Presidenti rus Vladimir Putin thotë se Moska ka në plan të vërë në shenjestër Uashingtonin me armë të reja hipersonike, nëse Uashingtoni vendos raketa me rreze të mesme veprimi në Evropë.
“Rusia do të detyrohet të krijojë dhe të dislokojë armë që mund të përdoren kundër territoreve, nga të cilat vjen një kërcënim i drejtë ndaj nesh, si dhe në territore ku ndodhen qendrat vendim-marrëse,” tha zoti Putin gjatë fjalimit të 15-të mbi gjendjen e vendit para asamblesë federale të mërkurën në Moskë.
Zoti Putin i është referuar disa herë Traktatit të Armatimeve Bërthamore me Rreze të Mesme Veprimit të vitit 1987, i njohur si Traktati INF që duket se i ka ditët e numëruara. Këto komente bëhen ndërkohë që popullariteti për udhëheqësin rus është në një nivel të ulët rekord.
Presidenti Putin hodhi poshtë komentet e Uashingtonit se Shtetet e Bashkuara po tërhiqen nga ky traktat, si rezultat i mosrespektimit të termave nga Rusia. Ai fajësoi Shtetet e Bashkuara se kanë bërë akuza false kundër Rusisë, për të justifikuar vendimin e tyre për ta braktisur marrëveshjen.
“Shtetet e Bashkuara shkelën në mënyrë të drejtpërdrejtë dhe të pakamufluar rregullat e traktatit; ata kanë vendosur platforma hedhëse në Rumani prej kohësh,” tha zoti Putin, duke përsëritur një argument të ngritur shpesh nga Moska lidhur me sistemin e mbrojtjes nga raketat balistike që Shtetet e Bashkuara kanë vendosur në Rumani dhe që ka aftësinë të asgjësojë raketa kruz Tomahawk me rreze të mesme veprimi.
Shtetet e Bashkuara kanë thënë që në fillim, se sistemi është vendosur si masë mbrojtëse kundër vendeve të papërgjegjshme si Irani dhe nuk shërben për mbrojtje nga arsenali bërthamor rus.
“Rusia nuk ka në plan të dislokojë e para raketa të reja në Evropë,” shtoi zoti Putin. “Nëse Shtetet e Bashkuara do të dislokojnë raketa të reja në kontinentin evropian, ata do ta acarojnë situatën ndërkombëtare dhe do të krijojnë një rrezik të mirëfilltë për Rusinë, pasi do të kemi raketa që për 10-12 minuta arrijnë në Moskë”.
Më pas u duk se udhëheqësi rus u përpoq të vinte në lojë Shtetet e Bashkuara duke u bërë thirrje udhëheqësve amerikanë të llogarisin rrezen e veprimit dhe shpejtësinë e armëve më të avancuara të arsenalit rus.

“Kanë të drejtën të mendojnë si të duan,” tha zoti Putin, duke folur për udhëheqësit amerikanë. “Por a dinë të numërojnë? Jam i bindur se dinë të numërojnë. Atëherë, të llogarisin shpejtësinë dhe rrezen e veprimit të sistemit të armëve që po zhvillojmë ne”.
“Provat me Poseidonin, nëndetësen e telekomanduar me rreze të pakufizuar veprimi po shkojnë mirë. Nuk është thënë deri tani, por sot mund të them se brenda pranverës së këtij viti do të kemi në ujë nëndetësen e parë atomike”.
“Ne jemi gati për bisedime mbi çarmatimin, por nuk do të vazhdojmë më të trokasim mbi një portë të mbyllur,” tha më pas Presidenti Putin.
Rusia filloi të shprehte skepticizëm lidhur me traktatin dypalësh për kontrollin e armëve që para 10 vjetësh, kur zyrtarë të Kremlinit i kërkuan administratës së atëhershme të ish-presidentit George W. Bush të shikonte mundësinë e zgjerimit të traktatit për të detyruar vende të tjera që po shfaqeshin si fuqi bërthamore, si për shembull Kina, të respektonin termat e kontrollit të armëve.
