Këshilli i Sigurimit i Kombeve të Bashkuara është mbledhur me kërkesë të Serbisë, për të diskutuar mbi vendimin e parlamentit të Kosovës për shndërrimin e Forcës së Sigurisë në ushtri të Kosovës.
Vendimi, i cili u mbështet nga Shtetet e Bashkuara, Britania dhe Gjermania, ngjalli kundërshtimin e NATO-s dhe të Bashkimit Evropian, që vlerësuan se nuk ishte koha e përshtatshme për një gjë të tillë.
Presidenti serb, Aleskandër Vuçiç, shprehu indinjatën mbi votimin e parlamentit të Kosovës, duke e quajtur veprim që rrezikon qëndrueshmërinë e gjithë rajonit. Në Beograd më parë, ai kishte sulmuar ashpër Shtetet e Bashkuara për mbështetjen e ushtrisë së Kosovës.
Ai tha në mbledhjen e Këshillit të Sigurimit se Serbia “po përballet me gjithnjë e më shumë vështirësi në Kosovë dhe jam shumë i brengosur dhe madje i frikësuar jo vetëm për popullin tim dhe Serbinë por edhe rajonin”.
Ai tha se Serbia kë bërë gjithçka për të përmbushur krejt marrëveshjet e arritura në bisedimet e ndërmjetësuara nga Bashkimi Evropian, ndërsa akuzoi Kosovën për mospërmbushjen e marrëveshjes për themelimin e Asociacionit të komunave me shumicë serbe.
Ai tha se Beogradi u ka tërhequr vërejtjen Prishtinës dhe Bashkimit Evropian se problemet duhet të zgjidhen përmes bisedimeve dhe “mos na fusni në telashe, siç janë përpjekjet për anëtarësimin në INTERPOL”.
“Dhe si kundërpërgjigje vunë tarifën për mallrat serbe. Fillimisht e bënë 10 për qind dhe kur e panë që pati efekt te popullata e vet, e ngritën në 100 për qind. Në kundërshtim me CEFTA-n dhe të gjitha parimet evropiane, duke mbytur çdo marrëveshje tregtare mes Serbisë qendrore dhe Kosovës. A mund ta imagjinoni dikë në shekullin 21 që vë taksë kundër lëvizjes së lirë të mallrave, se nuk u ka pëlqyer një vendim politik i anës tjetër?” Ata, tha ai, “rrezikuan kësisoj tërë komunitetin serb në Kosovë”.

“Por as kjo nuk ishte mjaft. Ata shpallën dëshirën për të krijuar ushtrinë e tyre”, tha ai duke e cilësuar atë si veprim në kundërshtim me rezolutën 1244 të Këshillit të Sigurimit të Kombeve të Bashkuara, madje sipas tij edhe në kundërshtim me kushtetutën e tyre, që Serbia nuk e njeh.
Presidenti i Kosovës, Hashim Thaçi, tha se ushtria e Kosovës do të jetë kontribuuese e qëndrueshmërisë në rajon dhe se vendimi për ushtrinë është i pakthyeshëm.
“Asgjë e jashtëzakonshme s’ka ndodhur në Kosovë javën e kaluar. Në fakt ajo që ndodhi ishte vendim krejt normal, i drejtë, me mision dhe qëllim. Nëse Kosova ka bërë gabim është sepse ka pritur pesë vite pa nevojë për themelimin e ushtrisë. Vendimi për ushtrinë është i vonuar e assesi i gabuar. Është i vonuar sepse kemi pritur vullnet të mirë nga ata që deri më tani nuk e treguan në raport me shtetin e Kosovës. Por tani Republika e Kosovës si shtet sovran dhe i pavarur ka marrë veprim të hapur për ushtrinë. Çka ka të jashtëzakonshme këtu? Asgjë fare”, tha ai.
Duke theksuar se kërcënimi i vetëm për rajonin “janë thirrjet irracionale për konflikt dhe luftë nga fqinji verior”, presidenti Thaçi tha se “si president dhe komandant suprem u them troç se ushtria sjell më shumë paqe dhe stabilitet. Ky hap nuk është mesazh kundër askujt. Ushtria e Kosovës nuk është dhe s’do të jetë kërcënim ndaj askujt. Është dhe do të mbetet profesionale e shumetnike. Mbi 10 për qind e ushtarëve janë nga komunitetet jo shumicë, serbë, malazezë, kroatë, turq, rom, egjiptas, ashkali e të tjerë. Do të mbrojë çdo qytetar në gjithë territorin, pavarësisht gjuhës që flasin në shtëpi”, tha ai.
Ai theksoi se themelimi i ushtrisë nuk është për të dyfishuar misionin e NATO-s në Kosovë, i cili do të vazhdojë të kujdeset për sigurinë që nga hyrja e tij në Kosovë në vitin 1999, për t’u dhënë fund mizorive të forcave serbe në Kosovë.

