Kaosi vazhdon: Theresa May ofron dorëheqjen, nëse deputetët i japin votën për marrëveshjen e Brexitit. Por DUP-i irlandeoverior thotë jo. Dhe parlamenti voton pa sukses variantet e Brexitit.

Në fund ishin të ashtuquajturit “burrat me kostume gri”, ata që sollën ndryshimin e parë të ditës. Një delegacion i konservatorëve kryesorë i thanë kryeministres të vërtetën e pakëndshme, se pjesa më e madhe e partisë e ka humbur besimin tek ajo. Theresa May ka kohë që e di këtë, por ka vazhduar të qeverisë sikur të mos kishte të bënte me të.

Prej javësh ka qarkulluar thashethemi, se deputetët e të djathtës janë të gatshëm të aprovojnë marrëveshjen që Theresa May ka bërë me BE, nëse ajo vetë jep dorëheqjen. Ajo pati ngurruar, sepse nuk donte të dëbohej nga posti prej ndjekësve të linjës së ashpër.

Të mërkurën në mbëmje ajo mori vendim ta dorëzonte shpatën. May nuk pa rrugëdalje tjetër, sepse pas humbjes së votave dhe dorëheqjes në seri të ministrave nuk ka më shumicë në qeveri.

Në një fjalim emocional të mbajtur para mbledhjes së fraksionit të konservatorëve kryeministrja deklaroi: “Unë e kam kuptuar klimën. Unë e di që ekziston dëshira për një fillim të ri dhe ndryshim udhëheqjeje”. Ajo tha se është e gatshme të largohet nga detyra, nëse deputetët i japin shumicën për marrëveshjen e Brexitit.

Salla gati sa nuk shpërtheu në të qara. Kështu tregojnë deputetët që respektuan dinitetin e May-it, ndjenjën e përmbushjes së detyrës. Krye-brexitësi Jacob Rees-Mogg vlerësoi “guximin në dalje” të saj.

Fjalë kaq miqësore fraksioni nuk ka thënë prej kohësh për kryeministren. Megjithatë nuk mund të mos vihej re optimizmi i klikës së Brexitit, që filloi garën për pasardhësin e saj.
Triumf i shkurtër i qafëgjatëve

Boris Johnson, Michael Gove, Dominic Raab kanë javë që kanë zënë pozicionet. Grupi i brexitësve të fortë dhe kundërshtarë të tjerë të kryeministres kanë votuar dy herë kundër marrëveshjes së kryeministres me BE. Por papritur ata deklarojnë se mund ta japin votën.

Jacob Rees-Mogg e argumentoi ndryshimin e qëndrimit duke thënë më mirë një gjysmë buke, se sa pa bukë fare. Pra, ai do e aprovojë marrëveshjen. Boris Johnson iu bashkua atij, po ashtu si Ian Duncan Smith dhe rebelët e tjerë.

Ditët dhe muajt e fundit ata e patën quajtur marrëveshjen “më të keqen të bërë ndonjëherë”, “kthim në vasalë”, “jelek vetëvrasës” ndezëzin e të cilit e mban në dorë BE, “e papranueshme” e kështu me radhë. Ideja se një brexitas mund të kthehet në pasardhës së Theresa May-it bëri që edhe shprehjet më të ashpra të harrohen brenda natës.

DUP hedh bombën
Vëzhguesit bënë llogaritë, që edhe pas njoftimit të fundit marrëveshja Theresa May për dalje nga BE nuk do arrinte të merrte shumicën e votave. Në votimin e dytë të bërë në mes të muajit mars, ajo pati humbur 75 vota. Nëse 20 deri 30 ndjekës të linjës së ashpër do vazhdonin të qëndronin tek Jo-ja, atëherë prapë ajo nuk do merrte vota sa duhet.

