Vijojnë hetimet lidhur me gjetjen e trupit të 49-vjeçarit Jak (Jani) Prenga, i marrë peng 12 ditë më parë në qendër të Kamzës. Deri më tani, për pengmarrjen dhe vrasjen e tij Policia e Tiranës ka arrestuar 5 persona, i fundit i identifikuar si Festim Bexhdili 30 vjeç, banues në Kavajë.

Për këtë ngjarje të rëndë detaje të reja janë zbuluar ku, Prokuroria e Tiranës në bashkëpunim me policinë kanë sekuestruar kamerat e sigurisë, si të resortit të Hajrajve, po ashtu edhe të një biznesi përballë, ku është filmuar një fugon që qëndron për disa orë.

Burime për abcnews.al raportojnë se personat e arrestuar, kanë dalë nga resorti, me vegla pune, që dyshohet se kanë dalë për të bërë varrosjen e trupit të Jan Prengës.
Të përfshirë në këtë ngjarje janë persona me rrezikshmëri të lartë kriminale, që janë të përfshirë në trafikun e drogave të forta.

Gjithashtu burime për abcnews.al, kanë bërë me dije se, rrëmbimi i Prengës, është bërë për shkak se i vëllai që ndodhet në Angli, ka marrë një sasi të konsiderueshme lëndë narkotike, dhe nuk e ka dorëzuar në destinacion. Ndërkohë përveç 5 personave të arrestuar janë shpallur në kërkim policor edhe disa presona të tjerë.

Prokuroria do të lexojë ditën e nesërme në Gjykatë, kërkesën për caktim të masës së sigurisë, ku do kërkojë “arrest në burg” për 5 të arrestuarit. ABC News ka mësuar se janë shpallur në kërkim të dyshuarit si urdhëruesit e pengmarrës së Jan Prengës:

M.B, G.D K.G këta të tre janë nga Shkodra, dhe D.R nga Vlora. Vëllai i viktimës Astrit Penga, është përgjuar me urdhër të gjykatës penale të Tiranës, dhe bazë të përgjimeve, rezulton se ai ka komunikuar me familjarët, dhe u ka thënë se Jani është mirë, dhe droga është dorëzuar në destinacion, dhe po ashtu edhe të tjerët do të bëjnë dorëzimin e lëndës narkotike.

Gjithashtu pamjet kanë fiksur Jan Prengen duke e nxjerrë të zhveshur nga makina.
Astrit Prenga, vëllai i Janit, ka kërkuar që familjarët të mos bashkëpunojnë me Policinë.
Ngjarja u zbardh nga Policia e Shtetit dy ditë më parë, ku u dhanë detaje për operacionin që u zhvillua në Shijak.

49-vjeçari i rrëmbyer, si pasojë e goditjeve të marra në Kamzë dhe humbjes së gjakut ka ndërruar jetë rrugës për në resort, aty ku do mbahej peng.

Rrëmbimi i Prengës ka ndodhur si pasojë e një konflikti që një nga vëllezërit e viktimës ka pasur me pengmarrësit, si pasojë e prishjes së disa pazareve të drogës në Britaninë e Madhe, të cilëve do t’ju jepte 60 kilogramë kokainë. Policia ka ndaluar të dyshuarit kryesorë për ngjarjen.

Bëhet fjalë për dy vëllezërit Elton, Leonard dhe babain e tyre, Bajram Hajri, respektivisht 32, 35 dhe 64 vjeç dhe 36-vjeçarin Olsi Turja, të gjithë banues në Shijak.
Mbi të ndaluarit rëndojnë akuzat e “rrëmbimit të personit”, “fshehja e kufomës”, “moskallëzim krimi” dhe “pengimi i zbardhjes të së vërtetës. Në to shtohet edhe “armëmbajtja pa leje .

Pas rrëmbimit të 49-vjeçarit, pengmarrësit janë nisur menjëherë drejt resortit të Altin Hajrit për të mbajtur aty viktimën. Të ndaluarve u janë sekuestruar armë zjarri, municione luftarake, aparate celularë, automjete dhe një shumë parash në euro.

Agjencia Kombëtare e Ujësjellës-Kanalizime ka shpallur fitues të tenderit 15 milionë euro për mbylljen e land-fillit të Porto-Romanos bashkimin e operatorëve ndërmjet kompanisë shqiptare “Victoria Invest International” dhe asaj italiane, “De Mare” srl”.

