Skandalet e ALUIZNI-t nuk kanë të sosur. Çdo ditë gazeta po nxjerr në pah shkeljet e kryera nga ky institucion, çka provojnë se nuk është mbajtur premtimi për rregullimin e procesit të legalizimeve dhe zgjidhjen e hallit të qytetarëve pa i vërdallisur.
Auditit të Kontrollit të Lartë të Shtetit nuk i ka shpëtuar as ALUIZNI i Sarandës, i cili, ashtu si zyrat e tjera rajonale, ka shkelje të shumta ligjore dhe ka bërë batërdi me legalizimet. Një ndër shkeljet që mund të përmendim është abuzimi me fondin limit në tendera. Sipas raportit të KLSH, ALUIZNI Sarandë nuk ka përllogaritur fondin limit për rastet kur ka pasur blerje me vlera të vogla. Po ashtu, ka patur edhe nga ato raste kur fondi limit është llogaritur pa u bërë testimi i tregut. 

“Drejtoria e ALUIZNIT Sarandë, nuk ka hartuar plan vjetor dhe nuk ka bёrё përllogaritje të fondit limit në asnjë prej 12 procedurave pёr blerjet me vlera tё vogla gjatë periudhës 2016- 30.06.2017. Fondi i prokuruar i referohet buxhetit të miratuar të institucionit. Në disa raste testimi i tregut është bërë pasi është përcaktuar fondi limit për objektin që do të prokurohet, duke mos bërë përllogaritjet e tij, veprim në kundërshtim me VKM nr. 914, datë 29.12.2014 “Për miratimin e rregullave të prokurimit publik” kreu II, neni 9, pika 1, dhe udhëzimit nr. 3, datë 27.01.2015 “Për procedurën e prokurimit me vlerë të vogël””, thuhet në raport.
Po ashtu, KLSH, ka konstatuar se në Drejtorinë e ALUIZNIT Sarandë nuk është ngritur komision për kolaudimin dhe marrjen e mallrave, punimeve dhe shërbimeve në dorëzim. “Në të gjitha procedurat mungon procesverbali i marrjes në dorëzim të mallrave ose kryerjes së shërbimit, veprime në kundërshtim me pika 42, 43, 52 dhe 60, të Udhëzimit nr. 30, datë 27.12.2011, “Për menaxhimin e aktiveve në njësitë e sektorit publik””, shtohet më tej në audit.

Batërdi me legalizimet në bregdet
ALUIZNI i Sarandës nuk ka mundur të shmangë as shkeljet me lejet e legalizimit të dhëna në bregdet. Kontrolli i Lartë i Shtetit ka vënë re sesi në 9 raste kjo zyrë rajonale ka legalizuar objekte pa respektuar distancën ligjore nga brigjet detare.
“Në 9 raste rezultoi se janë kryer legalizime të objekteve pa respektuar distancat nga brigjet, ku sipas dokumentacionit disponibël në dosje, si genplani, harta dixhitale e paraqitur, rezulton se objektet ndodhen në një distancë prej buzës së detit me pak se 100 metrash veprime këto në kundërshtim me ligjin nr. 9482, datë 03.04.2006, të ndryshuar, ligjin nr. 111/2012 “Për menaxhimin e integruar të burimeve ujore”, i ndryshuar, nenin 4, pika 8 a dhe b, VKM nr. 280, datë 01.04.2015 “Për përcaktimin e kritereve, procedurave e dokumentacionit të zbatueshëm për të kualifikuar ndërtimet pa leje, shtesat anësore dhe/ose në lartësi, në ndërtime me leje” , pika 4”, theksohet dokumentin e KLSH.
Midis skandaleve nuk mungojnë as legalizimet e objekteve në zona arkeologjike, në parqe apo në zona të mbrojtura. Për këto shkelje KLSH ka kërkuar që ALUIZNI i Sarandës të marrë masa që me plane konkrete të shqyrtojë kërkesat për të zbatuar afatet ligjore për shqyrtimin e praktikave të legalizimit me qëllim rritjen e transparencën publike dhe respektimin e ligjeve. /Agjencia e Lajmeve Sot/

Ndërsa situata politike në vend është përfshirë në kaos total politik dhe nën rrezikun e një konflikti civil, kryebashkiaku i Tiranës Erion Veliaj, po krijon edhe më shumë ndasi me parimin: “ne të mirët” dhe qytetarët opozitarë “negativët”. Por kjo platformë më shumë se e tij është nën taktikën e kryeministrit Edi Rama.
Vetë Lali Eri ka krijuar postin e “kryeministrit” të Tiranës dhe në mandatin e dytë po zotohet se nuk do lerë hapësirë të mbetur pa ngritur kulla dhe komplekse shërbimi.

