Rama u kërkoi edhe sot durim qytetarëve që humbën banesat e tyre nga tërmeti i 26 nëntorit, por nuk dha asnjë datë se kur do të nisë ndërtimi i banesave, premtuar prej tij. “Njerëzit kërkojnë të dinë se kur do të kthehen në shtëpi. Duam të bëjmë një proces rindërtimi ku gjithçka të jetë sipas standardeve dhe kushteve optimale për ato kategori ndërtesash që janë pjesë e procesit. Është e nevojshme të bëhet pak durim. Më vjen keq që në raste të caktuara kam parë dezinformim”.

Rama deklaroi se, tashmë procesi i rindërtimit është në një fazë të re pasi tashmë janë zonat e përcaktuara për t’u zhvilluar dhe modelet e banesave individuale.

Kreu i qeverisë u shpreh se në ditët e ardhshme do të hapet procedura e garës ndërkombëtare për të ftuar kompanitë që do të ofrojnë ndihmën e tyre për zhvillimin e këtij projekti.

“Kemi përfundimisht zonat e përcaktuara të zhvillimit. Një pjesë e madhe e planeve dhe ndër to kemi planet e avancuara të Laçit, Thumanës, Shijakut që janë tre zonat ku rindërtimi do të nisë më shpejt sesa në zonat e tjera. Kemi modelet e konfirmuara të banesave individuale sipas tipologjive.

Jemi gati që ditët e ardhshme të dalim në procedurën e garës së hapur ndërkombëtare për të ftuar kompanitë që do të ofrojnë suportin për shtëpitë individuale. Kemi të dhënat lidhur me institucionet arsimore dhe shëndetësore që të fillojmë dhe lidhur me to procedurën e garës që të fillojë dhe aty rindërtimi”, u shpreh Rama.

Kryetari i Partisë Demokratike, Lulzim Basha, pas takimit me ambasadorin e BE, Luigi Soreca u shpreh se, beteja e opozitës dhe e të gjithëve është e rëndësishme zhvillimi i zgjehdjeve të parakohshme.

Basha ndër të tjera në deklaratën e tij për mediat ka theksuar se gjithçka që po ndodh në vend është produkt i vetë qeverisë me në krye Edi Ramën.

“E gjithë beteja jonë është që zgjedhjet e parakohshme të bëhen sa më shpejt që shqiptarët të zgjedhin me votë të lirë përfaqësuesit e kuvendit të bashkive është e vetmja zgjidhje për daljen nga kriza politike, për të ndalur gremisjen e vendit për të zgjedhur qeverisjen e tyre që të krijojë më shumë mundësi për punës.

Gjithçka që po shohim në këtë vend, bjerrja e shpresës, kriza ekonomike është produkt i krizës politike. Kriza politike është krijuar pikërisht nga mentaliteti i KÇK. KÇK është qeveria, kryeministri dhe veglat e tij në pushtet. Zgjedhje parlamentare në një ditë me ato qëndrore nuk janë dëshire por domosdoshmëri, është thirrja e çdo shqiptari për të nxjerrë vendin nga kriza kjo është beteja”, tha Basha.

Gjithahstu Basha theksoi se, opozita është e angazhuar për tryezën zgjedhore, dhe po bën çdo përpjekje që reforma zgjedhore të përfundojë me 15 mars por një pjesë të rëndësishme ka dhe pala tjetër që ka sot pushtetin.

Basha tha se, opozita është e gatshme që të japë të gjithë kontributin e saj që Reforma të përfundojë sa më parë, në mënyrë që vendit të hapet rruga për zgjedhje të parakohshme.

Ish-deputeti i Partisë Demokratike Ervin Salianji ka qenë këtë të mërkurë te ABC-ja e Mëngjesit ku ka folur në lidhje me domosdoshmërinë e zhvillimit të zgjedhjeve të parakohshme në vendin tonë.

Salianji në fjalën e tij është shprehur se nuk mund të presim zjedhje nga Edi Rama dhe nga Taulant Balla se ato patjetër nuk duan që të ndodhë një gjë e tillë, por që zgjedhjet e parakohshme janë domosdoshmëri dhe do të zhvillohen kjo është e pashmangshme.

Ish-deputeti ka theksuar se zhvillimi i zgjedhjeve nuk është i rëndësishëm për sjelljen e opozitës në pushtet por është domosdoshmëri për shkak të krizës në të cilën ndodhet vendi.

“Ka nevoje per zgjedhje të parakohshme ato nuk bëhen për të sjelle një opozite ne pushtet, por në vend ne kemi një krizë politike, kemi një krizë ekonomike, sociale dhe gjithashtu kemi marrëdhenie të shkrumbuar me presidentin kemi dhe prioritetin që është integrimi për në BE.

Vetëm zgjedhjet e parakohshme dhe qeveria që do të zgjedhin qytetarët do të bëjnë të mundur mbështetjen e qytetarëve dhe të gjithë partive të tjera. Në politike nuk ka asnjëherë të folur me siguri, deri më tani jemi provuar ne si të vertetë. Ju e mbani mend që Rama dhe numri dy i PS thonin se ne dhjetor do të kishin reformë zgjedhore, por që nuk e arritën dot këtë fakt pasi është e rëndësishme që pjesë do të ishte një tryezë politike”, tha Salianji.

Ndër të tjera ai ka theksuar se zhvillimi i zgjedhjeve të parakohshme nuk ka lidhje me zbatimin e reformës në drejtësi pasi tashmë në një mënyrë apo tjetër janë krijuar institucionet e reja të drejtësisë pavarsisht mënyrës së si funksionojnë.

“Nuk ka më asnjë lidhje për të kuptuar ka apo jo zgjedhje të parakohshme në lidhje me zbatimin e Reformës në Drejtesi pasi organet e reja të krijuara secili e ka iden se si janë formuar. Me Edi Ramën nuk ka për të pasur ndonjëherë shtet të së drejtës dhe zbatim të ligjit dhe këtë tashmë e kemi parë të gjithë prej 7 vitesh, prandaj zgjedhje të parakohshme ka dhe do të ketë në vitin 2020”, është shprehur ish-deputeti.