Vonë në mbrëmje DUP irlandezo-verior ndezi bombën. Ata thanë se u vjen keq, por nuk janë në gjendje të mbështesin kryeministren. Dhe përveç kësaj, ata nuk mund t’i përmbahen një çështjeje kaq vendimtare si bashkimi i Irlandës së Veriut me Britaninë e Madhe. Kështu që marrëveshja e Brexitit hidhet sërish poshtë.

Parlamenti thotë tetë herë Jo
Edhe ëndrra e parlamentit se mund t’i marrë kontrollin mbi Brexitin qeverisë, u pa që ishte vetëm iluzion. Deputetët nuk dështuan në problemet e procedurës, sepse ata mund të sillnin në tavolinë kundër vullnetit të qeverisë një seri prej tetë variantesh Brexiti.
Ata dështuan në mungesën e bashkimit midis tyre.

Megjithëse pati bisedime mbipartiake, për të marrë shumicën, në fund asnjë nga variantet e ofruara nuk u aprovua. Një Brexit edhe më i ashpër se sa pa marrëveshje nuk u pranua nga shumica e parlamentit.

Më shumë sukses pati propozimi që Britania e Madhe të vazhdojë të qëndrojë në bashkim doganor me BE. Por edhe në këtë version duheshin edhe tetë vota për të marrë shumicën. Po ashtu nuk u pranua edhe ideja e një tregu të përbashkët të brendshëm, ose ideja e një referendumi të ri.

Në Bruksel me siguri janë ngritur qimet përpjetë që britanikët nuk janë në gjendje të thonë “çfarë duan në të vërtetë”. Partitë, qeveria dhe publiku janë aq të përçarë për çështjen e Brexitit saqë çdo lloj kompromisi duket i pamundshëm. Britania e Madhe ndodhet në qorrsokak.

Brexiti i ashpër po afrohet më 12 prill, nëse shumica parlamentare nuk arrihet për të aprovuar zgjatjen deri në fund të vitit. Kjo do të thoshte që vendi duhet të marrë pjesë në zgjedhjet parlamentare europiane që mbahen në maj.

Parlamenti Evropian ka kaluar të enjten në Strasburg me 331 vota pro iniciativën e eurodeputetes, Tanja Fajon, për liberalizimin e vizave me Kosovën. Parlamenti Evropian ka kaluar iniciativën e Tanja Fajon, eurodeputete dhe raportuese për liberalizimin e vizave me Kosovën me 331 vota pro dhe 126 kundër.

Ky votim, sipas ekspertëve, nënkupton edhe vazhdimin e mbështetjes së euruparlamentarëve për liberalizimin e vizave për qytetarët e Kosovës në zonën Shengen, pra do të jetë i vlefshëm edhe në përbërjen e ardhme të parlamentit, pas zgjedhjeve që do mbahen në muajin maj.

Më parë Parlamenti Evropian e ka votuar një rezolutë që kërkonte nga vendet e BE-së heqjen e regjimit të vizave për kosovarët sipas rekomandimit të Komisionit Evropian. Rezoluta e BE-së nuk ka bindur disa ministra të Brendshëm të vendeve të BE-së për të mundësuar aprovimin në mekanizmin e fundit që do të mundësonte liberalizimin e vizave për Kosovarët.

Procesi i liberalizimit përfshin: raportimin pozitiv nga Komisioni Evropian që jep rekomandimin, se një vend i ka plotësuar kushtet që qytetarët e tyre të udhëtojnë pa viza në zonën Shengen; pas kësaj Parlamenti Evropian duhet ta kalojë këtë raport në votim dhe në fund vendimi duhet të merret edhe nga ministrat e Brendshëm të vendeve anëtare, me një shumicë të kualifikuar.

Shumica e kualifikuar duhet të plotësoj dy kushte: Shumicën e vendeve të BE-së që përfaqësojnë mbi 50 për qind të popullatës së atyre vendeve. Vendimi për qytetarët e Kosovës ka ngecur në pikën e fundit.

