Luçiano BOÇI

Nga regjim monomediatik i para viteve ‘90, sot Shqipëria ka kaluar në një regjim plurimediatik.

Brenda këtij plurimediatizmi të regjimit, liria është një iluzion që mbahet gjallë e promovohet nga gazetarë të lirë, ose media alternative e kohës teknologjike që ruajnë një autonomi profesionale.

Mediat kombëtare dhe disa jokombëtare, sot diktojnë lajmin sipas afilimit politik, ose janë të diktuar në lajmin e transmetuar direkt nga zyrat e pushtetit.

Shërbimet që i ofrohen pushtetit konvertohen ne interesa dhe anasjelltas.

Në disa prej tyre, jo vetëm bëhet propagandë proqeveritare, por dhe mbillet një lloj “urrejtje” ekzemplare opozitare e mirëmenduar dhe me nota spektakolare.

Në këtë situatë është vështirë të flasësh për liri mediash.

Ajo më shumë ka formën e një servilizmi mediatik shpesh deri në pështirosje.

Vetë pushteti lundron i qetë midis favoreve që shpërndan dhe anatemimeve që bërtet për kazanë mediatikë e që i hedh sa për të ruajtur vigjilencën.

Parimi që ndjek pushteti, është ai i njohuri:

Kush kontrollon mediat kontrollon mendiet.

Mjafton të evidentosh faktin që shumë TV marrin sinjal nga kanali personal i K/M e nuk e kanë pë galje të transmetojnë me logon e tij.

Ndërkohë ERTV-ja, një “kopile” e lindur nga boshllëku ligjor dhe shkelja flagrante e ligjit, jo vetëm ka rrëmbyer atributet e RTSH publik, por dikton cdo event dhe format informimi për publikun që del nga zyra e K/M.

Në kushte të tilla, gazetarët konsiderohen nga pushteti si vasalë dhe dalja nga rreshti e disave nxit një gjuhë shantazhuese dhe kërcënuese të drejtpërdrejtë ndaj tyre.

Politikat editoriale dhe shumë formate emisionesh të rëndësishme diktohen nga kërcitja e telefonave të zyrës së propagandës.

Kronikat i nështrohen censurave të disallojta, duke nxitur në një masë marramendëse dhe autocensurën.

Gazetaria investigative si shpirti i një lirie mediatike është e pafuqishme, e panxitur, e goditur deri me armë, ose e simuluar brenda një rrethi të ngushtë interesash.

Shpesh infot në këtë drejtim, sidomos për krimin e organizuar e qeveritar, deformohen dhe devijohen, nën efektin e përfitimeve ekonomike e politike.

Sot liria mediatike mbahet gjallë nga mediat online, të cilat janë të detyruar të luftojnë me tentativat ligjore të qeverisë përtej vetërregullimit, për t’i zaptuar ato, goditur, mbyllur, ose për t’i konkuruar në mënyrë krejt të pandershme.

Disa prej këtyre mediave krijohen e financohen artificialisht, enkas si “qen lufte”, për të kafshuar ato objektivet dhe për sulmuar të vërtetat, duke mbjellë një lloj kaosi që çon lexuesin në selektivitet me natyrë autocensure.

Kjo autocensurë selektive e lexuesit i mbivendoset autocensurës së vetë gazetarit, duke mbytur kështu informimin.

Brenda këtij kaosi të gjesh lirinë është si të kërkosh gjilpërën në kashtë.

Madje figurativisht dhe kjo është futur midis lapsave më ngjyra të zyrës që komandon e dhunon lirinë e medias.

Namir LAPARDHAJA

Rrogat e mësuesve – u kandis kaposhi në një thelë…!!!

