Liverpool përgatitet për një fund-sezon të mbushur me sfida të mëdha. Mohamed Salah, pasi mori “OK” nga Federata e Egjiptit për të mos luajtur në dy ndeshjet ndaj Niger dhe Nigerisë, ka vendosur të relaksohet disa ditë me familjen e tij. Në plazh…
Ylli i “reds” synon të jetë në formën optimale për këtë fazë të kampionatit, me Liverpool që synon titullin kampion në Premier League dhe është kualifikuar në çerekfinalet e Champions League. Gjithsesi, kohët e fundit nuk kanë munguar zëra se Salah mund të largohet, me Juventus që duket në “pole”.
Mesazhi i fundit i dhënë nga lojtari egjiptian ka trembur disi fansat e Liverpool. Në rërën e plazhit, Salah ka shkruar korin e famshëm të tifozerisë, “You will never walk alone” (ti asnjëherë nuk do të ecësh i vetëm). Nuk dihet nëse ky mesazh është një shenjë falënderimi për tifozët, apo një sinjal se Salah do të largohet.
Sulmuesi është krejt i vetëm në foton e postuar në plazh, me kurriz nga shkrimi në rërë, duke shëtitur. Kohet e fundit ai nuk është duke kaluar një moment të mirë me fanellën e Liverpool, pasi është kritikuar se nuk është vendimtar në ndeshjet e rëndësishme. Ndoshta ky mesazh është sinjali i parë i një lamtumire të mundshme nëse Liverpool dështon edhe këtë vit.
Salah tremb fansat e Liverpool
Mourinho “bekon” Zidane: Si ai, askush tjetër më parë!
Jose Mourinho e ka “bekuar” rikthimin e Zinedine Zidane në “Bernabeu”, duke theksuar se është njeriu i duhur për stolin e Real Madridit. Francezi u riemërua si trajneri kryesor i “Los Blancos” në fillim të këtij muaji, vetëm 10 muaj pasi kishte dhënë dorëheqjen nga i njëjti pozicion.
Pas shkarkimit të Solarit, shumë besuan se Mourinho do të kthehej aty, duke qenë se ishte pa punë, që nga largimi si trajner i Manchester United në dhjetor. Portugezi ishte trajner i të bardhëve në periudhën 2010-2013, por Florentino Perez vendosi të rikthente fituesin e trefishtë të Ligës së Kampionëve, Zidane.
Vetë Mourinho e “bekon” këtë zgjidhje. “Unë nuk mendoj se mund të flasim për karrierën e tij si trajner, ende, – tha Mourinho për “Canal Plus”. – E ka të ardhmen përpara. Sidoqoftë, për një kohë shumë të shkurtër, Zidane bëri atë që askush nuk e kishte bërë më parë, fitoi tri Liga Kampionesh radhazi.
Tani po fillon një hap të ri në karrierën e tij, duhet të ndërtojë një skuadër. Ai duhet të bëjë zgjedhje, të blejë lojtarë, t’i shesë ato, t’i aftësojë ata, t’u japë filozofinë e tij të lojës. Unë mendoj se Zidane është ndoshta personi më i mirë për atë klub”.
Amerikania që bombardoi Serbinë për 200 orë rresht!
Nga Beqir SINA – New York
Me 24 Mars 2019 Nicole Malachowski (Piloted the USA Air Force) është pilotja e parë “bombarduese” amerikane e cila sot e 20 vite më parë, pikërisht më 24 mars filloi ta gjunjëzoj Serbinë. Ajo ka marrë medalje të ndryshme nderi nga Ushtria e SHBA-ve. Ajo është shquar për përsosmëri të jashtëzakonshme në goditjen e objekteve ushtarake serbe, edhe nëpër qendra të banuara, ose afër qyteteve ku ndodheshin bazat.
Me gradën “Majore”, pilotja amerikane, Nicole Malachowski, është dekoruar me medaljet e çmimet më të larta të Ushtrisë Amerikane si “Meritorious Service Medal”, “Air Medal”, “Air Force Commendation Medal”, “Air Force Achievement Medal”, si dhe medaljen “4th Fighter Wing”s”, të cilën e ka marrë si një heroinë e madhe gjatë fushatës së bombardimeve ajrore në Kosovë, për mbrojtjen e civilëve gjatë bombardimeve.
