“Për të larguar kasapin e zgjedhjeve, nuk ka më Shqipëri të kuqe dhe Shqipëri blu. Më 11 Maj Shqipëria është kuqezi, e bashkuar me PD në Tiranë”, u shpreh Basha në Ballsh.

Jemi mbledhur në muzgun e tiranisë së krimit, në prag të rrëzimit të klikës më kriminale qe ka njohur vendi në 30 vjet, në muzg të rregjimit më të korruptuar. Ndonëse në këtë shesh valëviten flamuj të PD ka edhe vëllezër e motra socialist mallakstriotë që nuk kanë gjë të përbashkët me rilindjen që i braktisi dhe i mashtroi.

Edhe socialistët kanë të njëjtat halle si demokratët, paguajnë të njëjtat çmime të rritura, por janë dyfish të zhgënjyër se sollën në pushtet një njeri që e ndau pushtetin me krimin. 11 maji është parathënia për bashkimin më të madh të shqiptarëve, tek të cilët ka lindur shpresa dhe besimi se së bashku do të rrëzojmë Shqipërinë e frikës dhe do të ndërtojmë Shqipërine e shpresës.

Nuk ka më Shqipëri blu dhe Shqipëri të kuqe. Shqipëria kuqezi është bashkuar me PD. Me ne janë bashkuar edhe socialistët, që duan ta shpëtojnë vendin dhe partinë e tyre nga uzurpimii krimit. Përballë në këtë betejë është Shqipëria e shumicës, e dhunuar, e varfëruar, përballë një Shqipërie të pakicës, që pasurohet në kurriz të Europës.

Sot, në Ditën e Europës, këto dy Shqipëri të shqiptarëve të shpunësuar, të tradhëtuar dhe të një grushti njerëzish që grabisin naftën mineralet, bregdetin, nuk rrinë dot bashkë. Njëra do të qëndrojë, tjetra do të largohet. Që Shqipëria europiane të qëndrojë, duhet që Shqipëria europiane të fitojë betejën e nisur më 16 shkurt: zotër në shtëpitë tuaja nëpërmjet zgjedhjeve të lira e të ndershme. Vetëm ato do ta presin nyjen e qeverisë me krimin dhe oligarkët dhe do t’u japë shqiptarëve një qeveri, që punon për qytetarët.

Më 11 Maj në Tiranë të bashkohemi të gjithë për të larguar këta politikanë të korruptuar që janë bërë më të pasur me sheikët duke grabitur pasuritë e shqiptarëve, të realizojmë qeverinë tranzitore, pa kasapin e zgjedhjeve, pa Edi Ramën kryeministër.

Gjatë fjalës së tij para popullit të Mallakastrës, kreu i PD-së Lulzim Basha premtoi se, qeveria e ardhshme nuk do të varet nga krimi dhe kriminelët, por nga vetë qytetarët.

“Zotër të fateve tuaja, zotër në shtëpinë tuaj. Kjo është beteja jonë. Ne do ti japim fund zgjedhje me krimin që pjellin qeveri me krimin dhe pë krimin. Parlamenti dhe qeveria e ardhshme do ta keni fatin të lidhur me qytetarët. Nuk do ta kenë fatin të lidhur me Beso që i pinë naftën këtij vendi. Një kryeministër dhe 10 miq të tij kriminelë nuk mund tju mbajnë peng”, tha Basha.

Ai ftoi qytetarët në protestën e 11 Majit, që sipas tij do t’i japë fund qeverisë së kriminalizuar.

“Kjo është thirrja që buron nga Shkodra në Vlorë, nga Durrësi në Korçë “Rama ik”.  Sot jemi mbledhur në muzgun e tiranisë së krimit dhe në prag të rrëzimit të klikës së korrupsionit. Me 11 maj, ditën e shtunë, parathënia e bashkimit shqiptar më të madh në historinë e kombit shqiptar.

Janë bashkuar me demokratët edhe socialistët, që duan ta shpëtojnë partinë nga kthetrat e krimit. Pakica është pasuruar mbi gjakun e qytetarëve. Janë sulur dhe grabisin gjithçka. Beteja e nisur me 16 shkurt, ku 12 javë me vonë jemi në një Shqipëri plot me shpresë dhe me besim.