Qeveria tmerrësisht socialiste vijon talljet dhe mashtrimet me mësuesit. Me tam-tame të mëdha ajo na premtoi e na tha se do të rriste rrogat e mësuesve në masën 7%. Si mësues, pavarësisht se kishte disa vite pa lëvizur rroga fare nga vendi, e prita me entuziazëm të madh këtë lajm… Madje, për pak iu bashkova edhe unë korit të drejtorëve që falënderonin të organizuat lartgjatësinë e tij, Skënderbenë tonë, por hezitova se mo nuk ma pranonte dhe ma merrte për të madhe…

Dhe kur ja…, vjen mesazhi i hedhjes së rrogës dhe ç’të shohë…7% i qeverisë, në fakt, nuk është as më shumë e as më pak se 4% (në rastin më të mirë)…

Konkretisht, rroga ime ishte 60510 bruto, neto 50130; bëhet bruto 63169, neto 52138.
Pra, rritja është 2008…

Raporti i shtesës me atë që merrja: 2008/50130=4%…

Pra, rritja që unë do të marrë në dorë është vetëm 4%.

Mirëpo, ka edhe një përllogaritje më të keqe se kjo… Qeveria e ka detyrë ligjore që çdo vit të indeksojë rrogat sipas inflacionit të vitit të kaluar. E bëri me pensionet, duhet ta bënte edhe me rrogat e mësuesve. Duke qenë se neto rroga u rrit vetëm 4% – 2.8% të inflacionit të vitit të kaluar = 1.2 %… (Kjo analizë, ma nxjerr rritjen reale vetëm 1.2%).

Po mirë, mor zotërinj, pse gjithë kjo tallje e hapur dhe kaq e ekzagjeruar ndaj mësuesve, ndërkohë që për turpin e kësaj qeverie, pavarësisht se e shitën edhe këtë si rritje, mjekëve nuk iu rrit rroga këtë muaj.

Enver Bytyçi

Presioni që kryeministri i Shqipërisë, Edi Rama dhe presidenti i Kosovës, Hashim Thaçi, i kanë bërë kryeministrit Haradinaj është bërë temë diskutimi e replikash të ndërsjellta midis protagonistëve dhe pjesmarrësve në Samitin e Berlinit. Kryeministri I Kosovës i akuzoi publikisht të dy “vëllezërit siamezë pro serbë”, Ramën dhe Thaçin se “ata i kanë bërë më shumë presion për taksën sesa vetë Vuçiq në Berlin”! Edi Rama u përgjigj me formulën e tij standard kur i djeg e vërteta se “Askush nuk më ndalon të flas për Kosovën”! Këtë lloj formule ai e ka shpreh në publik sa herë është zënë ngushtë dhe nuk ka patur përgjigje për kritikat që i janë bërë në raportet e tij me Kosovën.

Ndërkaq e vërteta është se zoti Rama, bashkë me Hashim Thaçin dhe Baton Stanishiqin nuk flasin për Kosvën, por intrigojnë kundër saj. Nëse rendisim të gjitha deklaratat e tyre, atëherë secili do të shohë se në diskursin dhe veprimtarinë e këtyre tre protagonistëve të ndarjes së territorit të Kosovës ka vetëm intrigë, shejtanllëk, gënjeshtër, maska, mashtrime, me një objektiv të vetëm, të realizojnë me çdo kusht projektin e Beogradit për Serbinë e Madhe. Samiti i Berlinit ishte një dështim i madh për ta, por nuk e ka varrosur projektin serb të shkëmbimit të kufijve me Kosovën.

Me datën 7 maj Aleksandër Vuçiq do të jetë në Itali për të kurdisur dhe njëherë tik-taket e orës së këtij plani dhe një ditë më pas do të vijë në Tiranë, me qëllim që të rekordojë punën në koordinim me Edi Ramën. Atë ditë në Tiranë do të jenë edhe Hashim Thaçi e Baton Stanishiqi. Këta të katër do të takohen jashtë kamerave e në fshehtësi nga publiku, me qëllim që të projektojnë kundërmasat në kundërpërgjigje ndaj Berlinit. Këtu do të jemi dhe do të shohim se cila do të jetë intriga e radhës kundër Kosovës! Dhe përsëri Edi Rama do ta justifikojë intrigën e tij me formulën “Askush nuk më ndalon të flas për Kosovën”!

