Prokuroria e Tiranës ka filluar hetim në lidhje me tërmetin e 26 nëntorit. Prokuroria i ka dërguar një komunikatë bashkisë dhe policisë që të mos kryhet asnjë ndërtimin pa praninë e prokurorëve.

Prokuroria ka kërkuar që deri më datë 5 dhjetor të dorëzohen raportet.

Edhe pse një kërkesë është dërguar pranë policisë dhe bashkisë që më 27 nëntor, deri më sot nuk ka mbërritur në prokurori asnjë raport.

Përmes kërkesës Prokuroria e Tiranës kërkon që të dorëzohet raport i përpiktë me të gjitha banesat që janë dëmtuar nga tërmeti.

Po ashtu Prokuroria e Durrësit ka kërkuar sot konfiskimin e dokumenteve në zyrën e Urbanistikës.

Dje, së bashku me dhjetra mbështetës të lirisë së fjalës, isha e pranishme në gjyqin politik që ju bë Xhuliana Aliajt me urdhër të Kryeministrit.

Me plot dinjitet Xhuliana dëgjoi kërkesën e Prokurorëve dhe vendimin absurd të gjykatës për ta konsideruar të ligjshëm arrestimin e saj dhe për ta detyruar të paraqitet dy herë në muaj në kuesturat e regjimit.

Xhuliana, u arrestua se postoi në llogarinë e saj personale në facebook, një shkrim të portalit të Vatikanit “ L‘avvenire.it”. Artikulli shprehte shqetësimin për mundësinë e shpërthimit të depozitave në Porto Romano, në periferi të Durrësit. Xhuliana i kërkoi qeverisë të sqarojë lajmin e mediave italiane, por Kryeministri nuk e vonoi përgjigjen e i dërgoi në shtëpi skuadrën e anti-terrorit dhe e arrestoi.

U akuzua se kishte përhapur panik, ndërkohë që kishte shkruar vetëm në hapësirën e saj #personale në fb. Kishte marrë vetem 26 pëlqime. Akuza nuk arriti të vërtetonte që veprimi i Xhulias ishte i qëllimshëm për të përhapur panik.

Një #gjyq #politik, që na riktheu në kohën e akuzave për “agjitacion e propagandë”. Xhuliana akuzohejj edhe pse mungonte ana subjektive e veprës penale (mungonte dashja, qëllimi). Çështje që nuk duhet të ishte çuar fare në gjykatë, e Xhuliana duhet të ishte liruar menjëherë, pasi arrestimi i saj ishte i paligjshëm.

Xhuliana është viktimë e qëllimit kriminal të Kryeministrit për t’i mbyllur gojën çdokujt që mendon ndryshe, cilitdo që kritikon keqqeverisjen, të gjithëve që ai nuk i blen dot, apo nuk i bën dot të heshtë. Xhuliana duhej të bëhej shembull për të tjerët, që të mos denonconin abuzimin, keqmenaxhimin dhe mungesën e transparencës dhe informimit.

Rasti i Xhulianës vërteton se vendi po rrëshqet me shpejtësi në diktaturë. Mirënjohje për këdo që u solidarizua në mbështetje të Xhulianës. Thirrje për reagim për këdo që ende nuk ka kuptuar që heshtja e mosveprimi qytetar po ndihmon në rivendosjen e një regjimi diktatorial.

Urdhëruesit dhe zbatuesit e arrestimit të Xhulianës duhet të paguajnë për çdo sekond qëndrim të padrejtë e antiligjor të saj në qelinë e ftohtë të Drejtorisë së Policisë. Urdhëruesit dhe zbatuesit e arrestimit të paligjshëm të Xhulianës duhet të paguajnë për traumën e përjetuar nga prindërit dhe të afërmit e saj.

#DrejtësiPërXhualianën
#StopCensurës
#TëNdalimDiktaturën
#ReagoPërTëDrejtatETua

Mëngjesin e së martës (26 Nëntorit), Dorjan Greku kishte kaq shumë thirrje të humbura sa e ka të vështirë të kujtojë se cila ishte telefonata e parë, apo e fundit që e njoftoi për shembjen e pallatit ku jetonin familjarët e tij. Lajmi që e tronditi ishte se e gjithë familja ndodhej nën rrënojat e pallatit ku jetonin, në Thumanë.