Ajo është shquar për përsosmëri të jashtëzakonshme në goditjen e objekteve ushtarake serbe, edhe nëpër qendra të banuara, ose afër qyteteve ku ndodheshin bazat. Besohet se Nicole është një grua e guximshme dhe mjaft e aftë, e para femër amerikane në historinë 60-vjeçare të aviacionit që është pjesë e skuadronit bombardues luftarak “Pilotët e vdekjes”.
Ajo hyn kështu edhe në analet e historisë amerikane të fluturakëve, duke u renditur e suksesshme dhe me vlera të spikatura mes pilotëve burra. Deri sot pilotja numëron rreth 200 orë fluturime bombarduese në Kosovë (mars-qershor 1999 – 78 ditë) si dhe 10 ditë në Irak (prill 2003).
Forcat luftarake-ajrore amerikane (The USA Air Force) kanë gjithsej 568 femra pilote. Nga këto vetëm 71 prej tyre shërbejnë me aeroplanët fluturakë. “Unë, thotë Nicole, do të bëj detyrën, pavarësisht se mund të jem vendosur edhe në qendër të debateve, se si ka mundësi që një femër të kryejë këtë detyrë kaq të vështirë dhe me rrezik të madh për jetën” citohet të këtë thënë Pilotja amerikane, Malachowski, e cila ka kryer shkollën e mesme në vitin 1992 në Las Vegas.
Ajo thuhet se është fëmija i tretë i një familjeje të vjetër amerikane (nëna quhet Cathy dhe babai i saj Robert Ellingwood). Nicole është e martuar me pilot, edhe ai me gradën “Major”, por me origjinë polake , i quajtur Paul Malachowski.
Nicole u rreshtua në radhët e Flotës Ushtarake Ajrore të Shteteve të Bashkuara të Amerikës, në vitin 1996, pas diplomimit në Akademinë e Forcave Ushtarake Ajore, me nivelin B. S. në Management dhe më ulët French.
Më parë se të inkuadrohej në radhët e skuadroneve bombarduese të Flotës Ushtarake Ajrore të SHBA-ve, “Bubullima e zogut” (Thunderbirds), ajo shërbeu si instruktore dhe komandante me avionët luftarakë “F-15E”, në skuadronin “494th Fighter Squadron”, në bazën amerikane në Britaninë e Madhe, “RAF Lakenheath”. Këtu Nicole mblodhi rreth 1900 orë fluturime, nga këto 1700 orë fluturime me bombarduesit “F-15” dhe “F-16”.
Nicole Malachowski, nga Çikagoja, është e datëlindjes 1974 dhe njihet në SHBA si e para femër amerikane pilote me gradën “Major” dhe e para femër amerikane e seleksionuar për të shërbyer në radhët e fluturimeve luftarake në forcat ajrore “Thunderbrids, që njihen ndryshe si “Pilotët e vdekjes” apo “Bubullima e zogut”. Fluturimin e parë në qiell të hapur e ka kryer në vitin 1996. Për piloten amerikane kanë shkruar e folur jo vetëm gazetat, revistat ushtarake, por edhe gazeta e televizione të njohura në SHBA si CNN, ABC, NBC, FOXNEWS etj.
Eksperienca
Malachowski u trajnua në bazën ushtarake “Columbus Air Force Base”, në Misisipi, me fluturakët bombardues “F-15E” e më pas, në bazën Seymour Johnson Air Force Base në Karolinën ë Veriut. Prioriteti i saj ka qenë stërvitja me “Pilotët e vdekjes” (Thunderbird).
Më tej, Nicole shërben në bazën RAF Lakenheath, në Angli dhe kthehet sërish në bazën, “Seymour Johnson Air Force Base” në Karolinën e Veriut. Ajo do të shërbejë si oficere edhe në bazën “Camp Red Cloud” në Korenë e Jugut. Nicole ka marrë pjesë në krejt fushatën e sulmeve ajrore ndaj bazave e caqeve serbe në Kosovë e Serbi, si dhe në operacionin “Liria e Irakut” (Operation Iraqi Freedom).
