Gjykata e Tiranës ka rrëzuar kërkesën e ish-kryebashkiakut të emëruar të Vorës për heqjen e masës së sigurisë ‘Arrest me burg’. Kajmaku, kërkesën për heqjen e kësaj mase, e ka bërë nga arratia. Shkak i rrëzimit të kërkesës nga gjykata është bërë mungesa në seancë e avokatit të Kajmakut.

Masa e sigurisë ‘arrest me burg’ vazhdon të jetë në fuqi dhe pse Kajmaku nuk është gjetur ende, ndonëse të gjithë e dinë se ku ndodhet, por nuk e arrestojnë me porosi nga lart.

Dosja në gjykatë
Ndërkaq, në gjykatë është dërguar dosja hetimore në ngarkim të Agim Kajmakut, ish-kryebashkiakut socialist të Vorës.

Agim Kajmaku ndodhet në arrati që prej kohës kur është shpallur në kërkim nga Prokuroria disa muaj më parë për mashtrim në formularin e dekriminalizimit, tejkalim kompetencash si dhe falsifikim dokumentash të kryer në bashkëpunim, ndërsa procesi gjyqësor është ndjekur pa praninë e tij.

Në 16 Janar, kanë përfunduar hetimet për ish-kryebashkiakun e Vorës që u shkarkua nga KQZ pas publikimit të dokumentave nga ana e Partisë Demokratike se kishte qenë i dënuar nga autoritet greke. Kajmaku nuk është përballur drejtpërdrejt me akuzat, ndërsa këtë e ka bërë avokati i tij. Pas përfundimit të hetimeve nga Prokuroria për kryebashkiakun e Vorës Agim Kajmaku, çështja është dërguar në Gjykatën Penale të Tiranës për tre akuzat e sipër-përmendura.

Akuzat
Prokuroria ka bërë me dije në rrugë zyrtare se Kajmaku kërkohet në lidhje me hetimin e nisur ndaj tij për falsifikim të formularëve, denoncuar së pari nga opozita që ngriti zërin gjatë verës dhe tregoi që Agim Kajmaku kishte qenë i dënuar në Greqi. Ai nuk e kishte raportuar këtë fakt në formularët e dekriminalizimit. Për këtë shkak, u shkarkua nga KQZ nga detyra e kryebashkiakut.

Nga ana tjetër, prokuroria pohon se ai është nën hetim edhe për ushtrim të funksioneve pas dhënies fund të detyrës duke qenë se ka shkarkuar dy nënkryetarë te bashkisë pikërisht ditën kur komisioni qendror i zgjedhjeve i ndërpreu unanimisht mandatin si edhe ka shpërdoruar detyrën. Lidhur me këtë akuzë, avokati i Kajmakut pretendon se këto dy lëvizje janë bërë më 31 Tetor.

Pjerin Ndreu, kryebashkiaku i emëruar i Lezhës, u shpreh dje se të gjitha familjet, banesat e të cilëve janë dëmtuar nga tërmeti i 26 nëntorit dhe janë shpallur të pabanueshme, po trajtohen ose me bonus qeraje ose me akomodim.

Debati në studion e “Open” lindi pasi një familje pohoi se qendra humanitare “Sebastia” i ka siguruar familjes një kontenier, ku ata strehohen.

“Sebastia” nuk bashkëpunon me bashkitë, por veprojnë si një qendër humanitare, dhe kanë strehuar familjen e prekur nga tërmeti, e cila ishte lënë në mëshirë nga bashkia.

Por ky pohim ka nxehur Pjerin Ndreun, i cili tha se, nuk ka snjë shans që të vendoset një kontenier pa pasur bashkëpunimin me pushtetin vendor.

“Unë jam kryebashkiak, ju dëgjoni një qytetar atje. Unë ju them se nuk ka asnjë shans që të akomodohet një familje pa pasur bashkëpunim mes shoqatave humanitare dhe pushtetit vendor.
Kam konfirmimin e administratorit të Mamurrasit që thotë se kjo familje është akomoduar në çadër, marrin edhe ndihmë mujore nga një shoqatë”, tha Ndreu.

Sipas tij, nuk ka asnjë shans që shoqatat të veprojnë dhe të vendosin kontenierë apo çadra ka koordinimin e tyre me bashkitë.

Por një prej familjarëve tha se ata jetojnë në një kontenier, të siguruar nga shoqata humanitare “Sebastia”.

“Jemi 8 pjesëtarë, jemi të vendosur në një kontenier, pasi çadra që na ofroi pushteti vendor në ditët e para, kishte kushte shumë të këqija dhe nuk mund të jetohej”, tha familjari.

Policia bëri të ditur se ka shpallur në kërkim aktorin kryesor të pengmarrjes së ndodhur pak kohë më parë në Kamëz. Ai, sipas burimeve nga Policia, është Altin Hajri nga Shijaku, një emër mjaft i njohur për drejtësinë shqiptare dhe amerikane, nuk u arrit të gjendej, duke u shpallur në kërkim.