Votimi i fundit sipas shpjegimit të ekspertëve do ta vazhdojë vendimin e Parlamentit Evropian në mandatin e ri pas zgjedhjeve të Parlamentit Evropian. Në maj edhe raportuesja për Kosovën, Tanja Fajon edhe deputetët e tjerë do të testohen para votuesve të vendeve të tyre, duke kërkuar votën. Sipas statistikave zyrtare Sllovenia llogaritet të ketë 0.6 për qind shqiptarë që përbën një numër në mes të 6 dhe 7 mijë banorëve.

Gjatë debatit që është mbajtur dje (27.03) Komisioneri i BE-së për çështje të brendshme greku Avramopulos edhe një herë ka theksuar rëndësinë e heqjes së vizave për kosovarët, duke thënë se liberalizimi i vizave nuk duhet të bëhet vetëm për të qenë të drejtë e për të njohur punën e bërë deri tani nga autoritetet kosovare. “Kjo ka të bëjë edhe me sigurimin e stabilitetit në rajon dhe perspektiven evropiane për tërë rajonin”.

Me kërkesë të drejtpërdrejtë për liberalizim ka qenë edhe raportuesja për Kosovën, Tanja Fajon e cila ka thënë se “Kosova mbetet pika e fundit e zezë në hartën e Ballkanit Perëndimor që nuk ka liberalizim vizash. Unë pyes pse Këshilli i Evropës dhe qeveritë e vendeve anëtare të BE-së nuk e kanë mbajtur premtimin. Si Evropë po humbim kredibilitetin e qytetarët kosovarë po humbin shpresën”.

Presidenti i SHBA, Donald Trump tha se Rusia “duhet të tërhiqet” nga Venezuela. Komentet bëhen pas arritjes së personelit ushtarak rus ditët e fundit në Venezuelë.

“Të gjitha opsionet janë të hapura,” tha disa herë Presidenti Trump të mërkurën në përgjigje të pyetjes së një gazetari nëse Shtetet e Bashkuara janë të gatshme të dërgojnë trupa në terren për të hequr rusët. Presidenti shtoi se Moska është shumë e vetëdijshme për qëndrimin e SHBA.

Presidenti Trump komentoi për gazetarët në Shtëpinë e Bardhë, në prani të zonjës Fabiana Rosales, gruaja e udhëheqësit të opozitës venezueliane dhe presidentit të vetëshpallur, Juan Guaido. Ajo shkoi në Zyrën Ovale pas një takimi me zëvendëspresidentin Mike Pence.

“Shtetet e Bashkuara e shohin ardhjen e aeroplanëve ushtarakë të Rusisë këtë fundjavë si një provokim të padëshiruar,” tha zoti Pence gjatë takimit me zonjën Rosales në dhomën Roosevelt të Shtëpisë së Bardhë.

“Ne i bëjmë thirrje Rusisë sot që të ndalë të gjithë mbështetjen ndaj regjimit të Maduros dhe të qëndrojë me Juan Guaido-n, të qëndrojë me vendet e të gjithë kësaj hemisfere dhe të gjithë botës, derisa të rivendoset liria”, tha Nënpresidenti Pence.

“Sot, në Venezuelë, është liri ose diktaturë. Është jeta ose vdekje,” tha zonja Rosales. “Dhe ata që paguajnë çmimin e kësaj urrejtjeje janë fëmijët.” Ajo shtoi se fëmijët po vdesin nëpër spitale të cilat nuk kanë energji elektrike ose furnizime mjekësore të nevojshme, dhe fëmijët e tjerë po pësojnë “sepse nuk kanë ushqim”.

Shtetet e Bashkuara, së bashku me dhjetra vende të tjera, e kanë njohur zotin Guaido si president të përkohshëm të vendit, ndërsa Rusia ka mbështetur presidentin Nicolas Maduro.
Zoti Guaido, u bëri thirrje mbështetësve të protestojnë të shtunën kundër ndërprerjeve të energjisë në mbarë vendin.