Ajo shihet në SHBA si femra që ka bërë histori. Në muzeun e “Pionierëve të fluturimit”, hapur në Washington D.C, asaj i është rezervuar një pavijon i veçantë me fotot, videoxhirimet, shkrimet dhe kujtimet e pilotes nga Britania e Madhe, Kosova e Iraku.
Fushata e sulmeve ajrore, e cila vuri në shënjestër caqet ushtarake serbe në territorin e saj dhe në bazat e vendosura në Kosovë zgjati 78 ditë dhe përfundoi me fitoren e NATO-s. Ajo është konsideruar si lufta më e suksesshme e kohëve moderne të Aleancës Veri Atlantike, NATO.
Kosova, aty zë një vend të posaçëm, pasi atje pilotja amerikane ka kryer mëse 200 orë fluturime bombarduese gjatë fushatës së vitit 1999. Siç dihet, më 24 mars 1999, është edhe dita kur nisën sulmet ajrore kundër bazave ushtarake serbe në Kosovë dhe në territorin e Serbisë.
Sheikët e Manchester City irritohen me Hoeness: Kërko falje, ose në gjyq!
Presidenti i Bayern Munich, Uli Hoeness, duket se i ka hapur telashe vetes, pas një deklarate të ditëve të fundit. Komentet e tij mbi Pep Guardiolën dhe Manchester City, i kanë acaruar kampionët e Premier League. Duke folur në një konferencë për shtyp në Mynih, Hoeness tha:
“Miku im, Pep, më tregoi se çfarë ndodh, kur ai dëshiron një lojtar, që kushton 100 milionë euro. Ai mbledh disa video të këtij lojtari dhe fluturon për ta parë edhe sheiku. Atje konsumohet një vakt i pasur, gjatë të cilit shihen videot dhe sheiku bën gati paratë (e nevojshme për të përfunduar nënshkrimin). Ditën tjetër sheiku hap pak rubinetin e gazit (rrit çmimin) dhe i rikuperon direkt paratë”, – tha njëshi i klubit bavarez.
Këto fjalë duket se kanë zemëruar punëdhënësit e rinj të trajnerit katalanas. Sipas “Mirror”, drejtuesit e Manchester City kanë kërkuar nga presidenti i bavarezëve që të kërkojë falje, pasi ata i shohin komentet e tij si një goditje për mënyrën se si bëjnë biznes.
Një burim nga “qytetarët” i tha kësaj mediaje angleze: “Kjo ishte vërejtje e një egoisti të vetëkënaqur dhe arrogant. Ne jemi të shqetësuar, gjithashtu, sepse mund të ketë elementë të prishjes së imazhit në atë që ka thënë Hoeness”.
Çështja mendohet të ketë kaluar edhe në tavolinën e punës së ekipit ligjor të Manchester City, ndoshta për të hapur një çështje gjyqësore, nëse nga drejtuesi i “Allianz Arena” nuk mbërrin kërkim-falja publike.
Gazeta e Vatikanit: Qeveria e ka çuar vendin në një autokraci, varfëri, trafik droge dhe demontimi të demokracisë
Gazeta e përditshme e Vatikanit L’Osservatore Romano ka botuar një artikull mbi situatën politike të shkruar. Ata e vlerësojnë situatën në Shqipëri me tensionet në rritje dhe rrezikun e një valë të re të fluturimit.
Gazeta zyrtare e Vatikanit i referohet pozicioneve të ndryshme të partive për të zgjidhur krizën dhe pasojat e saj. L’Osservatorio Romano https://lnkd.in/da8W_gz thotë se megjithëse situata nuk është e krahasueshme me vitin 1997, ekziston ende një frikë që, për shkak të mungesës së sundimit të ligjit (jo gjyqësia, pra asnjë legjislaturë, administrata e korruptuar e qeverisë socialiste, shtypi kontrollohet indirekt nga shteti), një tjetër
“Rasti Shqipëria” është i afërt, së bashku me rrezikun e një valë të madhe migrimi, të ngjashme me vitin 1990. Sipas Gallup, 2017, rreth 62% duan të largohen nga Shqipëria që do të jenë rreth 1.3 milion dhe që do të bëjnë zgjedhjet e tyre ne vendet e BE.