Pjesa më e madhe e arsenalit bërthamor të Kinës klasifikohet si armë me rreze të mesme veprimi dhe nëse Kina do të pranonte të respektonte termat e traktatit të 1987-ës, kjo do të nënkuptonte se Pekini do të hiqte dorë nga thuajse i gjithë arsenali i tij.
Në dhjetor, kur Sekretari i Shtetit Mike Pompeo njoftoi se Shtetet e Bashkuara kishin në plan të tërhiqeshin nga traktati, ai i dha Rusisë 60 ditë afat për të dëshmuar se po respekton termat e marrëveshjes për kontrollin e armëve bërthamore, duke lënë të hapur mundësinë se Uashingtoni nuk do të tërhiqej nga traktati.
“Rusia nuk ka ndërmarrë hapat e nevojshëm për t’u kthyer brenda parametrave të traktatit në këto 60 ditët e fundit,” tha Sekretari Pompeo në një deklaratë me shkrim më 1 shkurt. “Rusia vazhdon të jetë materialisht në kundërvajtje me detyrimet për të mos zotëruar, prodhuar apo testuar një sistem raketash kruz me rreze të mesme nga 500-1000km”.
“Shtetet e Bashkuara kanë bërë përpjekje të panumërta për ta ruajtur Traktatin INF, duke komunikuar me zyrtarët rusë mbi 30 herë në afro gjashtë vjet për të diskutuar shkeljet ruse. Kemi biseduar deri në nivelet më të larta të qeverisjes,” shtoi zoti Pompeo.
Në bazë të termave të marrëveshjes origjinale INF, Moska dhe Uashingtoni janë të detyruara të zhvillojnë gjashtë muaj negociata lidhur me mospajtimet mes tyre. Nëse nuk zgjidhen këto mospajtime, kjo rezulton në tërheqje të plotë nga traktati.
Nëse Shtetet e Bashkuara dislokojnë armë të tjera në vende evropiane, Presidenti Putin paralajmëroi se Rusia do të vërë në shenjestër jo vetëm këto vende, por do të dislokojë armë të reja për të vënë në shenjestër edhe “qendrat amerikane të vendim-marrjes”.

Presidenti Donald Trump, kritikoi ashpër të mërkurën një raport se ai i kishte kërkuar ish-prokurorit të tij në detyrë për të caktuar një aleat të Trumpit në krye të një hetimi federal për paratë e paguara gjatë fushatës zgjedhore të vitit 2016 për dy gra që pretendonin se kishin marrëdhënie me zotin Trump.
Gazeta New York Times njoftoi të martën se presidenti Trump i kërkoi Matthew Whitaker të shikonte nëse ai do ta vinte hetimin në duart e Geoffrey Berman, gjykatësi amerikan për Qarkun Jugor të Nju Jorkut, të cilin e ka emëruar presidenti Trump.
“Raportimi i New York Times është i rremë,” tha Trump në Twitter. “Ata janë vërtetë ARMIQTË E POPULLIT!”
Botuesi i Nju Jork Tajmsit, A.G. Sulzberger hodhi poshtë karakterizimin e gazetës së tij nga presidenti Trump, duke thënë: “Fraza ‘armiku i popullit’ nuk është vetëm e rremë, është i rrezikshme. Ajo ka një histori të shëmtuar të përdorimit nga diktatorët dhe tiranët që kërkonin të kontrollonin informacionin publik”.
Trump kishte shkruar më herët në Twitter, “Media nuk ka qenë kurrë më e pandershme se sa është sot. Historitë shkruhen duke qënë absolutisht pa asnjë bazë. Gazetarët as nuk kërkojnë të verifikojnë faktet. Janë tërësisht jashtë kontrollit. Mjerisht, unë i mbajta shumë prej tyre në biznes. Në gjashtë vjet, të gjithë do të dalin nga biznesi!
Megjithatë, Maggie Haberman, një nga gazetaret e Tajmsit që ka punuar në këtë artikull, i tha CNN-it se pretendimi i zotit Trump se gazeta nuk e kishte kërkuar komentin e tij para se artikulli të botohej, ishte e pavërtetë.