Këta të katër nuk do të flasin më 8-9 maj për Kosovën, por kundër Kosovës. Atyre do t’u vijë në ndihmë gjithashtu viktima tjetër e Berlinit, Frederica Mogherini, e cila do të jetë ato dy ditë në Tiranë. Prej së paku katër vitesh ata kanë folur dhe kanë vepruar ethshëm kundër saj, kundër shtetësisë së Kosovës, kundër integritetit territorial të saj, kundër institucioneve dhe kushtetutës kosovare.

Këtë punë do të vijojnë ta bëjnë edhe pas Berlinit. Të qenit kundër nuk është njëjtë me të folurit për diçka. Këta liderë, tre shqiptaro-serbë dhe një serb bashkë me Mogherinin, janë bërë bashkë jo vetëm kundër Kosovës, por edhe kundër Bosnjë-Hercegovinës, kundër Maqedonisë së Veriut, kundër Malit të Zi dhe vendeve të tjera të Europës Lindore ku jetojnë pakica të rëndësishme. Nëse ndodh me Kosovën shkohet te shpërbërja e këtyre shteteve.

Në Berlin kryeministri i Bosnjë-Hercegovinës foli hapur për rrezikun që përbën vepra antiKosovë e presidentit serb, presidentit kosovar dhe kyzeministrit shqiptar. Por edhe presioni për heqjen e taksës nga ana e Ramës dhe Thaçit e ka intrigën e vet. Baton Haxhiu e trajtonte si tragjedi përgjigjen negative të Haradinajt dhënë presidentit Macron për këtë çeshtje.

Në fakt tragjedi do të ishte nëse Haradinaj e heq taksën ndaj mallrave serbe që hyjnë në Kosovë. Në këtë çeshtje gjithashtu Kadri Veseli u shfaq në favor të kërkesës së Beogradit për heqjen ose suspendimin e taksës me pretendimin se ajo e ka kryer tashmë funksionin e saj.

E vërteta është se të gjithë këta me heqjen e taksës synojnë largimin e Haradinajt nga posti i kryeministrit. Që Vuçiq, Thaç, Rama e Baton Stanishiqi nuk duan ta shohin Ramush Haradinajn në krye të ekzekutivit të Kosovës, kjo tashmë është e provuar. Shkaku është se Haradinaj, siç shkruante Der Spiegel, pengoi planin e tjetërsimit të territorit të Kosovës.

Dhe me qëllim që ky plan të rikthehet në skenë atyre u duhet të largojnë taksën e bashkë me taksën edhe autorin e saj, Ramush Haradinajn. Kjo është intriga e radhës që Edi Rama ka përdor në Samitin e Berinit kundër Kosovës dhe kryeministrit të saj. Me një gur të vrasë dy zogj: Edhe ta realizojë projektin e penguar në Berlin të ndarjes së Kosovës, edhe të hiqet para Merkel e Macron si faktor në Ballkan, për shkak të rënies së krediteve nga kriza politike në Shqipëri.

Rama, Thaçi, Batoni janë tashmë të pabesueshëm në opinionin shqiptar. Ata duhen izoluar si mashtruesit më të mëdhenj në historinë e shqiptarisë, jo vetëm si njerëzit që punojnë më së shumti kundër Kosovës e pro Serbisë. Nisur nga faktet e shumta dhe lodhja që këta njerëz pa dinjitet e pa atdhe na kanë shkaktuar do të doja që këta të bojkotohen, të mos shihen në ekranet televizive, të mos dëgjohën se çfarë thonë, të mos ndiqen në deklarata që bëjnë, madje të mos intervistohen dhe të abondonohen edhe në rastet kur thërrasin konferenca shtypi, sepse njerëzit janë lodhur nga intrigat, mashtrimet dhe gënjeshttrat e tyre.

Tiranë, më 03.05.2019