Gjithnjë ndërtuesit do të jenë pesë oligarkët më të mëdhenj të vendit dhe nën rrezikun e hapur të pastrimit të parave të drogës, pas çdo objekti që lartësohet e shtrihet dhunshëm në kryeqytet.

Kryebashkiaku kryeqytetas, në rreth dy orë “shpalosje të programit” të tij për katër vitet e ardhëshme, para drejtuesit të emisionit “Opinion”, konfirmoi se do të vijojë ndërtimi i kullave në kryeqytet, do shembë përfundimisht Teatrin Kombëtar dhe do e kthejë zonën afër Liqenit Artificial në një kompleks të madh betoni me kulla shumëkatëshe.

Ndryshe nga fushata e vitit 2015, që premtoi se Tiranën nuk do e betonizonte, madje mund të vendoste moratorium për ndërtimet, që në fund doli një mashtrim i madh, këtë mandat Lali Eri e pranon hapur se edhe sipas vizionit të Ramës, ai do ndërtojë Tiranën në lartësi. Kulla, kulla, kulla dhe pallate shumëkatëshe.

Po ku do ngrihen ato? Mbi të gjitha përfshirja e parave të drogës në ndërtimin e Tiranës mbetet krimi më i madh që sot shihet si zhvillim nga sytë e Rilindjes, por e nesërmja do jetë shkatërrimi i jetës së çdo qytetari, që do detyrohet të punojë për trafikantë që fshihen si ndërtues.

Me veprimet dhe mosveprimet e tij, nëse drejtësia do ishte “e drejtë”, Lali rrezikon të dënohej me 15 vjet burgim, për akuzat: “Pastrim të produkteve të veprave penale, shpërdorim detyre, falsifikim të dokumentave dhe ndikim i paligjshëm të funksionarëve publik”.

1-Veliaj në mbështetje të trafikantëve që pastrojnë paratë në ndërtim
“Nuk rri me lacë, të burgosur apo ordinerë”. Kështu deklaroi Veliaj në emisionin “Opinion” të Blendi Fevziut. Lali Eri pranoi një të vërtetë. Ai nuk rri me trafikantë ordinerë, as me gjobaxhi të vegjël, statura e tij kërkon tjerë personazhe, pikërisht ata që sot njihen si biznesmenë janë enturazhi i tij, ndonëse e shkuara e tyre mbetet e errët në trafikun e drogës apo prostitucionit. Veliaj jeton mes grupit të oligarkëve, që nuk janë “laca të dhunshëm”, por biznesmenë që të ngrohin xhepin. Veliaj nuk rri me të fortë! Po, është e vërtetë, ai vlerëson këdo trafikant të “amnistuar”, që sot njihet si pronar ndërtimi.

I tillë është edhe Edmond Bego, një ish-i dënuar për trafik droge që me shumë lehtësi, Veliaj ia dha lejen e ndërtimit në zonën e Unazës së Re. Për më tepër, duke devijuar rrjedhën e Lumit Lanë dhe vendosur në projekt shkatërrimi mbi 200 banesa, vetëm me arsyen madhore që Bego të ndërtojë një komples të madh pallatesh, që shkon në rreth 60 milionë euro investim. Lali Eri nuk ka nevojë të rendë pas Niçeve dhe personazheve aktiv të botës së krimit, si kolegu i tij Vangjush Dako.

Por ndërsa Veliaj u pyet nëse ekziston rreziku që nëpërmjet lejeve të shumta të ndërtimit që po jepen në Tiranë të pastrohen paratë e drogës, ai ka një përgjigje epike, prej një mashtruesi patologjik. Ndonëse kreu disa lëvizje të çuditshme para përgjigjes, u shpreh se ai bashkëpunon ngushtë me prokurorinë dhe drejtorinë e pastrimit të parave për të verifikuar bilancet e kompanive fituese të ndërtimit. Megjithatë, pranoi se dikush e merr lejen dhe me pas ai ja jep me nënkontraktim një tjetër kompanie.

Pastrimi i parave të drogës është kthyer në standard nga Lali Eri, ndonëse kapet nga disa kleçka ligjore, të cilat e lejojnë një kompani që të nënkontraktojë një tjetër. Për të “kamufluar” të vertetën, ai lejet për ndërtimin e pallateve, apo kullave ua jep kompanive me “emër”, por këta të fundit, pasi marrin lejen zhvillimore për kryerjen e punimeve, nënkontraktojnë një tjetër kompani, pikërisht pas saj dyshohet se po pastrohen paratë e dyshimta të drogës, një shqetësim i ngritur nga opozita prej të paktën tre vitesh.