Qeveria socialiste e ka çuar vendin në një autokraci, varfëri, korrupsion, trafik droge dhe demontimi të demokracisë gjë që ka nxjerrë forcat demokratike, PD, Lulzim Bashën, popullin shqiptar në rrugë, në një pranverë shqiptare. Është koha për një dorëheqje të qeverisë socialiste Rama dhe për zgjedhje demokratike …
Nëna e yllit të ri të Juves: Na nxori nga varfëria, lindja e tij ishte një mrekulli!
Moise Kean është lojtari i momentit në Itali, pasi shënoi dy gola njëri pas tjetrit. Të parin me Juventusin, kundër Udinese, ndërsa të dytin në debutimin si startues me kombëtaren axurre, kundër Finlandës. Tani, për të na treguar talentin e ri të futbollit italian, ka folur nëna e tij, Isabelle, e cila është intervistuar nga “Tuttosport”. Ajo zbulon edhe një detaj për lindjen e Kean.
“Giovanni lindi në vitin 1993 dhe Moise në vitin 2000. A e dini pse ne e quajmë atë të voglin e shtëpisë? Sepse lindja e tij ishte një mrekulli. Mjekët më thanë se nuk mund të kisha më fëmijë, unë bërtita dhe u luta. Natën që ëndërrova për Moise, ai “kishte ardhur” për të më ndihmuar…, sepse pas katër muajsh isha përsëri shtatzënë”.
Jeta e familjes “Kean” ndryshoi kur Moise nënshkroi kontratën e tij të parë profesionale me Juventusin: “Kishim shumë pak para në shtëpi. Ai më telefonoi gjatë natës, kur po punoja. Fillimisht u frikësova, mendova se diçka i kishte ndodhur atij, që më merrte në një orë të vonë, por më tha: mami, kam një surprizë për ty. Unë e pyeta plot ankth: Mos më thuaj që nuk ke nënshkruar me Juven. Dhe ai m’u përgjigj: Jo, mami, kam nënshkruar dhe ju nuk do të punoni më, pasi do të vini të jetoni në Torino me mua”.
Dhe në fakt, djaloshi i talentuar i nxori nga varfëria, ku po “notonin” gjithë kohës. Kjo është arsyeja pse Isabelle e falënderon Juventusin, që po punon për rinovimin e kontratës me Mino Raiola, për ta shmangur humbjen e Kean në afatin e caktuar, vitin 2020: “Juve e mirëpriti atë si një fëmijë, e bëri njeri. E ndihmoi të studionte dhe të stërvitej, e rriti atë në çdo drejtim. E bëri ky që është jo vetëm në fushë, por edhe në jetën si njeri. Klubi bardhezi ishte si babai i tij”.
Së fundi, nëna e yllit të ri të Juves dhe Italisë konfirmon dëshirën e madhe të Kean, edhe brenda katër mureve të shtëpisë, ku nuk heq dorë nga “shoku” i tij më i mirë: “I jep atij një top dhe e bën të lumtur. Moise është i palodhur. Edhe pas një dite trajnimi, ai kthehet në shtëpi dhe gjëja e parë që bën është të driblojë me topin. Problemi është se më përfshin dhe mua, më do si rivale, kur argëtohet me topin…”
Siç përmend “Tuttosport”, Juventusi po përpiqet ta “blindojë” Moise Kean, sepse xhevahirin e ri po e lakmojnë disa klube, mes të cilëve Ajax dhe Milan. Ato u interesuan edhe në janar, por trajneri Allegri kërkoi që sulmuesi i ri të qëndrojë. Sidoqoftë, gjërat mund të ndryshojnë, nëse Kean nuk merr më shumë garanci për aktivizim sezonin tjetër. Topi, me pak fjalë, kalon këtë kohë tek Allegri…
Si të kuroni bajamet e acaruara
Shumica prej nesh e ka provuar se çfarë do të thotë të të dhembin bajamet. Në të shumtën e rasteve ato shkaktohen nga sëmundje të tjera, siç është gripi ose ftohja. Megjithatë, nuk duhet të shqetësohemi, pasi mjekët popullorë e kanë gjetur kurën e kësaj sëmundjeje.