“Kjo është një gënjeshtër,” tha ajo. “Nuk e di nëse ai e di që është gënjeshtër, apo nëse stafi i tij nuk i thotë se u munduam ta kontaktojmë”.
Trump fillimisht reagoi ndaj artikullit të martën, kur u pyet në Shtëpinë e Bardhë nëse ishte e vërtetë se ai i kishte kërkuar zotit Whitaker për të ndërhyrë në këtë rast.

Në konferencën e organizuar në Prishtinë nga Instituti RIDEA u tha se 62 % e qytetarëve të Kosovës e mbështesin dialogun Kosovë-Serbi. Por politikanët patën dallime në qëndrime lidhur me dialogun me Serbinë.
Presidenti i Kosovës, Hashim Thaçi tha të mërkurën, se “mund të ketë destabilizim të rajonit, nëse nuk ka marrëveshje me Serbinë”. Prandaj presidenti tërhoqi vërejtjen se këtë vit duhet të ketë marrëveshje Kosovë-Serbi, me garanci dhe zotimin e SHBA-së. Këtë deklaratë, presidenti e bëri gjatë një konference, “Zëri i Popullit rreth Finales së Madhe” që u organizua në Prishtinë nga Instituti Kërkimor për Çështje Evropiane dhe të Zhvillimit. Ky institut prezantoi edhe një sondazh që sipas organizatorëve “i jep përgjigje disa prej dilemave kryesore që po e karakterizojnë debatin rreth fazës finale të dialogut ndërmjet Kosovës dhe Serbisë.” Ky Institut ka organizuar të mërkurën konferencën, “Zëri i Popullit rreth Finales së Madhe” ndërmjet Kosovës dhe Serbisë, duke iu referuar kështu procesit të dialogut mes këtyre dy shteteve që ndërmjetësohet nga Bashkimi Evropian në Bruksel.
Ka ardhur koha për ta lënë prapa armiqësinë që ka prodhuar tragjedi
“Mbi një shekull kemi pasur armiqësi në raportet Kosovë-Serbi. Por, tani edhe unë besoj fuqishëm në këtë qëndrim, se ka ardhur koha për ta lënë prapa armiqësinë që ka prodhuar tragjedi të njëpasnjëshme në Kosovë, dhe për ta bërë Marrëveshjen Gjithëpërfshirëse për normalizimin e marrëdhënieve në mes të dy shteteve”, tha presidenti Thaçi, duke e bazuar konkludimin e tij në disa argumente.
Së pari, presidenti Thaçi tha se opsioni i ruajtjes së status quo-s në raportet në mes të Kosovës dhe Serbisë, i cili është mbështetur dhe ende mbështetet nga disa, është treguar i gabuar dhe i paqëndrueshëm.
“Unë mendoj se status quo-ja nuk paraqet as vendnumërim, por është kthim prapa. Në dymbëdhjetë muajt e fundit ka përkeqësim dhe regres në raportet e Kosovës dhe Serbisë. Nuk kam kurrfarë dyshimi që nëse këtë vit nuk do ta bëjmë marrëveshjen ligjërisht detyruese në mes të Kosovës dhe Serbisë, do të hyjmë në një zonë të rrezikshme të këtyre raporteve, që mund ta destabilizojnë gjithë rajonin. Pra, përvoja e vitit të fundit vetëm sa ka sforcuar bindjen time që ka ardhur koha për ta arritur këtë marrëveshjen historike në mes të dy shteteve”, tha presidenti Thaçi.