Tenderi është zhvilluar me procedurën e prokurorit “me negociim, pa shpallje paraprake”, duke e argumentuar “për shkak të nevojës ekstreme në të cilën ndodhemi pas ngjarjeve të shkaktuara nga tërmeti i datës 26.11.2019”.

Ky argument, si edhe i gjithë tenderi për mbylljen e landfillit të Porto-Romanos, krijon hije dyshimi për një proces të paracaktuar.

Kompani 3-mujore në Shqipëri
Fituesit e tenderit rreth 15 milionë euro janë kompanië “Victoria Investment International” e regjistruar në Kosovë, pjesë e “Victoria Invest”, e regjistruar në Shqipëri nga biznesmeni elbasanlli, Fatmir Kuçi.

Ndërsa, kompania e dytë është “De Mare” srl, një kompani me qendër në Itali dhe që ka regjistruar në Shqipëri “De Mare-Albania”, si degë e huaj e saj. Kompania mëmë drejtohet nga Fausto De Mare, nga rajoni jugor italian i Potenzas.

Biznesmeni De Mare ka drejtuar, për disa kohë, edhe “Confcommercio”-n, Konfederatën Italiane të Sipërmarrjes dhe Aktiviteteve Profesionale dhe të Profesioneve të Lira.

Në faqen zyrtare të kompanisë lexohet, ndër të tjera se, “shoqëria, ndër vite, ka siguruar një staf të kualifikuar, gjë e cila i ka lejuar që nga viti 2015 të zbatojë projekte, të realizojë drejtimin teknik të kantiereve të punës për realizimin e pastrimit dhe bonifikimit në zonat e Elbasanit, Tiranës e Fierit”.

Në bazë të të dhënave të Qendrës Kombëtare të Regjistrimit (QKR), kompania “De Mare” është regjistruar në Shqipëri, fillimisht në 5 Qershor 2018, si “zyrë përfaqësimi” e “De Mare” srl, me objekt “Menaxhimi teknik i veprave të kryera nga kompania mëmë dhe ndjekja e punimeve dhe të politikave të shoqërisë”.

Në 18 Tetor 2019, regjistrohet në QKR “De Mare-Albania”, si dega e huaj e kompanisë e “De Mare” srl.
Në objektin e kësaj kompanie janë “drejtimi teknik dhe testimi, ndërtimi e menaxhimi i impianteve për llogari të vetën dhe të palëve të treta, private dhe publike, për ruajtjen dhe trajtimin e mbetjeve inerte urbane…., impiant të shkatërrimit termik dhe impianteve të rivlerësimit termik të mbeturinave, landfilleve, bonifikime…”.

Vetëm 3 ditë pas regjistrimit të “De Mare-Albania” si “degë e huaj” e “De Mare srl”, konkretisht në 21 Tetor 2019, Agjencia Kombëtare e Ujësjellës-Kanalizimeve dhe Infrastrukturës së Mbetjeve (AKUM) shpall tenderin për “mbylljen e vend-depozitimit të ngurta EKO-Park, Durrës”.

Në bazë të të dhënave zyrtare, vlera e tenderit ishte parashikuar 1.68 miliardë lekë (të reja) pa TVSH, një vlerë e përafërt me 15 milionë euro.

Tenderi u parashikua të mbyllej në datë 19 Nëntor 2019. Por, në kohën kur duhej të shpallej fituesi, Agjencia Kombëtare e Ujësjellës-Kanalizime njoftoi se tenderi ishte anuluar, për shkak të “gjendjes së fatkeqësisë natyrore”, të shpallur me Vendim të Këshillit të Ministrave më 27 Nëntor 2019, një ditë pas tërmetit tragjik.

Në njoftimin e anulimit, nuk u publikua asnjë informacion për kompanitë pjesëmarrëse në tender.

Tender “i mbyllur” për nevoja ekstreme?
Pas anulimit të tenderit të parë, Agjencia Kombëtare e Ujësjellës-Kanalizime e ka rishpallur procedurën e prokurimit publik. Por, kësaj radhe, ka ndjekur procedurën e “mbyllur”, atë që quhet “procedurë me negociim paraprak, pa shpallje”, duke shpallur fitues bashkimin e operatorëve “De Mare” srl. dhe “Victoria Invest International”.