Shfaqja e bajameve zakonisht shoqërohet me dhimbje të fytit dhe skuqje të bajameve. Ndodh që mund të shkojë deri në qelbëzim të tyre,. Kur bajamet shfaqen si rezultat i gripit ose ftohjes ajo shoqërohet edhe me temperaturë. Këta të sëmurë ndihen të lodhur dhe të pafuqishëm fizikisht.
Për inflamacionin e bajameve ekzistojnë faktorë të ndryshëm. Njerëzit të prekur nga sëmundje të ndryshme, shpesh vuajnë edhe nga shfaqja e bajameve. Në të shumtën e rasteve, bajamet shkaktohen nga pirja e lëngjeve shumë të ftohta, të cilat çojnë në ftohje, grip etj.
Acarimi i bajameve
Për kurimin e acarimit të bajameve përgatitet përzierja e disa bimëve. Në një raport 1 me 1, përzihen bimët e sherbelës, këputja e arrave dhe boçet e hormoqit. Nga këto përgatitet çaji, i cili ëmbëlsohet me mjaltë sipas dëshirës.
Me çajin e përgatitur shpëlahet fyti (gargarë) për çdo 15 minuta. Një tjetër bimë që shërben për kurimin e bajameve është edhe mëllaga e bardhë. Pjesët që përdoren për këtë qëllim janë rrënjët e bimës. Pasi thahen, ato copëtohen dhe me to përgatitet çaji.
Edhe ky çaj përdoret në formë gargare për shpëlarjen e fytit. Mund të përdoret sa më shpesh, në mënyrë që edhe efekti të jetë më i shpejtë. Një tjetër mjekim për inflamacionin e bajameve është edhe përdorimi i bimës së angjinares. Angjinarja zihet mirë me gjithë gjethe.
Me lëngun e përftuar prej tyre bëhen kompresa të ngrohta nga jashtë fytit. Kjo mënyrë përdoret për çdo 20 minuta. Shpesh acarimi i bajameve mund të shoqërohet me ngjirje të zërit dhe dhimbje të fytit.
Për të sjellë sërish zërin në gjendjen e mëparshme, mjekësia popullore sjell një prej mënyrave të saj. Për këtë qëllim, merren 1 deri në 2 pika vaj dafine. Këto hidhen në shurup dhe më pas pihen. Shumë shpejt do të vihet re një përmirësim i dukshëm.
Mjalti
Sipas mitologjisë së vjetër greke, thuhet, që bleta “i ka shpëtuar” jetën Zeusit të Ri, pas një sëmundjeje, që ai pati. Zeusi ia dinte bletës, saqë për të shprehur respektin që ai kishte, e kultivoi atë edhe më tej. Megjithëse produktet e ëmbla shpesh nuk janë të rekomandueshme për shëndetin, mjalti mbetet ende ushqim i veçantë për shkak të vitaminës B, që përmban.
Mjalti ka veti kuruese dhe dezinfektuese, jo vetëm ndaj infeksioneve të bajameve, por edhe ndaj sëmundjeve të tjera. Shumë mjekë popullorë e rekomandojnë mjaltin në përzierje me bimë të tjera mjekësore siç është sherbela.
Çaji i përftuar nga zierja e bimës së sherbelës ëmbëlsohet me mjaltë sipas dëshirës. Kjo kurë vazhdon deri në përmirësim të bajameve. Mjalti këshillohet nga mjekët edhe në gërvishtje të vogla të lëkurës, pasi përmban veti dezinfektuese për plagën. Mjalti përmban 14-20% ujë, sheqer, materie azotike, vitamina. Ndërkohë që 300 gramë sheqer, mund të krahasohen me 250 gramë mjaltë.
