Pamje që të rrëqethin mishin janë të gjitha ato ç’ka shohim pas tërmetit të 26 nëntort. Sindrit Caca, vëllai i Manjola Cakonit, e cila ka humbur bashkëshortin Kastriotin dhe vajzën e saj Drita Cakoni, 15 vjeçe ka bërë dëshpërimisht apel për ndihmë për strehim dhe psikolog për motrën e tij dhe djalin e saj 10 vjeç.

Manjola momentalisht gjendet e shtruar në spitalin e Traumës, ndërsa vëllai i saj kërkon strehim në Tiranë dhe ndihmën e psikologut sidomos për 10 vjeçarin.

Vogëlushi, ka kërkuar vazhdimisht familjarët e tij dhe madje ka tentuar edhe të ikë nga spitali, pasi nëpër korridore ka dëgjuar tragjedinë që i ka ndodhur familjes së tij.

Shpesh ai pyet nëse motra gjendet në ndonjërën nga dhomat e spitalit. /abcnews.al

Kriminalitet, abuzime në ndërtim dhe ndërtesa të ngritura pa asnjë kontroll.

Tërmeti në Shqipëri ka nxjerrë në dukje një aspekt paradoksal.

Ndërsa llogariten dëmet, që janë të mëdha, del që strukturat e shembura janë ato të mëvonshmet, që nuk përmbushin kriteret antisizmike. Strukturat dhe shtëpitë e vjetra, të ndërtuara në vitet ’70 e ’80, kanë rezistuar.

Disa kanë dëme, por nuk janë në rrezik. Sipas asaj që thuhet nga njerëzit, ‘në kohën e komunizmit inspektimet ishin shumë më rigoroze krahasuar me kohën e demokracisë’.

Tani gjithçka ka ndryshuar.

Jorgaq Stasi, inxhinier civil, na shpjegon se Durrësi, dhe i gjithë bregu, është zonë tërmetesh, disa edhe shumë të dhunshëm.

Këtu ndërtesat nuk duhet të jenë mbi katër apo pesë kate.

Sipas asaj që thonë shumë shqiptarë, e rëndësishme është të kursesh e kush ka parà ndërton hotele, vila, shpesh pa leje e rregulla.

E ndërkohë numri i viktimave rritet, tashmë rreth 50, ndërsa vazhdojnë pa pushim kërkimet për të mbijetuar.

Sfida kryesore tani për qeverinë shqiptare është t’u gjejë çati mbi 2000 të pastrehëve. Pastaj të mendojë për rindërtimin. Duke e nisur nga rregulloret e sektorit të ndërtimit.

Tragjedia që ka prekur vendin tonë, vijon të jehojë dhe në mediat e huaja, ku zënë vend historitë dramatike të atyre që humbën jetën por dhe ata të cilët shpëtuan por tashmë duhet të jetojnë me dhimbjen për humbjen e familjarëve të tyre.

Prestigjozja Reuters, tregon se si u shpëtua një 17-vjeçar nga rrënojat. Mësohet se 17-vjeçarin e ka ruajtur lavatriçja, pasi struktura metalike e saj ka  krijuar hapësirë sa për t’i mbrojtur trupin dhe kokën 17-vjeçarit. Blloqet e inerteve të rëna sipër lavatriçes, i kanë bllokuar çdo mundësi dalje Ramë Lalës, por fatmirësisht nuk e kanë shtypur.

Shqipëria e gjunjëzuar mes lotëve dhe rrënojave”, shkruan gazeta italiane Il Pikolo. “Babai hedh djalin nga dritarja për ta shpëtuar”. E përditshmja shkruan për orën e tërmetit, numrin e viktimave dhe të të lënduarve duke dhënë edhe detaje se si është transformuar tashmë qyteti i Durrësit apo Thumana pas atij tëmeti në mëngjesin e 26 nëntorit.

Por ajo që bie në sy është titulli goditës që ka zgjedhur gazeta italiane për lajmin e tërmetit  në Shqipëri: Shqipëria e gjunjëzuar mes lotëve dhe rrënojave, babai hedh djalin nga dritarja për ta shpëtuar.

Kur tërmeti me magnitudë 6.4 që shkatërroi Durrësin dhe Thumanën në mëngjesin e 26 nëntorit ai e mbështolli djalin e tij 12-vjeçar, Alesio, në batanije dhe e hodhi poshtë dritares nga kati i tretë, drejt një fushë të vogël me bar nën shtëpi. Thjesht ishte gjëja e fundit që ai mund të bënte për të.  Djali i tij është shtruar në spital në Tiranë. Trupi i zotit Cakoni u nxorr mëngjesin e djeshëm nga rrënojat e ndërtesës.

La Stampa vjen me një tjetër histori tragjike, ku zjarrfikësit italianë kanë nxjerrë nga rrënoja trupat e pajetë të një gruaje dhe tre fëmijëve të saj të përqafuar në shtrat.

Gruaja ishte bashkëshortja e 40 vjecarit Berti Lala; ndërsa fëmijët ishin dy binkjakët 1 vjec e gjysëm dhe një fëmijë tjetër 7 vjec. Historia e familjes Lala ka tronditur të gjithë botën. Reuters raporton se një nga motrat e Berti Lala, nëna e tyre dhe një nip janë gjithashtu mes viktimave./abcnews.al

Nga Flutura AÇKA

Sarkazmë mbi gërmadha

30 sekonda tërmet na i shkokluan 30 vjet jetë dhe shpresë për shtet. Akullorja me duar të pastra që ndërtoi një Durrës të frikshëm, do të bëjë një jetë perandorësh mbi jetët e 50 vetëve nën rrënoja, dhe mbi germadhat e miliona e milionat e shqiptarëve të mbetur nën qiell të hapur.

I njëjti njeri që ndërtoi një Tiranë po aq të frikshme, do të rindërtojë Durrësin, madje ka thirrur edhe Opozitën të bëjë pjesë në komitetin e rindërtimit, në një si “biçim” marrëveshje si e 17 majit, që do ta zgjasë edhe më agoninë e shqiptarëve. Si mund të presësh transparencë mbi rrënoja nga institucione që kurrë nuk e bënë në kushte normale?

Por kjo nuk mjafton, mbi gërmadha teatri i strehimit të të mjerëve në hotelet me 5 yje, është aq sarkastik, aq i përshtirë, sa tronditesh. Të varfër që do të ishin përzënë po të shfaqeshin atypari në hollet e hoteleve me 5 yje, pasi varfëria e veshjeve të tyre bënte konflikt me luksin e këtyre hoteleve – që më së shumti kanë orgjira pushtetarësh në historikun e tyre – sot më ne fund do të kenë fatin të shijojnë pak nga luksi i të tjerëve. Shih, çdo e keqe e ka një të mirë! Po i provoni më në fund hotelet me 5 yje që deri më sot vetëm i keni ëndërruar.

Këtë sarkamë njerëzit e pushtetit duhet t’ua kursejnë shqiptarëve, në emër të një sensi human në shpirtin e tyre, sot duhet të jenë më të kujdesshëm. Të pakten sot!
Jo vetëm ata, por edhe klerikët shqiptarë, që nuk po lënë ekran pa dalë.

Zoti është aq modest, sa nuk mund të pranojë as qurravitjen e tyre nëpër ekane, as krekosjen e tyre plot bujë. Zoti nuk ka nevojë për kamera, se sheh vetë, ndaj respektojeni mjerimin dhe fatin e shqiptarëve të pastrehë e të pabukë sot, siç do të donte dhe siç ju mëson ai, me modesti!