Të njëjtat burime thanë dje se nga hetimet e kryera që prej momentit kur Jan Prenga u rrëmbye në Kamëz, pasi u dhunua nga dy persona të maskuar që e futën me forcë në makinë, dyshohet se ngjarja lidhet me një sasi prej 60 kg kokainë.

Sasi kjo që, sipas Policisë, ishte marrë në dorëzim nga njëri prej vëllezërve të Prengës, i cili për shkak se u arrestua në Londër, në vitin 2017, nuk arriti t’ua dorëzonte personave që ia kishin besuar.

Por ç’ndodhi në atë kohë? Një operacion ndërkombëtar i Drejtorisë së Antidrogës shqiptare dhe asaj italiane, në bashkëpunim me Guardia di Financa u finalizua në orët e para të mëngjesit të 28 tetorit 2015, duke vënë në pranga 16 persona.

Operacioni i koduar “Enigma”, i koordinuar njëkohësisht në dy shtetet, u realizua në zbatim të 21 urdhrave të arrestit të lëshuar nga Gjykata e Venecias, pas 5 vitesh hetimi intensiv. Bilanci i këtij aksioni fliste për mbi 500 kilogramë drogë të sekuestruar, nga të cilat 206 kg heroinë, si dhe 10 milionë euro pasuri të sekuestruara, që dyshohej se ishin ndërtuar me të ardhura nga kjo veprimtari.

Dy vëllezërit Altin dhe Emiljan Hajri, nga Shijaku, u dyshuan në atë kohë se drejtonin trafikun e heroinës që nga vendi ku sigurohej në Afganistan, duke u blerë më pas në Turqi e kaluar transit në Shqipëri me destinacion final Italinë.

Sipas Policisë italiane, vëllezërit shqiptarë kanë drejtuar grupin në një mënyrë të ngjashme me ato të organizatave mafioze, me qeliza të ndryshme, ku të gjithë e dinin se çfarë duhej të bënin, por vetë drejtuesit, kryesisht vëllai i madh, Altini, nuk kishte asnjë kontakt me pjesën tjetër të rrjetit. Jo vetëm për shkak të mënyrës që ka pasur sistem i komunikimit, që ripërtërihej nga koha në kohë, por edhe nga mënyra se si funksiononte organizata. Në rast se njëra qelizë zbulohej, atëherë tjetra vazhdonte punën, pa rënë në gjurmët e Policisë.

Historia e organizatës ishte e lidhur ngushtë me të shkuarën e dy vëllezërve, të cilët duke u larguar nga realiteti i vështirë para 20 vitesh, emigruan drejt Italisë, duke përzgjedhur terrenin ku do të ushtronin aktivitetin kriminal, por edhe njerëzit e tyre të besuar. Altin e Emiljan Hajri konsiderohen nga hetuesit italianë si persona me karizëm, shkathtësi dhe vendosmëri. Shumë prej anëtarëve të grupit nuk e kishin parë asnjëherë Altinin, madje nuk i kishin dëgjuar as zërin, pasi gjithçka ishte e koduar.

Policia pati zbuluar 5 vite më parë se vendi i origjinës së heroinës që trafikohej drejt Italisë, ishte Afganistani. Por asnjë prej anëtarëve të grupit nuk shkonte vetë atje, pasi çmimi ishte i arsyeshëm edhe në Turqi.

Droga blihej në Turqi me 5 mijë euro për kg, duke sjellë një fitim gati 10-fish, pasi merrej parasysh se vlera e shitjes me pakicë është 40 mijë euro për kg (40 euro doza). Të gjitha paratë që përfitoheshin nga kjo veprimtari, transferoheshin në Shqipëri, duke u investuar në sasi të tjera heroine apo pasuri të patundshme./Panorama/

Kryeministri Edi Rama ka deklaruar dje në një intervistë për Top-Channel se Shengeni Ballkanik ishte pjesë e diskutimeve të tij me kancelaren gjermane, Angela Merkel. Nga mënyra sesi përgjigjet zoti Rama duket sikur ai dëshiron të marketojë një mbështetje gjermane në këtë kuadër, nisur nga fakti se Shengeni Ballkanik është pranuar edhe nga presidenti serb Vuçiç se kundërshtohet në disa vende të BE-së. Cilat janë këto vende?

Pyetja ka vetëm një përgjigje që ka kuptim: Janë vende që kanë rëndësi. Përndryshe askush nuk do përfillte shqetësimin e kryeqyteteve pa peshë në vendimmarrje. Kryeministri na thotë atë që nuk u zu në gojë në konferencën për shtyp me Merkel: Gjermania mbështet Shengenin Ballkanik.