Nuk është rastësi që nga 2016 dhe në vijim, të gjithë kompanitë “nënkontraktore” të objekteve të madha që ndërtohen në Tiranë, janë krijuar në dy vitet e fundit dhe për më shumë nga persona krejtësisht të panjohur si pjesë e biznesit. Oligarkët e qeveritarët janë bërë njësh me “lacat e drogës”, që sot po kthehen në biznesmenë. Kjo metodë e ndjekur ka vend për akuzën: “Pastrim i produkteve të veprës penale”.

2-Shembja e Teatrit Kombëtar
“Do prishet Teatri Kombëtar dhe do hapet gara për kompaninë fituese”-tha Erion Veliaj për planin e ri 4-vjeçar. Numri një i bashkisë së kryeqytetit dha një lajm të vërtetë kur shprehet se do shembet Teatri Kombëtar, por mashtron qartësisht kur argumenton se për ndërtimin e teatrit të ri dhe të shtatë kullave pranë, do hapet garë e “ndershme” për çdo kompani ndërtimi që do të japë ofertën më të mirë.

Ajo tashmë është paracaktuar, Edi Rama dhe Erion Veliaj ia kanë premtuar kompanisë “Fusha.sh.p.k” ngritjen e kullave shumëkatëshe, në një nga zonat historike të qytetit të Tiranës, fare pranë bllokut të ministrive dhe Bashkisë së Tiranës. Në këtë rast, ka elementë të veprës penale të shpërdorimit të detyrës dhe falsifikimit të dokumentave, pasi ka tjetërsuar pronën publike, duke ia ofruar një privati në kundërshtim me ligjin.

3-Miqësia me ish-kryeprokurorin e Tiranës Petrit Fusha
“Po e kam takuar vetëm një herë, pasi më kërkonte për çështjen e celebrimit në martesën e djalit. Nuk ka asnjë lidhje hetimi i prokurorisë me këtë takim për vdekjen e Ardit Gjoklajt në Sharrë”. Kështu deklaroi Lali Eri, që edhe në këta rast ndonëse u kapërdi dy tre herë nga sikleti i një pyetje që erdhi nga qytetarët, megjithatë qe në gjendje të jepte mashtrimin aty në moment.

Kryebashkiaku u shpreh se e ka takuar për celebrimin e djalit të kryeprokurorit kryeqytetas, por ndërsa Lali Eri shijonte dasmën e madhe, familja e Ardit Gjoklajt ende ishte me lot ndër faqe, për humbjen e jetës në mënyrën më tragjike në Landfillin e Sharrës. Ai ishte vetëm 17 vjeç dhe u gjet i copëtuar nga fadromat që grumbullonin mbetjet e kryeqytetit.

Bashkia e Tiranës ishte institucioni që kishte detyrimin ligjor të kontrollonte kushtet e punës, sigurimin e punonjësve, apo verifikimin e kompanisë nëse e kishte zbatuar oase jo kontratën. U desh vdekja e 17-vjeçarit për të zbuluar se në Sharrë, “mafia e plehrave”, kishte punësuar minorenë, i paguante 250 mijë lekë të vjetra në muaj, punonin nën rrezikun e sëmundjeve infektive dhe pa asnjë kusht teknik.

Pavarësisht shkeljeve që shkonin drejtëpërdrejtë në zyrën e Veliajt, ai mundi ta mbyllë çështjen, dyshohet nëpërmjet mikut të tij Petrit Fusha, kryeprokuror i Tiranës. Dhe si “rastësisht” kompania “Fusha sh.p.k” që është në pronësi të të afërmve të ish-kryeprokurorit kryeqytetas, fiton qindra tendera të punëve të bashkisë, e mbi të gjitha i jepet leja për shtatë kulla në afërsi të Tetarit Kombëtar.

Çdo prokuror (kuptohet me pak fije ndërshmërie), këtë rast do e hetonte për akuzën: “Ushtrim i ndikimit të paligjshëm ndaj personave që ushtrojnë funksione publike”. Të gjitha akuzat bashkë, edhe me masa lehtësuese, do kapnin 15 vite dënim…, që do ishte rruga e fundit me bicikletë, në aksin Bashki-Burgu 313.
/Boldnews.al

Ministri i Brendshëm Sandër Lleshaj ka qenë sot në Shkodër për të prezantuar prefektin e ri të këtij qyteti Valdrin Pjetri.

Mirëpo ky prezantim i bërë sot, ka sjellë dhe një përballje të ministrit me kryebashkiaken Voltana Ademi, e cila ka ngritur alarmin për gjendjen e krimit në Shkodër, ku vetëm në 8 muaj ka pasur 11 viktima në atentate, të tipit mafioz, dhe në përballje mes bandave.

Në një moment që Ademi po diskutonte me drejtorin e Policisë, Ardi Veliu, ku i fundit është larguar në mënyrë demonstrative nga takimi, ndërkohë që kryebashkiakia nuk e ka fshehur zhgënjimin për këtë gjest. Ndërkohë, Veliu u shpreh se ai nuk ishte politikan, dhe refuzonte që të bënte një debat të tillë.