Ministrat e kabinetit Maduro kanë akuzuar Shtetet e Bashkuara për sabotimin e rrjetit të energjisë elektrike, duke përfshirë një sulm me internet në digën kryesore hidroelektrike të Venezuelës.

“Tetëdhjetë përqind e popullsisë në Venezuelë nuk ka energji elektrike,” tha gruaja e zotit Guaido në Shtëpinë e Bardhë. “Ata po përpiqen të thyejnë moralin tonë. Ata duan të na zhytin në errësirë të përjetshme. Por më lejoni t’ju them se ka dritë dhe drita është këtu.”
Përpjekjet për të sjellë ndihmë humanitare në Venezuelë nga Kolumbia nuk kanë patur sukses.

“Maduro nuk lejon ndihmat,” tha Presidenti Trump të mërkurën në Zyrën Ovale. “Kemi dërguar qindra milionë dollarë ndihmë në kufi. Ai nuk lejon marrjen e ndihmës. Për të, më mirë njerëzit e tij të vdesin nga uria sesa të marrin ndihma. Nuk mendoj se kjo është gjë e mirë, as edhe politikisht, qoftë edhe nga një diktator”.

Ai shtoi se “kjo nuk duhej të ndodhte në Venezuelë”. Presidenti fajësoi administratat e mëparshme të SHBA për mos zgjidhjen e çështjes venezueliane. “Kjo është një tragjedi,” tha ai.

Presidenti shtoi se kishte “trashëguar një kaos” me Venezuelën dhe çështje të tjera të politikës së jashtme. Sipas njoftimeve, dy avionë rusë sollën të shtunën në aeroportin kryesor të Karakasit një zyrtar rus të mbrojtjes dhe rreth 100 trupa.

“Rusia ka kontrata të ndryshme që janë në proces realizimi, kontrata me karakter ushtarak teknik”, tha shërbimi i lajmeve Sputnik në pronësi të qeverisë ruse. Sipas kësaj agjencie, zyrtarët kanë shkuar në Venezuelë për të “shkëmbyer konsultime”.

Disa analistë e shohin retorikën e zotit Trump, duke i shtuar kësaj praninë e forcave ruse në Venezuelë, si diçka që e shton rrezikun e një konfrontimi atje.

“Rusët po kërkojnë të projektojnë forcë pranë Shteteve të Bashkuara, siç kanë bërë në të kaluarën, si dhe të tregojnë solidaritet dhe mbështetje për regjimin e Maduros”, thotë Michael Shifter, president i Dialogut Ndër-Amerikan, një institut studimesh transnacional. “Shtetet e Bashkuara e dinë se Rusia mund t’i japë Maduros pak osigjen dhe hapësirë për frymëmarrje por nuk ka aftësinë apo vullnetin për ta shpëtuar Venezuelën”, tha ai.

Por nëse Uashingtoni zgjedh përfundimisht alternativën ushtarake në Venezuelë, parashikon zoti Shifter, “rusët nuk do të ishin të gatshëm për ta mbrojtur Maduron.”
Analisti i tha Zërit të Amerikës se në thelb janë rangjet e larta të ushtrisë së Venezuelës që e mbajnë Maduron në pushtet.

“Administrata Trump duhet të përqëndrohet te kjo sfidë, jo duke dhënë kërcënime dhe ultimatume për gjeneralët, të cilat nuk kanë funksionuar, por duke u përpjekur të organizojnë dhe lehtësojnë negociata serioze për të arritur një marrëveshje që do t’i hapte rrugën një tranzicioni demokratik, tha zoti Shifter, i cili shtoi se “kjo sigurisht që do të ishte një detyrë e ndërlikuar dhe e vështirë, por pa këtë, vështirë të kesh shumë besim se kriza mund të zgjidhet”.