Kudo qi i hedh sytë, shoh një gjë tek njerëzit: Shoh shpresë. Ne do t’u japin fund  zgjedhjeve të krimit. Ne do ta presim nyjën që lidh krimin me politikën. Qytetarët nuk do të jenë peng i krimit dhe i oligarkëve do të jenë peng i mallkastriotëve të ndershëm dhe punëtorë, njerëzve të thjesht që duan punën dhe dinjitetin dhe për këtë do të fitojmë dhe do të qëndrojmë.

Bashkimi i juaj e zgjoi vetëdijen tuaj. Ju Mallakastra, keni një rol të veçantë se në atë mëngjes të së shtunës para protestës së 16 shkurtit, kur shqiptarët e panë Mallakastrën  e bashkuar me të  majtë dhe të djathtë.

Derdhuni në Tiranë me 11 maj për ta rrëzuar Shqipërinë e frikës dhe për ta lartësuar Shqipërinë e shpresës”, tha Basha gjatë fjalës së tij.

Kryetari i Opozitës së Bashkuar Lulzim Basha, tha nga Gjirokastra se nuk ka Evropë, pa zgjedhje të lira dhe pa futur në burg politikanët që vjedhin zgjedhjet si në vitin 2017.

Sipas Bashës, ky është edhe mesazhi që Europa ka për Ramën. “Nuk është thjesht beteja për rotacionin politik, sepse ai është i pashmangshëm, por është beteja për të drejtat dhe vlerat evropiane, duke nisur me votën e lirë. Nuk ka Europë për vendet që skanë votën e lirë dhe që qeverisen nga krimi. Nuk ka Europë në një vend që nuk respekton kriteret minimale të shtetit të së drejtës. S’ka Europë në një vend ku qeveria është bërë njësh me krimin dhe u ka dhënë oligarkëve të gjithë buxhetin e shtetit, tenderat dhe gjithçka.

Sot në këtë ditë të Europës mesazhet kanë ardhur të qarta për qeverinë e paligjshme të Edi Ramës. Mesazhi se pa u dënuar politikanët që vodhën zgjedhjet e 2017, Shqipërisë nuk i hapen negociatat. Kjo është e vërteta, dhe jo pallavrat dhe propaganda e Edi Ramës, e cila buçet nga buritë e shpuara të televizioneve kombëtare të kapura nga paratë që u vidhen shqiptarëve.

Afërmendsh, sepse pa u ndëshkuar vjedhësit e votave, si mund të kemi zgjedhje të reja të lira e të ndershme. Beteja dhe zotimi ynë i parë është transformimi politik i vendit sipas standardeve evropiane. Ne demokratët jemi të qartë e të vendosur. Në Evropë shkohet me zgjedhje të lira dhe me balancim pushteti e drejtësi të pavarur”, tha Basha.

Basha: Polici politike, çdo veprim i saj i paligjshëm

Kryetari i PD-së, Lulzim Basha, ka folur për vendimin e gjykatës që liroi nga arrestimi, ish-deputetin e PD-së, Klevis Balliu.

Në një videomesazh gjatë takimit në Gjirokastër, Basha ka deklaruar se Balliu dhe 4 banorët e Unazës së Re u arrestuan për shkak se mbrojtën qytetarët nga gazi djegës.

“Gjej rastin të ndaj me miqtë e mi për lirimin e Klevis Balliut dhe 4 të arrestuarve nga policia në mënyrë kriminale me urdhër politik me të vetmin faj, sepse mbrojtën qytetarët nga gazi djegës që iu hodhën në fytyrë nga dhuna policore.

Sot Gjykata ka konstatuar se arrestimet janë bërë mbi bazën e kallëzimeve të rreme të policisë që është një fakt tjetër që tregon sesa politike është kjo polici, sa e paligjshme është çdo veprim i saj.

Në mënyrë të paligjshme kanë ndërtuar një skenar provash fallco dhe deklarata fallcosh të policisë vetëm e vetëm për të zbatuar urdhrin politikë të Edi Ramës për të çuar në burg Klevis Balliun, një nga përfaqësuesit e lartë të opozitës të Qarkut të Korçës”, është shprehur Basha.