Autoriteti kontraktor, Agjencia Kombëtare e Ujësjellës-Kanalizime e ka argumentuar këtë procedurë “të veçantë” tenderi “për shkak të nevojës ekstreme pas ngjarjeve të shkaktuara nga tërmeti i dates 26.11.2019”.

Ky argument duket se “çalon” për disa arsye, referuar të dhënave publike të mëparshme, të cilat sugjerojnë që mbyllja e landfillit të Porto-Romanos nuk lidhet me “emergjencën e tërmetit të 26 nëntorit 2019”.

Landfilli i Porto-Romanos konsiderohet një nga pikat më të nxehta në Shqipëri, me nevojë urgjente për mbylljen e tij. Në vitin 2016, Bashkia e Durrësit hartoi një plan-studimi, ku parashikohej mënyrë se si duhej mbyllur ky landfill.

Në Qershor 2018, kryeministri Edi Rama deklaroi se “Ne kemi marrë një angazhim që ta mbyllim zonën kanceroze të fushës së mbetjeve. Besoj deri në vjeshtën e vitit të ardhshëm”.

Në Tetor të vitit 2018, ish-kryetari i Bashkisë së Durrësit, Vangjush Dako dhe ministri i Turizmit, Blendi Klosi, u shfaqën në landfillin e Porto Romanos, ku deklaruan se brenda vitit 2019 do të mbyllej vend-grumbullimi i mbetjeve urbane dhe zona do të shndërrohej në një hapësirë me parqe.

Por, megjithë premtimet politike, land-filli i Porto-Romanos nuk u arrit të mbyllej në vitin 2019. Megjithatë, deklarimet e zyrtarë të lartë dëshmojnë se land-filli i Porto Romanos ishte shndërruar në emergjencë për shkak të ndotjes alaramente. Dhe kjo gjë nuk kishte lidhje me tërmetin e 26 Nëntorit.

Që mbyllja e land-fillit të Porto Romanos ishte shndërruar në “emergjencë” konfirmohet edhe nga fakti që Agjencia Kombëtare e Ujësjellës-Kanalizimeve, administruese e asaj zone, kishte shpallur tenderin në Tetor 2019, pra rreth një muaj para tërmetit tragjik të 26 Nëntorit.

Gjithashtu, për shkak të shtrirjes dhe specifikës së zonës, land-filli i Porto Romanos nuk pësoi dëme strukturore (pasi nuk ka të tilla) nga tërmeti i 26 Nëntorit, që të mund të justifikonte ndërhyrjen “me negociim, pa shpallje paraprake” për shkak të pasojave të lëvizjeve sizmike.
/ BoldNews.al

Paniku dhe frika nga tërmeti është rikthyer përsëri për banorët e Durrësit, Tiranës dhe zonat përreth pasi një tërmet me magnitudë 4.9 rihter është ndjerë në orët e mbrëmjes së djeshme.

Kamera e ABC News ka qenë paraditen e sotme në epiqendrën e tërmetit të mbrëmshëm, në Bubq.

Gazetari Maksi Rama ka qenë në familjen Ajazaj në Bubq, ku prej tërmetit të 26 nëntorit, po qëndrojnë në çadra duke sfiduar kapriçot e motit, mes të ftohtit e shiut.

“Që prej datës 26 nëntor kemi jetuar jashtë, fillimisht në hangar mbi dëngjet e barit, pastaj në makinë, më pas na prunë çadër dhe që atëherë ne jetojmë në çadër familjarisht. Jetojmë me pensionin e invaliditetit tim. Me pensionin duhet të siguroj bukën e familjes, të paguaj drita, ujë, të blej ilaçet se kam shumë sëmundje në trup“.

Kryefamiljari thotë për abcnews.al se ka bërë aplikimin ashtu siç i kanë rekomanduar, por ende nuk ka marrë asnjë ndihmë nga shteti, dhe bonusi i qirasë nuk i është dhënë.

“Jetesa jonë është e vështirë, është bërë e padurueshme. Nuk kemi ku të ankohemi, nuk kemi ku ti drejtohemi. A jetojnë njerëzit pas kaq vitesh shtet shqiptarët me këto kushte e vështirësi? Ne e dimë që na zuri halli nga tërmeti por jemi për një copë bukë se nuk na del. As nuk jetohet, as nuk flihet, as hahet, jemi në hall që prej datës 26 nëntor.

