Protestuesit në Kukës kanë çarë kordonin policor të vendosur aty, duke avancuar më tej në rrugën ku po zhvillohet protesta. Në qytetin verior, protesta po zhvillohet të Ura e Drinit në hyrje Rrugës së Kombit. Ish-deputeti i PD është stacionuar aty, duke protestuar krah qytetarëve.

Kjo është protesta e dytë në formën e mosbindjes civile e thirrur nga opozita, e cila një javë më parë bllokoi për 60 minuta 5 akse kryesore të vendit.

Opozita e bashkuar kërkon largimin e kryeministrit Edi Rama dhe krijimin e një qeverie tranzitore për garantimin e zgjedhjeve të lira e të ndershme.

Protestat që po zhvillohen në 12 qarqe të vendit kanë nisur që prej orës 18:00 dhe parashikohen të mbyllen në orën 20:00.

protestuesit në Korçë i bëjnë thirrje kryeministrit Edi Rama që të largohet, pasi në të kundërt do ta pësojë si ish-diktatori i Rumanisë, Nikolae Çaushesku.

“Kjo protestë është bërë për të përmbysur atë qenin, kriminelin, bastardin që ja ka vënë thikën në grykë të gjithë popullit. Prandaj ai të qërohet që mos e pësojë si Çaushesku”, tha protestuesja.

Mosbindjen Civile në Korçë e drejton ish-deputeti i PD-së Ervin Salianji dhe zyrtarë të tjerë të opozitës.

Mijëra qytetarë nga Elbasani i janë bashkuar kreut të opozitës Lulzim Basha në protestë.

Opozita ka bllokuar në 12 qarqe akset kryesore të rrugëve në vend, në shenjë protestë duke kërkuar largimin e kryeministrit Edi Rama, si personi përgjegjës për bashkëpunimin me krimin në blerjen e votës.

Lulzim Basha ndodhet në Elbasan, aty ku edhe e kanë pritur një numër shumë i madh protestuesish, siç shihet edhe në fotot e mëposhtme.

Kryetarja e Lëvizjes Socialiste për Integrim, Monika Kryemadhi ju është bashkuar qytetarëve që po protestojnë në ‘Plepat’ në Durrës, të cilët do të mbajnë rrugën të bllokuar për dy dorë, si shenjë ndaj pakënaqësive për keqqeverisjen.

Kryemadhi tha për mediat se Rama akoma nuk e kupton që përshkallëzimi i vërtetë i protestave dhe mosbindja civile ende nuk kanë filluar.

Ajo tha se opozita dhe qytetarët janë gati të shkojnë në pikën e fundit për t’i treguar Ramës se ai nuk mund të bëjë gjenocid mbi këtë popull.

‘Këtu është tjetërsuar vota, ka mungesë të Gjykatës Kushtetuese, ka mungesë demokracie, e cila pa liri është diktaturë. Unë do të dëshiroja mos kishte përshkallëzim proteste, do doja të shihja një reagim në PS për t’i rikthyer vlera kësaj force politike, për ti rikthyer atë në shinat e Kushtetutës.

Përshkallëzimi nuk është mirë as për PS-në as për qeverinë, por mbi të gjitha nuk është mirë as për shqiptarët. Mosbindja civile dhe përshkallëzimi i protestës akoma nuk kanë filluar, jemi ende në momentet që po i themi se ne jemi gati të përballemi për ti dhënë fund këtij gjenocidi të tmerrshëm që po u bëhet shqiptarëve.

Ne themi që nuk është e nevojshme të shkojmë atje pasi një i çmendur ka marrë peng një parti dhe disa institucione. Por ajo që është sot më e rëndësishme është që ne tu japim shqiptarëve shpresën se ky vend mund të bëhet një ditë, të cilat janë shkatërruar nga kjo qeveri.

Ajo që dua të them është se ne do të bëjmë çdo lloj proteste dhe çdo lëvizje politike për të sensibilizuar shqiptarët, por jemi gati të shkojmë edhe në pikën e fundit për t’i treguar Edi Ramës se ky popull nuk e bën atë që po ju bën ai shqiptarëve’, deklaroi Kryemadhi.

Përplasje mes protestuesve dhe policisë në rrugën e Mbrostarit në Fier, që është nga 12 pikat në të gjithë vendin ku po protestohet.

Protestuesit kanë dashur të avanconin në drejtim të urës duke çarë kordonin e policisë që janë vendosur aty. Ka pasur shtyrje mes protestuesve dhe efektivëve të policisë që kanë dnaluar avancimin e protestuesve. Situata më pas është qetësuar me qytetarët që kanë hequr dorë nga avancimi drejt urës.

Ish-deputeti i PD, Luan Baçi dhe ish-deputetja e LSI-së Kejdi Mehmetaj ndodhen mes protestuesve në Fier.

Kjo është protesta e dytë në formën e mosbindjes civile e thirrur nga opozita, e cila një javë më parë bllokoi për 60 minuta 5 akse kryesore të vendit. Opozita e bashkuar kërkon largimin e kryeministrit Edi Rama dhe krijimin e një qeverie tranzitore për garantimin e zgjedhjeve të lira e të ndershme.