Ademi iu drejtua ministrit Lleshaj: Situata problem në Vlorë, Elbasan dhe kudo, por në Shkodër nuk pranohet shprehja të hanë kokat e veta. Ka rënie të turizmit mbyllje të biznesit dhe largim masiv të qytetarëve. Jam gati të bashkëpunoj pasi as policia se ben dot e vetme, ngjarjet mund të parandalohen. Unë flas me zemër dhe ofroj të gjithë bashkëpunimin tim ndaj Policisë së Shtetit, pasi mendoj se krimi nuk mund të luftohet vetëm.

Kryetari i Bashkisë së Kavajës, Isa Sakja i ka kthyer përgjigje akuzave të kryeministrit Edi Rama, i cili gjatë një vizite në Golem u shpreh se, janë lejuar ndërtime edhe në rërë.
Por sipas Sakjas, e vërteta e sulmit politik të Ramës është se, ne 2 vjet që Sakja qeveris Kavajës, është shkatërruar monopoli Rilindjes në fushën e ndërtimit.

Ai shton gjithashtu se, kryeministri ka frikë edhe nga protestat që po zhvillohen në çdo qytet të Shqipërisë.

Reagimi i kryebashkiakut të Kavajës, Isa Sakja
“Sot, Kryeministri Rama perdori nje vizite inkonjito ne Golem, duke hedhur fjale ne tym, sic e ka ne stilin e tij te konsumuar retorik, per te nxitur nje sulm politik ndaj meje. Zoti Rama, Qe ndertimi eshte nje valvule shkarkuese per punesim, kete duhet ta dish! Nen drejtimin e demokrateve, ne Bashkine e Kavajes eshte shembur monopoli i ndertimit 6-vjecar te klanit rilindas; kjo eshte e verteta. Kjo e ka shqetesuar kliken e rilindasve ne qytet, e cila uzurpoi edhe reren, edhe zhavorrin, edhe mistrite e muratoreve punetore ne Kavaje per t’ia dhene te gjitha vetem nje firme. Kjo nuk ndodh me!

Çdo propagande me prapavije te theksuar politike, retorike boshe, pa asnje argument nuk mund ta zhbeje kete te vertete. Nga shkolla e mesme e Golemit, ne shoqeri te Kryetarit te Bashkise se Durresit, (shpresoj qe zoti KM te mos e keni marre vesh vetem sot qe Golemi eshte pjese e Bashkise Kavaje), pa asnje kavajas me vete, deklarove se do te ndryshosh njje sistem te tere administrimi, sepse Bashkia Kavaje, qe e drejtojme prej vetem 2 vjetesh, nuk paska ndertuar nje konvikt qe kerkon nje investim miliona euro. Mbasi ndritet Durresin sot z. Rama dhe z. Dako ju leshuat Kavajes.

Ne fakt, nuk ka ironi me te madhe se permendja e fjales “prokurori” dhe “pallate ne rere ” ne prani te Vangjush Dakos. Sot, bashkia e Kavajës zoti Rama, mbasi mbaroi riparimet e dëmeve që bëri ” rilindja” juaj në Kavajë dhe Golem po ben tamam ato që ju nuk i bete dot. Ajo qe sot ne po bejme eshte nje park 88 000 metra katrore e një kopesht femijesh ne mes, aty ku njerezit e tu e kishin shndrruar ne nje depozite plehrash. Po bejme lulishte dhe parqe ne zonat administrative, ku ju nuk shkelet kurre! Zoti Rama duhet ta dish, se ne kushtet kur nuk investon asnje qindarke ne nje bashki vetem per arsye politike, nuk mund te pretendohen investime disa miliona euro ne nje konvikt. Eshte nonsens!

Gjithsesi, te falenderoj se sot zbuluat platformen e sulmit kunder meje, ate te ‘45-es: kundershtar politik= ne litar! E di, kete sulm e ben se ke frike nga protestat! Ke frike nga Kavaja, djemte e vajzat, burrat e grate e saj qe jane ne balle te protestave per rrezimin tend. Po te kishe me vete djem socialiste nga Kavaja, do te thoshin se une nuk jam frikacak Perkundrazi! Aty, poshte zyres tende, perballe parlamentit do te na kesh, derisa te kuptosh se ora jote mbaroi. Sa per prokurorine, ti dhe kushdo tjeter e ka deren e Bashkise Kavaje te hapur!”

“Bashkia këtu ndërton pallate në rërë, akoma sot e gjithë ditën dhe s’kanë faj përderisa sot akoma s’ka ardhur dora e prokurorisë”, do të shprehej ndër të tjera sot Rama.