Kamomili
Një nga bimët mjekësore, që ka gjetur edhe përdorim të shpeshtë për shërimin e disa sëmundjeve, është kamomili. Edhe në rastin e bajameve të acaruara ai mund të përdoret, duke u përgatitur me mjaltë. Masa e përftuar më pas mund të pihet në formë çaji deri në tri herë në ditë.
Ja përse miqësia e vërtetë ju bën mirë për shëndetin
A keni mik të vërtetë? A keni menduar ndonjëherë nëse ekziston ndonjë përkufizim apo diçka më shumë që e përshkruan më së miri një mik të vërtetë?
– Dëshira për t’i ndihmuar të tjerët rreth vetes;
– Ndjeshmëria dhe simpatia;
– Sinqeriteti madje edhe në situatat në të cilat njerëzit e tjerë e kanë të vështirë ta thonë të vërtetën, sidomos kur është fjala për të metat e dikujt;
– Mirëkuptimi dhe dhembshuria e ndërsjellë; aftësia për t’iu drejtuar të tjerëve kur keni nevojë për mbështetje emocionale;
– Kënaqësia për kohën e kaluar së bashku;
– Besimi;
– Reciprociteti pozitiv – marrëdhënia është e bazuar në “marrjet” dhe “dhëniet” e barabarta të të dyja palëve;
– Aftësia për të qenë ai (ajo) që është, për t’i shprehur ndjenjat dhe për të bërë gabime pa u frikësuar nga gjykimi.
Dihet se ndjenja e lidhjes me ata që i doni çon në një jetë më të lumtur. Por a e dini nëse kjo ju bën edhe të shëndetshëm?
Në fakt, për të qenë më të shëndetshëm nuk është e mjaftueshme që vetëm të hani shumë perime, të stërviteni, të flini, dhe t’i ndiqni udhëzimet e mjekut.
Shumë faktorë të tjerë kontribuojnë në shëndetin tuaj të përgjithshëm, dhe një prej tyre është miqësia.
Hulumtimet tregojnë se njerëzit me një rreth të ngushtë të miqve jetojnë më gjatë, ballafaqohen më lehtë kundër sëmundjeve të rënda, si kanceri apo sëmundjet e zemrës dhe ftohen më rrallë.
Pra, shoqërohuni me sa më shumë njerëz. Kultivoni miqësi, por mbani në mend se nuk duhet të shoqëroheni nga lakmia, por nga motive të mirëfillta dhe të sinqerta.
Peka-Ramës: Dimë kush të priti dhe të shoqëroi në spital, ku po e kërkon tani paktin të shpëtosh
Nga Çim PEKA
Qëndrimin tim personal dhe linjën editoriale të SYRI.net kurrë nuk e kam parë si luftë personale me personin Edi Rama, por me Kryeministrin Rama dhe modelin e tij të qeverisjes. Si rrjedhojë, asnjëherë nuk të jam përgjigjur personalisht, dhe i kam qëndruar larg sulmeve nën-brez.
Nuk e kam marrë personale as kur detyrove pronarin e një televizioni modest të mbyllte emisionin tim ‘Fakt’ duke më nxjerrë në rrugë të madhe. Madje, thelle-thellë të kam falënderuar, sepse ishte ajo ndërhyrje brutale e Kryeministrit kundër gazetarëve kundërshtarë (si mua u ndodhi edhe shume emisioneve dhe gazetarëve), që më detyroi të hapja portalin SYRI.net.
Sot, falë qeverisjes tënde, SYRI.net ka një audience prej 450-500 mijë vizitorë në ditë, më shumë se të gjitha mediat e qeverisë sëbashku. Në aspektin profesional, edhe për ketë të falënderoj.
Shfaqjen e shëmtuar dje në sheshin Nënë Tereza e kam ndjekur nga larg dhe pa nerv. Thjeshtë kisha një kureshtje profesionale për të parë spektaklin e kalimit të pronësisë së Partisë Socialiste nga Edi Rama tek Erion Veliaj.