Dorjani kishte më pak se dy muaj që jetonte në Francë, ku kishte shkuar për një jetë më të mirë dhe kishte kërkuar azil. Pikërisht nga Franca mori vesh se një tërmet i fuqishëm që do t’i shuante atij të gjithë familjen, babain Pëllumb Greku, nënën Çelike Greku dhe vëllain 31-vjeçar Sajmir Greku.

I tronditur dhe me shpresën se nuk kishte ndodhur ajo që i druhej, ai braktisi Francën dhe u nis drejt Shqipërisë. Kur shpresat për prindërit u shuan, drita e vetme në fund të tunelit u duk sikur ishte jeta e vëllait të tij, i cili u nxor i gjallë nga rrënojat. Por Sajmir Greku ndërroi jetë pak orë më vonë në spital, duke bërë që Dorjani të përjetonte një tragjedi të trefishtë.

Në një intervistë ekskluzive për tvklan.al, mes lotëve Dorjan Greku rrëfen momentin kur mori vesh lajmin që do t’i ndryshonte jetën, kthimin drejt Shqipërisë, por jo vetëm. Ai tregon edhe për dëmtimet që kishte pësuar shtëpia e tyre nga tërmetet e mëparshme. Dorjani thotë se tërmeti i Gushtit të 2018-s kishte shkaktuar dëmtime të shumta në pallatin ku ata jetonin. Ai tregon se ekspertët që kishin shkuar për të parë banesën e tyre kishin dalë në konkluzionin se banesa kishte vetëm dëmtime të suvasë dhe ishte e banueshme.

Keni humbur 3 pjesëtarët më të shtrenjtë të familjes, babain, nënën dhe vëllain. Keni arritur të shpëtoni vetë, ka arritur të shpëtojë nusja e vëllait tuaj bashkë me mbesën. Çfarë mund të na rrëfeni? Ku ishit ju në momentin e tërmetit dhe si e morët vesh që të afërmit tuaj ishin nën rrënoja?

Kisha udhëtuar për në Francë për të kërkuar një jetë sa më të mirë, kërkoja azil atje dhe normalisht kishim komunikim të vazhdueshëm, të përnatshëm. Më datë 26 kemi qenë në gjumë. U zgjuam në mëngjes, nusja tha Dori çohu se çfarë ka ndodhur në Shqipëri, ka rënë një tërmet shumë i madh. Mu duk thjeshtë një ëndërr ai zgjimi. U çova me qetësinë time si përherë. Pamë ato thirrjet e humbura të pafundme edhe nuk mund të them kush ishte personi i parë që më njoftoi apo ta mbaj mend, por thjeshtë familjet tona, shoqëria, miqësia. Na njoftuan se pallati ishte shembur dhe se familja jonë ishte nën rrënoja. Nuk kishim ende informacion nëse ishin gjallë apo vdekur. Thoja do Zoti i shpëton, ata e të gjithë ata që po përjetojnë këto momente.

Çfarë bëtë më pas? U nisët drejt Shqipërisë, e latë azilin?

Absolutisht. Po prisja minutë për minutë për të ardhur në Shqipëri. Mendoja se do të arrija gjithçka me forcat e mia, por është diçka natyrore, punë e Zotit. Falë atij jemi edhe ne të tjerët këtu. Nuk e përshkruaj dot…

Po kur morët vesh lajmin që Sajmiri u nxor i gjallë, kishit shpresë?

Absolutisht, mendova se… jo mendova, por u sigurova. Nuk po e përmendja më emrin e tij, thjeshtë po kërkoja për dy të tjerët, ose po dëgjoja edhe për të gjithë njerëzit që po mundoheshin që t’i nxirrnin nga rrënoja. Kurse unë mendoja që do ia hedhë Sajmiri, sepse ishte njeri shumë i fortë, kisha shumë shpresa tek ai. Por desh Zoti e mori me vete.

Cila ka qenë biseda e fundit që keni bërë me babain, me nënën, me Sajmirin?

Po atë natë ka qenë. Folëm si përnatë. Më tha mami që kam përcjellë nusen e vëllait bashkë me mbesën, i kam çuar të rrinë disa ditë tek njerëzit e vet.

Po tërmetin e kishin ndjerë?

Jo ishte diku nga ora 7 e gjysmë, 8.

Çfarë mund të na rrëfesh për Sajmirin?