Kryeministrja britanike Theresa May hodhi poshtë thirrjet rreth një referendum të dytë për shkëputjen nga Bashkimi Evropian ose për të hedhur në votë alternativa të ndryshme në Parlament.
Pas një jave të trazuar, në të cilën ajo i mbijetoi një votëbesimi dhe kërkoi ndryshime të minutës së fundit në marrëveshjen e arritur me Brukselin muajin e kaluar, Kryeministrja May përballet me një bllokim të marrëveshjes në parlamentin britanik.
Në kushtet kur Bashkimi Evropian nuk është i gatshëm për lëshime, një numër në rritje politikanësh britanikë po bëjnë thirrje për një referendum të dytë. Disa nga ministrat e zonjës May thonë se kjo mund të shmanget, nëse qeveria teston me votë në parlament skenarët e ndryshëm të shkëputjes nga BE-ja.
Parlamenti është thellësisht i ndarë për çështjen Brexit. Disa nga ligjvënësit favorizojnë alternativa të ndryshme për marrëdhëniet e ardhshme me BE-në, një pjesë kërkojnë daljen pa ndonjë marrëveshje, ndërsa të tjerë janë që Britania të qëndrojë në BE.
Zonja May dhe ministrat e saj kanë hedhur poshtë në mënyrë të përsëritur rishikimin e referendumit, duke thënë se kjo do të thellonte përçarjet dhe do të ishte tradhti ndaj votuesve, të cilët e mbështetën largimin nga BE-ja me 52 për qind vota pro dhe 48 kundër në vitin 2016.
Gjendja e krijuar e shton rrezikun që Britania të largohet pa marrëveshje më 29 mars, një skenar që disa biznese druhen se mund të ishte katastrofik për ekonominë e pestë më të madhe në botë.

Presidenti Donald Trump i shtoi detaje të reja doktrinës së tij politike “Amerika e Para” në vitin 2018, me politika që synuan shkundjen e institucioneve të ngritura pas Luftës së Dytë Botërore. Korrespondentja e “Zërit të Amerikës” për çështjet e diplomacisë, Cindy Saine, hedh një vështrim rreth asaj se si po ndryshon politika e jashtme amerikane nën administratën Trump.
Kur Mike Pompeo mori detyrën e sekretarit të Shtetit në muajin maj, pas shkarkimit të Rex Tillerson-it, ai premtoi të ndihmojë agjencinë të rifitojë sigurinë si dhe të formësojë politikën e jashtme të presidentit Trump “Amerika e para”.
Në një linjë me këtë, në një fjalim përpara një publiku thellësisht dyshues evropian, zoti Pompeo tha se rendi ndërkombëtar pas Luftës së Dytë Botërore kishte “tradhëtuar si amerikanët ashtu edhe ata”.
“Kur traktatet nuk zbatohen, duhet të ballafaqohemi me shkelësit. Traktatet duhet të ndreqen ose të prishen.” tha ai.
Në funksion të këtij qëllimi, Shtetet e Bashkuara nën udhëheqjen e Presidentit Trump u larguan nga marrëveshja bërthamore me Iranin si dhe marrëveshja e Parisit mbi ndryshimet klimatike. Presidenti iu vu pas dhe një numri zyrtarësh të lartë. Për disa analistë, zoti Trump po rikrijon një ekip më të bashkuar, në mbështetje të platformës së tij.
“Aktualisht pas dy vitesh ai rrethohet me besnikë, me njerëz që janë të përkushtuar për të zbatuar vizionin e tij,” thotë Celia Belin e Institutit Brookings.
Takimi i nivelit të lartë mes presidentit Trump dhe udhëheqësit të Koresë së Veriut Kim Jong Un në Singapor qershorin e kaluar, nuk ka dhënë ende rezultate konkrete.
“Ndërsa ajo që rezultoi nga ato bisedime nuk dha shumë, nga pikëpamja e thelbit, në vetvete fakti që këto bisedime u zhvilluan, ishte një arritje mjaft e madhe” thotë Luke Coffey i “The Heritage Foundation”.
Por zoti Trump u kritikua ashpër lidhur me takimin e tij të muajit korrik me Presidentin rus Vladimir Putin. Takimi u pa nga shumë si miratim i qëndrimit të zotit Putin mbi ndërhyrjen ruse në zgjedhjet amerikane të vitit 2016.
“Pa dyshim do ta përshkruaja takimin e Presidentit Trump me Presidentin Putin në Helsinki si pikën më të ulët të politikës së jashtme, jo vetëm përgjatë këtij viti, por të administratës Trump deri më tani”.
Vrasja e gazetarit të Washington Post-it Jamal Khashoggi në konsullatën saudite në Stamboll tronditi komunitetin ndërkombëtar javët e fundit. Por ndërsa e dënoi vrasjen, zoti Trump tha se do të vazhdojë të qëndrojë me një aleat të rëndësishëm sikurse Arabia Saudite. Për disa analistë ky qëndrim dërgon mesazh të gabuar tek qeverisjet autoritare në mbarë botën.
“Ai e tha qartë se interesat ekonomikë kanë më shumë rëndësi sesa vlerat morale” Celia Belin, Instituti Brookings.
Sa i takon Kinës, vëzhguesit po përgatiten për një konflikt të mundshëm vitin që vjen ndërsa dy vendet kanë mosmarrëveshje lidhur me tregtinë, detin e Kinës së Jugut dhe sigurinë kibernetike.