Kurti: Nuk duhet të ketë korrigjim kufiri
Qëndrimet e Presidentit Thaçi u kundërshtuan nga lideri i lëvizjes Vetëvendosja Albin Kurti, i cili vazhdon të jetë i bindur që ndërmjet Kosovës dhe Serbisë nuk duhet të ketë korigjim kufiri. Kurti thotë se, “askush nuk ka të drejtë të falë tokën e Kosovës”.”A e dini pse qytetarët nuk duan status-quo, sepse e kanë mendjen tek papunësia, varfëria. Brezi i sotëm është mjaft i pasigurt. Kundërshtimi i status-quos është me shumë kundërshtim socio-ekonomik. As dëshmorët nga varret nuk kanë të drejtë të falin tokë të Kosovës e lëre më njerëzit e gjallë. Është keq që s’ka ndodh korrigjimi me Malin e Zi, por është mirë që s’ka ndodhë korrigjimi me Serbinë si kompromis i dhimbshëm. Por, mos të shtiremi se s’kemi marrëveshje me Serbinë. Plot 33 marrëveshje gjatë dialogut Kosovë-Serbi kanë ndodhur”, tha Albin Kurti. Sipas tij, kuvendi i Kosovës duhet t’i trajtojë këto marrëveshje se sa janë përmbushur.
“Mos të harrojmë se 33 marrëveshje Kosovë-Serbi nuk ia kanë ndryshuar mendjen as një vendi të Evropës e as Kinës dhe Rusisë. Prandaj nuk është mirë që të magjepsemi për një marrëveshje të ardhshme. Ne e dimë se çfarë do Serbia. Kufizim me shqiptarët, praktikisht përmes ndarjes”, deklaroi Albin Kurti.
Propozimi i Ivica Daçiq
Për ndarje, një kufi ndërmjet serbëve dhe Shqiptarëve në fillim të kësaj jave foli edhe shefi i diplomacisë serbe, Ivica Daciq. Mediet në Serbi citojnë Daçiqin të ketë thënë se “propozimi zyrtar i Serbisë, për zgjidhjen e çështjes së Kosovës është ndarja e kufirit mes serbëve dhe shqiptarëve”. Sipas tij, “nëse kjo ide ndonjëherë do të jetë në tryezë të bisedimeve, atëherë të dyja palët do të deklarohen për të”.
Sidoqoftë, në konferencën e sotme në Prishtinë “Zëri i Popullit rreth “Finales së Madhe”, ndërmjet Kosovës dhe Serbisë, ku morën pjesë shumë figura të jetës politike dhe publike e organizuar nga Instituti Kërkimor për Çështje Evropiane dhe të Zhvillimit (RIDEA), u prezantua edhe një /sondazh, ku u tha se 62 për qind e qytetarëve mbështesin vazhdimin e dialogut në formatin aktual. Labinot Graicevci, që prezantoi hulumtimin tha se “kanë testuar tre skenarë me qytetarë duke i pyetur ata rreth marrëveshjeve të mundshme mes Kosovës dhe Serbisë

“Skenari i parë ka të bëjë me status-quon. Vetëm 16 për qind e qytetarëve të Kosovës mbështesin status-quon aktuale ndërmjet Kosovës dhe Serbisë. Skenari i dytë ka të bëjë me Asociacionin e komunave me shumicë serbe me kompetenca ekzekutive në këmbim të njohjes defakto të pavarësisë së Kosovës nga Serbia. Vetëm 10 për qind e mbështesin këtë skenar. Dhe skenari i tretë ka të bëjë me korrigjimin e kufirit ndërmjet Kosovës dhe Serbisë në këmbim të njohjes globale dhe anëtarësimit në OKB. Ky skenar ka hasur në 30 për qind mbështetje nga qytetarët e Kosovës”, tha Labinot Greiçevci, duke prezantuar hulumtimin e Institutit Kërkimor për Çështje Evropiane dhe të Zhvillimit (RIDEA).
Në debatin për një marrëveshje finale Kosovë-Serbi, ligjërisht të obligueshme janë përfshirë edhe vendet e QUINT-it. SHBA-ja mbajnë qëndrimin që do të pranojnë çdo marrëveshje, për të cilën pajtohen Kosova dhe Serbia. Mirëpo, në Bashkimin Evropian janë të ndarë rreth kësaj ideje, ku është Gjermania ajo që po e kundërshton ndryshimin e kufijve si pjesë e një marrëveshje Kosovë-Serbi.