Nuk e di, doja ta kisha këtu pranë vetes, do ta kisha një mbështetje shumë të fuqishme… nuk kam fjalë, nuk di të shprehem, jam i pafuqishëm.

Ju praktikisht keni lënë azilin, keni ardhur në Shqipëri, keni humbur 3 pjesëtarë të familje, nuk keni as banesë ku të rrini. Çfarë apeli keni sot dhe ku po rrini, ku po strehoheni?

Pas ceremonisë mortore ishim të gjithë sëbashku në Thumanë. Mendova po jetoj në Tiranë tek baxhanaku, te motra e nuses time. Po rrimë aty derisa të kontaktoj me dikë apo të lidhem me shtetin për të na strehuar, sado pak, sepse jemi shumë të tromaksur.

Ju kur keni ikur për azil?

As dy muaj nuk i kisha bërë të plota.

Po tërmetet e mëparshme keni qenë? A ka pasur dëmtime pallati juaj?

Tërmeti i parë, nuk e di në mos gaboj ka qenë në Gusht (2018). Normalisht unë kam qenë në punë gjatë ditës. Vajza ime e vogël, Klejsa dhe Ilda kanë qenë brenda në shtëpi, edhe mami. Kur ra i pari i fuqishmi normalisht kanë dalë jashtë. Janë trembur dhe shtëpia ishte copëtuar nga 400 anët e murit.

Ishte e dëmtuar?

Absolutisht, kishte dëmtime pamasë. Ky i Shtatorit, kam qenë vetë brenda. Te i pari e kam përjetuar vetë, nuk e di çfarë të të them.

Erdhën ekspertët, çfarë thanë?

Nuk e di a kanë qenë ekspertë apo çfarë, nuk e imagjinoj dot, nuk i njihnim, ose nuk u prezantuan kurrë. Erdhën panë, thanë që është i banueshëm.

Thanë që është i banueshëm, pavarësisht se apartamenti kishte dëmtime të brendshme?

Janë thjeshtë suvatime të rëna, thanë që është i banueshëm.

/tvklan.al

Një familje 4 anëtarëshe në Golem të Kavajës fle në makinë prej një jave, për shkak të panikut nga tërmeti. Dy djemtë e familjes, 10 dhe 12 vjeç nuk pranojnë të kthehen në banesë, ku përjetuan tmerrin e tërmetit të 26 nëntorit. Ndërsa i ati pret një vlerësim nga ekspertët mbi gjendjen e pallatit.

“Duam të jetojmë në një shtëpi të fortë me një bazament të fortë mos të lëvizë nga tërmeti dhe mos të tronditemi më nga tërmeti”.

Kështu e nis rrëfimin Orgeni nga Golemi i Kavajës. Pallati në të cilin banon 12 vjecari me familjen e tij është shpallur i pabanueshëm. Dy  vëllezërit Sallaku, 10 dhe 12 vjeç rrëfejnë për ABC News përjetimin e tmerrshëm të mëngjesit se 26 nëntorit.

“Mbaj mend babin që na kapi prej krahësh, ishte tepër errësirë, pashë mamin dhe babin të trembur. Ne kaluam direkt hekurat, na tha babi, dhe ne kaluam, tjetër nuk mbaj mend”.

Babai i dy djemve tregon se ata nuk mund të kthehen në shtëpinë ku kaluan moment ankthi e paniku.

Gazetarja: Keni frikë të ktheheni në shtëpi?

“As bëhet fjalë të kthehem më këtu. Siç e shikoni po flemë në makinë bashkë me nusen dhe dy fëmijë. Plus që edhe po të shkoj në shtëpi të tjera, fëmijët nuk shkojnë se janë të trembur, nuk pranojnë, vetëm në makinë rrinë”.

Bujari është njëkohësisht edhe administrator i pallatit. Ai kërkon nga ekspertët  të vendosin sa më parë çfarë do të bëhet më këtë objekt.

“Ne kërkojmë të paktën të vijnë personat kompetentë dhe të na thonë banohet në këtë pallat apo nuk banohet. Siç e shihni, ky ka marrë dëmtime në kollona, në mure, kjo është anuar në një krah, që s’ke as çfarë ti riparosh më. Jemi munduar ta përforcojmë me ca mentela por prapë është e paarritshme”.

Ky  pallat ne Golem kishte pasur dëmtime qe nga tërmeti i 21 shtatorit, por banoret i kishin  riparuar vete ato./abcnews.al