Duke e ditur se spektakli i sotshëm nuk ishte hapja e fushatës elektorale për zgjedhjet lokale (pasi nuk do të ketë zgjedhje lokale), por ‘de facto’ kalimi i stafetës nga Rama tek Veliaj, më tepër prisja të shihja se si do të ishte pikënisja e Erion Velisë si lider i Partisë Socialiste. Por, jo! Sot e kishe me mua, dhe kolegët e mi.
Klithmat e pushtetit ndaj mediave që nuk janë me të dhe ndaj meje personalisht në anti-mitingun e Rilindjes i marr si një kompliment të madh profesional, dhe si motivim për të vazhduar më tej.
Por, nuk mund të rri pa t’i thënë dy fjalë ty si Edi Ramë. ‘Selamin’ që më dërgove para 7000 fytyrave të vrara e të sjella me forcë në atë shfaqje të shëmtuar, po ta kthej me ‘Selam’ përmes 500,000 lexuesve të SYRI.net. Nuk të jam përgjigjur as kur më ke dërguar sekserët e tu për të më blere.
As nuk të jam përgjigjur kur më ke kërcënuar haptazi e midis rreshtave, nëpërmjet shqiptarëve apo të huajve nën avujt e nxehtë të alkoolit në zyrën tënde. Por një gjë po të them: As nuk më blen. As nuk më shantazhon. E, as nuk më ndalon dot.
Duke qenë se kam zgjedhur të merrem me ty jo personalisht, por publikisht dhe politikisht, po të them gjithashtu se je i pashprese. Dhe nuk ta ka fajin askush. As kundërshtarët politikë. As kundërshtarët brenda partisë tënde. As kundërshtarët mediatikë. As të brendshmit e as të jashtmit.
Nëse të ka djegur se kam informuar publikun për shëndetin e Kryeministrit të vendit, unë e shoh si detyrim profesional të medias, jo vetëm këtu, por kudo në botë.
Vetëm diktatorët kanë problem bërjen publike të problemeve shëndetësore, sepse sundimin e tyre e ndërtojnë mbi frikën, dhe të qenit i sëmurë i bën vulnerabël. Ndoshta ti ke frikë të përmendin sëmundjen, se sëmundja të kujton vdekjen, por ky është problem psikik i yti.
Nuk kam zgjedhur të informoj publikun në lidhje me atë se kush të ka shoqëruar, kush të ka pritur në aeroport dhe me çfarë makine, sa kohë të është dashur për të mbërritur nga aeroporti në spital, dhe kush të ka shërbyer nga stafi mjekësor.
Jo se nuk përbën skup mediatik, por se kam ruajtur një etikë profesionale për tu përqendruar vetëm në ato elemente që I shërbejnë publikut. Madje, as nuk të kam përmendur sëmundje të tjera, që janë më të rënda se katër stenta venozë, sepse janë gjëra tepër privatë dhe të vetë-shkaktuara.
Ne të dy e dimë se ti ke prekur fundin tënd. Po ashtu dimë se nga sot ti nuk je më kryetar I Partisë Socialiste, por Erion Veliaj. Dimë edhe se me shfaqjen e sotshme të përdhunoi duke të detyruar t’ia kalosh Partinë me spektakël. Dimë edhe gjëra të tjera.
Dimë që grupi parlamentar të është ndarë në dysh. Se deputetet, disa prej ministrave, drejtorët, e shefat e policisë po vrapojnë për të gjetur pronar të ri brenda dhe jashtë partisë. A nuk janë minjtë që e ndjejnë të parët tërmetin?
Dimë që je i marrë peng nga krimi, dhe nuk të lenë të largohesh. Dimë se lidhjet e tua me krimin janë të hershme, shumë më të hershme se para se ti futeshe politikës. Dimë që ke probleme financiare ne Singapor e Hong Kong. Dhe se preferon të punosh me femra. Po ashtu, nga Delaëare në Neë Jork.
Dimë se je futur në pazare territoresh dhe se të kanë kërcënuar edhe fizikisht. Dimë se ka një duzinë shërbimesh që të njohin me dhëmbë e dhëmballë, dhe ti e di këtë. Dimë edhe që po kërkon marrëveshje. Jo me shqiptarët, por me të huajt. Marrëveshje, jo për zgjidhje politike, por për vete. Marrëveshje që nuk po e gjen në Europë, e po shikon larg në lindje.
