, pse hesht?

“Pse nuk e kanë frikë policinë e shtetit, e cila me pretekstin anti KCK, po merr superkompetenca, pasi mund të bëjë përgjime deri në 6 muaj, pa leje prokurorie a vendim gjykate?, shkruan Spahia në reagimin e tij.

Reagimi i plotë

Edhe në mes të ditës, në një zonë qendrore të Shkodrës, si Parruca qëllohet me armë, fatmirësisht pa pasoja dhe kush e bën ikën rehat në punë të vet, madje me makina luksoze raportojnë mediat! Eshtë një nga zonat më të monitoruara të Shkodrës pra, edhe me biznese që kanë kamera sigurie.

Ku e gjejnë kurajon të rrezikojnë jetë qytetarësh në mes të ditës? Ku e gjejnë kurajon ta sfidojnë shtetin kaq hapur? Pse nuk po “dridhen” nga aksioni anti KCK, që shënjestron edhe makinat luksoze?

Pse nuk e kanë frikë policinë e shtetit, e cila me pretekstin anti KCK, po merr superkompetenca, pasi mund të bëjë përgjime deri në 6 muaj, pa leje prokurorie a vendim gjykate?

Pse ministri Lleshaj vazhdon të heshtë para këtyre rasteve të përsëritura në Shkodër? I ka të identifikuar e nuk i prek dot, apo nuk di si të përballet me ta? Në cdo rast, heshtja nuk është flori, por flet shumë e qartë!

Presidenti i Republikës, Ilir Meta gjatë një interviste të drejtpërdrejtë për Euronews Albania ka komentuar ligjin e sapomiratuar në Parlament nga mazhoranca për mënyrën e kryerjes së betimit për anëtarët e rinj të Gjykatës së Lartë dhe asaj Kushtetuese, Presidenti Meta u shpreh se, do të shprehet në momentin kur ligji t’i mbërrijë në zyrë për dekretim.

“Nuk e di se çfarë ka ndodhur në Parlament, por prej kohësh në Parlamentin tonë është lajm kur miratohet ndonjë ligj në respekt të Kushtetutë. Shkelja e Kushtetutës është kthyer në një sport të preferuar të mazhorancës.

Nuk dëshiroj të komentoj diçka që nuk e kam lexuar, por në vijim të marrëzimit që ka ndodhur me zbatimin antikushtetues të reformës në drejtësi. Nuk habitem që të ketë ndodhur ndonjë marrëzi e tillë. Kur ligji të mbërrijë në Presidencë do të shprehem në mënyrë zyrtare.

Nuk ekziston asnjë mekanizëm ligjor që rrëzon Kushtetutën, këto janë përpjekje për të dënuar me vdekje çdo minimum kredibiliteti që mund t’i ketë mbetur reformës në drejtësi”, është shprehur z. Meta gjatë intervistës në studion e Ilva Now.