Banesën tonë erdhën e panë ekspertët po askush nuk dha një vendim nëse është e pabanueshme apo e banueshme. Tani na thonë që duhet të bëjmë prapë dokumentet, çfarë dokumentesh të bëj më unë, çfarë kërkon nga unë më shumë, mua mezi më del të blej bukë. Nuk kërkoj asgjë, as ushqime asgjë thjesht të fus kokën diku se jemi të mbaruar”, thotë i zoti i shtëpisë.

Shumë familje në fshatin Bubq jetojnë ende në çadra të cilët kanë të njëjtin problem pasi banesat e tyre janë shpallur të pabanueshme. Si për ironi të fatit edhe tërmeti mbrëmjen e djeshme ka ngjallur frikën dhe pasigurinë jo vetëm në Bubq por edhe në Durrës, Tiranë./abcnews.al

Policia e Shtetit publikoi një listë me emrat e personave më të kërkuar. Për qarkun e Vlorës, ndër emrat më të kërkuar është edhe ai i Dritan Zaganit, ish-shefit të antidrogës që denoncoi i pari implikimin e Sajmir Tahirit në trafikun e drogës me Habilajt.

Zagani sot ndodhet në Zvicër ku ka kërkuar azil, ndërsa në Shqipëri është hetuar për shpërdorim detyre.

Në një reagim në rrjet, Zagani shkruan se “Policia që duam me paska bërë një nderë të madh, me paska venë të tetin në listen e “trimave” për qarkun Vlorë…”.

“Ndjehem vertet i vlerësuar nga drejtuesit aktuale, lokal në Vlorë dhe shefat e tyre madhore në Tiranë deri te vetë ai Gjenerali pa grada…!
P.s…Po interpoli ça pati ,pse ua menderosi kartelen e kuqe për mua… .. eee , ka ndonjë nga këta polica të squt me ma sqaru…jo për gjë por bie vlera e “nderit” që këta me bejne pastaj”, mbyll postimin e tij ish-zyrtari i policisë.

Gazetarja Klodiana Lala ka zbardhur për “News24” dhe “BalkanWeb” emrat e kriminelëve, që urdhëruan marrjen peng dhe vrasjen e 49-vjeçarit Jan Prenga, më 17 janar në Kamëz.
Janë katër persona, që kanë dhënë urdhrin për marrjen peng të Prengës, të cilët sipas gazetares Lala, mendohet se kanë aktivitet kriminal në Ekuador dhe vendet e Bashkimit Evropian.

Më poshtë, katër emrat e urdhëruesve të krimit makabër:
M. B., personazh me dritë-hije të forta në botën e krimit, nga Shkodra, i akuzuar për trafik droge nga Ekuadori në vendet e BE.

G. D., është i skeduar nga autoritetet e vendeve të BE dhe konsiderohet si njeriu kyç që urdhëroi rrëmbimi i Jan Prengës, përderisa vëllai i këtij të fundit arriti të nxirret nga porti britanik një sasi të madhe kokaine, por nuk e dorëzoi në destinacion.

K. G., nga Shkodra, i përfshirë më herët në aktivitet kriminal në vendet e BE, por edhe në Shqipëri i skeduar. Ky mendohet të jetë personi që ka bërë rolin e ndërmjetësit, duke çuar mesazhin për marrjen peng të Prengës.

D.R., nga Vlora, personazhi më i fuqishëm i botës së krimit në Vlorë. Më 2014, është arrestuar me 240 kg kokainë në Ekuador, më herët ishte akuzuar për përfshirje në vepra kriminale në Shqipëri.

Paniku i ka përfshirë të gjithë mbrëmjen e djeshme ndërsa tërmeti lëkundi sërish Durrësin dhe Tiranën. Duke qenë se ora e tërmetit përkonte më shumë emisione televizive emocionet, paniku është fiksuar në kamerat e këtyre televizioneve. Një prej tyre ishte edhe gazetari Balla.

Lëkundjet e djeshme të tërmetit të orës 21:15 minuta janë ndjerë edhe në studion e lajmeve në Ora News dhe në emisionin “Tempora”.

Folësja e lajmeve në momentin e tërmetit është frikësuar, por ka vazhduar duke dhënë lajmet.

E njëjta situata ndodhi edhe në studion e emisionit “Tempora”, ku moderatorja qetësoi menjëherë shikuesit që po e ndiqnin emisionin në studio.