“Natyrisht kancelaria është tejet mbështetëse për këtë proces. Madje ne diskutuam dhe ky proces do të gjejë një mbështetje gjithmonë dhe më të madhe. Konsiderohet një nisëm shumë domethënëse dhe fakti që kjo nisëm u ndërmor nga nga tre vende, por jo si një nisëm ekskluzive, por një nisëm gjithpërfshirëse ku të gjitha vendet janë të ftuara dhe fakti që në fund të ditës kjo nisëm nuk është asgjë tjetër veçse jetësimi i nismave të dakordësuara gjatë procesit të Berlinit e bën kancelaren shumë të inkurajuar dhe shumë të interesuar për procesin.

Përfshirë dhe faktin që ajo e kupton shumë mirë dhe e di shumë mirë se çfarë hapi i jashtëzakonshëm është bërë në raport me Serbinë duke e bindur Serbinë që të heqë dorë nga vetoja ose nga refuzimi për të lejuar dhe lëvizjen e lirë të njerëzve që do të thotë: Lëvizja e lirë e njerëzve mes Shqipërisë dhe Kosovës. Gjë që për fat të keq në Prishtinë nuk duan ta kuptojnë dhe kujtojnë se duke e kthyer këtë në një debat se kush është tradhtari dhe kush është patrioti po i bëjnë ndonjë nder apo të mirë Kosovës”.

Kështu na thotë kryeministri i Shqipërisë, i cili edhe lëvizjen diplomatike të ambasadorit amerikan Grenell – krejtësisht në funksion elektoral për Donald Trump – e konsideron si komplementare me Shengenin Ballkanik.

Vini re kujdesin e z. Rama për të theksuar se nisma nuk ishte ekskluzive, se ajo është e hapur për të gjithë. Nëse është kështu, çfarë vlere ka atëhere Nisma e Berlinit dhe pse të mbivendosësh në këtë mënyrë projektet? Asnjë vend nuk do të dalë hapur dhe në mënyë të posaçme kundër Shengenit Ballkanik, pasi nismëtarët kanë me vete alibinë bazë: është një projekt që imiton Europën dhe vlerat e saj. Por ai është një projekt që ka implikime dhe autorësi, që ndërfutet mes nismave dhe detyrimeve të tjera dhe në fund është e qartë se nuk mund të ketë sukses pa mbështetje. Për të sqaruar diçka më shumë rrethë kësaj çështjeje, ResPublica iu drejtua me disa pyetje Ministrisë së Jashtme të Gjermanisë dhe Departamentit Amerikan të Shtetit.

Në përgjigjen e vet, Ministria e Jashtme gjermane shprehet: Shqip mund të sillet në këtë formë;

“Thellimi i bashkëpunimit rajonal është një prioritet i Procesit të Berlinit dhe një hap i rëndësishëm drejt të ardhmes europiane të Ballkanit Perëndimor. Për këtë arsye, ne mirëpresim të gjitha nismat që i japin një shtysë të re integrimit rajonal. Për Gjermaninë mbetet me rëndësi kruciale që një progres i tillë të përfshijë të gjashtë vendet e Ballkanit Perëndimor dhe që nismat të jenë në një linjë me detyrimet në fuqi – konkretisht CEFTA dhe Zona Ekonomike Rajonale – në mënyrë që të shmanget fragmentarizimi i mëtejshëm i rajonit”.

Është e qartë se fryma e bashkëpunimit mbështet, por forma e Shengenit Ballkanit, JO. Dhe ajo që vë në dukje Ministria e Jashtme gjermane në fakt ka ndodhur. Kosova është vendi i parë që e refuzoi atë duke çuar në përplasje të re përveç asaj që ka me Serbinë. Edhe Mali i Zi ishte i pranishëm në takimin e Tiranës sa për formalitet, ndërkohë që Bosnje Hercegovina nuk ka një qëndrim.

Nga ana tjetër nuk mund të mos shihet se Berlini zyrtar konsideron si prioritar dhe kryesor në Ballkan, Procesin e Berlinit që me Shengenin Ballkanik ngjan se relativiziohet bashkë me rolin e Gjermanisë. Kujtojmë këtu se në fjalën e parë që z. Rama mbajti në Novi Sad, pra kur Minishengeni u promovua, deklaroi se ne nuk kemi pse presim Eruopën.

Dhe kjo është një deklaratë që është mbajtur shënim.

DASH nuk u përgjigj për pyetjet drejtuar, ndërkohë që siç është vënë re diplomacia amerikane nuk ka patur ndonjë vizion apo angazhim të thellë këto kohë, veç spektaklit të Grenell që kërkoi një marrëveshje të shpejtë.

Është ajo lloj fitoreje që po kërkon të shesë edhe z. Rama në Tiranë, ku shërben sipas midesë qëndrimet e të tjerëve, duke spekulluar me heshtjen apo hapësirën e komunikimit mes vendeve. Por edhe më parëndësinë e Shqipërisë që ai drejton. Fundja kush do lodhej në Europë të përgënjeshtronte një kryeministër të Shqipërisë?
/Res Publica