Dimë se do të urresh veten kur të mësosh se ata që ti sot mban më afër, bash ata po të shesin. Më shumë akoma do të shesin kur të mos jesh më. Dimë se pa përjashtim të gjithë ata që po të rrinë afër, nuk e kanë prej idealizmit apo lidhjes shpirtërore me ty, por prej interesit, dhe kur të vijë momenti që tua kesh nevojën, nuk do të jenë aty për ty.
Dimë që nuk do të ikësh pa bërë dëm. Nuk e dimë sa dëm do bësh. Këtë vetëm ti e di. Dimë edhe se frikacaku dhe i ligu është më i rrezikshëm se trimi dhe i forti.
Por, si përfundim një këshillë politike dhe personale po ta jap: ke futur 37,000 kryefamiljarë në burg për rrymën elektrike, ke vjedhur miliarda dollarë me oligarkët e tu, ke marrë me dhunë prona, e ke rrafshuar qindra shtëpi, ke shkatërruar jetë, ke blerë e je shitur, dhe ja ku jemi. Gjej një zgjidhje së pari për vendin, e së dyti për veten! Sa për mua, po të them se këtu me ke!
Statistika e frikshme, 111 mijë shqiptarë lanë Shqipërinë dy muajt e parë të 2019-s
Ilir NIKOLLA
Ekziston një statistikë e thjeshtë për të analizuar flukset e lëvizjes së shqiptarëve jashtë vendit dhe për ta lidhur atë me ritmet e përgjithshme të emigrimit. Nëse në shumë muaj, balanca e shtetasve që dalin nga territori është gjithmonë më e madhe sesa numri i atyre që kthehen në atdhe, atëhere kemi të bëjmë me një largim pa kthim, me një emigracion të padeklaruar.
Edhe numrat për janarin dhe shkurtin e këtij viti vijojnë të jenë me shifra katastrofë të larta, të cilat flasin për një eksod “të qetë” nga Shqipëria. Edhe pse balanca e dhjetorit ishte sërish negative, çka do të thoshte se përralla për numrin e lartë të emigrantëve që erdhën në Shqipëri për festa nuk ishte e vërtetë, shifrat e janarit dhe të shkurtit flasin për 111 353 shtetas shqiptarë që kanë lënë vendin.
Rreth 90 mijë i përkasin vetëm janarit, ndërkohë që mbi 20 mijë është numri i atyre që kanë lënë vendin në shkurt. Asnjë justifikim lidhur me lëvizjen 90 ditëshe të shqiptarëve në zonën Shengen nuk mund të fshehë emigracionin e fshehtë që po ndodh.
Mediat e huaja flasin se shqiptarët e thyejnë viston 90 ditore dhe thjesht nuk paraqiten në zyra për të kërkuar azil (pasi është kuptuar se ai nuk jepet më), por vijojnë të qendrojnë në Gjermani, Francë, Itali e gjetkë thjesht në mënyrë të parregullt.
Këto ritme, nëse do të vijojnë të tilla, rrezikojnë të mbërrihet në shifrat biblike të 3-400 mijë largimeve në një vit. Analistët mendojnë se një valë edhe më e madhe emigrimi do të verifikohet pas qershorit, kur Shqipërisë nuk do t’i çelen negociatat e kur në vend kriza politike do të ketë mbërritur kulmin me dështimin e zgjedhjeve vendore.
Ekspertët flasin se tradicionalisht, janari dhe shkurti janë muajt më të mirë të bilancit për emigracionin, pasi në muajt e fillimit mund të kompensohen hyrjet masive për festa apo largimet për pushime. Ky kompensim ka ndodhur dhe llogaria del -111353 shtetas.
Një pyetje për Edi Ramën: Sa e pret bilancin në fund të vitit, në mënyrë që të pranojë më në fund se po, po ndodh një eksod? (Pyetja është retorike, pasi largimet Rama i sheh si bojkot ndaj opozitës e si shans për të fituar pa u lodhur zgjedhjet 99,99 përqind…në e lënshim!)
Kryesore
Continue to the category
